لیژنەی ناوچەی بریتانیا

04/10/2026

ئەمرۆ کۆبوونەوەی لێژنەی ناوچەی بریتانیا لەگەڵ هەڤاڵانی ڕێکخراوی بێرمینگهام و کۆڤنتری کۆبوونەوە.

کۆبوونەوەیەکی هاوبەش بە بەشداری لێژنەی ناوچە و هەڤاڵانی هەردوو ڕێکخراوی بێرمینگهام و کۆڤنتری، بە مەبەستی گفتوگۆ و هەماهەنگی لەسەر بابەتە پەیوەندیدارەکانی کار و چاڵاکییەکانی ڕێکخراوەکان، بەڕێوەچوو

04/10/2026

پەیامی سەرەخۆشی

بەناوی لیژنەی ناوچەی بریتانیا

بە دڵێکی پڕ لە خەم و داخەوە، هەواڵی کۆچی دواییی خاتوو سەبری مام ئەحمەدمان وەرگرت.

خاتوو سەبری مام ئەحمەد، خاوەنی مەدالیای بارزانی نەمڕ و بەرپرسی یەکێتی ئافرەتان لە ساڵانی ١٩٧٠–١٩٧٤ بوو. هەروەها یەکێک بوو لە ئەندامە دڵسۆز، بەڕێز و ماندوونەناسی ڕێکخستنەکانی پارتیمان لە بەریتانیا، کە بە درێژایی ژیانی خۆی خزمەتی ڕێکخستن و هاوبەشانی کردووە.

کۆچی دواییی ئەو خاتووە بەڕێزە، بۆ هەموو ئەندامان و هاورێیانی ڕێکخستن و خێزان و کەسوکارانی، خەمێکی گەورەیە. بەبۆنەی ئەم ڕووداوە ناخۆشەوە، لیژنەی ناوچەی بریتانیا بە دڵێکی پڕ لە خەم و داخ، هاوخەمی و سەرەخۆشیی خۆی ئاراستەی خێزان و کەسوکارانی بەڕێز دەکات.

یاد و ناوی هەمیشە زیندوو بێت.
خوالێی خۆش و ڕۆحی شاد بێت.

01/10/2026

ڕێزدار کاك شیفا بارزانی،
کەسێکی خاوەن ڕەگ و ڕیشەی کوردایەتی و دڵسۆزییەکی ڕاستەقینە بۆ کورد و کوردایەتییە. هەوڵ و چالاکییەکانی لە دیاسپۆرا جێی ڕێز و شانازییە، هەروەها ئەمەش جێگای شانازییە کە لە هەمان کاتدا توانیویەتی پەیوەندییەکی زۆر بەهێز لەگەڵ کوردانی دیاسپۆرا بنیات بنێ و بە بوونی جەنابیانەوە کاریگەرییەکی زۆر بەهێز و دیار لە ناو رەوەندی کوردی لە دەرەوەی کوردستاندا هەبێت❤️

30/09/2026

سەرۆک بارزانی پەیامی دڵنیاکەرەوە دەدات

عرفان عەزیز

لەگەڵ کشانەوەی تەواوەتی هێزەکانی هاوپەیمانان، سەرۆک بارزانی دوو پەیامی گرنگی لەبارەی دۆخی ناوچەکەوە هەیە. یەکێک لە پەیامەکان هۆشداری بوو لەوەی، کە دوای کشانەوەی هاوپەیمانان، دەبێت ئامادەکاری بکرێت بۆ ئەوەی عێراقێکی نوێ ئامادە بێت بۆ ڕووبەڕووبوونەوەی ئاڵنگارییەکان، بەتایبەت بابەتی تیرۆر، چونکە هۆشدارییەکەی ساڵی 2011 سودی نەبوو بۆ دەسەڵاتدارانی ئەوکاتی عێراق تاوەکو بەهەندی وەربگرن. بۆیە ئێستا، دوای دەیان ساڵ لەو هۆشدارییانە و نەمانی داعش، دەبێت ئەزموونێکی نوێ بێتە ئاراوە، کە هەموولایەک ئەو قۆناغانە تێپەڕێنن کە وەکو مەترسی بۆ ناوچەکە بوون.

سەرۆک بارزانی لە دواین دیداریدا لە کەناڵی شەرقییە، زیاتر لەسەر ئەو بابه‌ته‌ قسە دەکات و دەڵێت، (مەترسیی داعش هێشتا ماوە و ئەگەری سەرهەڵدانەوە و هێرشیان هەیە. گرنگ ئەوەیە ئەم هۆشدارییە بەهەند وەربگیرێت. عێراق دەرفەتێکی زێڕینی لەبەردەمدایە، کە دووبارە ڕێککەوتنێکی ئەمنی، سەربازی، ئاسمانی، زەمینی و ئابووری لەگەڵ کوردستاندا بکات، تاوەکو چیتر سیناریۆی ڕابردوو دووبارە نەبێتەوە و داعش هێرش نەكاتەوە سەر ئەو ناوچانەی، کە دەبنە مەترسی لەسەر قۆناغی پاش کشانەوەی هاوپەیمانان.)

پەیامی دووەمی سەرۆک بارزانی، دووبارە لەبارەی قۆناغی پاش کشانەوەی هاوپەیمانانە، ئەمجارە پەیامەکە زیاتر بۆ خەڵکی کوردستان و عێراقە و دڵنیایی دەدات لە دۆخی ناوچەکە، بەو مەرجەی هەماهەنگی و هاوکاری لەنێوان هەولێر و بەغدادا هەبێت، بەم شێوەیە، (بە هەماهەنگیی تەواو لەگەڵ بەغدا و پشت بە هێزی پۆڵایینی پێشمەرگە و هێزە عێراقییەکان، ڕووبەڕووی هەر مەترسی و هەڕەشەیەک دەبنەوە.) بەجۆرێک کە ڕووبەڕووی هەر هەڕەشەیەک دەبنەوە، جا ئەم هەڕەشەیە لەژێر ناوی داعش بێت یان هەر ناوی دیکەی هاوشێوە.

ئەوەی لەم پەیامەدا زۆر گرنگە بە روونی ببینرێت، ئەوەیە کە ناوچەکە دەبێت ئامادە بێت بۆ دروستبوونی هەر سیناریۆیەکی دیکە کە مەرج نییە هەر بەناوی داعشەوە بێت، چونکە لە پەیامی سەرۆک بارزانیدا بەڕوونی لێکدانەوە بۆ ئەوە دەکرێت، کە هەڕەشە لە ناوچەکەدا مەرج نییە تەنها لە ژێر ناوی داعشدا خۆی نمایش بکات. بۆ ئەمەش، ئەركی سەرەکیی حکوومەتی عێراق ئەوەیە پەلە بکات لە جێبەجێکردنی ڕێککەوتنێکی خێرای ئەمنی لەگەڵ هێزی پێشمەرگەدا، تاوەکو ئەو (560) کیلۆمەترەی بۆشایی ئەمنییە لەنێوان هەردوولادا پڕ بکرێتەوە.

ئێستاش کە بەرەو دانان و ئامادەکاریی بودجەی 2027ی عێراق دەڕۆین، یەکێک لەو خاڵانەی وەکو گرفت ماوەتەوە لەنێوان هەولێر و بەغدادا، بابەتی ژمارەی هەناردەکردنی بەرمیلە نەوتەکانی کوردستانە، کە ئەوان داوا دەکەن کوردستان ڕۆژانە (450) هەزار بەرمیل نەوت ڕەوانە بکات. بەڵام بینیمان لە ماوەی ڕابردوودا چۆن هه‌ركاتێك گرووپە لەیاسادەرچووەکان ویستوویانە، هێرشیان کردووەتەوە سەر کێڵگە نەوتییەکانی کوردستان و هەناردەی نەوتیان ڕاگرتووە. بۆیە، ئەگەر لە ئێستاوە حکوومەتی عێراق کار نەكات بۆ کۆنترۆڵکردنی چەکی گرووپە چەکدارەکان و نەیانخاتە چوارچێوەیەکی یاساییەوە، ئەوا یەکێک لەو مەترسییانەی سەرۆک بارزانی باسی دەکات دێتە دی، ئەویش دروستکردنی جۆرێک لە نائارامی و پشێوییە کە دواجار ئەمە پێویستی بە پلانێکی تۆکمە و هەماهەنگیی تەواو لەگەڵ هەرێمی کوردستان هەیە. عێراق ئێستا وەک جاران نییە، بە هێرشێکی تیرۆریستییەوە دووبارە شەڕی ساڵی 2014 ناکاتەوە. دۆخەکە گۆڕاوە و گۆڕانکاریی گەورە لە ناوچەکەدا ڕووی داوە، نە پشتیوانانی عێراق لە ئاستی هەرێمایەتیدا وەکو خۆیان ماونەتەوە، وەک چۆن ئارەزوو و تمووحی ناوچەکانی دیکەی عێراقیش وەک جاران نییە کە خۆیان بکەنە قوربانیی سیاسەتی هەڵە لە بەغدا ده‌بێت ئه‌م جاره‌ له‌به‌غداوه‌ به‌رپرسیاریه‌تی هه‌ڵبگیرێت. هەر بۆیە، سەرۆک بارزانی بەڕوونی باس لەوە دەکات کە چەندە هەرێمی کوردستان زیانمەند بوو بەهۆی گوێنەدان بە هۆشدارییەکان كه‌ ڕه‌نگه‌ ئه‌م جاره‌ ناوچه‌كانی دیكه‌ی عێراقیش ببنه‌ قوربانی جه‌نگ.

ئەوەی دەمێنێتەوە، دوای کشانەوەی هاوپەیمانان، پەیامی سەرۆک بارزانی دڵنیاکەرەوە بوو بۆ هەموو ئەو لایەنانەی کە دەیانەوێت ئەم هەلە بقۆزنەوە بۆ هێرشکردنەسەر کوردستان. سەرۆک بارزانی بەڕوونی باس لەوە دەکات کە، (پێویستە بزانرێت لە کوردستاندا ژمارەیەکی پێویست لە پێشمەرگە و گیانفیدای وڵات هەن کە بەرگری لە خەڵک و خاکی کوردستان دەکەن و هەر دەستدرێژییەک تێکدەشکێنن. هێزی پێشمەرگەی کوردستان، کە ڕەگی لە مێژووی خەباتی ڕزگاریخوازیی کوردستاندا هەیە و زادەی خوێنی شەهیدانە، بەردەوام دەبێت.)

ئەمە باشترین پەیام و جەختکردنەوەیە لەسەر هەڵوێست و پەیامەکانی پێشووی سەرۆک بارزانی، لەوەی کە ئەم گەلە لەم ناوچەیەدا خاوەنی دۆز و قەزییەی خۆیەتی و خۆی نەبەستووەتەوە، بە هیچ هێزێکی دەرەکییەوە و بە توانای خۆی بەرگری لە مافەکانی دەکات.

30/09/2026

پەیامێك لە سەرۆك بارزانییەوە

بەناوی خودای بەخشندە و میهرەبان

هەروەک هەموو لایەک ئاگادارن، بەپێی ڕێککەوتنی نێوان هێزەکانی هاوپەیمانان و حکوومەتی عێراقی فیدڕاڵ، ئەمڕۆ 30ی ئەیلوولی 2026 دوایین ڕۆژە بۆ کۆتاییهاتنی ئەرکی هێزەکانی هاوپەیمانان لە عێراق و هەرێمی کوردستان. هاوپەیمانان لە شەڕی دژی تیرۆر و هەروەها لە گەڕاندنەوە و بەهێزکردنی سەقامگیری لە عێراقدا پشتیوانی هێزەکانی عێراق و هێزەکانی پێشمەرگە بوون.

هێزەکانی هاوپەیمانان لە ماوەی مانەوەیاندا یارمەتییەكی زۆری هێزەکانی عێراق و هێزەکانی پێشمەرگەیان دا و تەنانەت قوربانیی زۆریشیان دا. ئێستاش دوای کۆتاییهاتنی ئەرکەکەیان، ئەوە لە داهاتوودا بۆ حکوومەتی عێراق و هەرێمی کوردستان بەجێدەمێنێت کە بەپێی هەلومەرجەکان و لەپێناو پاراستنی سەقامگیریدا، ڕێککەوتنی دووقۆڵی لەگەڵ وڵاتانی هاوپەیماندا بکەن.

لێرەدا جێی خۆیەتی سوپاسی هەوڵ و ماندووبوونی هێزەکانی هاوپەیمانان بکەین، ڕۆڵیان لە تێکشکاندنی داعش و گەڕاندنەوەی سەقامگیری بۆ عێراق جێگەی پێزانین و ڕێزگرتنێکی زۆرە. هەروەها سڵاو بۆ گیانی پاکی سەرجەم شەهیدانی پێشمەرگە، هێزە عێراقییەکان و هێزەکانی هاوپەیمانان دەنێرین و یادیان هەمیشە بە بەرزی دەمێنێتەوە.

لەبارەی هەرێمی کوردستانیشەوە زۆر کەس لەڕووی پەرۆشی و هەندێکیش لەڕووی ڕق و لێکدانەوەی نادروستەوە وای بۆ دەچن کە بە نەمانی هێزەکانی هاوپەیمانان ئیدی هەرێمیش دەکەوێتە ژێر هەڕەشە و کۆتایی پێدێت. دەمەوێ خەڵکی خۆشەویستی کوردستان لەوە دڵنیا بکەمەوە کە هەماهەنگییەکی زۆر باش لەگەڵ حکوومەتی عێراقی فیدڕاڵدا هەیە بۆ بەرپەرچدانەوەی هەر جۆرە هەڕەشە و مەترسییەک، جا ئەو هەڕەشەیە لەژێر ناوی داعشدا بێت یان هەر ناوێکی تر.

هەر کەسێک و لایەنێکیش خەیالی ئەوەی هەبێت ببێتە هەڕەشە و زیان بە سەقامگیریی هەرێمی کوردستان بگەیەنێت، با بزانێت لە کوردستاندا بەقەد پێویست پێشمەرگە و قارەمان و گیانفیدای وڵات هەن کە بەرگری لە خەڵک و خاکی کوردستان بکەن و هەموو هەڕەشە و دەستدرێژییەک تێکبشکێنن. هێزی پێشمەرگەی کوردستانیش کە ڕەگی لە مێژووی خەباتی ڕزگاریخوازی کوردستاندا هەیە و زادەی خوێنی شەهیدان و فرمێسکی دایکە شەهیدانە، هەر دەمێنێتەوە. هێزی پێشمەرگەی کوردستان بە هەماهەنگیی تەواو لەگەڵ هێزەکانی عێراقی فیدڕاڵدا، ئامادەن بۆ بەرگری، پاراستنی سەقامگیریی وڵات و نەهێشتنی هەموو جۆرە هەڕەشە و مەترسییەک.

مسعود بارزانی

30ی ئەیلوولی 2026

26/09/2026

بيرمينكهام / بهريتانيا
٢٦/٠٩/٢٠٢٦

پەیوەندی‌کردنی دەیان گەنجی نوێ بە ڕیزەکانی پارتی دیموکراتی کوردستان لە بەریتانیا

بە پەیوەندی‌کردنی دەیان گەنجی نوێ بە ڕیزەکانی پارتی دیموکراتی کوردستان لە بەریتانیا، کادێرانی پاریی بەخێرهاتنیان کردن بۆ ناو ڕیزی کوردایەتی.

هەڤاڵان کاک سەردار بەرواری، بەرپرسی ڕێکخراوی پارتی لە بیرمینگهام، کاک عومەر والی و کاک ڕەشید زیباری، هەروەها هەڤاڵانی نوێ کاک نازم محەمەد جەلال و کاک ئەیوب محەمەد جەلال، کە هەردووکیان گەنجانی شاری هەولێرن و لە بیرمینگهام دەژین، بەخێر و خۆشحاڵی بەشدار دەبن لە ڕیزەکانی پارتی دیموکراتی کوردستان.

بە هیوای سەرکەوتن و بەردەوامی لە خزمەتکردن بە کورد و کۆمەڵگەی کوردی لە بەریتانیا

15/09/2026

پەیامی سەرەخۆشی

بە ناوی لیژنەی ناوچەی بریتانیا، بە دڵێکی پڕ لە خەم و داخەوە، هاودەردی و سەرەخۆشیی خۆمان پێشکەش دەکەین بە دکتۆر هیمن هەورامی و کاک هەردی هەورامی و هەموو ئەندامانی خێزان و کەس و کاری بەڕێزیان، بەهۆی کۆچی دوایی دایکی بەڕێزیان.

ئەم هەواڵەی کۆچی دوایی بە داخ و خەمێکی گەورەوە پێمان گەیشت و بە دڵێکی پڕ لە خەم لەگەڵتان هاودەردین. بێگومان کۆچی دایکی خۆشەویست زۆر قورس و پڕ لە ئازارە، بەڵام هیوا دەخوازین یاد و بیرەوەرییە جوانەکانی ئەو دایکە بەڕێزە هەمیشە مایەی دڵخۆشی و ئارامی بێت بۆ هەموو ئەندامانی خێزان.

لەو ساتە سەخت و ناخۆشەدا، لیژنەی ناوچەی بریتانیا خۆی بە بەشدار لە خەم و پەرۆشییەکەتان دەزانێت و لە خودای گەورە داوا دەکەین کە بە ڕەحمەت و بەخشینی خۆی مامەڵەی لەگەڵ ئەو کۆچکردووە بکات، شوێنی بەهەشتی بێت و گۆڕەکەی پڕ لە ڕووناکی و ئارامی بکات.

هەروەها داوا لە خودای گەورە دەکەین کە بە دکتۆر هیمن هەورامی، کاک هەردی هەورامی و هەموو خێزان و کەس و کاری بەڕێزیان ئارامیی دڵ، توانای خۆڕاگری و سەبری جەمیل ببەخشێت و لەم خەمە گەورەیەدا یار و یاوەریان بێت.

جارێکی تر، بە ناوی لیژنەی ناوچەی بریتانیا، بە گەرمی سەرەخۆشیی خۆمان پێشکەش دەکەین و دەڵێین:

خوا لە کۆچکردووە خۆش بێت، ڕووحی شاد و یاد و ناوی هەمیشە زیندوو بێت.
خوا سەبری جەمیل و دڵێکی ئارام بە هەموو خێزانەکەی ببەخشێت.

لەگەڵ ڕێز و هاودەردییەکی زۆرەوە،
لیژنەی ناوچەی بریتانیا

12/09/2026

پەیامی سەرۆك بارزانی لە ساڵیادی هەڵگیرساندنی شۆڕشی ئەیلوول

ئەمڕۆ شەست و پێنج ساڵ بەسەر هەڵگیرسانی شۆڕشی مەزنی ئەیلوولدا تێدەپەڕێت؛ شۆڕشێکی سەرتاسەری کە تێیدا پێشمەرگە، سیاسی، ڕێکخستنەکان، زانایانی ئایینی، مامۆستایان، ئەدیبان، ڕۆشنبیران، گەنجان، ئافرەتان و سەرجەم چینوتوێژەکانی کۆمەڵگە بەشدارییان لە خەباتی نەتەوەیی و دیمۆکراسیخوازیی گەلەکەیاندا کرد.

شۆڕشی ئەیلوول هەڵقوڵاوی ئیرادە، باوەڕبەخۆبوون و شکۆی مرۆڤی کوردستانی بوو؛ بناغەیەکی پتەو و ڕێکخراو بوو بۆ بەردەوامیی تێکۆشان و وەستانەوەی گەلی کوردستان لە بەرامبەر زۆرداریدا. ئەم شۆڕشە مەزنە، بە بەها بەرزەکانی و بە پێداگری و خۆڕاگریی بێوێنەی سەرکردایەتی، پێشمەرگە و جەماوەر، دۆزی ڕەوای گەلەکەمانی بە هەنگاوی گەورە بەرەو پێشەوە برد. شۆڕشی ئەیلوول لەژێر ڕابەرایەتیی بارزانیی نەمردا، بووە سەرچاوەی هێز و ئیلهامبەخش بۆ قۆناغەکانی دواتری خەباتی ڕزگاریخوازیی گەلەکەمان و خەباتگێڕانی کورد لە تەواوی پارچەکانی دیکەی کوردستاندا.

لە شەست و پێنجەمین ساڵیادی ئەم شۆڕشە شکۆدارەدا، پێزانینی خۆم بۆ ڕۆڵی مێژوویی تەواوی ئەو پێشمەرگە و خەباتکارە قارەمانانە دووپات دەکەمەوە کە بەشدارییان لە تۆمارکردنی ئەم سەروەرییە نیشتمانییەدا کردووە؛ چ ئەو شەهیدە نەمرانەی لە شۆڕشی ئەیلوولدا گیانی خۆیان بە خاکی نیشتمان بەخشی و ئەوانەی لە ژیاندا نەماون، چ ئەو ڕۆڵە سەربەرزانەی کە تا ئێستاش وەک شایەتحاڵی زیندووی مێژوو لە ژیاندا ماون. ئەو قارەمانانە هەوێنی دروستکردنی سەروەری بوون بۆ گەلەکەیان و جێگەی شانازین.

مسعود بارزانی

11/09/2026