20/01/2026
嚴厲譴責工黨政府無視九次示威反對 強行通過中國超級大使館計劃
(English Version in Comment Section)
列斯手足連線嚴厲譴責工黨政府無視當地居民、在英港人，以及其他受中共打壓族群與關注人權人士嘅強烈反對，仍然強行通過興建中國超級大使館嘅決定。
事件先後經歷市議會及警方提出反對意見，加上港人九次走上街頭，社會上嘅反對聲音清晰堅定。然而，工黨政府仍然一意孤行，強行通過有關計劃。呢個決定唔單止係對民主程序嘅踐踏，更係對所有受中共打壓族群嘅徹底背叛，完全無視英國國民嘅安全同尊嚴。
呢座所謂嘅中國超級大使館，從來都唔係普通外交設施，而係一個具高度政治風險、涉及國家安全問題，並對異見社群構成實質威脅嘅象徵。可憐英國政府甘願對中共搖尾乞憐，只為首相日後訪華向北京送上一份「政治大禮」。
我哋必須重申，興建中國超級大使館存在眾多弊處：
1️⃣ 中國政府多年嚟被揭發喺海外進行跨境鎮壓、監控同滋擾異見人士。批准一座規模龐大、用途不透明嘅大使館，唔單止加劇英國居民嘅恐懼，更直接構成英國本土安全風險。
2️⃣ 大使館選址鄰近關鍵通訊及數據基建，包括數據電纜設施，涉及情報蒐集同通訊安全；面對一個心懷不軌嘅政權，資訊外洩風險難以估計。
3️⃣ 隨住越多中共人員獲得外交豁免權，其行動幾乎完全無法受到有效監管，英國隨時淪為「冇掩雞籠」。
更諷刺嘅係，工黨政府一邊聲稱重視人權同法治，另一邊卻選擇相信一個已經徹底撕毀《中英聯合聲明》、摧毀香港自由與法治嘅政權。對港人而言，呢種「相信」令人心寒。
我哋必須再次強調，中國超級大使館唔只係影響在英港人、藏人、維吾爾人以及中國異見人士嘅日常安全，而係直接關乎外交風險及英國本土嘅國家安全。政府今日嘅決定，清楚表明只要有「外交利益」，國民嘅安全同聲音就可以被犧牲。
我哋唔會因為政府嘅決定而噤聲。抗議唔會停止，監察唔會停止，追究責任亦唔會停止。歷史已經證明，沉默只會助長打壓；企出嚟，先係我哋保護自己、守住尊嚴嘅唯一方法。居民即將以司法覆核挑戰政府呢個決定，我哋懇請所有在英港人繼續關注事件，並資助及支持居民嘅行動。
居民司法覆核集資： https://gofund.me/9fd702135
一人一信炸爆MP信箱：
透過以下網站得知你嘅MP，再一人一信炸爆佢信箱，話俾佢知民意所向！
https://members.parliament.uk/FindYourMP
