20/07/2025
Koreen Jiddugalaa KFO Walgahii Isaa Xumure; Akeekkachiisa Cimaa fi Filannoo 2018'f Ulaagaalee Murteessoo Kaa'e
=======
FINFINNEE, Itoophiyaa – Adoolessa 13, 2017 ALI – Koreen Giddugaleessaa Kongireesii Federaalawaa Oromoo (KFO) walga'ii idilee guyyaa lamaaf turee fi murteessaa ta'e har'a xumuruun, ibsa bal'aa baaseera. Ibsichi rakkoolee biyyattii keessa jiran kanneen gadifagoo ta'an qorachuun, kallattii fuulduraa bu'uura jedhu kaa'eera. Paartichi, "biyyi karaa qaxxaamuraa irra jirti; filannoon jiru 'haaromsa dimokraatawaa yookiin diigamsa biyyaa' ti" jechuun akeekkachiiseera.
Koreen giddugaleessaa, guyyaa jalqabaa cimina dandeettii keessoo irratti erga xiyyeeffatee booda, guyyaa xumuraa isaa haala biyyaalessaa yaaddessaa ta'e gamaaggamuu irratti dabarse. Ibsi walga'icha irraa bahes, waggoottan torban darban "yeroo abdii qusaasame" kanneen rakkooleen siyaasaa, nageenyaa fi diinagdee wal-utubuun gara badiitti geessan ta'uu isaa ibseera. KFO'n kufaatii kanaaf sababa guddaan, sirna federaalizimii sab-daneessaa irratti haleellaa sirnaawaa raawwatamuu fi karaaleen nagaa hunduu cufamuu isaanii ti jedheera.
Ijoon murtoo paartichaa, filannoo biyyaalessaa bara 2018 dhufu irratti ejjennoo ulaagaadhaan hidhame qabaachuu isaati. KFO'n "adeemsa siyaasaa burkutaayeef" fudhatama akka hin laanne ibsuun, dimokraatummaafi amanummaan filannichaas kan mirkanaa'u yoo mootummaan "sirreessa bu'uuraa" gaggeesse qofa ta'uu isaa cimsun dubbateera.
Gaaffileen murteessoo paartichi dhiyeesse keessaa muraasni:
1/Oromiyaa fi naannoo Amaaraa keessatti waraanni battalumatti, to'annoo idil-addunyaatiin akka dhaabbatu, itti aansuunis mariin siyaasaa hunda-hammataa akka gaggeeffamu.
2/Hidhamtoonni siyaasaa hundi haal-duree malee akka gadhiifaman; kunis araara biyyaalessaatiif bu'uura akka ta'u.
3/Mirgoonni siyaasaa guutummaatti akka kabajaman; waajjiraaleen KFO cufaman akka banaman, akkasumas seeronni miidiyaa,paarilee morkattoota fi jaarmiyaalee siivilii ukkaamsan akka haqaman.
4/Boordiin Filannoo Biyyaalessaa Itoophiyaa (BFBI) amanamummaa ummataa deebisee akka argatuuf, waliigaltee paartilee hundaatiin bifa haaraatiin akka hundeeffamu.
Ibsichi xumura irratti waamicha gochaaf taasifame kan kutaa adda addaa qabu dhiyeesseera. Uummata Oromoo tokkummaan akka dhaabbatu, humnoota dimokraasii Oromoo fi Itoophiyaa biroo wajjin "Waadaa Dimokraasiif" uumuuf harka michoomaa diriirsuu fi hawaasni idil-addunyaas mootummaa irratti dhiibbaa cimaa akka godhu gaafateera.
KFO'n, qabsoo nagaa gaggeessuuf kutannoo qabaatus, haala mijaa'aa dimokraasiif barbaachisu uumuun dirqama paartii aangoo irra jiruuti jechuun kallattii ifa kaa'eera.
Madda: Waajjira Hariiroo Uummataa KFO ti
