23/05/2026
በኦሮሞ ብሔረሰብ አስተዳደር ዞን ከ1 ቢልዮን ብር በላይ ገቢ ተሰበሰበ
ግንቦት 12 /2018 (የኦሮሞ ዞን ገቢዎች መምሪያ /ከሚሴ) በአማራ ብሔራዊ ክልላዊ መንግስት ገቢዎች ቢሮ ኦሮሞ ብ/ሰ/አስተዳደር ዞን ገቢዎች መምሪያ በ2018 በጀት ዓመት ከመደበኛ ገቢ ብር 1,166,394,679 እና ከከተማ አገልግሎት ገቢ ብር 359,959,734 በድምሩ ብር 1,526,354,413 ገቢ ለመሰብሰብ መልካም ውጤት እያሳየ ይገኛል።
መምሪያው እስከ ሚያዚያ 30/2018 ዓ/ም ከመደበኛ ገቢ 839,059,092.62 ብር ወይም የዕቅዱን 71.9 በመቶ እንዲሁም ከከተማ አገልግሎት ገቢ 263,893,855.08 ብር ወይም የዕቅዱን 73.3 በመቶ በድምሩ ብር 1,102,952,947.70 ወይም ከዓመቱ ዕቅድ በአማካይ 72.26 በመቶ መሰብሰቡን የኦሮሞ ብሄረሰብ ዞን ገቢዎች መምሪያ የግብር ትምህርት እና ኮሙኒኬሽን ዋና የስራ ሂደት አስተባባሪ አቶ ገመዳ ጉታ ገለፁ።
ገቢው በ2017 ተመሳሳይ ወር ከተሰበሰበው 721,931,840.06 ብር ጋር ሲነፃፀር የብር 381,021,107.64 ወይም የ 52.77 በመቶ ዕድገት ማሳየቱን አስታውሰዋል።
የህብረተሰቡን ማህበራዊና ኢኮኖሚያዊ ተጠቃሚነት ይበልጥ ለማሳዳግ ኢኮኖሚው የሚያመነጨውን ገቢ በአግባቡ ለመሰብሰብ፣ የህግ ተገዢነትን ደረጃ ለማሳደግ በተደረገው የቤት-ለቤት እና የመድረክ ላይ የግንዛቤ ፈጠራ ስራ የግብር ከፋዮች አመለካከትና አስተሳሰብ እየተሻሻለ መጥቷል።
አሁንም ግን ታክስ ለመሰወር፣ በግብይት ወቅት ደረሰኝ አለመቁረጥ እንዲሁም በራስ ፈቃደኝነት የግብር ግዴታን በወቅቱ ያለመወጣት ክፍተቶች መኖራቸውን ጨምረው ገልፀዋል።
ግብር ከፋዩን ማስተማርና ግንዛቤ ማስጨበጥ፣ መምከር ቅድሚያ ተግባሩ ያደረገው መምሪያው የሕግ ተገዢነትን ለማረጋገጥ በተደጋጋሚ ጊዜ ትምህርትና ምክር እየሰጠ ቢሆንም የህግ ጥሰቶችን ማስቆም አልተቻለም።
በምምሪያው ባደረገው ክትትል በደረሰኝ ግብይት እንዲፈጽሙ ግዴታ ያለባቸው 30 ግብር ከፋዮች ያለ ደረሰኝ ግብይት ሲፈፀሙ እጅ ከፍንጅ ተይዘው የ50 ሺህ ብር አስተዳደራዊ ቅጣት መቀጣታቸውን አቶ ገመዳ አብራርተዋል።
በሚቀጥሉት ወራት የደረሰኝ ክትትልን ከማጠናከር በተጨማሪ በኦዲት ግኝትና እንቨስትጌሽን፣ በዳግም ውሳኔ፣ በውዝፍ ገቢ አሰባሰብ፣ በ3ኛ እና በ2ኛ ሩብ ዓመት 25% ቅድመ-ግብር ክፍያ ላይ ትኩረት ተደርጎ እንደሚሠራም አስታውሰዋል።
ዘገባው ፡- የኦሮሞ ዞን ገቢዎች መምሪያ የግ/ትም እና ኮሙኒኬሽን ዋና የሥራ ሂደት ነው።
