07/09/2026
🏔️ VILAMARTÍN VOLVE A MIRAR CARA Á MONTAÑA
Onte, Vilamartín de Valdeorras volveu ser escenario dunha das probas deportivas máis espectaculares e esixentes do noso calendario: a Carreira Vertical O Sacauntos, que este ano acolleu ademais o II Campionato Xunta de Galicia de Trail Running Subida Vertical.
🏃♀️🏃♂️ 106 corredores e corredoras aceptaron o reto de percorrer 4,2 quilómetros nos que agardaban máis de 1.000 metros de desnivel positivo, con pendentes que chegaron a superar o 65 %, ata alcanzar o Alto do Monzón.
Un desafío enorme, que require esforzo, preparación e moita capacidade de superación, pero que tamén permite descubrir e desfrutar dun dos nosos grandes tesouros: a montaña e a paisaxe de Vilamartín.
Este ano, ademais, a proba tiña un significado especial. Os incendios do pasado ano modificaron profundamente o terreo e o percorrido, e as condicións meteorolóxicas das últimas horas tamén puxeron a proba a organización. Pero, unha vez máis, o deporte, a ilusión e as ganas de seguir adiante puideron con todo.
Parabéns a todas e todos os participantes polo enorme esforzo e por aceptar este reto.
E o noso agradecemento a todas as persoas que fixeron posible esta xornada: organización, voluntariado, persoal municipal, corpos de seguridade, colaboradores e, por suposto, a todas as persoas que se achegaron para animar e apoiar aos corredores.
Grazas por facer de Vilamartín un punto de encontro para o deporte, a montaña e a superación.
Seguimos subindo.
Seguimos facendo Vilamartín. 🏔️💚
