17/06/2026
📲 Dende o Concello de Vilasantar, en representación da veciñanza e persoas residentes no municipio, presentamos unha reclamación formal ante o Ministerio de Transformación Dixital e da Función Pública, a Axencia para a Modernización Tecnolóxica de Galicia, a Valedora do Pobo, Telefónica e Vodafone, reclamando unha solución pola deficiente e grave falta de cobertura do servizo de telefonía móbil e datos no noso ámbito territorial.
Esta situación de desconexión dixital e incomunicación supón o illamento da poboación e un prexuízo grave para o día a día dos veciños e veciñas, que non se poden comunicar coa súa familia, cos servizos sanitarios, de emerxencias, etc. Asemade, supón un aumento da fenda dixital e a imposibilidade de realizar trámites administrativos, teletraballar ou desenvolver actividades comerciais e agrícolas locais.
Non obstante, a cidadanía vilasantaresa aboa as tarifas de telecomunicacións, polo que dende o Concello de Vilasantar esiximos que se garantice o dereito á conectividade e as obrigas estipuladas na Lei 11/2022, do 28 de xuño, Xeral de Comunicacións.
Así pois, solicitamos que se realice un estudo de cobertura e medición de sinal sobre terreo e que se adopten con carácter de urxencia as medidas técnicas precisas para intensificar e garantir un sinal de telefonía digno, estable e de calidade.
Esta non é a primeira acción dende o Concello de Vilasantar para solucionar a problemática que nos traslada a veciñanza. En 2023 xa presentamos unha queixa e solicitude de mediación á Valedora do Pobo e unha queixa ante a Secretaría do Estado de Telecomunicacións e as operadoras principais, animando á veciñanza a presentar reclamacións para aumentar a presión.
Esperamos que as entidades correspondentes, quen ten as competencias sobre este tema, escoiten as nosas reclamacións e actúen urxentemente para solucionar os problemas e garantir un servizo digno.
