Charo Regueiro

17/07/2026

NUNCA UN NOME REPRESENTOU TAN BEN A XESTIÓN DUN GOBERNO: “A CONVIDADA” 🎉

Porque desde que teñen maioría absoluta, parece que converteron o Concello nunha barra libre para algúns…

Eles convidan. Nós pagamos.

Porque este 4 de xullo, o Goberno de Trazo celebrou unha vez máis “A Convidada”, esa festa que organizaron desde que teñen maioría absoluta e que moitos veciños aínda non saben moi ben de que vai… nin a que vén.

O único que temos claro é que a factura págase cos cartos de todos. Porque para isto si hai cartos.

E este ano había que encher como fose: chamadas ás casas, autobús… Non só se mobilizaron os oito concelleiros do Goberno, senón que ata algúns dos seus “palmeiros” andaron á procura de veciños.

E pasáronse tanto de freada que, nun auténtico éxtase de peloteo, chegaron a dicirlle a algún veciño que, se non ía, a alcaldesa iría persoalmente á súa casa buscalo! 😂

Vamos, que puxeron toda a carne no asador…

E nunca mellor dito.

Porque aquel 4 de xullo foi o día de máis calor no que levamos de ano, unha calor desas de caer os paxaros das árbores. E, con semellante temperatura, as mentes pensantes que nos gobernan tiveron unha idea brillante para o menú:

¡CALLOS!

Si, si. CALLOS. No día de máis calor do ano.

E logo aínda se preguntan por que Trazo vai peor que nunca…

A esas alturas, a pregunta xa non era de que ía A Convidada… senón se querían convidar os veciños ou acabar con eles. 😂

Pero nin con chamadas, nin con autobús, nin mobilizando concelleiros e palmeiros, nin con semellante éxtase de peloteo, conseguiron o éxito que esperaban.

E quizais deberían empezar a preguntarse por que.

Porque os veciños están cansos de tanta festa e tanta propaganda mentres o realmente importante segue esperando. O relato estalles acabando.

E A Convidada é só un exemplo. Máis de 1.200 € en roscas e chocolate o día das comparsas de Entroido. E, un ano máis, os disfraces dos membros do Goberno volvémolos pagar os veciños de Trazo, mentres os demais participantes teñen que pagar os seus do propio peto.

E só entre decembro e marzo gastaron máis de 6.000 € en empanadas, chocolate, roscas e similares.

Para o realmente importante sempre hai unha escusa.

Para festa, comida e disfraces… sempre hai cartos.

Mentres tanto, os cartos de todos seguen concentrándose unha e outra vez nos mesmos lugares, e hai aldeas que continúan esperando polo que realmente necesitan.

Porque os lavados de cara e o asfalto cando se achegan as eleccións cada vez enganan a menos xente.

Menos festa. Menos peloteo. Menos propaganda.

E máis gobernar para todos.

24/06/2026

Adivina que Concello aínda non abriu a piscina, seguindo o mesmo camiño de todos os anos: abrila de último e pechala de primeiro.

Cando te queres rir dos veciños e tomalos por tontos, non hai mellor cousa que ter unha maioría absoluta.

Mentres no resto dos concellos as piscinas levan semanas abertas —e máis coa calor que está facendo estes días—, en Trazo o goberno anda entretido facendo concursos de bandeiras. Hai que recoñecer o nivel da ocorrencia: entre 8 concelleiros non lles dá para máis?

E despois, o de sempre: propaganda e máis propaganda. Vemos no Facebook do Concello que xa van pola segunda tanda de fotos, porque como tampouco hai nada novo que ensinar, toca volver repetir a “Pala dos Trampillas” —cando despois os traballos de pala se subcontratan a un autónomo— e, outra vez, a aldea de Merelle: máis de 400.000 € gastados nunha soa aldea mentres as outras cen do concello caen a cachos.

En fin… maioría absoluta para facer o que lles dá a gana, para tomar os veciños por tontos e para rirlles na cara.

13/06/2026

"Os veciños de Berreo están facendo o RIDÍCULO”

Ese foi, sen dúbida, o titular do debate sobre a planta de biogás no último pleno.

Non o dixo un veciño. Non o dixo a oposición. Díxoo Fina Suárez. E non unha vez, senón en varias ocasións ao longo do debate.

A nosa pregunta era moi sinxela: se se creou unha comisión de seguimento para a planta de biogás, ¿por que non se convoca?

A resposta de Fina Suárez foi que non a vai convocar porque non hai orde do día nin nada que tratar.

Pero entón, ¿por que se creou a comisión?

Porque non hai que esquecer que cando se anunciou a súa creación deuse publicidade ao asunto incluso nos medios de comunicación e nas redes sociais municipais, pagadas por todos os veciños. Naquel momento parecía un tema suficientemente importante como para anuncialo publicamente. Agora resulta que non hai nada que tratar.

Porén, o certo é que existe un correo electrónico remitido aos membros da comisión no que unha empresa manifesta por escrito o seu interese e incluso expón dúas posibles situacións dentro do concello de Trazo. Ese documento existe e coñécese perfectamente.

Pola súa banda, José Manuel Juncal (exconcelleiro do PSOE e hoxe no PP), chegou a afirmar, cun evidente aire de superioridade, que os veciños deberían saír máis da casa e viaxar a Italia ou Francia para ver este tipo de instalacións. Un comentario que, sinceramente, parece tomar aos veciños por tontos, como se non levasen meses informándose, lendo documentación e seguindo este asunto con atención.

Quizais antes de recomendar viaxes aos demais, debería explicar tamén por que en moitos destes países existen marcos normativos diferentes para a xestión dos dixestatos e por que boa parte destas instalacións están vinculadas á actividade gandeira, e non a proxectos impulsados principalmente como negocio gasístico.

E por se faltaba algo, Manuel Ángel Mariño comparou a preocupación dos veciños coa dunha persoa que pasa a vida preocupada por morrer dunha enfermidade e ao final esa enfermidade nunca lle vén.

Así que xa sabemos o que escoitamos no pleno: Fina Suárez insistindo en que os veciños de Berreo están facendo o ridículo, José Manuel Juncal falando aos veciños coma se fosen tontos e Manuel Ángel Mariño restando importancia ás preocupacións expresadas.

Nós pensamos algo diferente.

Pensamos que cando os veciños preguntan, merecen respostas. Cando teñen dúbidas, merecen información. E cando expresan preocupacións, merecen respecto.

Porque nun Concello democrático os veciños non fan o ridículo por preguntar.

O que fai o ridículo é crear unha comisión de seguimento, anunciala a bombo e prato nos medios e nas redes sociais que pagamos todos, e despois negarse a convocala porque agora resulta que non hai nada que tratar.

Ou quizais a pregunta que deberían responder é outra: ¿non hai nada porque realmente non existe nada ou porque, polo momento, non interesa que exista oficialmente?

Os veciños merecen unha explicación.

22/05/2026

🌹 Hoxe celebramos a Santa Rita, patroa dos funcionarios, unha felicitación que facemos extensible tamén a todo o persoal laboral do Concello de Trazo.

Quero agradecer o traballo, a dedicación e o compromiso de todas as persoas que, cada día, contribúen ao funcionamento dos servizos públicos e á atención dos veciños e veciñas.

Feliz día de Santa Rita! 🌹

17/05/2026

Hoxe, no Día das Letras Galegas, quero poñer de manifesto tanto o respecto polas nosas letras como polos cartos dos veciños, que son de todos.

Ter un xornalista que nin sequera é do concello e comprobar que cada publicación institucional en galego está chea de erros ortográficos creo que demostra moi pouco respecto por todo iso: pola nosa lingua, pola imaxe do Concello e tamén polos recursos públicos.

Cando se paga o servizo de manter as redes sociais do Concello por un módico prezo de 6.000 € ao ano, un dá por feito que, cando menos, exista certo coñecemento da nosa lingua e que cada publicación que se faga en galego se corrixa. Polo visto, culturalmente tampouco hai moita solvencia no Concello. Mágoa.

Se cadra, se se apostase por un xornalista de Trazo, as cousas irían mellor. E, desde logo, se non se despilfarrase diñeiro neste tipo de servizos mal feitos, seguramente ao concello tamén lle iría moito mellor.

16/05/2026

🚍 RUTA TURÍSTICA POLAS CONSELLERÍAS 🚍

Outra das preguntas relevantes que fixen no pleno foi:
👉 Que froitos deu a ruta turística que fixo Fina polas diferentes consellerías, aparte das fotos para Facebook, que foi o único que vimos ata agora?

Porque, de momento, entre visita e visita, o único que chegou a Trazo foron publicacións, postureo institucional e moita foto de despacho… pero resultados reais, máis ben poucos.

Pois ben… agarrádevos, porque a resposta non ten desperdicio.

Sinceramente, deixoume atónita. Sen palabras. Sorte que estaba sentada, porque senón… caía para atrás.

Vai e di:
👉 “Non vendo fume”.

Repito:
👉 “NON - VENDO - FUME”.

Así, ás bravas. Sen inmutarse. Sen escaparlle a risa.

E isto despois de levar anos cos veciños de Trazo metidos nun fumeiro que nin Meirama nos seus mellores tempos.

Porque se algo tivemos ata agora foi:
🔸 mentiras,
🔸 promesas,
🔸 anuncios,
🔸 fotos,
🔸 escusas…
…e resultados, máis ben poucos.

E, pensándoo ben, razón ten:
fume non o vende…

ESTÁNOLO A COBRAR. 💨💸

Porque aquí cada visita ás consellerías acaba igual:
📸 foto para Facebook,
🤝 postureo institucional,
☕ paseo oficial…
…e Trazo volvendo para casa coas mans baleiras.

É o mesmo que cando un veciño vai á alcaldía cun problema… entra preocupado, sae exactamente co mesmo problema e solución cero, pero co nivel de peloteo e de boas palabras que lle botan enriba, marcha de alí pensando que non lle resolveron nada… pero que acaba de gañar unha familia nova por adopción.

Así nos vai…
4 anos entre festas, promesas, anuncios, mentiras, escusas e moito escaparate… un fume que estamos pagando moi caro os veciños de Trazo. 💨

📌 P.D.:
A ver se, a raíz desta publicación, algunha consellería reacciona e cae algo para Trazo… porque, visto o visto, igual esta publicación acaba dando máis resultados ca toda a ruta turística da alcaldesa polas consellerías. 🤷‍♂️

07/05/2026

🔴 No último pleno ordinario celebrado o pasado 26 de marzo aprobáronse os presupostos municipais de Trazo para 2026.

Un presuposto de 4,39 millóns de euros.

Antes de nada, quero deixar clara unha cousa:

Estou totalmente a favor de que se fagan obras e investimentos no concello.

Asfaltados, accesos, melloras de pistas ou humanizacións fan falta en moitos sitios de Trazo.

E precisamente por iso me abstiven na votación.

Porque o problema destes presupostos non é que se invista.

O problema é como se reparte ese investimento.

O problema é o desequilibrio.

O problema é que hai aldeas e parroquias que reciben actuacións continuamente mentres outras levan anos esperando.

---

Máis de 1 millón de euros vai para obras.

E arredor de 938.000 € van para asfaltado, accesos e pavimentacións.

É dicir: case todo o investimento vai para obras viarias.

E insisto:
non me parece mal.

O que me parece mal é que non exista igualdade nin equilibrio á hora de decidir onde se actúa e onde non.

---

E logo vemos como se reparte:

📍 BERREO → 0 €
📍 TRAZO → 0 €
📍 RESTANDE → 0 €
📍 VILOUCHADA → 0 €

Parroquias enteiras sen investimento.

---

📍 CHAIÁN → arredor do 28% do investimento.

Gurís, a aldea da alcaldesa, outra vez.

Gundille… despois de que a neta dunha veciña denunciase en Facebook o estado no que vivía a súa avoa, obrigando o goberno a moverse.

Parece que neste concello, se non hai denuncia pública, non hai actuación.

---

📍 CAMPO → arredor do 27% do investimento.

Entre Campo e Chaián lévanse arredor do 55% de todo o investimento previsto.

E mentres tanto, Viaño Pequeno, sendo a capital do concello, segue sen unha humanización seria nin solucións reais para o tráfico e os coches aparcados.

E o mesmo pasa noutras aldeas da parroquia de Campo, onde levan anos sen unha soa inversión importante.

---

📍 XAVESTRE → máis cartos outra vez para Merelle.

Aos máis de 360.000 € investidos ata agora hai que sumarlle outros 34.000 € máis.

¿Como pode ser que nunha única aldea se invistan preto de 400.000 € mentres outras seguen esquecidas?

---

📍 BENZA → apenas un 4% do investimento.

Sen dúbida, a parroquia máis castigada do concello.

A única actuación ou proposta deste goberno para Benza foi un camiño en Sar, con apenas 26.000 €… e aínda segue sen facerse.

E agora aparecen 16.000 € para aglomerar diante da casa dunha amiga.

Hai veciños que senten isto como unha auténtica burla.

---

📍 MORLÁN → arredor do 6% do investimento.

Investimento concentrado en Zabuceda.

E o resto da parroquia, coma sempre, a esperar.

---

📍 CASTELO → outra vez actuacións na Castiñeira.

E mentres tanto, outras aldeas da parroquia seguen esquecidas.

---

📍 MONZO → despois de anos co Lestido abandonado, moitas rodas pinchadas e moitas queixas da veciñanza… agora toca “lavado de cara”.

E casualmente tamén o Concello de Tordoia vai actuar na estrada entre Monzo e Vilarchán, obrigando practicamente ao Concello de Trazo a continuar a actuación.

---

E ás parroquias que quedan a 0 €… que se preparen para un ano de promesas, peloteo, fotos e propaganda.

Porque iso é o que queda ata as eleccións.

Non é planificación equilibrada.

É política de favoritismos e movementos de última hora.

---

Dentro dun ano haberá eleccións.

E cando cheguen os políticos porta por porta con promesas, fotos e boas palabras…

lembrade que tiveron 4 anos de maioría absoluta para facer todo iso que agora van prometer.

Porque as promesas, as excusas e o peloteo xa non chegan.

E iso de dicirlle á xente o que quere escoitar para durmila mentres todo segue igual… cada vez funciona menos.

29/04/2026

La compañía francesa expuso dos ubicaciones en la parroquia de Berreo para tratar entre 50.000 y 99.000 toneladas anuales de residuos orgánicos

19/04/2026