Concello de Toén

Casa
España
Toén
Concello de Toén

Canle oficial do Concello de Toén

06/09/2026

AXUDAS PARA A ADQUISICIÓN OU AUTOPROMOCIÓN DE VIVENDA EN TOÉN

O Concello de Toén informa dunha nova convocatoria de axudas da Xunta de Galicia destinada a facilitar o acceso á vivenda ás persoas menores de 36 anos en concellos de ata 10.000 habitantes.

As principais condicións son:

• Ata 15.000 € de axuda por vivenda, cun límite do 20 % do prezo de adquisición ou do custo da autopromoción.
• O prezo de adquisición ou custo da autopromoción non poderá superar os 250.000 €.
• Dirixida a persoas menores de 36 anos que cumpran os requisitos establecidos na convocatoria.
• A vivenda deberá constituír a residencia habitual e permanente.
• Prazo de solicitude: do 27 de agosto ao 16 de novembro de 2026, ou ata o esgotamento do crédito dispoñible.

As solicitudes tramítanse mediante concorrencia non competitiva e deben presentarse obrigatoriamente por vía electrónica a través da Sede Electrónica da Xunta de Galicia.

Procedemento: VI501B – Axudas para a adquisición ou autopromoción de vivendas en concellos de Galicia con poboación igual ou inferior a 10.000 habitantes.

Máis información e acceso á convocatoria:
https://igvs.xunta.gal/gl/axudas/programa-de-axudas-para-adquisicion-ou-autopromocion-de-vivendas-en-concellos-da-comunidade-autonoma

31/08/2026

Este xoves retomamos a clase de ioga nas Piscinas Municipais de Toén! 🧘‍♀️

A actividade, que tivo que ser aprazada por mor do mal tempo, celebrarase finalmente este xoves ás 20:00 h.

A clase é gratuíta e non é preciso inscribirse. Só tes que traer roupa cómoda e unha toalla grande ou esterilla, se tes.

Agardámoste para desfrutar dunha sesión de ioga ao aire libre!

28/08/2026

O vindeiro 13 de setembro, a Carballeira de Puga acollerá unha xornada cultural enmarcada no Pedra Festival de Saberes, coa participación activa da Asociación Amigos do Patrimonio de Toén.

A programación comezará ás 10:00 h cunha pequena andaina entre Puga e Alongos pola beira do Miño, visitando os enclaves dos antigos portos fluviais de Toén. Ao rematar, haberá autobús gratuíto desde Alongos para regresar a Puga.

A partir das 12:00 h, a xornada continuará cun obradoiro gratuíto de cestería tradicional a cargo de Vimbios e, ás 12:30 h, concerto de Columna Vegana. Ademais, poderase visitar unha mostra de fotografías antigas da Ribeira do Miño e unha exhibición de barcas tradicionais de río a cargo de Anxo Moure.

Unha oportunidade para coñecer e compartir o patrimonio, a memoria e as tradicións vinculadas ao Miño no noso concello.

Organiza: Ruralisto e Amigos do Patrimonio de Toén
Colabora: Concello de Toén

21/08/2026

A vendima xa comeza a sentirse en Toén. 🍇

Algúns xa están metidos de cheo nela e outros agardan aínda o momento de comezar. Son semanas de moito traballo, pero tamén unha das épocas máis especiais para un territorio que forma parte do Ribeiro e que leva séculos ligado á cultura do viño.

Desde o Concello de Toén queremos tamén vivir a vendima a través da nosa veciñanza. Se queredes compartir connosco fotografías destes días, podedes enviárnolas por mensaxe privada ou etiquetar o Concello nas vosas publicacións.

Viñas, acios, colleita, xente traballando... queremos ver e compartir como se vive a vendima nos diferentes lugares de Toén.

Boa vendima a todas e todos! 🍇

11/08/2026

Información sobre cortes intermitentes de subministro eléctrico nalgúns núcleos do concello

UFD Naturgy está executando os traballos comprometidos co Concello de Toén para mellorar a liña:
- tala e poda de árbores e acacias ao longo de toda a liña durante o verán.
- instalación de novos puntos de telecontrol.

Estes traballos precisan de cortes de luz breves ocasionais (3 minutos aproximadamente), e noutros casos a instalación de xeneradores para manter o subministro mentres se fan os traballos de mellora na liña. Nestes casos o cambio de xenerador a liña e viceversa provocan cortes de entorno a 20 min

Estes traballos e inversión de UFD na liña buscan mellorar o servizo e que nos invernos teñamos menos incidencias. Están cumplindo cos seus compromisos, pero durante os traballos xeneran estes inconvintes que ninguén desexamos.

Mañá voltaremos a ter cortes breves, non nos poden concretar a hora porque depende das necesidades da brigada.

10/08/2026

Este mércores 12 de agosto poderemos observar unha eclipse solar desde Galicia. Ante este fenómeno, o Concello de Toén fai un chamamento á prudencia e á responsabilidade, tanto á hora de protexer a vista como de coidar o noso territorio.

Para observar a eclipse é imprescindible utilizar lentes homologadas para a observación solar. As lentes de sol convencionais non son suficientes e nunca se debe mirar directamente ao Sol sen a protección adecuada.

Tamén queremos facer especial fincapé na situación actual de alto risco de incendios forestais. Se vas observar a eclipse, evita desprazamentos innecesarios a zonas de monte, extrema as precaucións e non realices ningunha actividade que poida xerar risco de incendio.

Se detectas un incendio forestal, chama ao 085. Para calquera outra emerxencia, ao 112.

Desfrutemos deste acontecemento excepcional con sentidiño, seguridade e respecto polo noso territorio.

05/08/2026

O VI Concurso de Pinchos "Toén a Bocados" xa ten datas.

Os días 2, 3, 9 e 10 de outubro, entre as 20:00 e as 23:00 horas, os establecementos participantes volverán ofrecer as súas mellores creacións nunha nova edición deste evento gastronómico, que xa se converteu nunha cita destacada do calendario de Toén.

Unha oportunidade para percorrer os distintos locais, degustar propostas elaboradas para a ocasión e seguir apoiando o traballo da hostalaría do noso concello.

Nas próximas semanas iremos desvelando máis detalles sobre o concurso, os pinchos participantes e todo o que vos espera nesta sexta edición.

Anotade as datas e preparádevos para saborear Toén!

Dirección

Rúa Ribadela, 1
Toén
32930

Página web

https://toen.gal/es/

Notificaciones

Sé el primero en enterarse y déjanos enviarle un correo electrónico cuando Concello de Toén publique noticias y promociones. Su dirección de correo electrónico no se utilizará para ningún otro fin, y puede darse de baja en cualquier momento.