23/06/2026
💡 TUI 20.000 | Un obxectivo para construír entre todas e todos
Tui ten a día de hoxe 17.468 habitantes (INE). Pero detrás desa cifra hai moito máis que un número: hai familias, comercios, asociacións, proxectos de vida, persoas que decidiron construír aquí o seu futuro e mozos que queren poder seguir facéndoo.
Porque unha cidade non medra polas obras que inaugura nin polos anuncios que presenta. Unha cidade medra cando é capaz de ofrecer oportunidades, cando a súa veciñanza sente que forma parte dela e cando cada vez máis persoas queren vivir, traballar e desenvolver aquí o seu proxecto de vida.
Nos últimos anos vimos investimentos e proxectos importantes, pero tamén problemas que continúan sen resolverse e decisións que, en demasiadas ocasións, se tomaron sen contar coa veciñanza. Nós cremos que existe outra maneira de facer as cousas.
Por iso iniciamos hoxe TUI 20.000, un proxecto para escoitar, propoñer e construír. Un espazo para falar de vivenda, comercio, mobilidade, cultura, patrimonio, emprego, fiscalidade e calidade de vida, pero sobre todo para reflexionar sobre o futuro que queremos para o noso concello.
Non queremos presentar unha lista de promesas. Queremos abrir unha conversa coa cidadanía, coñecer as súas prioridades e construír, entre todos, unha folla de ruta realista para facer de Tui un lugar cada vez mellor para vivir.
