07/06/2026
Día Mundial da Inocuidade dos Alimentos, 7 de xuño, baixo o lema “Dá carga ás solucións: alimentos inocuos en todas partes”
A inocuidade alimentaria constitúe un elemento esencial para a protección da saúde pública e require unha abordaxe científica, preventiva e multidisciplinar ao longo de toda a cadea alimentaria, desde a produción primaria ata o consumo.
Neste ámbito, os profesionais da Bioloxía desenvolven funcións fundamentais relacionadas coa microbioloxía alimentaria, a avaliación e análise de riscos, a seguridade alimentaria, o control microbiolóxico, a sanidade ambiental, a trazabilidade, o control de pragas, a epidemioloxía, a biotecnoloxía, a xestión da calidade e a saúde pública, contribuíndo á prevención de enfermidades transmitidas polos alimentos e á protección das persoas consumidoras.
Nun contexto marcado pola globalización das cadeas de subministración, a emerxencia de novos riscos biolóxicos, o cambio climático e a aparición de novos alimentos e procesos produtivos, resulta imprescindible reforzar os equipos multidisciplinares e incorporar perfís científicos especializados nos sistemas de control oficial.
Desde o COBGA queremos lembrar que ámbitos estratéxicos para a inocuidade alimentaria, como a inspección pesqueira, o control dos produtos da pesca e da acuicultura, a seguridade alimentaria, a sanidade ambiental ou os sistemas de vixilancia e análise de riscos, precisan aproveitar plenamente o coñecemento e as competencias profesionais dos biólogos.
Porque garantir alimentos inocuos non depende só da produción ou da inspección final: require ciencia, prevención e profesionais capacitados para identificar, avaliar e controlar os riscos ao longo de toda a cadea alimentaria.
Máis Bioloxía é tamén máis prevención, máis seguridade alimentaria e máis saúde pública.
