23/08/2026
📚️A Universidade de Santiago de Compostela mantén aberto, durante a segunda quincena de agosto, o prazo para que o estudantado con discapacidade e/ou necesidades específicas de apoio educativo (NEAE) solicite os apoios necesarios para desenvolver a súa actividade universitaria en condicións de igualdade. A través do Servizo de Participación e Inclusión Universitaria (Sepiu Usc ), a USC ofrece unha atención específica orientada a identificar as necesidades de cada estudante e deseñar os apoios que permitan garantir a súa participación plena na vida universitaria. “Entre as medidas que pode proporcionar o servizo atópanse o asesoramento e apoio para o deseño de adaptacións curriculares non significativas, así como outros recursos destinados a facilitar o desenvolvemento das actividades académicas, sociais, culturais e deportivas do estudantado”, apuntan dende o SEPIU.
O obxectivo é favorecer unha universidade inclusiva e accesible, eliminando as barreiras que poidan dificultar a participación do estudantado e promovendo que todas as persoas poidan desenvolver os seus estudos e a súa vida universitaria en igualdade de oportunidades.
As solicitudes poden realizarse a través dos formularios habilitados no web da USC, dentro do apartado de Inclusión Universitaria. A tramitación tamén pode facerse presencialmente nas oficinas do SEPIU. No caso do estudantado con discapacidade e/ou NEAE, a primeira atención debe concertarse previamente mediante cita previa a través da área de Inclusión Educativa.
https://www.usc.gal/gl/xornal/novas/aberto-prazo-solicitar-apoio-usc-estudantes-discapacidade-eou-necesidades-especificas-apoio-educativo
Vía: xornal USC
