01/09/2026
Campamento de Verán: Semana 9
Esta semana no campamento de Cea viaxamos ata o espazo da man de Wall-E, unha película que nos axudou a reflexionar sobre a contaminación, o coidado do planeta e a vida no espacio.
Para poñer en práctica fixemos unha manualidade reutilizando botes, aos que lles demos unha nova vida como xarróns. Decorámolos con pintura que brilla na escuridade e completámolos con bonitas flores de papel.
Tamén saímos polas rúas do pobo para facer unha limpeza de Cea, recollendo latas, botes e outros residuos que algunhas persoas botan nas cunetas. Unha actividade coa que comprobamos de primeira man a importancia de manter limpo o noso entorno.
E, para seguir aprendendo sobre reciclaxe, construímos tres recipientes de reciclaxe e descubrimos que tipo de residuos debemos depositar en cada un.
Ademais, recibimos a visita de persoal da planta de SOGAMA, que nos explicou de maneira moi amena a importancia de separar correctamente os residuos e nos agasallou con pequenos detalles feitos con materiais reciclados.
Pero non todo foi coidar o planeta! Tamén nos transformamos en protagonistas dunha auténtica aventura espacial cun xogo de roles no que dous equipos, extraterrestres e terrícolas, se prepararon para unha invasión. As caracterizacións foron do máis simpáticas e fixeron que a actividade estivese chea de risas e imaxinación.
E cando o tempo non nos permitiu saír ao exterior, aproveitamos ao máximo as instalacións do campamento: billar, futbolín, ping-pong e moitos outros xogos cos que seguimos gozando e compartindo momentos inesquecibles.
E así chegamos ao final da semana e do campamento cunha experiencia moi especial: viaxamos polo universo dentro dun planetario, onde puidemos g***r de proxeccións alucinantes e mergullarnos de cheo no mundo do espazo.
E para despedirnos por todo o alto… festa galáctica! Música, luces, baile e moitísima diversión puxeron o broche final a unha semana chea de aventuras, aprendizaxes e momentos que gardaremos para sempre.
Ata a próxima aventura, campistas!
