No 2015 nacemos para dar unha alternativa á cidadanía ribadumiense. Unha alternativa que permitira pular por un cambio moi necesario, logo de anos de políticas de despilfarro e enchufismo. Nacemos naquel intre, e co apoio da veciñanza logramos dar o cambio que Ribadumia precisaba, que nos fixemos efectivo confiando a alcaldía en David Castro. Durante catro anos, co noso voceiro volcado no traballo
municipal co apoio da nosa Comisión Executiva, Ribadumia converteuse nun exemplo de pequeno concello a seguir pola comarca e o resto de Galicia, con importantes avances na transparencia, na xestión municipal e na política social, con importantes logros. Logo no 2019 a cidadanía interpretou que era mellor volver a un goberno maioritario, e iso sumado á ventaxa que IR tiña ao posuír a alcaldía e toda a presenza pública, e ao segundo descalabro electoral do PP, fixo posible que os Independientes obtiveran a maioría absoluta. Mantivemos o apoio dunha parte da veciñanza, e seguimos traballando coa mesma forza que o primeiro día, agora na oposición, onde nos destacamos como o partido máis activo tanto na labor de control ao goberno como poñendo enriba da mesa propostas e solucións diversas aos problemas do noso concello. O paso dos meses está demostrando que por un lado David Castro precisa da experiencia e das capacidades de Somos Ribadumia, sen os cales resúltalle complicado, a pesar de ter tres liberacións, sacar adiante o goberno. Por outro lado a maioría absoluta de IR sacou a parte caciquil que esa formación leva dentro (non esquezamos que son unha escisión do PP), e que durante catro anos dende Somos Ribadumia mantivemos a raia. E todo isto tradúcese nun concello que xa non é referente de nada, cunha xestión opaca, cun goberno sen proxecto, que traballa a impulsos, facendo política de oposición á oposición, á que tenta bloquear en todos os aspectos, e que so sae nos medios por mor dos seus ataques xudiciais a traballadoras do concello e polo lios continuos nos que o alcalde se mete. Por iso cada día é máis evidente que seguimos sendo unha forza necesaria. E por iso seguimos traballando, sen depender de ningunha entidade superior nin de ningun líder público ou oculto, unicamente da nosa veciñanza. Nesta páxina está o noso traballo diario, complementada coa nosa presenza no Twitter, no Instagram e na web www.somosribadumia.com , e cos nosos boletíns en papel que cada certo tempo chegan aos voso fogares. Porque todas e todos Somos Ribadumia.
