07/05/2026
PSdeG-PSOE de Punxín fixo pública a súa preocupación pola situación “moi grave” vivida no CEIP Punxín, onde apareceu unha infestación de carrachas que, segundo denuncian, estaría relacionada coa falta de limpeza e mantemento das instalacións e das zonas próximas ao centro escolar por parte do goberno local de PP e CxG.
Dende o grupo socialista critican que, mentres outros concellos da comarca están tomando medidas preventivas para garantir a limpeza de parcelas e evitar riscos ambientais e sanitarios, en Punxín o executivo municipal continúa “sen cumprir coas súas obrigas básicas” en materia de seguridade, hixiene e salubridade pública.
A voceira socialista, Lorena Peleteiro Vázquez, cualificou a situación de “totalmente inadmisible”, asegurando que “a falta de xestión e a pasividade do goberno municipal están poñendo en perigo a saúde da comunidade educativa e da veciñanza”. Ademais, sinalou que “é moi preocupante que nin sequera se garantan condicións mínimas de limpeza nun espazo tan sensible como un colexio”.
Segundo explican as e os socialistas, a comunidade educativa leva meses advertindo do estado de abandono da contorna do centro e reclamando actuacións de mantemento, sen recibir resposta do alcalde nin do seu equipo de goberno. “As demandas do colexio foron ignoradas de maneira continuada por un concello máis centrado en ocultar os problemas que en resolvelos”, denunciou Peleteiro.
O PSdeG-PSOE tamén asegura que a falta de actuación municipal provocou que varios nenos e nenas se visen afectados polas carrachas e que o problema chegase ao interior do propio edificio escolar. Ante esta situación, foi o CEIP quen tivo que solicitar servizos de limpeza, control de pragas e medidas sanitarias.
“É moi grave que o propio centro educativo tivese que asumir unhas tarefas que son responsabilidade directa do concello mentres o goberno municipal permanecía ausente”, criticou a voceira socialista, que considera que esta actitude evidencia “un abandono institucional sen precedentes”.
Para o PSdeG-PSOE de Punxín, este episodio é consecuencia “dun executivo esgotado e sen capacidade de xestión”, denunciando ademais que os problemas de abandono e sucidade tamén son visibles noutras zonas do municipio, incluídas as inmediacións do centro de saúde e diversos espazos públicos.
“PP e CxG non poden seguir instalados na inacción mentres os problemas afectan directamente á saúde pública. Punxín precisa un goberno responsable, que traballe pola veciñanza e deixe atrás a propaganda e a desidia”, concluíu Lorena Peleteiro.
