20/04/2026
Comunicado do BNG de Muros
Desde o BNG de Muros queremos trasladar á veciñanza que, nos vindeiros días, explicaremos con detalle os feitos relacionados coa sentenza que condena ao Concello de Muros a indemnizar a unha das traballadoras municipais, así como o contexto no que se produciron e as actuacións levadas a cabo. Trátase dun asunto cun percorrido xudicial longo e, precisamente por iso, queremos abordalo co máximo rigor.
O que si consideramos necesario aclarar de maneira inmediata, ante a campaña de desinformación e as medias verdades difundidas polo PP e polo PSOE, é unha cuestión fundamental: esta situación non se pode reducir á actuación dunha soa persoa.
O que esta sentenza pon enriba da mesa é unha carencia de fondo no propio Concello. Durante anos non existiu unha avaliación de riscos psicosociais, que é obrigatoria desde 1995, nin houbo ferramentas claras para previr e actuar ante situacións deste tipo no ámbito laboral municipal.
En relación ao publicado polo PP nas redes sociais, cómpre lembrar algo moi sinxelo: esta situación non nace agora. Durante o seu goberno, o Concello non contou cunha avaliación de riscos laborais nin puxo en marcha medidas claras de prevención. Tiveron catro anos para facer ese traballo e non o fixeron.
Por iso, asumindo sempre a nosa responsabilidade como forza que goberna o Concello desde 2023, resúltanos cando menos chocante que quen non fixo ese traballo queira agora dar leccións e presentarse como defensor da clase traballadora. Máis aínda cando se atreve a pedir dimisións como se nunca tivese gobernado Muros.
En realidade, tampouco sorprende demasiado. Falamos dun partido que leva tres anos na oposición intentando ocultar o seu paso polo goberno e sen achegar nada útil ao debate público, máis alá do ruído, dos bulos e das medias verdades.
En relación ao comunicado do PSdeG-PSOE de Muros, cómpre sinalar que formar parte dun goberno implica asumir responsabilidades políticas, dar explicacións e actuar con coherencia co lugar que se ocupa dentro do executivo.
A fórmula de atribuírse os acertos do goberno e sinalar ao BNG cando hai erros non é máis ca unha mostra de falta de responsabilidade política e de respecto á veciñanza e ao persoal municipal.
Estamos vendo como este xeito de facer política, baseado no ruído, nos bulos e na confrontación interesada, só contribúe a deteriorar a confianza da xente nas institucións. E nese camiño non gaña ninguén: perde Muros.
Desde o BNG cremos que hai que actuar con responsabilidade, asumir o que nos corresponde e traballar para que Muros se sinta orgulloso do seu Concello. É o que merece a veciñanza. É o que nos debemos como representantes públicos.
Queremos trasladarlle publicamente ao persoal laboral do Concello o noso compromiso para reverter esta situación e seguir reforzando as garantías de protección dos seus dereitos.
E facémolo sabendo que de todo isto tamén hai que aprender: para corrixir erros, mellorar o que falla e garantir que nada semellante volva acontecer, goberne quen goberne.
