Concello de Muxía

06/06/2026

📢 Muxía participa na Semana Verde de Silleda! 🌊🌿

Muxía está presente nun dos eventos máis relevantes de Galicia, levando ata a Feira Internacional de Galicia todo o potencial do noso concello como destino turístico, cultural e natural.

✨ A beleza da nosa costa, o patrimonio, a tradición mariñeira, a gastronomía e a esencia da Costa da Morte son parte da oferta que estamos a mostrar a milleiros de visitantes durante estes días.

📍 Se visitas a Semana Verde, achégate ao espazo de Muxía e descubre todo o que o noso municipio ten para ofrecer ao longo do ano.

💙 Unha oportunidade para seguir promocionando Muxía, poñendo en valor os nosos recursos e reforzando a nosa presenza nun dos grandes escaparates de Galicia.

05/06/2026

🎭 O I Ciclo de Teatro Afeccionado de Muxía levanta o pano!

A Escola Municipal de Teatro de Muxía será a encargada de inaugurar esta nova iniciativa cultural coa representación de “Delicatessen. Pequenas historias selectas”, unha proposta chea de humor, emoción e personaxes que non deixarán indiferente a ninguén.

🍫 Un menú teatral composto por pequenas historias que nos achegan ás luces e sombras da condición humana, interpretadas polo alumnado da nosa Escola Municipal de Teatro.

👏 Unha oportunidade para g***r do talento da casa e recoñecer o traballo que durante todo o ano desenvolve a Escola Municipal de Teatro de Muxía baixo a dirección de Artur Trillo.

📅 13 e 14 de xuño de 2026
🕘 21:00 h
📍 Edificio de Servizos Múltiples de Muxía
🎟️ Entrada: 1 €

Con esta función damos comezo ao I Ciclo de Teatro Afeccionado de Muxía, unha aposta pola cultura, polo intercambio con outros concellos e polo teatro como espazo de encontro para toda a comunidade.

Agardámosvos para compartir esta primeira cita dun ciclo que converterá Muxía nun escenario aberto ao talento afeccionado de toda Galicia.

04/06/2026

Chega a Carreira de Correndo pola Costa da Morte a Muxía

🏃‍♀️💥 Abrimos inscricións para o Concello de Muxía! 💥🏃‍♂️

Este ano fixemos algúns cambios no calendario e, como xa sabedes, Muxía adiántase no Circuíto 🌊

Así que, xa temos a seguinte cita á vista 😏

📍 O 21 de xuño agárdanos Muxía, unha das probas máis especiais do calendario, con quilómetros para desfrutar correndo ao pé do mar.

👉 Xa podes inscribirte!

🔗 https://correndopolacostadamorte.com/es/web/evento/3204/

Quen se apunta á seguinte parada de Correndo pola Costa da Morte? 💙🏃‍♀️🏃‍♂️🌊

03/06/2026

🏛️⛪ O Goberno de Muxía celebra un novo paso histórico para culminar a recuperación do Santuario da Virxe da Barca 💙

O alcalde de Muxía, Francisco Javier Sar, acompañado da tenente de alcalde Sandra Vilela, participou esta mañá xunto á delegada da Xunta na Coruña, Belén do Campo, no anuncio da adxudicación da segunda fase das obras de restauración do Santuario da Virxe da Barca por un importe superior aos 415.000 euros 🙌

Dende o Goberno municipal queremos agradecer á Xunta de Galicia o seu compromiso coa conservación dun dos símbolos máis importantes da nosa vila, da Costa da Morte e de toda Galicia 🌊⛪

Esta nova actuación permitirá seguir recuperando todo o esplendor dun espazo emblemático para a nosa historia, a nosa cultura e a nosa identidade, garantindo ademais a súa conservación para as futuras xeracións 💫

As obras incluirán importantes actuacións de restauración interior e exterior, melloras na conservación da pedra, substitución de ventás, recuperación de elementos orixinais e revisión das instalacións do templo, continuando así o traballo iniciado tras o incendio sufrido no ano 2013 🔨🪨

O alcalde Javier Sar destacou a importancia de continuar avanzando na recuperación integral deste enclave único, referente espiritual, patrimonial e turístico de Galicia, que cada ano recibe milleiros de persoas peregrinas e visitantes ❤️

Muxía segue mirando ao futuro sen esquecer as súas raíces 🤝✨

01/06/2026

📚💜 GALERÍA MULLERES | Xuño 2026
O Concello de Muxía dedica este mes de xuño a Paz López Facal, mestra, compañeira, contista, bibliófila e unha muller profundamente comprometida coa educación, coa cultura galega e coa xustiza social.
Natural de Toba, Cee, Paz López Facal formou parte desa xeración de mestras que levaron ás escolas unitarias moito máis ca ensino: levaron alfabetización, progreso, cultura, igualdade e unha maneira nova de entender a comunidade. 👩‍🏫✨
Ao longo da súa vida destacou polo seu compromiso pedagóxico, pola defensa da lingua galega, pola incorporación de métodos educativos innovadores e pola súa implicación activa nun tempo no que defender a liberdade e a xustiza requiría valentía. 💪💜
Tamén compaxinou o ensino coa escritura e coa promoción da literatura infantil, deixando unha pegada fonda na escola, na cultura e na memoria colectiva.
Desde o Concello de Muxía queremos render homenaxe a mulleres como Paz López Facal, referentes necesarios para seguir construíndo unha sociedade máis xusta, máis culta e máis igualitaria. 🌿📖
💜 Porque lembrar as súas historias tamén é facer xustiza.

29/05/2026

🌬️ Muxía leva a súa voz ao Congreso dos Deputados no Foro Vecinos Eólicos

O alcalde de Muxía, Javier Sar, participou hoxe no Congreso dos Deputados na xornada “Foro Vecinos Eólicos”, onde se presentou a Declaración conxunta da eólica e os municipios para o desenvolvemento local sostible.

Este documento, impulsado pola Asociación Empresarial Eólica, nace como un marco voluntario de colaboración entre empresas e concellos para favorecer o diálogo, a transparencia e que os proxectos eólicos deixen beneficios reais nos territorios nos que se implantan. Segundo a información publicada, a declaración foi asinada por máis de 45 organizacións e representa a municipios que conviven coa enerxía eólica en España.

Durante a xornada abordouse a importancia de que a transición enerxética se faga co territorio e non de costas a el, escoitando aos concellos, á veciñanza e ás comunidades locais.

Muxía estivo presente neste foro a través do alcalde Javier Sar, que participou no espazo de diálogo sobre convivencia eólica no territorio, trasladando a realidade do municipio e a necesidade de que o desenvolvemento enerxético sexa tamén unha oportunidade para o rural.

Dende o Concello de Muxía seguiremos defendendo un modelo sostible, equilibrado e xusto, no que a enerxía eólica contribúa ao futuro do territorio e ao benestar da veciñanza. 💙🌱⚡

29/05/2026

Hoxe damos un paso máis na posta en valor de Muxía como destino de espiritualidade, patrimonio e acollida coa instalación do panel informativo da Vía Mariana no entorno do Santuario da Barca.

Trátase dun elemento moi demandado dende hai anos pola asociación Vía Mariana que impulsa esta ruta internacional e que, por fin, ve cumprida unha vella reivindicación. Queremos agradecer especialmente a D. Daniel a súa disposición e colaboración para facer posible esta instalación nun lugar tan simbólico e especial como é o entorno do Santuario da Barca.

A Vía Mariana é unha ruta de peregrinación europea que une algúns dos principais santuarios marianos do continente, converténdose nun itinerario espiritual, cultural e turístico de primeiro nivel. Muxía ocupa nela un lugar destacado, xa que o noso concello e o Santuario da Barca representan a meta final deste camiño que moitos coñecen como “o camiño feminino”, pola especial vinculación da ruta coa figura da Virxe María e coa espiritualidade mariana.

Dende o actual goberno municipal seguimos traballando para potenciar esta ruta e todo o que representa para Muxía: dinamización turística, promoción internacional, creación de oportunidades e posta en valor da nosa identidade. Porque falar da Vía Mariana é tamén falar da nosa historia, do noso patrimonio e da forza simbólica dun lugar único no mundo como é o Santuario da Barca.

Seguiremos apostando por iniciativas que axuden a situar Muxía no lugar que merece como final de camiños e referente espiritual e cultural.

28/05/2026

✨ O Concello de Muxía segue apostando polo deporte, a cultura e o talento da nosa mocidade.

Este curso vivimos un momento moi especial coa posta en marcha, por primeira vez no noso concello, da actividade de ximnasia rítmica e estética da man do Club Pangea Costa da Morte. 💙🤸‍♀️

Foi unha experiencia moi positiva, chea de ilusión, aprendizaxe e participación, que culmina agora coa exhibición de fin de curso e coa xornada de portas abertas para novas incorporacións.

Desde o Concello queremos seguir dándolle impulso a esta disciplina, apoiando iniciativas que fomenten hábitos saudables, o traballo en equipo e novas oportunidades deportivas para as nenas e nenos de Muxía.

💫 Este é só o comezo! Animámosvos a descubrir esta fermosa actividade e a formar parte deste proxecto que segue medrando.

📍 Pavillón Municipal de Muxía
📅 Mércores 10 de xuño
⏰ De 18:00 a 19:30 h

📣 Ademais, queremos coñecer o interese das familias e persoas interesadas de cara aos próximos cursos. Podedes cubrir a seguinte enquisa:

https://docs.google.com/forms/d/e/1FAIpQLSdwA0nTj80_YCp_6gxUIgwL-a-TcrsF2alLfCisiXzumJrP8Q/viewform?usp=send_form

28/05/2026

📢 AVISO IMPORTANTE | Cambio na saída da andaina da Vía Mariana
Dende o Concello de Muxía informamos dun cambio na saída da actividade “Mulleres Rurais na Vía Mariana. Andainas, 1ª parte: de Moraña a Muxía”, prevista para este domingo 31 de maio.
📍 Nova saída: Capela do Pilar, en Suxo
🕘 Hora de saída: 8:45 h aprox.
⚠️ Polo tanto, a saída xa non será dende Berdoias.
A chegada a Muxía está prevista entre as 12:30 h e as 12:45 h aproximadamente, aínda que poderá variar en función do ritmo do grupo, da calor e doutras circunstancias do percorrido.
⛪ Ás 13:30 h celebrarase unha misa breve no Santuario da Virxe da Barca.
Pedimos desculpas polas molestias que este cambio poida ocasionar e agradecemos a comprensión de todas as persoas participantes. 🙏✨
Concello de Muxía

27/05/2026

🌟 Talento muxián que nos enche de orgullo do que se fai eco os medios de comunicación. https://www.lavozdegalicia.es/noticia/somosagro/agricultura/2026/05/16/patatas-fritidas-motor-da-inclusion-social-rural-galego/00031778933611555315398.htm
O alcalde de Muxía, Javier Sar, quere trasladar publicamente o seu recoñecemento e agarimo a Manuel Outes Marcote, veciño de Muxía, polo proxecto que está impulsando xunto a Lucía Echevarría Rodríguez, unha iniciativa que une intelixencia artificial, inclusión social e medio rural galego.
Manuel e Lucía traballan na posta en marcha de Atlántica Inclusión Social, un centro especial de emprego tecnolóxico que busca demostrar que a intelixencia artificial tamén pode servir para acompañar ás persoas, crear oportunidades laborais e facer que o talento brille por riba de calquera limitación.
Dentro deste proxecto están a desenvolver unha liña agroalimentaria de patacas fritidas elaboradas con Pataca de Galicia, empregando a tecnoloxía para facer máis accesible o proceso produtivo e abrir novos camiños no rural.
Para Javier Sar, “é unha alegría ver como persoas da nosa terra apostan pola innovación, pola inclusión e por proxectos que miran ao futuro sen esquecer as raíces”.
👏 Dende Muxía enviamos os nosos parabéns a Manuel e Lucía por esta iniciativa tan especial, que fala de talento, compromiso social e futuro para o rural galego.
💙 Porque cando unha persoa de Muxía emprende un camiño así, tamén sentimos que leva un anaquiño da nosa terra con ela.