Bng Mondoñedo

27/05/2026

O BNG DE MONDOÑEDO DEMANDA MEDIDAS QUE GARANTAN A SALUBRIDADE DAS AUGAS MUNICIPAIS EN DOUS BARRIOS DO CONCELLO



A nefasta xestión do Partido Popular no concello pón en perigo a sáude da poboación



Mondoñedo 27 de maio do 2026. O BNG de Mondoñedo levará ao vindeiro pleno rogos e preguntas para ver de solucionar os problemas de abastecemento de auga potable aos barrios do Monfadal e Maariz.

Concretamente segundo apuntan os nacionalistas as augas das traídas municipais que chegan a estes barrios carecen dun tratamento para a potabilización ou desinfección que garanta a seguridade da auga para o consumo humano, os depósitos están rotos, sucios e sen ningún tipo de blindaxe contra calquera contaminación externa.



Situación inaceptable

Eloi Cabanas, voceiro do BNG no concello, considera inaceptable esta situación e esixe unha intervención inmediata por parte do goberno local para que se poña en contacto coa empresa concesionaria e corrixir sen máis demoras estas deficiencias. "A veciñanza está farta de escoitar ao señor alcalde falar de investimentos que nunca chegan mentres seguen sen consumir auga da traída municipal polo risco que iso leva consigo" manifestou Cabanas.



Barrio do Monfadal e A Fonte, sen ningún tipo de tratamento potabiizador

O depósito que suministra a auga municipal a parte da veciñanza do barrio do Monfadal e ao lugar da Fonte non está operativo, a entrada de auga ao depósito orixinal de formigón está anulada e como solución instalouse un depósito de material plástico que almacena de forma directa a auga sen ningún tipo de blindaxe que protexa o interior deste para logo introducir a auga á rede municipal sen ningún tipo de tratamento potabilizador.



Barrio de Maariz, co depósito roto e a auga sen potabilizar

O depósito está roto, non é capaz de gardar todo o volume auga para o que foi construído e carece dun tratamento de potabilización que garanta a seguridade da auga que chega á veciñanza.



O goberno municipal do Partido Popular tén que dar explicacións pola súa nefasta xestión e ofrecer unha solución inmediata á veciñanza

O grupo municipal do BNG no concello pediralle explicacións ao goberno sobre a potabilidade da auga que chega a estes barrios a través de diversas preguntas así como a reclamación da suspensión de cobro da taxa do subministración de auga mentres non se resolvan as deficiencias que presentan estas traídas municipais.

Eloi Cabanas expresa a súa fonda preocupación pola inacción do goberno ante estes problemas que a veciñanza destes barrios vén denunciando e poñendo en coñecemento do alcalde, Manuel Otero, desde fai máis dun ano polo que esixe unha explicación que dea seguridade e certeza aos máis de trinta veciños e veciñas afectadas. “A nefasta xestión desta situación evidencia unha vez máis a tendencia xeneralizada coa que o goberno municipal administra o concello, causando frustración entre a veciñanza que ve como cada día que pasa Mondoñedo presenta un estado de abandono máis evidente” concluíu Eloi.

18/05/2026

"Para garantir ese itinerario alternativo é necesario que desde o Goberno se proceda a arranxar é adecuar a N-634, prolongando o terceiro carril desde o punto quilométrico 596 ate a rotonda de ligazón coa A-8 no Alto da Xesta. Un tramo de tan só 4,5 quilómetros entre Mondoñedo e Abadín para convertelo nunha auténtica alternativa á A-8 en situacións de intensa néboa que imposibilitan a condución pola A-8. Esta actuación permitiría mellorar a seguranza viaria e favorecer a fluidez do tráfico que tería tra alternativa"


Na sesión da Comisión de Transportes do Senado celebrada esta tarde tratouse un tema que tanto o BNG como a veciñanza de Mondoñedo e a comarca levan demandando desde hai anos, que é a prolongación do terceiro carril na N-634 desde Mondoñedo ata o Alto da Xesta. O motivo desta demanda era e é facilitar un itinerario alternativo cómodo, seguro, e que facilita a fluidez do tráfico, frente aos continuos peches da A-8 no Fiouco por motivo da néboa.

Esta proposta do terceiro carril formulada pola senadora do BNG Carme da Silva como emenda de adición a unha moción do PP que reclamaba un sistema de balizamento láser e o reforzo dos sistemas de control, análise e avaliacion das condicions meteorolóxicas na A-8, foi aprobada.

08/05/2026

En Mondoñedo analisando as experiencias en urbanismo nos centros históricos.

Políticas que aposten por colocar o espazo público municipal ao servizo dun urbanismo que promova igualdade, accesibilidade, vivenda, comercio local, e coidado do patrimonio.

30/04/2026

ACTO PÚBLICO DO BNG SOBRE A VIVENDA
Será o vindeiro venres 8 de maio ás 19:30 no centro comarcal - Pazo San Tomé- en Mondoñedo.

Contaremos con Xaquín Moreda (arquitecto e concelleiro de Servizos Urbanos en Pontevedra) e María Xosé Piñeira (doutora en Xeografía e Historia pola USC) ademáis do deputado no Parlamento Galego Daniel Castro e Eloi Cabanas portavoz municipal do BNG en Mondoñedo.

29/03/2026

XORNADAS SOBRE EXPERIENCIAS MUNICIPAIS

O BNG PRESENTA NA MARIÑA O SEU MODELO DE POLÍTICA MUNICIPAL

Fortalecemento e ampliación dos servizos públicos, participación da veciñanza, xeración de riqueza desde o local, piares básicos destas propostas

O BNG de Bng Mondoñedo participa nesta xornada sobre política municipal aprendendo das diferentes experiencias de como aplicar a política do BNG no local.

25/03/2026

MAÑÁ ÁS 20:00 Hrs HAI PLENO:

O BNG DE MONDOÑEDO PROPÓN ELABORAR UN PLAN DE ACCESIBILIDADE PARA EDIFICIOS E ESPAZOS PÚBLICOS MUNICIPAIS

Mondoñedo, 25 de marzo do 2026.

O grupo municipal do BNG no Concello de Mondoñedo presentará no vindeiro pleno unha moción para impulsar a elaboración dun plan de accesibilidade para os edificios e espazos públicos de titularidade municipal, co obxectivo de garantir que todas as persoas poidan acceder en condicións de igualdade.



Desde o BNG lembran que o acceso autónomo e seguro aos edificios e espazos públicos é un dereito que debe estar garantido para toda a cidadanía, independentemente da súa condición de mobilidade, idade ou capacidade. Porén, sinalan que en Mondoñedo existen diversos inmobles municipais que non cumpren coas condicións básicas de accesibilidade, o que dificulta ou mesmo impide o uso normal dos servizos que prestan.



-A CASA DO CONCELLO COMO EXEMPLO MÁIS EVIDENTE-

Entre os exemplos que mencionan, o BNG destaca o propio edificio do Concello, onde se sitúa a alcaldía, o salón de plenos e varias oficinas municipais e segundo explica o voceiro do nacionalista no concello, Eloi Cabanas, o acceso ás plantas superiores só pode realizarse a través das escaleiras, sen ningún sistema alternativo que permita salvar a barreira arquitectónica que presenta. “Non hai alternativa e a única forma que ten a cidadanía para poder solicitar de forma presencial información sobre trámites administrativos, realizar xestións ou asistir ás celebración plenarias ou outros actos institucionais ou culturais que alí se celebran é a de acceder ás plantas superiores do consistorio polas escaleiras do edificio”.



Ademais, indican que esta situación non se limita á casa consistorial. Outros edificios municipais como o Consistorio Vello, que alberga a Oficina de Turismo e a Biblioteca Municipal, ou a Casa da Xuventude na rúa Pacheco, tamén presentan problemas de acceso.

A moción presentada polo grupo nacionalista propón en primeiro lugar que o Concello elabore un estudo detallado de todos os edificios e espazos públicos municipais para identificar obstáculos que dificulten o acceso a persoas con discapacidade, mobilidade reducida ou familias con carriños de bebé.

Unha vez realizado este estudo, o BNG solicita que o goberno municipal leve a cabo as actuacións necesarias para corrixir os problemas detectados e mellorar a accesibilidade nos espazos públicos.

Por último, a iniciativa tamén reclama que o Concello actúe con maior celeridade no mantemento das prazas de estacionamento reservadas para persoas con mobilidade reducida, xa que a falta de sinalización ou de pintado adecuado fai que en moitos casos non resulten plenamente funcionais.

Desde o BNG consideran que avanzar cara a unha accesibilidade universal é unha cuestión de dereitos e igualdade, e confían en que o pleno municipal apoie unha proposta que busca facer de Mondoñedo unha vila máis accesible para todas as persoas.

02/02/2026

acollerá o 7 e 8 de febreiro a oitava edición do Foro Galego de Agroecoloxía A agroecoloxía é o relevo

Unha xornada organizada polo Sindicato Labrego Galego coa colaboración da área de , Vicepresidencia.Deputación de Lugo, centrada nas oportunidades que ofrece este modelo produtivo para a incorporación de persoas mozas á actividade agrogandeira.

Palestras, visitas a proxectos labregos e xantares agroecolóxicos completan o programa desta xornada, nun lugar emblemático do potencial da produción de horta.

04/01/2026

Asemblea Comarcal de Galiza Nova en Mondoñedo.

As mocidades de Galiza Nova de Mondoñedo e da Mariña comezan o ano debatendo as liñas de actuación e novas actividades.

Galiza Nova da Mariña ven de comezar o ano cunha asemblea comarcal que tivo lugar en Mondoñedo, no Centro Comarcal Pazo Santo Tomé no día 3 de xaneiro. N...

08/12/2025

PARA DEFENDERSE DAS CRÍTICAS DO BNG AOS ORZAMENTOS DO 2026 O PARTIDO POPULAR TIVO QUE REMONTARSE 10 ANOS ATRÁS PARA XUSTIFICAR AS BONDADES DA SÚA XESTIÓN.
ASÍ QUE, "POR ALUSIÓNS", O EQUIPO DE GOBERNO DO PERIODO 2007-2015 FAI UN EXERCIZO SAUDABLE DE MEMORIA.

Compartimos a súa contestación:

"CONTESTACIÓN AO GOBERNO MUNICIPAL DO PP DE MONDOÑEDO

O GOBERNO MUNICIPAL DO PP ACTÚA CON MALICIA E MALA INTENCIÓN

Os/as integrantes dos gobernos municipais do concello de Mondoñedo durante os mandatos 2007- 2011 e 2011 -2015, ante a versión incompleta, maliciosa e malintencionada que o PP pretende trasladar á opinión pública sobre a xestión económica realizada nos mandatos reseñados, queren aclarar e puntualizar:

1°,- Cando o goberno de coalición BNG – PSOE entrou a gobernar no 2007 no concello de Mondoñedo, atopouse cunha situación económica caótica e insospeitada, na que:
As contas estaban sen presentar desde o exercicio 2004, de xeito que a contabilidade do exercicio 2005 estaba sen pechar e as de 2006 e 2007 sen abrir.
A débeda a longo prazo ascendía a 1.194.017,4 euros e a débeda a curto prazo ascendia a 5.210.344,98 €, incluida unha operación de tesoureria de 80.000 €. Tan só a débeda recoñecida por sentencias xudiciais de algunhas empresas que entablaron contenciosos - administrativos contra o concello por impagos de cettificacións de obras de mandatos anteriores ascendeu á unha coantía de 1.200.000€, incluidos xuros de mora.

2°.- Nesta situación, os gobernos dos mandatos 2007 - 2011 e 2011 -2015 tiveron como prioridades económicas:

Normalizar a situación contable do concello, partindo dunha situación de inexistencia da mesma, coas dificultades que elo comportaba mesmo dun punto de vista técnico.

Saldar progresivamente as débedas contraidas con provedores e adxudicatarios/as de obras, por medio de acordos puntuais, contención do gasto, depuración de saldos e acollendonos ao coloquialmente coñecido * Plan Montoro “ para pago a provedores, que conlevaba obligatoriamente unha operación crediticia e un plan de axuste. Decisión esta necesaria se queriamos sair da situación heredada.

3°.- É certo que vostedes, cando entran a gobernar no concello en 2015, atópanse con débeda ainda non amortizada na súa totalidade, pero cunha situación económica en boa medida saneada e controlada, Lembremos os seguites datos:

A día 9 de xuño de 2015, os saldos das contas bancarias do concello de Mondonedo sumaban un total de fondos liquidos de 1.311.244,50 €. Cuantia que a ben seguro propiciou a cancelación definitiva da débeda contraida para o pago a provedores.

Quedaban asinados coa Deputación de Lugo diversos convenios parao exercicio 2015, por valor de 318.845,07€e contratadas e en fase de execución obras por valor de 150.041,25 €een trámite de adxudicación a adquisición dun camión por 57.596€.

Por último, os cogobernos dos mandatos aludidos, pese á situación económica descrita, sempre preservaron e garantiron o pago de nóminas ( non existen impagos ), e os servizos municipais; realizando xestións coas restantes administracións públicas para novas obras e servizos nas mellores condicións de financiamento.

Se despois de 10 anos de goberno, non teñen nada que ofrecer máis alá dunha mirada retrospectiva cargada de mala intención e malicia, pechen a porta ao sair.

Mondoñedo a 06 de decembro de 2025

Asinan este escrito:

Manuel Orlando González Cruz.

Modesto Díaz Garcia

Anxel Díaz Garcia

Magdalena Doménech Gruñeiro

Elena Freire Castro

Xusto Fernández Haro"

02/12/2025

O BNG DE MONDOÑEDO CONSIDERA QUE OS ORZAMENTOS DO 2026 AMOSAN UN GOBERNO ESTANCADO E SEN IDEAS

Á vista dos orzamentos aprobados o pasado xoves para o ano 2026 o BNG considera que se perdeu unha oportunidade para romper co continuísmo de anos anteriores e implantar políticas novas para transformar a vida diaria da veciñanza. “Todo vai seguir máis ou menos igual”, polo que denotan estar ante un goberno estancado e sen ideas novas para mellorar a vida diaria da veciñanza.

Mondoñedo, 2 de decembro do 2025. Para o voceiro do BNG, Eloi Cabanas, estes orzamentos non cumpren co mantemento dun servizo eficiente dos espazos e edificios públicos do concello e a falta de persoal, con dez prazas vacantes sen cubrir, é un factor que o goberno popular debera ter presente á hora de atender as necesidades do concello ao longo de todo o ano.

Eloi lamenta que estes orzamentos carezan de realismo e sexan só un rápido “corta e pega” de exercicios anteriores onde seguen aumentando partidas en gastos diversos ou outros traballos realizados por outras empresas profesionais que si se poderían facer desde o concello con medios propios.

-ANEXO DE INVERSIÓNS-

Para o BNG o anexo de inversións é unha mostra clara da falta de traballo institucional do goberno de Manuel Otero onde se fía todo ao remanente de tesourería para gastos xerais sen executar de anos anteriores e nas modificacións de crédito entre distintas áreas de gasto xa que inversións con aplicación orzamentaria doutras administracións só se recollen as correspondentes a conta do Plan Deputación e do PEIM por valor de 32.000 €.

Aos nacionalistas chámalles a atención que fora do anexo de inversión anuncien a previsión doutras inversións para o exercicio 2026 sen contaren con consignación orzamentaria necesaria por valor de 1169000 € e onde se repiten actuacións que quedaron pendentes de facer do ano pasado. “Na práctica son os mesmos orzamentos de sempre, a mesma canción pero máis cargada de bombo, con repetición de propostas que non foron capaces de amarrar neste exercicio polo que nos preguntamos que razóns nos van facer crer agora na capacidade do Partido Popular para rematar todos os proxectos anunciados para o vindeiro ano.”

-PROPOSTAS-

O BNG apunta que propuxo alternativas no debate dos orzamentos para o mantemento dos servizos que presta o concello como a necesidade de dispoñer de máis persoal cualificado para manexar os medios e a maquinaria coa que conta o concello así como a actualización da RPT para que estea adaptada á realidade actual do concello.

Demandan do goberno un control máis eficiente do gasto en festas e en axudas ao tecido asociativo con liñas de axuda ben en réxime de concorrencia competitiva e subvencións nominativas a aquelas asociacións que se sabe que organizan o mesmo evento tódolos anos ou unha partida especifica para incentivar o asentamento de empresas no polígono.

O BNG tamén botou en falta no orzamento partidas específicas para o arranxo das deficiencias da piscina municipal e denuncian que non se teñan en conta propostas que veñen demandando desde o seu grupo desde fai tempo e que foron aprobadas en pleno por unanimidade como e a elaboración dun inventario de camiños públicos de titularidade municipal ou medidas para o fomento do comercio local.



Eloi Cabanas considera insuficiente que o goberno se comporte como un mero xestor ao limitarse a intentar cubrir as necesidades básicas do concello, “unha vez máis os orzamentos para Mondoñedo son unha oportunidade perdida de dotar o noso concello de políticas novas e servizos máis eficientes para o conxunto da cidadanía”.