18/07/2026
Hoxe cúmprense 90 anos de que José Troncoso Faro, alcalde de por 'Unión Republicana', se vise obrigado a emprender o camiño do exilio tras o golpe de Estado fascista de xullo de 1936. Despois de pasar por Portugal e Cataluña, acabou internado nun campo de concentración no estado francés. Alí estableceuse definitivamente e retomou o seu oficio de xastre. Nunca regresou a Mondariz nin a Galiza.
Compartimos a requisitoria publicada en El Pueblo Gallego o 9 de outubro de 1936, na que se lle ordenaba comparecer ante un xuíz militar. Xunto ao seu nome aparecen tamén:
• Manuel Martínez Alonso, do Escobeiro.
• Celso Collazo, de Crecente, oficial de 1º do Concello de Mondariz e militante do Partido Galeguista. Foi asasinado polos sublevados e o seu corpo apareceu no Covelo o 22 de setembro de 1936.
• Francisco Bouza, do Grove, mestre en Frades e militante de Izquierda Republicana. Foi sometido a consello de guerra e condenado a 12 anos de prisión.
• Luís Soto, da Bola, mestre en Aboal e do PCE. Exiliouse tras a guerra, foi colaborador e secretario de Castelao no exilio e participou na fundación da UPG.
Noventa anos despois, seguimos lembrando a todas as persoas que sufriron a represión tras o golpe de Estado e 40 anos de ditadura franquista. A memoria democrática non é só unha homenaxe ás vítimas: é tamén un compromiso coa defensa da democracia, das liberdades e dos dereitos humanos fronte a calquera forma de autoritarismo.
Galiza non esquece!
