16/01/2026
📣 COMUNICADO
O Partido Popular de Malpica levará ao vindeiro pleno municipal unha moción para esixir ao Goberno de España que rectifique e flexibilice de inmediato a aplicación das novas obrigas administrativas impostas pola normativa europea de control pesqueiro, en vigor desde o pasado 10 de xaneiro.
Estas medidas supoñen un ataque directo á frota litoral e artesanal galega, e en particular á de Malpica, onde moitas familias dependen da pesca para vivir. O Goberno central, lonxe de defender aos nosos mariñeiros, está a impoñer un sistema burocrático pensado para grandes frotas industriais e totalmente alleo á realidade do noso mar.
Desde o PP de Malpica denunciamos que estas normas están a converter aos pescadores en funcionarios sen despacho, obrigándoos a dedicar máis tempo a trámites que a faenar, poñendo en risco a viabilidade económica das embarcacións e ameazando o futuro do noso porto.
As principais trabas que rexeitamos son:
• A imposición do diario electrónico de bordo (ERS) para buques de 12 metros ou máis, sen garantir medios técnicos axeitados nin apoio real ao sector.
• A obrigatoriedade dun caderno dixital de pesca, totalmente desproporcionada para embarcacións pequenas.
• A esixencia de avisos previos de entrada en porto de ata catro horas, unha aberración para unha frota que traballa con mareas curtas e condicións cambiantes.
• A trazabilidade dixital obrigatoria, imposible de cumprir en moitos casos pola falta de conectividade nos portos e a escasa capacidade tecnolóxica de pequenas embarcacións.
• A pesaxe obrigatoria das capturas antes da primeira venda, que só engade custos e complicacións innecesarias.
• Un endurecemento do control da pesca recreativa que castiga tamén ás nosas confrarías e comunidades mariñeiras.
O Partido Popular de Malpica acusa ao Goberno de España de manter unha actitude de pasividade e desprezo cara ao sector pesqueiro galego. Esiximos que faga uso inmediato das marxes que permite a normativa europea para aplicar un réxime de control realista, flexible e adaptado á pesca artesanal, e que deixe de poñer atrancos a quen sostén o noso litoral.
En Malpica, a pesca non é só economía: é identidade, tradición e modo de vida. Non imos permitir que decisións tomadas desde despachos de Madrid ou Bruxelas, sen coñecer o noso mar, afoguen aos nosos mariñeiros.
Defenderemos os intereses da nosa frota, da Confraría e de todas as familias que viven do mar.
