Frades,malia ser un concello eminentemente rural, goza dunhas condicións xeográficas que o deberan favorecer; desde a súa conformación paisaxística e medio natural até o seu emprazamento no eixo potencial Atlántico galaico-portugués, a 20 minutos de Santiago e a 40 de A Coruña. Todo este conxunto de factores leva décadas sendo desaproveitado de principio a fin por un goberno de actuación pasiva no
interese do pobo e activa no seu interese persoal, cunha xestión ineficaz e misteriosa, deste xeito Frades ficou ancorado nun atraso socioeconómico que parte da carencia infraestrutural e chega á perda de poboación. O único avance sustancial que viu Frades nas últimas décadas foi o traballo de concentración parcelaria, que non dependeu nin na súa maior parte do goberno actual. No BNG cremos que Frades ten potencial, cremos que se lle pode sacar moito partido á agricultura ecolóxica, ás enerxías renovábeis, a unha rede de infraestruturas adaptada á realidade dos fradenses, con zonas por onde camiñar, a un solo industrial que concentre a tendencia de espallamento da industria fradense, ás políticas sociais e de axuda a maiores, a un Frades con mobilidade interior e para o exterior, comunicado coas metrópoles e coa súa realidade... políticas progresistas feitas sen cor nin discriminación política de por medio, e desde unha Casa do Concello do pobo, de todo Frades, e non apenas dunha familia. Frades ten futuro, co apoio de todos, conseguiremos poñelo en marcha!
