Bng Catoira

01/09/2026

📣 CATOIRA APROBA DEFINITIVAMENTE O ORZAMENTO DE DE 2026 CON ESTABILIDADE ORZAMENTARIA E INFORMES POSITIVOS DE INTERVENCIÓN DO ESTADO.

🟢 Entre os 3,3 millóns de euros de gastos orzamentados e os 2,7 millóns do Plan de Investimentos superarase a cifra histórica de 6 millóns de euros en actividades e actuacións.

Secretaría recoñece que hai superávit e que se reduciu de maneira importante a porcentaxe de endebedamento, case a punto de cumprir co nivel legal, destacando que o traballo feito polo goberno local é “o camiño a seguir”

🟢 O Pleno do Concello de Catoira aprobou hoxe definitivamente o Orzamento Municipal de 2026, que presenta un superávit e consolida a recuperación económica da administración local e superará os 6 millóns de euros en actividades e actuacións. O alcalde Xoán Castaño amosouse moi satisfeito das contas, xa que avanzan no saneamento progresivo das finanzas municipais cumprindo de maneira escrupulosa as indicacións da Secretaría de Estado de Facenda e do Servizo de Intervención e Secretaría Municipais, que emitiron informes positivos sobre a estabilidade orzamentaria e subliñan unha mellora moi significativa no nivel de endebedamento.

Segundo o informe oficial de avaliación de regras fiscais do servizo de Intervención Municipal -obrigatorio para aprobar o Orzamento- o Concello cumpre claramente o obxectivo de estabilidade orzamentaria. A Subdirección Xeral de Xestión Orzamentaria e Financeira de Entidades Locais do Ministerio de Facenda, que debe controlar a situación económica viquinga, tamén deu o seu visto bo.

🟢 Ante as contas presentadas inicialmente, o departamento estatal esixiu ao Concello que reducise gastos en 48.000 euros e que tamén que axustase a súa previsión de ingresos en 120.000 euros como medida de prevención. O superávit inicial antes deses axustes era de 166.277,38 euros, mais aínda seguiu sendo positivo por 7.518,69 euros logo dos cambios requiridos.
O goberno local realizou as baixas no orzamento retirando 32.000 euros do fondo de continxencia e 16.000 euros (o que supón o 0,4% dos orzamentos) de partidas de subministracións, sen tocar ningún dos apartados de Cultura ou Servizos Sociais, considerados básicos polo goberno nacionalista.

Así mesmo, o alcalde explica que tamén se fixo a baixa na previsión de ingresos aínda sabendo con certeza que neste exercicio se ingresarán uns 200.000 euros cartos por licencias de apertura de negocios e obras a máis do prognosticado.
En canto ao endebedamento, o informe de Intervención recoñece que aínda que se excede o límite ao estar no 114% -cando está marcado por lei no 110%-, “analizados estes datos en comparación cos datos do exercicio anterior reduciuse o endebedamento, sendo este o camiño a seguir en futuros exercicios”.

🟢 O rexedor explica que os datos e valoracións do interventor son un grande paso adiante na recuperación económica iniciada polo goberno do BNG, chegando “a unha certa tranquilidade” tras atopar o Concello nunha situación económica “máis que delicada” hai tres anos, e “demostrando que a xestión económica feita e as decisións que se están a tomar dende entón son as axeitadas xa que melloran as contas progresivamente”.
Castaño apunta que coa aprobación definitiva do Orzamento no Pleno de hoxe ao Concello ábreselle un horizonte positivo. Subliña que non todo o traballo está feito, mais salienta o fortalecemento da situación económica, pois as contas municipais que hoxe tiveron o visto bo ascenden a 3,36 millóns euros de gastos que se suman aos 2,7 millóns de euros do Plan de Investimentos (non incluídos no Orzamento), superando a cifra histórica dos 6 millóns de euros para actividades e actuacións para este 2026.

🔴 O alcalde Castaño lamentou a actitude do PSOE, que non fixo ningún tipo de achega nin proposta de mellora durante o período de alegacións do orzamento, se ben anunciou que presentará un Contencioso Administrativo nos xulgados. O nacionalista destacou que o proceder de Alberto García volve manifestar que está “ancorado no odio e no rancor” e que “unicamente se move para intentar paralizar o Concello e prexudicar á veciñanza”. Salientou tamén a falta de respecto do socialista á Corporación representante de todas as veciñas e veciños por levantarse e marchar do seu escano mentres o goberno facía uso da súa quenda de palabra na explicación das contas, volvendo unicamente para votar en contra.

01/09/2026

🚜 INTENSAS SEMANAS DE MANTEMENTO E LIMPEZA NOS ESPAZOS PÚBLICOS DE CATOIRA

O Concello de Catoira está a desenvolver un intenso programa de mantemento, limpeza e acondicionamento en diferentes puntos do municipio. O obxectivo é mellorar a imaxe de Catoira e garantir as mellores condicións de uso para toda a veciñanza.

✅ Actuacións xa realizadas:
• Áreas recreativas de Portocanles e Curva de Patiño.
• Limpeza do CPI Progreso.
• Parques infantís de Tarrio e Gondar.
• Beirarrúas da avenida Muíños do Vento.
• Rozas nas pistas da parcelaria de Dimo.
• Contorna de Pedras Miúdas.
• Xardíns e espazos públicos da rúa do Concello.

🚧 Traballos para esta semana:
• Pista de tenis da Balastrera.
• Espazos públicos da parroquia de Abalo.
• Rozas nas pistas da parcelaria de Oeste.

Seguimos traballando día a día para coidar e embelecer o noso concello! Coa colaboración de todos, mantemos Catoira limpa. 🤝

28/08/2026

📣 CATOIRA ESIXE Á DEPUTACIÓN QUE “MOVA FICHA” DE MANEIRA URXENTE PARA REFORMAR A ESTRADA DE DIMO-COAXE

Xoán Castaño volve reclamar unha reunión para impulsar o proxecto, xa que o goberno local leva meses coa súa parte cumprida.

O Concello de Catoira vén de reclamar formalmente á Deputación de Pontevedra que desbloquee a mellora integral da estrada provincial EP-8703 Dimo-Coaxe e denuncia o que considera “un abandono evidente” do municipio por parte da institución provincial no relativo ás infraestruturas viarias. O alcalde, Xoán Castaño remitiu unha carta ao presidente da Deputación na que solicita unha reunión político-técnica urxente para abordar a situación do proxecto, determinar os trámites pendentes e establecer un calendario que permita impulsar definitivamente unha actuación que leva anos sendo demandada pola veciñanza e que agora mesmo semella paralizada.

O rexedor nacionalista destaca que a administración local leva meses coa súa parte cumprida para avanzar na mellora da estrada, despois de realizar neste mandato as xestións necesarias para conseguir as cesións precisas para executar a actuación. Porén, a pesar da disposición e colaboración municipal, a Deputación non deu ningún paso para avanzar no expediente.

Castaño lembra que o pasado mes de maio xa remitiu outro escrito ao presidente solicitando o impulso do proxecto. “Porén, dende entón, non houbo ningún movemento oficial: nin unha chamada, nin unha carta, nin un escrito, nin unha reunión. Absolutamente nada”, denuncia Castaño, quen considera que a veciñanza non pode seguir esperando indefinidamente.

O rexedor nacionalista amosa o seu malestar coa falta de xestión da Deputación porque considera que o caso da EP-8703 non é un feito illado, senón que forma parte dunha situación máis ampla de falta de investimentos e abandono das estradas provinciais en Catoira. Neste sentido, critica que o municipio apenas estea recibindo da Deputación “o xusto que lle corresponde” dos plans de axudas xenéricos, sen actuacións adicionais en materia viaria que permitan corrixir as importantes necesidades existentes. Lembra que nas estradas provinciais no que vai de mandato apenas se construíron uns 300 metros de cunetas e que Catoira quedou excluída do último contrato provincial de conservación de firmes.

Para o alcalde “hai un total esquecemento e abandono de Catoira por parte da Deputación no ámbito das infraestruturas viarias”. Unha situación que, ao seu xuízo, resulta especialmente difícil de comprender tendo en conta a disposición demostrada polo Concello para colaborar coa institución provincial. “Sempre fomos partidarios de colaborar, de falar e de buscar solucións sen enfrontamentos. Mais unha cousa é actuar con responsabilidade e outra que se confunda esa actitude coa posibilidade de esquecer á veciñanza de Catoira. Por aí non vai pasar este Goberno local”, engade.

Por este motivo, o Concello reclama unha reunión urxente coa Presidencia da Deputación, a deputada responsable da área e o persoal técnico, co obxectivo de coñecer a situación exacta do expediente da EP-8703, determinar os pasos pendentes e fixar prazos concretos para desbloquear a actuación, así como para falar doutras melloras na rede viaria provincial.

27/08/2026

📣 O CONCELLO DE CATOIRA APLAUDE O RECOÑECEMENTO DA ROMARÍA VIKINGA ENTRE AS CINCO MELLORES FESTAS POPULARES DE ESPAÑA.

A celebración catoirense sitúase no quinto posto do ranking de Ron Barceló e Billionhands por diante doutras citas moi recoñecidas no Estado e mesmo a nivel internacional.

O Concello de Catoira vén de expresar a súa enorme satisfacción polo recoñecemento acadado pola Romaría Vikinga, que se sitúa no quinto posto do ranking das festas de pobo máis destacadas de España elaborado por Ron Barceló e a plataforma Billionhands. A celebración catoirense irrompe por primeira vez nesta clasificación e faino compartindo espazo con algunhas das festas populares máis recoñecidas do Estado e mesmo a nivel internacional.

Para o alcalde Xoán Castaño aparecer nunha relación destas características supón un importante “espaldarazo” ao traballo realizado nos últimos anos para mellorar a Romaría en calidade, organización, autenticidade e proxección, e confirma a percepción positiva que o Concello vén detectando tanto entre a veciñanza como entre as persoas que visitan Catoira durante a celebración.

O rexedor considera especialmente significativo compartir recoñecemento La Patum de Berga, a Batalla do Viño de Haro, o Descenso Internacional do Sella ou La Tomatina de Buñol, citas cunha enorme notoriedade e proxección.

O perfil elaborado para a Romaría Vikinga por Billionhands pon o foco nos elementos que lle confiren á celebración catoirense a súa personalidade diferencial: o desembarco vikingo xunto ás Torres de Oeste, a súa condición de Festa de Interese Turístico Internacional, o mercado medieval e os desfiles incorporados polo BNG na celebración, a música en directo e a gastronomía galega.

A análise destaca especialmente que a recreación histórica está “profundamente ligada ao patrimonio local” e que a presenza da veciñanza e a singularidade da paisaxe das Torres de Oeste lle outorgan “personalidade propia”. Tamén salienta que o desembarco do primeiro domingo de agosto complétase cunha programación cultural moi ampla arredor da recreación histórica.

Para o Concello resulta especialmente satisfactorio que sexan precisamente estes aspectos os que se poñan en valor. “É moi significativo que o que destaca o ranking sexa exactamente aquilo que nós queremos preservar e potenciar: o patrimonio, a historia, a participación da veciñanza, a paisaxe, a gastronomía e unha programación cultural completa. Esa combinación, a nosa maneira de entender a festa, é a que fai que a Romaría Vikinga sexa única”, sinala Castaño.

O Concello destaca a importante repercusión que pode ter para a vila aparecer nunha clasificación destas características, ao tratarse dun contido cunha capacidade de difusión que vai moito máis alá do propio ranking. “Aparecer entre as cinco mellores festas populares de España fai que Catoira chegue a moita xente que posiblemente non coñecía a nosa celebración”, explica Castaño, quen entende que o impacto pode multiplicarse ademais a través das redes sociais e das publicacións posteriores que recollen esta selección, especialmente en medios e plataformas vinculadas ás viaxes e ao turismo.
“É unha oportunidade para que moitas persoas descubran Catoira, a Romaría Vikinga, o noso patrimonio e todo o que podemos ofrecer. En certa maneira, posiciónanos no mapa das grandes festas populares, e iso ten un valor promocional evidente para a vila que nace do noso bo facer e do boca a boca, non dunha publicidade pagada”, apunta.

En calquera caso, Castaño subliña que o quinto posto no listado das festas populares “non nos fai cambiar o rumbo, senón todo o contrario: anímanos a seguir traballando na mesma dirección”. “Queremos seguir facendo da Romaría Vikinga unha festa de referencia, pero sen perder nunca a súa esencia, a súa autenticidade e a súa calidade.

Ese é o maior recoñecemento que podemos ter”. O nacionalista subliña que non hai intención de facer unha festa máis numerosa simplemente por facer máis grande a cifra de persoas asistentes, senón a intención de “apostar pola calidade, pola autenticidade e por ofrecer unha experiencia cada vez mellor”.

Neste sentido, considera que “o importante é que quen veña a Catoira goce, que a veciñanza se sinta orgullosa da súa festa e que cada edición sexamos capaces de mellorar no que sexa posible, coidando cada vez máis os detalles. Non buscamos un evento masivo e descontrolado, todo o contrario, queremos calidade e autenticidade, que a experiencia sexa inmellorable”, engade.

27/08/2026

📣 CATOIRA CORTARÁ ESTE SÁBADO A PONTE DO PASEO FLUVIAL PARA INICIAR A SÚA RENOVACIÓN

🟢 O alcalde Castaño explica que a actuación permitirá mellorar a conexión entre a avenida Eloy Domínguez coa zona dos Muíños de Moure.

⛔ O Concello de Catoira procederá este sábado ao peche da ponte que forma parte do paseo fluvial e que une a Rúa da Estación coa zona dos Muíños de Abaixo na Ponte para iniciar os traballos de renovación da estrutura. As obras comezarán coa desmontaxe da estrutura, que presenta actualmente varias táboas e elementos de madeira deteriorados, polo que o Concello considera necesario actuar para garantir as condicións de seguridade.

A ponte xa fora pechada durante a celebración da Romaría Viquinga, precisamente como medida preventiva ante o estado dalgunhas das súas madeiras. Nesa ocasión, o Concello advertiu expresamente do risco e estableceu o corte do paso, aínda que a pesar das indicacións “houbo persoas que continuaron utilizando a ponte”, explica o alcalde Xoán Castaño.

A mellora deste paso formaba parte da nova fase de actuacións prevista polo Concello para continuar coa recuperación e posta en valor do paseo fluvial, mais a súa execución estaba pendente de dispoñer do financiamento necesario, xa conseguido. A actuación suporá un investimento de 40.000 euros, neste caso financiados grazas a un cambio de finalidade do Plan + Provincia da Deputación de Pontevedra.

O alcalde lembra que esta intervención intégrase no paquete de obras deste ano para o paseo fluvial, de 12.000 euros procedentes do canon eólico, xa executado e outros 25.000 euros achegados polo programa Mar de Santiago tamén para realizar renovacións de estruturas e táboas.

O Concello enmarca esta actuación no traballo continuo de mantemento e mellora do paseo fluvial das Torres do Oeste, unha infraestrutura con 1,6 quilómetros de lonxitude en madeira dun ancho variable de entre 1,5 e 2,5 metros que require actuacións periódicas para garantir a súa seguridade e conservación. Desde 2023, o Concello leva destinado máis de 200.000 euros á súa rehabilitación e posta ao día, utilizando fondos provinciais, axudas do goberno galego para a mellora de infraestruturas turísticas, do Fondo de Compensación Ambiental, así como financiamento europeo.

Castaño tamén lembra que está pendente a construción por parte de ADIF unha nova pasarela peonil elevada na entrada da antiga Cedonosa, xunto a STAC, que substituirá definitivamente o antigo paso a nivel e permitirá un cruzamento seguro da vía férrea, permitindo amais outra conexión directa entre a avenida Eloy Domínguez e o paseo fluvial.

26/08/2026

A veciñanza de Catoira volveu mobilizarse para denunciar as carencias que arrastra desde hai meses o seu centro de saúde. A Plataforma do Centro de Saúde de ...

26/08/2026

📣 CATOIRA PREPÁRASE PARA A TERCEIRA EDICIÓN DO ‘Trofeo BasketBaia de baloncesto 3x3’ QUE SE CELEBRARÁ O VINDEIRO 5 DE SETEMBRO.

⛹🏼‍♂️ O torneo, que terá lugar na Praza de Santa Baia, agarda chegar ao cento de participantes.

🏀 O Concello de Catoira celebrará o vindeiro sábado 5 de setembro a terceira edición do ‘Trofeo BasketBaia de baloncesto 3x3’, unha cita deportiva que continúa medrando no calendario municipal e que volverá levar o deporte ás rúas e espazos públicos da vila viquinga. O torneo desenvolverase na Praza de Santa Baia, recuperando así o escenario exterior que xa acolleu a primeira edición, e contará con competicións en diferentes categorías, desde as idades máis temperás até sénior, aspirando a reunir un cento de participantes.

🎽 O alcalde de Catoira Xoán Castaño destaca a consolidación dunha iniciativa que “ano tras ano vai gañando presenza e que combina perfectamente dous dos obxectivos polos que apostamos desde o goberno local: fomentar a práctica deportiva e dinamizar os espazos públicos das nosas parroquias”. Neste sentido, subliña que o feito de levar o torneo á Praza de Santa Baia permite tamén “sacar o deporte das instalacións pechadas e convertelo nun espectáculo aberto, no que poden participar deportistas e achegarse tamén veciñas, veciños e visitantes”.

O Concello salienta especialmente a aposta por un formato como o 3x3, unha modalidade que facilita a creación de equipos e permite organizar competicións nos espazos públicos con medios relativamente sinxelos. Ademais, explica Castaño, o seu carácter dinámico e a duración dos encontros favorecen que a xornada se converta nunha actividade deportiva e de lecer para participantes e público.

Pola súa banda, o concelleiro de Deportes, Raúl Gómez, anima a participar nesta terceira edición e salienta a diversidade de idades que abrangue o BasketBaia. “Queremos que o baloncesto sexa unha modalidade accesible e atractiva para todo o mundo, desde as nenas e nenos que están comezando até as persoas adultas que xa levan anos practicándoo”, explica. O torneo contará con tres categorías: A, para premini/mini, de 8 a 11 anos; B, para infantil/cadete, de 12 a 15 anos; e C, para júnior/sénior, a partir dos 16 anos. As primeiras categorías comezarán a competir ás 10.30 horas, mentres que a categoría C iniciará os seus partidos ás 16.30 horas.

As inscricións permanecerán abertas até as 22.00 horas do xoves 3 de setembro. O prezo será de 20 euros por equipo na categoría A, 25 euros na B e 30 euros na C. As persoas interesadas poden formalizar a inscrición a través do código QR incluído no cartel do torneo ou solicitar información no teléfono 605 273 288 e no correo electrónico [email protected].

En caso de choiva, a actividade trasladarase ao Pavillón Polideportivo Municipal de Catoira, garantindo así a celebración do torneo con independencia das condicións meteorolóxicas. O certame está organizado polo Concello de Catoira en colaboración co Club de Baloncesto Río Ulla.

26/08/2026

📣 CATOIRA REFORZA O SEU SERVIZO TURÍSTICO E DUPLICA A ATENCIÓN ÁS PERSOAS VISITANTES

🟢 O Concello conta cunha nova informadora da Rede Rías Baixas, o que permitirá potenciar aínda máis as visitas guiadas que se están programando.

🟢 O turismo de Catoira gaña capacidade e servizo. O Concello de Catoira vén de incorporar unha nova informadora da Rede Rías Baixas, o que supón duplicar o persoal dedicado á atención das persoas visitantes e ofrecer un servizo máis amplo e flexible tanto no CACTO como na nova oficina instalada no Espazo das Torres.

Segundo explica o alcalde Xoán Castaño, a nova profesional estará en activo por un período de catro meses cunha xornada de 30 horas semanais e traballará en coordinación coa técnica que xa prestaba servizo. Esta colaboración permite que as dúas profesionais poidan cubrir simultaneamente diferentes necesidades, ampliando os horarios de atención e facendo posible organizar actividades e visitas guiadas (previa concertación) sen quedar sen atención para o resto do público.

Castaño salienta que “esta incorporación notarase xa desde o primeiro momento”. Segundo explica, “agora poderemos atender ás persoas que visitan o CACTO, recibir grupos e facer visitas sen ter que pechar a oficina, algo que antes estaba máis limitado pola dispoñibilidade de persoal”.

A incorporación da nova informadora permite tamén ampliar e completar os horarios de atención ao público. O CACTO estará aberto todas as mañás, de luns a domingo, e contará tamén con atención durante numerosas tardes, facilitando así o acceso ao centro durante os períodos de maior afluencia de visitantes.

A nova profesional da Rede Rías Baixas desenvolverá tarefas de información e promoción turística desde a Oficina de Turismo, difundindo os recursos patrimoniais, naturais e culturais de Catoira e da comarca e colaborando na organización de actividades de promoción turística.

Tamén se encargará da elaboración e actualización dos datos estatísticos de visitantes e das memorias de actividade, da xestión dos materiais informativos e promocionais e das tarefas vinculadas á participación de Catoira na rede provincial de oficinas ‘Info Rías Baixas’.
Para Castaño, “o obxectivo é que quen veña a Catoira atope información, acompañamento e posibilidades para coñecer mellor o municipio”. “Temos un patrimonio excepcional e queremos que o CACTO sexa non só un lugar que se visita, senón tamén unha porta de entrada para descubrir todo o que Catoira pode ofrecer”, engade.

A contratación da nova informadora é posible grazas á adhesión de Catoira á Rede de Oficinas de Turismo Rías Baixas e á subvención obtida polo Concello para reforzar o persoal de atención turística. O Concello de Catoira asumirá o 25% do salario bruto, mentres que a maior parte do custo estará cuberta pola axuda concedida.

21/08/2026

📣 O CONCELLO DE CATOIRA CONXELA POR TERCEIRO ANO CONSECUTIVO O PREZO DO MADRUGADA.

📝 As inscricións para o vindeiro curso 2026-27 abriranse o luns 24 de agosto e o servizo comezará o 7 de setembro con horario de 7.30 a 9.30 horas no CPI Progreso.

O Concello de Catoira manterá durante o curso 2026/27 o servizo Madruga, unha das principais ferramentas municipais de apoio á conciliación das familias traballadoras, e farao por terceiro ano consecutivo coas taxas conxeladas. Segundo explica o alcalde Xoán Castaño, as familias poderán contar cunha alternativa para atender as súas fillas e fillos nas horas previas ao inicio da xornada escolar sen asumir un incremento no custo do servizo.

O período de inscricións abrirase o vindeiro 24 de agosto. O Madruga desenvolverase nas mesmas condicións que en cursos anteriores (para rapazada de até 14 anos incluídos), no CPI Progreso en horario de 7.30 a 9.30 horas. As tarifas manteranse tamén conforme ás anualidades previas: 40 euros ao mes por usuaria ou usuario, con 10 euros mensuais para a segunda irmá ou irmán e seguintes. Para aquelas familias que precisen utilizar o servizo de maneira puntual, tamén se ofrece un bono de 10 sesións por 35 euros.

O alcalde Castaño salienta o compromiso do Concello coa conciliación e coa contención dos prezos públicos subliñando que o goberno local opta por manter a contía económica do servizo a pesar do incremento xeral dos custos, coa finalidade de que siga sendo unha prestación accesible. “A conxelación das taxas públicas é unha decisión consciente do Goberno local para apoiar as familias e manter servizos que son fundamentais no día a día, especialmente para aquelas persoas que teñen horarios laborais que non encaixan co horario escolar”, subliña.

As familias interesadas poderán formalizar a inscrición a partir do 24 de agosto mediante o formulario dispoñible na sede electrónica do Concello de Catoira ou de forma presencial no departamento de Servizos Sociais, onde tamén poderán solicitar información sobre o funcionamento do servizo e resolver as dúbidas relacionadas coa matrícula.

19/08/2026

🏀 ✨ O vindeiro sábado 5 de setembro, non te podes perder a terceira edición do evento deportivo de baloncesto 3x3 "BasketBaia", que se celebrará na praza de Santa Baia a partir das 10:30 h. (En caso de choiva trasladarase ao polideportivo municipal de Catoira).
​Será un día cheo de deporte, diversión e bo ambiente para todos os amantes do baloncesto.

🏀✨O vindeiro sábado 5 de setembro, non te podes perder a terceira edición do evento deportivo de baloncesto 3x3 "BasketBaia", que se celebrará na praza de Santa Baia a partir das 10:30. (En caso de choiva trasladarase ao polideportivo municipal de Catoira).

Será un día cheo de deporte, diversión e bo ambiente para todos os amantes do baloncesto.