04/09/2026
CADA VEZ CON MENOS RECURSOS.
A primeira hora da mañá fomos avisados pola aparición de cinco cachorros dentro dunha caixa, no interior dun contedor na avenida do Balneario. Os animais foron retirados polo servizo de lacaría.
Ao mediodía, un traballador sufriu unha caída desde un tellado na rúa Virtud. Foi atendido polos servizos sanitarios, que apreciaron inicialmente unha posible lesión no nocello e outra posible lesión na cadeira. Agardamos de corazón que finalmente non sexa nada grave e que se recupere pronto.
Pero a intervención das 18.00 horas aproximadamente foi a que máis nos fixo reflexionar.
O 061 Urxencias Médicas solicitou, a través do 112, o noso apoio para trasladar os facultativos desde o heliporto ata o PAC. E aquí atopámonos, unha vez máis, coa realidade coa que traballamos.
O vehículo de emerxencias que empregamos habitualmente, a pick-up, xa non está dispoñible para o Servizo Municipal de Emerxencias, ao ser destinada a brigada de prevención e extinción de incendios forestales, contratada por un convenio firmado coa Xunta de Galicia. Así que a dotación de garda, tivo que preparar o vello Terrano, retirando elementos do interior para intentar facer sitio ao equipamento sanitario e á padiola.
Finalmente, os médicos tiveron que ser trasladados pola Policía Local no seu propio vehículo patrulla, algo que tampouco é o máis adecuado nin cómodo para este tipo de intervencións.
E aquí queremos facer unha reflexión, con todo o respecto, se antes xa traballabamos con medios moi limitados, agora estamos aínda máis limitados.
Somos poucos e, habitualmente, unha soa persoa por quenda. Se ademais dos poucos efectivos dispoñibles imos perdendo os medios materiais necesarios, chega un momento no que resulta imposible facer o traballo como deberiamos.
Non se trata de presumir de facer máis con menos. Trátase de que, por moi boa vontade, experiencia e profesionalidade que teñamos, sen medios é imposible dar o servizo que a cidadanía merece.
Hai moitas intervencións e situacións que decidimos non publicar porque, sinceramente, ás veces dá vergoña ter que explicar as condicións nas que estamos traballando. Pero o acontecido hoxe cremos que supera un límite.
O pouco que temos non se pode ir retirando. Porque cando se retiran medios dun servizo de emerxencias, non se está retirando simplemente un vehículo, estase limitando a capacidade de resposta ante unha emerxencia.
E isto non vai de política, nin de persoas. Vai de seguridade, prevención e servizo público.
Nós seguiremos facendo o noso traballo coa mesma profesionalidade de sempre. Pero necesitamos algo tan básico como medios e recursos para poder facelo.
