25/05/2026
🇵🇸 Loiuko aireportuan Global Sumud Flotillako aktibisten eta harrera egitera gerturatu ziren senide, lagun eta kideen aurkako poliziaren basakeriak kapitulu berri bat gehitu dio Ertzaintzaren poliziaren indarkeriari. Armada sionistak aktibista hauek bahitu zituen nazioarteko uretan, eta torturak eta sexu erasoak jasan zituzten, horietako batzuk saihets-hezurra apurtuta edo esku bat hautsita iritsi zirelarik, Ertzaintzaren bultzadekin, borra-kolpeekin eta atxiloketekin hartu zituzten. Bideoak mundu osoan zabaldu dira, Ertzaintza eta Eusko Jaurlaritza salatuz eta historiako estatu-gobernu aurrerakoienaren isiltasun konplizea seinalatuz.
Ertzaintzaren basakeriari kontzentrazioekin eta Bilboko manifestazio handi batekin erantzun diogu; milaka lagun atera gara kalera 24 ordu baino gutxiagoan, 30 gradutik gorako beroarekin. “Vergüenza me daría ser policía; Herriak ez du barkatuko; Boikot Israel Palestina askatu” izan ziren amorruz beterik oihukatu genituen kontsignetako batzuk. 48 ordu igaro dira, eta ertzainek beren postuetan jarraitzen dute, beren plaka, soldata eta zigorgabetasunarekin. EAJ-PSEren Eusko Jaurlaritzak ezkutatu ezin duen erabateko eskandalua da.
Jokabide basati hau EH Bildu ertzain berrien Arkautiko graduazioan lehen aldiz egon den aste berean gertatu da. Ezker Abertzaleko dozenaka milaka militante eta kiderengan izugarrizko eragina, nahasmena eta haserrea sortu duen zerbait, eta bereziki mingarria Estatu aparatuaren errepresiorik basatiena beren azalean bizi izan duten belaunaldientzat. Ezker Abertzaleko zuzendaritza alde bat hautatzera behartuta egongo da. Ezin da aldi berean Arkauten eta borroka sozialean egon. Ez gaitu polizia eredu batek zapaltzen, poliziak zapaltzen gaitu.
https://ezkeriraultzailea.net/index.php/berriak/euskal-herria/2274-ertzaintzaren-basakeria-loiuko-global-sumud-flotillako-aktibisten-aurka
