11/02/2024
راقت لي الثمن/ و القيمة
ساندوتش_طعمية
الفنان علي الشريف "دياب" في فيلم الأرض وهو بياكل الطعمية قال ياما أنتو ممتعين نفسكو يا أهل البندر ، لو أنت من أطفال ريف زمان أكيد عارفين شعور دياب ، كان مستعد يضحي بفطيرة مشلتتة ومعاها قطعتين جبنة قديمة ثمنهم النهارده 200 جنيه عشان ساندوتش طعمية ب 5 جنيه .. لو خيرت طفل بين قطعة شيكولاته ب 20 جنيه وجاكيت ب 1000 جنيه هيختار الشيكولاته .
فيه فرق بين ثمن الأشياء وقيمة الأشياء ، واحد موظف وعنده حتة أرض كردون مباني والوظيفة مش كفاية ، زوجته طلبت الطلاق من ضيق الحال وأولاده مش عارفين يعيشوا بمرتب الوظيفة ، قيل له بيع الأرض ورتب حياتك و حياة أولادك قال لأ.. أنا سايب الأرض دي لهم في المستقبل ، قلت له هتفيد بإيه بعدين ؟!! وهما حاليا مش لاقيين ياكلوا ، الأرض لها ثمن لكن لمة أسرتك حواليك لها قيمة .. إيه الفرق بين ثمن الأشياء وقيمة الأشياء ؟
لو ابنك بقي راجل ومش شايفك أعظم أب في الدنيا يبقي ملكش أولاد وأنت بالنسبة له مجرد محفظة فلوس يعني شىء له سعر مش قيمة ، لو زوجتك عاشت معاك سنين ومش شايفاك رقم واحد في حياتها يبقي أنت وأنتي بالنسبة لها قايمة ومؤخر وشوية عفش مش إنسان له قيمة ، بلاش تخليهم يستعجلوا موتك عشان يورثوك لكن خليهم يتمنوا وجودك عشان يعيشوا معاك ، أي شيء له ثمن هو رخيص والثراء هو القدرة على امتلاك القيمة ، امتلاك ما لا يُشتري ..💴💵💵💰💰
مش كده ولا إيه؟!!✔️‼️👌
