مش فاهم ليه

10/05/2025

الهري شغال على مشاركة قوات عسكريه مصريه في و كله بيقولك شايفين احنا جامدين ازاي و بوتن طلب من مصر تشارك و كدهون ..

أحب أقولك إن #مصر بتشارك بقواتها في إحتفالات النصر ـ مع فرق عسكريه من دول صديقه أخرى ـ لأن مصر فعلياً من الدول اللي أعلنت الحرب على دول #المحور في الحرب العالميه التانيه سنة ١٩٤٥ و ده بعد قيام القوات الإيطاليه بغزو الحدود المصريه وقصف عدد من المدن أثناء الحرب و بكده تعتبر مصر من ضمن قائمة الدول الحليفه لروسيا في هذه الحرب و ده كلام عمنا #بوتن على فكره مش كلامي
بس يا سيدي فإحنا كنت بنحتفل مع حلفائنا و في نفس الوقت بنوصل رساله ضمنيه بتغيير المعسكر و خريطة التحالفات السياسيه و الإقتصاديه و العسكريه و ربنا يكرمنا و نرجع بصفقة دفاعات جويه من إللي روقت بيها باكستان طيارات الرافال و السوخوي الهنديه😉⚜️

08/05/2025

في يوم من الايام صحي الصبح رئيس الوزراء الباكستاني علي رساله من شاب يعمل في هولندا بتقول " حتى يتسنى لباكستان البقاء كدولة مستقلة فإن عليها إنشاء برنامج نوويّ"

طبعًا ده كلام بديهي، أنا وأنتَ هنقوله واحنا قاعدين على القهوة، لكن خطاب مُرسل من شخص لرئيس الوزراء، فده أكيد لُه مغزى مُهم..

رئيس الوزراء الباكستاني ياخد الكلمتين و يسكت !!!
لا طبعا بيقرر أنه يكلف المُخابرات الباكستانية بعمل تقرير كامل عن الشاب مُرسل الرسالة دي عشان يكتشفوا أمور في غاية الأهمية..

طلع مين الراجل ده بقى

الاسم "عبد القدير خان" من مواليد سنة 1936 يعني قبل إعلان دولة باكستان المُسلمة ب11 سنة..

من مواليد الكيان المُسمى بالهند القديم..

انتقل لدولة باكستان سنة 1952 يعني بعد إعلان قيام الدولة بخمس سنوات على طول وهناك تلقى تعليمه في جامعة كاراتشي وتخرج عن كلية العلوم..

عشان يشتغل كمُراقب للمقاييس والأوزان في وظيفة حكومية درجة تانية ويستقيل منها والكلام سنة 1960..

يقرر عبد القدير أنه يسافر على ألمانيا عشان يكمل تعليمه هناك بجامعة برلين وتخصص في علوم المعادن ..

وأثناء إقامته في ألمانيا بيقابل بنت جميلة هولندية من أصول افريقية اسمها "هنى" بيحبها ويعرض عليها الزواج بعد ما بقى مُغرم بيها..

توافق البنت على شرط إنها عايزة تعيش في هولندا موطنها وعليه بيوافق "عبدالقدير" أنه يسافر معاها على هولندا ويكمل دراسته هناك ..

ويلتحق هناك بجامعة "دلفت" الهولندية ويتخرج مُتخصصًا في علوم المعادن سنة 1967 وبعدها بخمس سنين يستغل قُرب بلجيكا وياخد درجة الدكتوراة من جامعة "لوفين" في بروكسل..

حاول يعرض قُدراته على أكتر من شركة باكستانية لكنه غالبًا ما قُوبل بالرفض..

محدش كان شايف مين ده، ولا بيقدر يعمل ايه، أصل معندوش واسطة ولا لُه حد مُهم يتوسط له..

فكان مكمل في هولندا لحد ما شركة "FDO" الهولندية عرضت عليه أنه يشتغل معاهم في مشروع تطوير المعادن..

تشاء الأقدار إن الشركة دي تكون ضلع أساسي في المُنظمة الأوروبية المُتخصصة في البحوث بعلوم المعادن وتخصيب اليورانيوم..

دي كانت مُنظمة سرية بتشتغل على تصنيع المواد اللازمة لتصنيع القنابل الذرية وتمويلات المشاريع النووية في الدول الكُبرى ...

مُنظمة في غاية السرية والخطوُرة، مش أيّ حد بيشتغل فيها يعني..

المُهم إن كل المعلومات والسيرة الذاتية دي وصلت لرئيس الوزراء الباكستاني واستغرب جدًا من الشاب الي عايز يرجع لباكستان ويسيب كل المجد ده..

فيقرر أنه يُكلف المُخابرات أنها تكشف دوافع الشاب ده..

فيكتشفوا إن الدافع الرئيسي له هو العودة لباكستان ومُساعدة البلد فعلاً ضد الهند..

عبدالقدير خان كان معروف بتديُّنه وإخلاصه الشديد للدين الإسلامي..

فيقرر أنه يخلي المُخابرات أنها تشتغل على انها تجيبه من هولندا بس من غير ما هولندا ولا الغرب كله يعرف..

المُنظمة الي كان شغال فيها دي مدعومة من الولايات المتحدة الأمريكية وبريطانيا، واسرائيل..

يعني أي خـروج وتسريب للمعلومات لأي جهة تانية يُعتبر خطيئة ولازم تعقُبها وهيمنعوا أي حركة منها وخارجهـا..

وبالفعل مع نهاية السنة يُفاجئ الهولنديين والعاملين بالمُؤسسة دي إن عبدالقدير والي هو واحد من ضمن العقول الفذّة بالمنظومة دي مبقاش موجود..

في الواقع الراجل غادر البلاد كلها في يوم وليلة من غير ما حد يعرف..

عشان يستلم شُغله في الوكالة النووية الباكستانية وتحديدًا سنة 1976..

الراجل بدأ يستثمر كل العلم والخبرة والمعلومات الي تلقاها طوال سنين الخبرة المُضنية في إنه ينقلها لزُملاءه هناك في باكستان..

وسنة 1981 الرئيس الباكستاني نظير جهوده الغير معهودة يغير اسم معامل البحوث النووية الباكستانية عشان يسميها على اسمه "معامل عبدالقدير خان" ..

وفي خلال خمس سنوات قدر "عبدالقدير خان" من إنه يختصر عشرات السنين من العمل والشغل ويمهد الطريق لأول قنبلة نووية باكستانية..

ينشُر كتاب "القنبلة الاسلامية" سنة 1981 يتكلم فيه عن رحلة كفاحه وصولاً للنتيجة الحاليـة..

ومن بعدها العالم يتقلب حرفيًا، الراجل الغامض الي محدش كان عارف له سكة تأكد وجوده في باكستان حيثُ يعمل كمُطور للبرنامج النووي الباكستاني..

الأمر الي يضطر الهند بقى والي هي العدو اللدود أنها تسرع من عملية التطوير النووي..

وسنة 1998 تعمل تاني تجربة نووية تحت مُسمى "عملية شكتي" وشكتي ده يا رفيق إسم لإله من آلهة الهندوسية ويتم تنفيذها بنجاح..

بس المرادي الوضع مُختلف..

بعدها بأسبوعين وبس..

تقوم جمهورية باكستان بأول تجربة نووية..

التجربة دي مكنتش عادية، وإنما كانت بتجرُبتين مرة واحدة..

واسمهم "عملية تشاغاي 1" و "تشاغاي 2"..

مُحملين على صواريخ بالستية اسمها "حتيف غوري" ..

وحتيف هو اسم سيف نبي الله، وغوري هو اسم البطل الاسلامي شهاب الدين غوري الي ظهر في القرن ال16..

وأعلن في مُؤتمر صحفي "عبدالقدير خان" إن القنبلة النووية الباكستانية أقوى بمراحل من القُنبلة النووية الهندية وده بسبب استخدامه لليورانيوم المُخصب في أحشاء القنابل دي..

عشان تتزّن كفة الصراع الهندي الباكستاني أخيرًأ..

ويخرُج الباكستانيين في مُظاهرة احتفاء بالرجل المُعجزة الذي ظهر من العدم مُهديًـا باكستان واحد من أعظم الإنجازات على مرّ التاريخ..

بس الي حصل بعد كده كان مأساوي شوية..

سنة 2004 ظهر "عبدالقدير خان" في تصريحات تليفزيونيية استعرض فيها مدى قُدرات الجانب الباكستاني النووية واستعداداتهم المهيبة..

الظهور ده أثار جدل واسع أدى لتدخُل وضغوطات من أمريكا ودول تانية على الرئيس الباكستاني وقتها الي فصّل "عبدالقدير خان" من منصبه وأحاله للتقاعد وحدد إقامته في بيته تحت الحراسة المُشددة..

ممنوع يخرُج أو يتحرك من البيت إلا بإذن..

كمان خرجت تقارير أمريكية وقتها بتقول إنه ساعد في تطوير البرامج لتخصيب اليورانيوم في كل من إيران وليبيـا..

وده خلّى العالم كله يشوف إن عبدالقدير خطر مُميت ماشي على الأرض..

ووسط أكتر من مُحاولة إغتيال فاشلة من السُلطات الهولندية والأمريكية وغيرهم على مدار سنوات..

النهاردة بتزيد التكهُنات حوالين الراجل إذا ما كان حيّ أو ميت ومحدش يعرف عنه حاجة..

في مرة سنة ٢٠١٣ خرج من معزله وكان في تجمهُر كبير لمُحبيـه ومُريدينه بيحييوه..

لأن العالم الغربي كله في حالة من الذُعر، بس من عقـل الرجل ده..

الرجل ده الي بسبب إخلاصه وتفانيه لإعلاء كلمة الله ليومنا هذا استحق مكانته كفارس من فُرسان الإسلام..


#منقول

07/05/2025

مكنتش أعرف إن الباكستانيين بصورم قوي كده😅


#الهند #باكستان

01/04/2025

"قطر جيت"... الفضيحة اللي خلت نتنياهو يشيل رئيس المخابرات الشاباك بنفسه!

اللي حصل في إسرائيل اليومين اللي فاتوا دول مش مجرد فضيحة...
إحنا قدام فيلم بطله بنيامين نتنياهو، وضحيته رئيس الشاباك رونين بار، والممول الرسمي قطر!

القصة ببساطة؟
قطر كانت بتصرف ملايين الدولارات على حملات علاقات عامة جوا إسرائيل عشان تلمّع صورتها...
واخدلى بالك انت من تلمع صورتها داخل المجتمع الإسرائيلي دي
بس المشكله بقى إن الناس اللي كانت بتقبض مستشارين شخصيين لنتنياهو، شغالين معاه في حملته الانتخابية، ومنهم اللي كان بيكتبله خطاباته!
و من أهم الأسماء اللي ظهرت في القضية
إيلي فيلدشتاين – كان المتحدث العسكري باسم نتنياهو، واتّكشف إن ليه صلات مالية مباشرة مع أطراف قطرية.

أوريتش وأينهورن – مستشارين من قلب مكتب و حملة نتنياهو... التحقيقات بتقول إن علاقتهم بقطر بقالها سنين.

لحد هنا ممكن نقول فضيحة عادية... لكن الكارثة بدأت لما رئيس الشاباك "رونين بار" بدأ يحقق في الموضوع.

عارف نتنياهو عمل إيه؟ شاله من منصبه بحجه تقصيره فى 7 اكتوبر!

آه والله زي ما بقولك كده... رئيس وزراء بيقيل رئيس جهاز أمني حساس، لمجرد إنه بيقرب من الحقيقة اللي ممكن تطيّره من الحكم.

بس النائبة العامة الإسرائيلية وقفتله، وقالتله: ممنوع... عندك تضارب مصالح، ومش من حقك تمشيه.

يعني باختصار: رئيس حكومة بيحاول يدفن قضية تمويل أجنبي لحملته الانتخابية، عن طريق التحكم في أجهزة الأمن!

ودي مش أول مرة... لكن "قطر جيت" تحديدًا فضحت البرتيته و خلت إللي ما يشتري يتفرج عليهم.


#اسرائيل #فلسطيني

#منقول

24/03/2025

"‏‏الإيمانُ ليسَ أن تدعو فيُستجاب لك .. فتؤمن
فذاك إيمانٌ مشروط!

الإيمان الحقيقي هو أن تدعو ، فتُسدّ في وجهك الدروب ،وتدعو فيسبقك الصحب ، وتدعو فتُدمي أقدامك أشواكَ الطريق ،
فما تزيد أن تقول : ربّي ما ألطفك أيُّ خيرٍ تُريده بي؟

ثمًّ ما زلت تدعو! حتى يجبر الله كسرك
ويجازيكَ أضعاف الأجور لأجل صبرك .. وظنك برحمته خيرًا ولن يُخيِّبك".

23/03/2025

برنامج مدفع رمضان عامل سعر رساله الموبايل جنيه ونص
يعني لو كل يوم في 5 مليون مصري من اللي بيحلموا بحلم المكسب السريع بعتوا كل واحد منهم رساله واحده بس علي مدار شهر رمضان
يعني 7.5 مليون جنيه يوميا في 30 يوم يعني 225 مليون جنيه
قول هيوزع كل يوم 300 الف جنيه علي مدار شهر رمضان يعني 9 مليون جنيه طول الشهر
يا عم قول 10 مليون جنيه علي مدار الشهر
قول هيوزع كل يوم مليون جنيه
يعني 30 مليون جنيه
اخصمهم من ال250 مليون اللي هيدخلوا من الرسائل
غير زيهم من الاعلانات اللي هتيجي علي البرنامج
خصوصا أن شهر رمضان موسم
ده غير ارباح المشاهدات فيسبوك ويوتيوب
يعني برنامج مدفع رمضان أقل ربح هيدخله نص مليار جنيه
وفي المقابل هيوزع 30 مليون جنيه وده مش هيحصل
ده بخلاف الشعبيه والجماهيريه الجباره للباشا الاسطوره ،بلا مسلسلات بلا ذفت
تفتكر مين العبيط في البرنامج ده🤔

ضيف علي كده بقي أن الغلابه اللي مش فاهمين اللعبه هيقولوا محمد رمضان جدع وابن حلال وهينسوا خالص أنه بيتلمع عشان يبقي اداه للضحك علي الغلابه
بنفس المنطق ده بقي قيس عليه كل مسلسلات وبرامج رمضان
هتلاقي تم تحويل ملايين المصريين الي مغيبين بدرجه امتياز👌
#الفيوم

22/03/2025