02/07/2022
تقدم احد الفلاحين الى النيابة يتهم جاره سرقة جاموسته
حضر جارة الفلاح وقاله الجاموسة السوده دى بتاعتى يا سعادة البيه _
استعانوا بالشهود الشهود قالوا والله جارنا دة عنده زريبة وجارنا التانى عنده زريبه
ودة له جاموسة سوده والتانى ليه جاموسة سوده ما نعرفش يا سعادة وكيل النيابة _ فالبية وكيل النيابة فال خلاص انا هعرف الحقيقة الان
وامر باطلاق الجاموسة وفك عقالها وتركها تسير بمفردها ويشوف هتروح فين وتسجل التجربة بواسطة كاتب النيابة وشهودها
الجاموسة فضلت ماشية تتمختر شوية تقف تاكل وشوية تقف على الترعه وشوية تتقف تتسامر مع الجواميس اصدقائها الى راجعين من الغيط وقلب الشاكى والمشكو فى حقه يكاد ينفطر او ينخلع من مكانة وكل منهما فى باله يقول يارب جاموستى ما تخذلنى
وبعد ساعتين او تلاته ووكيل النيابة والشهود والشرطة ماشين وراها بدون ازعاج
راحت ودخلت زريبة الشاكى , الذى احتضن الجاموسة وباسها وقال جاء الحق وذهق الباطل ان الباطل كان زهوقا
اتحالت القضية للمحكمة والمتهم محبوس
ووقف المتهم يصرخ فى القفص ويبكى ويقول والله جاموستى وياما وكلتها بايدى وبتحبنى وبحبها ولو جبتوهالى الوقتى جايز تنطق وتاخدنى بالحضن جاموستى يا عالم جاموستى يا خلق
انا برئ يا سعادة القاضى يعنى تاخدوا جاموستى وتحبوسونى يا عالم يا هوووو وبدأ يقول يارب يارب لا تسلط على حاكم ظالم واظهر الحق
القاضى قاله اخرس يا جدع انت بدل ما احبسك_ قاله ما انا محبوس يا سعاده القاضى
قاله خلاص سيب محاميك يكلم
تكلم المحامى وكان محامى كبير فى السن ولديه خبره _محامى (عقر) بضم العين زى ما بيقولوا
وقالة يا سعادة القاضى
قبل ان يجرى وكيل النيابة تلك التجربة بخمس ايام كان قد امر بايداع الجاموسة فى زريبه الشاكى وطبيعى الجاموسة تروح لاخر مكان كانت واقفة اكلة شاربة فيه
وعلى ذلك فتلك التجربة ليست دليل على انها ملك الشاكى وان المتهم سارقها
لكن القاضى حكم عليه بسنه
حبس وقال ان الجاموسة والبهائم لا تكذب ولا تتجمل
تم استئناف الحكم
لكن لا حياة لمن تنادى
محكمة الإستانف ايدت الحكم وقالت نفس الكلام ان البشر ممكن تكذب لكن الجاموسة لا تكذب
تم الطعن بالنقض
وهنا جاء دور محكمة النقض التى الغت الحكم وقالت ان كلام المحامى معقول جدا وكان يجب الانصات له وانه فعلا يجوز ان الجاموسة لما يطلق عقالها تروح لاخر مكان تتذكرة فذاكرة الجاموسة غير ذاكرة الانسان وكان يجب ان يستعين القاضى او المحقق بخبير حيوانات او يستند الى ادله اخرى او يحقق دفاع المتهم (العقربضم العين ) ولغت الحكم واعادت محاكمة المتهم
الى بقوله ده موش قصة خيالية
ده حدث بالفعل عام 1952 فى ( الطعن رقم 246 سنة 22 ق ، جلسة 1952/4/8 )
