02/04/2021
The Pasta Bakery
خروجة عند قصر البارون وكمان مش بس كدة المطعم في ممر شبه حواري ايطاليا
الموضوع دا ناقصه ايه؟
اكيد باستا ايطالي و دي مش اي باستا دا الشيف بيعمل العجينة Fresh قصادك من الالف للياء والمنيو بتبدأ من ٥٠ جنية ومفيش ولا خدمة ولا ضريبة
احنا كان مضحوك علينا بالمكرونات الجاهزة 😂 يا جماعة الباستا ال Fresh قصة تانية خالص
الشيف خبير في تحضير كل انواع الباستا live و بيعملها بنفس الطريقة اللي اشتغل بيها سنين في ايطاليا، الShow بتاع تحضير الباستا نفسه ممتع جداً خصوصاً انهم على طول مشغلين مزيكا ايطالي و عاملين مود حلو اوي
بالنسبالي دي كانت اول مرة اشوف المكرونة بتتعمل ازاي بأنواعها المختلفة زي
ريڤيولي، سباجيتي، فوتوتشيني و لازانيا
عشان محدش يجي بعد كدة يقول المكرونة بتتزرع 😅😂
بتختار من المنيو شكل و نوع الباستا اللي بتحبه و الصوص سواء طماطم، كريمة، ريحان، استرجانوف، او pink صوص
بعد كدة بتختار نوع البروتين يكون فراخ، لحمة، سي فود او عادي ممكن تطلبها سادة
اول ما الاوردر يجهز لازم تاكله على طول عشان الباستا الفريش حلاوتها و هي لسة سخنة و يستحسن تطلبها Aldenty "فيها عضة بسيطة" دي بقى التسوية الصح بتاعتها 👌
لو عايز حاجة وصاية بقى ممكن تدفع 30 جنيه زيادة و الشيف يعملك الاوردر في قالب الجبنة البارميزان 😍😍 طبعا الباستا بتبقى لسة سخنة و بمجرد ما تنزل في القالب الجبنة بتسيح في قلب الباستا و الموضوع بيوصل ل level تاني خالص من السعادة
بجد حاسس إني باكل حاجة تانية احلى بكتيييييير ❤️
ممكن تقعد تاكل في القعدة بتاعت المطعم و سط الزرع و انت بتسمع مزيكا ايطالي او تاخد الاوردر و تمشي خطوتين بالظبط و تقعد تاكل قصاد قصر البارون نفسه و تتصوروا هناك
الحلو بقى من الحاجات اللي لازم تجربوها
احنا طلبنا باستا ريڤيولي مقلية و محشية تفاح مكرمل بالقرفة و عليها من برة رشة سكر و قرفة
النوع التاني كان ريڤيولي محشي موز و فراولة، و في كمان ريڤيولي محشية نوتيلا و عليها من برة صوص وايت شوكليت
هتنبسطوا جدا و فعلا اي حاجة من دول مجرد ما تدوقها هتحس ان عينك عملت قلوب كدة 😍😍😍
رقمهم
0224149211
العنوان
102 ب شارع الميرغني، مصر الجديدة، في ظهر قصر البارون
