19/09/2026
اللي بيحصل وراء الكاميرا وأنا بصور إعلان مطعم بيخليني من قلبي أقول المعوذتين وكل دعوات الحماية من العين .
لأن فريق العمل إللي واقفين ورا الكاميرا وأولهم "المخرج" ، بيبقوا باصين في الأكل بكل شراسة لدرجة إني بضحك بجد وبغيظهم كمان ، وبمجرد ما المخرج يقول ستوب ، تلاقيهم هجموا على الأكل زي بالظبط "كفار قريش" في الأفلام العربي .
بس بصراحة بحب فيهم إنهم بيتعاونوا ، يعني اللي معاه ريشة يقول لزميله خد دوق دي والتاني يباصيله صباع كوفتة وهكذا ، المحبة بتبان وقت الأكل يمكن عشان زي ما بيقولوا : الأكل بيحب اللمة .
روحهم الجميلة مع بعض بتخليني ما أحسش إننا في شغل وبنصور ، بحس إننا في رحلة ، الروح الجميلة في الشغل بتخلي الوقت يعدي بسرعة والشغل اللي بيتعمل بمحبة بيطلع أحلى شغل .
مرة كان عندنا يوم تصوير طويل جداً ومتعب جداً ، بدأ من بعد الفجر اتحركنا من القاهرة للنوبارية ، صورنا والجو كان حر جداً ، وبعدها طلعنا على البحيرة وعملنا لقاءات كتير ، وبعدها جري على رشيد ، ولازم نخلص قبل الشمس ما تروح والمسافات بين المناطق دي كانت كبيرة ، وتجهيز الكاميرات والمعدات بياخد وقت ، كانوا بيجهزوا نفسهم قبل ما ينزلوا من العربيات وكأنهم فريق تدخل سريع ، همة ونشاط ومحبة وتعاون ، خلصنا الشغل وطلع أحلى تصوير عملناه والله ، وربنا كرمنا جداً فيه .
متهيألي لو كل زملاء في عمل جمعتهم المحبة والتعاون والعيش والملح ، الشغل مش هيبقى في أخطاء والتارجت أياً كان نوعه هيتحقق ، أي شغل في الدنيا ماحدش يقدر يعمله لوحده لازم فريق عمل ، وبينهم تناغم و انسجام .
أحسن بكتير أوي من شغل قايم على صراع ومشاكل ، بتبقى كل لحظة فيه بتعدي كأنها سنين والله .
حبوا بعض في الشغل ، بلاش شغل عصافير المدير ، بلاش ترموا الشغل على بعض ، بالعكس ساعدوا بعض ، ولما يجي وقت الأكل اتجمعوا بالحب وبسم الله كده ، واللي معاه صباع كوفتة يباصي لزميله والتاني يناوله الطحينة ورغيف ، الوقت هيعدي بشكل لطيف .
أنا بقى هنا مبتسمة عشان كنت عاملة ريجيم وقررت يبقى يوم فري عشان خاطر عيون الطرب والبابا غنوج اللي بحبه حب ، بسم الله وهوووب .
