23/11/2025
تعالى أقولك ببساطة ووضوح، أفكار المصريين اللي بيدافعوا عن الهوية المصرية، وفي مقدمتهم “تيار كِمت”. علشان تعرف تشغّل عقلك وتقيّم وجهة نظرهم، بدل ما تمشي ورا كلام أي حد.
**************************
1️⃣ مش بيقولوا: إن المصريين ليهم عرق نقي، أو بيأسسوا لحركة عنصرية فاشية زي النازية، كما شبههم البعض.
بيقولوا: إن المصريين القدماء كان ليهم تركيبة جينية مميزة ومستقرة، والأهم مستمرّة حتى اليوم في أغلب المصريين الحاليين، وفقا لكل الدراسات الجينية اللي أتعملت على أصول المصريين.
( وده دفاعًا أمام اللي بيقولوا إن أصل المصريين القدماء “زنوج أفارقة” أو “يهود” أو “عرب” أو حتى ملهمش أصل ومخلّطين من طوب الأرض، أو أن المصريين الحاليين ملهمش علاقة بأجدادهم القدماء).
**************************
2️⃣ مش بينكروا الدراسات العلمية اللي بتقول إن أصل البشر من قارة أفريقيا.
بيقولوا: أن ده “أصل جيني” مرتبط بمكان جغرافي، مش “أصل حضاري”.
(مفيش أي علاقة ثقافية أو حضارية بين بشر عاشوا قبل 300 ألف سنة أو حتى 20 ألف سنة، وكانت حياتهم معتمدة على الصيد والترحال وجمع الثمار، وبين بشر استقروا مع بداية الزراعة وبدأوا يبنوا القرى والمدن ويؤسسوا الدولة والحضارة المصرية القديمة في الألفية الخامسة قبل الميلاد).
**************************
3️⃣ مش بيقولوا: نرجع لماضي الحضارة المصرية القديمة ونعيش فيه ونمحي كل اللي بعده، زي ما اتقال عليهم إنهم حركة رجعية.
بيقولوا: نحترم الماضي ونعتز بيه، ونستلهم منه القيم والعِبر والأخلاق والتراث والثقافة وكل ما هو إنساني جميل، مع الأخذ بأسباب التقدم في الحاضر والمستقبل.
(نفسهم بقية المصريين يعرفوا إن حضارتنا القديمة اللي كل العالم بيحسدنا عليها، مش شوية “تماثيل وصخور” زي ما بيصوّرها بعض المتطرفين ضيّقي الأفق، بل كانت حضارة عظيمة إنسانيًا وأخلاقيًا، عرّفت العالم يعني إيه دولة، وقدّمت للتراث البشري نصيبها من الأدب، الفنون، الموسيقى، العمارة… إلخ).
**************************
4️⃣ مش بيمجّدوا أصنام أو يقدسوا أحجار.
بيقولوا: نعلّم الناس إن الآثار دي مش مجرد تماثيل وخلاص، ده فن… فن بيعكس دقة ومهارة وعظمة حضارة… فن بيحكي تاريخ وقيم ومعاني… فن بيحرك مشاعر نبيلة… فن بيوريك من نظرة واحدة: احترام المرأة، ترابط الأسرة، حب العمل… وغيرها من القيم النبيلة.
**************************
5️⃣ مش بيقولوا: نرجع لعبادة الأصنام ونركع لآمون.
بيقولوا: الدين والمعتقد حرية شخصية، حقك تعتقد ما تشاء، لكن مصر دولة مدنية، مش دولة دينية، مصر ملهاش دين، مصر لكل المصريين، يعيشوا فيها سواسية بغض النظر عن جنس او عرق او دين.
**************************
6️⃣ مش بيقولوا: نرجع نتكلم هيروغليفي ونلغي لغتنا الحالية.
بيقولوا: لغتنا الحالية جزء من مصريّتنا، لكن من حق أي حد يتعلم لغتنا القديمة في معاهد توفرها الدولة، زي كل الأمم اللي بتحترم لغتها التاريخية.
**************************
7️⃣ مش بيقولوا: نرجع نلبس فرعوني في الشارع.
بيقولوا: نبرز جمال وأناقة الأزياء المصرية القديمة في المحافل الدولية والمناسبات الثقافية وحتى الخاصة، زي ما كل الشعوب بتعمل مع تراثها.
**************************
8️⃣ مش بيقولوا: ننفصل عن محيطنا الجغرافي وننعزل.
بيقولوا: نبني علاقات قائمة على المصالح المشتركة والاحترام، مش على التبعية.
**************************
9️⃣ مش بيقولوا: المصري هو اللي جيناته بس مصرية.
بيقولوا: المصري هو اللي عايش على أرض مصر بغض النظر عن أصوله، ومعتز بحضارتها وثقافتها وتراثها كله.
**************************
🔟 مش بيقولوا: نحصر الهوية المصرية في حقبة مصر القديمة ونلغي اللي بعدها.
بيقولوا: هوية مصر هوية موحدة، هوية بتجمّع مش بتفرّق، هوية مش مرتبطة بدين ولا عرق ولا لغة. مصر هي مصر وبس، زي ما سنغافورة سنغافورية… وزي ما اليابان يابانية… وزي أي دولة على الكوكب، مش بيطلبوا حاجة جديدة ولا غريبة، بيطلبوا الطبيعي، بيطلبوا هويتهم الممتدة من أول فجر حضارتهم لحد النهاردة…
هوية لسه قادرة تنهض بينا لو احترمناها ودافعنا عنها ضد أي حد يحاول يشوّهها أو يقلل منها أو حتى يلغيها.
#مصر 🇪🇬❤️
Abdelkader Elturkey
