Celie- سيلي

19/09/2021

كانت إضافة لينا وفرصة لطيفة إنه تم استقبالنا في قرية كفر حجازي بالتعاون مع مبادرة أنا متطوع، اللي سمحتلنا إننا نساهم معاهم في جزء بسيط من خطتهم في تعليم الأطفال، و وثقوا فينا لمدة شهر بتقديم English course for kids, level 1 و زي ما كُنا إفادة للأطفال هما كمان كانوا إفادة لينا بالالتزامهم ومذاكرتهم وسعيهم يكونوا أحسن..

عن مبادرة "أنا متطوع":
أسسها شباب قرية كفر حجازي التابعة بمنشأة القناطر محافظة الجيزة، هدفها الأساسي تعليم أطفال القرية القراءة والكتابة وأصول الدين، بعد ملاحظتهم من كارثة عدم قدرة أطفال ومراهقين بالقرية على القراءة والكتابة..
المبادرة قائمة طول فترة الإجازة الصيفية وتنتهي بدخول الدارسة ماعدا تعليم أصول الدين وتاريخ الصحابة..

شكرًا كفر حجازي على استقبالكم، وشكرًا أنا متطوع على ثقتكم فينا..

19/07/2021

عيدكم مُبارك🐑

13/05/2021

كل سنة وأنتوا طيبين💙

12/04/2021

كل سنة وأنتم بخير، يا رب تعود عليكم الأيام بالخير💙🌙

11/04/2021

مقتطفات من 3 ورش خلال يومين السبت والأحد.
الاستعداد لرمضان في دار الأمل للأيتام.

شكرًا للمدربين في مشاركتهم لينا.
مس سندس أحمد
مستر شريف محمود

اتعرفنا خلال اليومين على:
يعني ايه رمضان ؟
امتى اتفرض الصيام؟
اخلاق المسلم في رمضان.
الشهور الهجرية والأشهر الحُرم.
الأفعال اللي ممكن تضيع ثواب رمضان.
ازاي نستغل رمضان؟
تنظيم الوقت بين العبادة والدراسة.

والورشة الأخيرة كانت زينة رمضان من أدوات بسيطة:
جلاد
خيط ستان
مقص
صمغ

كالعادة لازم نشكر سليمان على تعبه معانا والتزامه بالوقت في تسليم اي ديزاين..
Kamal

10/03/2021

بين متحرش المعادي والاستغلال الجنسي لأطفال الشوارع ويا قلبي لا تحزن..

صرحت منظمة الصحة العالمية في يونيو 2020 إن واحدة من كل 5 نساء وواحد من كل 13 راجل بلغوا عن تعرضهم للاعتداءالجنسي لما كانوا أطفال، وإن 120 مليون بنت دون سن ال20 اتعرضوا لشكل من أشكال التحرش الجنسي القسري..

أكدت الاحصائيات إن أغلب حالات التحرش اللي اتعرضلها الأطفال كانت من الناس القريبين للأسرة سواء خال أو عم أو صديق العيلة والجيران..

والأكثر عُرضة للتحرش والاستغلال الجنسي بكافة أنواعه هم أطفال الشوارع وده راجع لأسباب كتير منها إن مفيش مأوى آمن ليهم ووجودهم طول اليوم في الشارع واحتياجهم للفلوس اللي ممكن يخلي أي متحرش يستغلهم بكل سهولة.

وأشكال الاستغلال الجنسي ماوقفتش بس على إغراء الأطفال بحتة شوكولاته او فلوس وتعالى أوديكي عند ماما، فحسب كلام الخبراء إن الكوارنتين أو الحجر الصحي والحظر اللي اتفرض خلى المتحرشين والقوادين يطبقوا مقولة الحاجة أم الاختراع، وبقى فيه خدمة توصيل الأطفال لحد البيت دليفري وزيهم زي أي سلعة وزي ما بيقفوا بعربيتهم عند أي فرع من فروع الفاست فود بقى كمان فيه خدمة الشراء أثناء ركوب المركبات أو ما يُعرف ب Drive thru لاستغلال الأطفال..

عشان تحموا ولادكم لازم تحتووهم وتديهم الثقة والدعم وتقروا وتشوفوا حلقات عن التربية الجنسية وازاي تعلموا ولادكم يحموا نفسهم ولو حد حاول يتعرضلهم يحكولكم..

وأطفال الشوارع اللي لا حول ليهم ولا قوة، عشان تحميهم من انهم يتعرضوا لأي شكل من أشكال الاستغلال سواء جنسي أو مخدرات أو اتجار بالبشر وغيره من أنواع الاستغلال. فحاولوا لما تشوفوا طفل متسول أو حد بيتسول بيه تصوره لو قدرت:
لاتصال الخط الساخن للوزارة (16439) و (16528) أو من خلال الشكاوى المباشرة من المواطنين علي التليفون الخاص بالفريق (01095368111) أو من خلال الصفحة الرسمية لوزارة التضامن الاجتماعي
www.facebook.com/MoSS.Egypt

بكل الدعم والتضامن بنتمنى ليكم ولأطفالكم ولأطفال العالم الأمان والسعادة..

13/02/2021

مين سيلي - Celie ؟!

سيلي مبادرة مجتمعية، تهدف إلى دعم أطفال الشوارع والمراهقين والشباب خاصة فئة المهمشين تحت خط الفقر من أطفال وشباب القرى النائية عن مراكز التعليم.

كما تقدم سيلي لأطفالها وشبابها تدريبات وورش عمل مختلفة، تساعدهم على الاستعداد لسوق العمل.

11/02/2021

خلينا نكمل ونعرف أكتر عن أطفال الشوارع..

يعني أطفال الشوارع؟ وإيه الفرق بينهم وبين أطفال بلا مأوى؟

صنفت اليونسيف أطفال الشوارع لفئتين:
• فئة الأطفال اللي بيعيشوا في الشارع بشكل دائم وانقطعت كل علاقتهم بعيلتهم أو ماعندهمش عيلة أصلًا.
• فئة الأطفال اللي بيعيشوا في الشارع بهدف التسول أو ممارسة مهن هامشية وبيساهموا في دخل الأسرة وفيه منهم ممكن يكونوا بيرحوا المدرسة وليهم بيت يجمعهم مع أسرتهم.

منظمة الصحة العالمية عرفت أطفال الشوارع بناء على:
• أطفال بيعيشوا في الشارع وهو مأواهم.
• أطفال هربوا من أسرهم وبيعيشوا في جماعات أو مباني مهجورة وبيتنقلوا من مكان للتاني.
• أطفال عندهم أسرة وليهم علاقة بيهم ولكن بيقضوا معظم اليوم وأحيانًا أيام كاملة في الشارع وده لأسباب كتير منها الفقر والتزاحم في السكن أو تعرضهم لاستغلال بدني أو جنسي داخل الأسرة.
• الأطفال في مؤسسات الرعاية واللي مهددين انهم يرجعوا لحالة التشرد تاني.
أطفال الشوارع فيه منهم اللي ليه بيت وعيلة وبيرجعولهم آخر اليوم، أطفال بلا مأوى مأواهم الوحيد هو الشارع وتحت الكباري ومالهمش بيت يرجعوله.
أطفال الشوارع هو أي طفل ذكر أو أنثى تحت سن ال18 وتنطبق عليه المواصفات اللي اتكلمنا عنها فوق.

دلوقتي بقى قولولنا بتتصرفوا ازاي لو شُفتوا طفل بيتسول؟

الصورة ملك M. Ali Şekeroğlu

شكرًا @ Soliman Kamal Soliman

09/02/2021

أطفال بلا مأوى أو أطفال الشوارع..
آخر احصائيات الأمم المتحدة للطفولة " اليونسيف" عن أطفال الشوارع في مصر قدرت عددهم بحوالي 2 مليون طفل، والجهاز المركزي للتعبئة والاحصاء قدر عدد المتسولين منهم واللي بيشتغلوا في الورش والمصانع بحوالي 1.6 مليون طفل. والعدد الكبير منهم هم أطفال بلا مأوى.
ويا ترى تعرف إيه عن الأطفال بلا مأوى والفرق بينهم وبين أطفال الشوراع؟

شكرًا Kamal Soliman لمساعدتنا في الديزاين.

الصورة ملك Mick Hoblos

29/10/2020

جه الوقت اللي نتعرف فيه على سيلي..

سيلي هي مؤسسة خيرية -لسة بتبدأ- مهتمة بدعم أطفال الشوارع والمراهقين والشباب تحت خط الفقر من خلال تقديم ورش عمل لتأهيلهم.

وكمان بتساعدهم أنهم ينتجوا ويسوقوا لمنتجاتهم من خلال مواقع التواصل الاجتماعي الخاصة بسيلي والمعارض اللي بتعملها ليهم.

و سيلي محتاجة لدعمكم و دعم كل شخص بيحب يتعلم ويطور من نفسه ويساعد، عشان كدة سيلي فاتحة أبوابها ليكم عشان تكونوا عيلتها.
دي ال Committees المتاحة:
HR
PR
FR
Social media
Graphic design
Facilitator (مدرب)
Support and evaluation
Supply chain

املوا الفورم وهنتواصل معاكم عشان نبدأ سوا♥️

سيلي مؤسسة خيرية، بتعمل ايه؟ بتدعم أطفال الشوارع و الأطفال والمراهقين والشباب تحت خط الفقر من خلال تقديم تدريبات وورش عمل، وكمان بتساعدهم في أنهم ينتجوا ويسوقوا لم....