23/08/2023
طب ده والله اشتقنا بقا ولا ايه 😂❤️
طبعا كفاية تاخير في بوست اخر قسم لحد كدة
وجينا ببوست القسم الثالث جيولوجيا المياه والبيئة ❤️
هنتكلم عن القسم والدراسه وبعدين ندخل علي الشغل والحياه العملية مع بعض
اولا كدة احنا بندرس كل ما يخص المياه علي سطح الارض وتحت سطح الأرض كمان بس بنتكلم على سكيل صغير دلوقت وهو مصر، يعني اللي هيدخل هيدرس موارد المياه كلها الموجوده في مصر، الخزانات الموجوده، دائرة المياه كلها اللي بتتبخر والامطار والمياه السطحية والتحت سطحية وحاجات كتيره جدا عن المياه، هندرس شوية كيمياء ليها علاقه بالمياه برضه والتفاعلات اللي بتحصل من منظور جيولوجي، وهندرس معالجة المياه ودي خلال ال ٣ سنوات التخصص وهندرس كورسات جيولوجيا يعني انواع الصخور والخامات الاقتصاديه والمعادن وكل ما يخص علم الارض، وفي كورسات كمان بقا زي ال GIS والبترول والجيولوجيا الهندسية وحاجات كدة ، وطبعا اغلب الكورسات بيكون ليها شغل عملي .
طيب كدا خلصنا من الكلية وكورساتها وخلصنا ال ٤ سنين علي خير يعني ان شاء الله 😂❤️
ندخل على الشغل بقا؛ الشغل في المجال يتمثل في انك شخص خريج كليه بتدرس جيولوجيا بالاضافه الى انك بتاخد كورسات تبع المياه بالاضافه الى العلوم المرتبطه بالجيولوجيا وهو الجيوفيزياء أو الجيولوجيا التركيبية أو جيوكيمياء...الخ، فهنتكلم بالمختصر عن بعض وليس كل الوظائف اللي ممكن يشتغلها خريج قسم المياه، ممكن تشتغل كجيولوجي في شركات الحفر سواء كانت بترول أو مياه، ممكن تشتغل جيوفيزيائي فى نفس الشركات وشغل تاني كتير للجيولوجيين في المجال دا،وطبعا لما اقول جيولوجي هنا يبقا انت كشخص لازم تحط في اعتبارك ان الجيولوجيين ليهم اكتر من وظيفه في نفس الشركه بحكم انك واخد كورسات غير الجيولوجيا زى ما ذكرنا فوق، ممكن تشتغل في المحاجر بتاعت الخامات زي الفوسفات والمنجنيز والحديد وغيرها، تشتغل في مناجم الذهب واي خام ثمين، دا كدا جزء من شغل جيولوجيا عموما واللي انت طبعا ليك فيه بغض النظر عن القسم 🤝
ندخل بقا على القسم نفسه ممكن تشتغل منه في ايه ؟
في معالجة المياه بكل انواعها وشغل المعالجة شغل محترم جدا جدا وفيه فلوس كويسه جدا برا مصر ومقبوله جوا مصر، وشغل المعالجه لا يقتصر انك تشتغل في محطات وبس لا طبعا عندك مصانع كتيره جدا وشركات عملاقه بتستخدم المياه في الصناعات بتاعتها ممكن تشتغل فيها، ممكن تشتغل في حاجات تانيه كتير زي المراكز البحثيه ومنها المركز القومي لبحوث المياه، معهد بحوث البترول، مركز بحوث الصحراء، هيئة الاستشعار عن بعد وطبعا ممكن تشتغل برا في نظم المعلومات الجغرافيه وشغلها محترم جدا، مرصد حلوان الفلكي والجيوفيزيقي، هيئة المواد النوويه وغيرهم من الأماكن الكثيره جدا تبع المجال بالاضافه إلي الشغل في السيفتي أو الكواليتي كنترول ودول فلوسهم محترمه وغالبا لكل المؤهلات العليا، أو في المبيعات في شركات المياه،
طبعا دي الوظائف عموما ولو حابب تعرف وظائف ناس خريجة اشتغلتها بالفعل في ناس اشتغلت في المعالجة ، ناس اشتغلت في الحفر , الكيماويات وحاجات تانية برضو
دا جزء من الكلام وفي كلام كتير جدا عن الكليه، مبشكرش في الكليه ولا ببالغ في حاجه، بس عن تجربه شخصيه هتقابل ناس ياما بتتكلم كلام سلبي عن الكليه وبرضه هتقابل ناس كتيره جدا بتشكر في الكلية وبتحبها، وكل شخص ليه وجهة نظر فيها، بس المتعارف عليه وثابت انك مع السعي والاخذ بالاسباب هتحقق كل اللي انت عايزه مهما اختلفت الطريق للهدف ❤️❤️
وطبعا ده كلام مختصر جدا عن القسم ولسه لينا كلام تاني في حاجة جميلة بنظبطها باذن الله تقدر تفيدكم برضو ❤️
