نُصِين - Nossein

17/08/2025

ليه!!! بجد ليه واحده بعد م تدي الامان لواحد هو وعيلته وتتنازل انها بدل ما يبقي ليها حياتها وخصوصيتها لوحدها وتوافق انها تقعد في بيت عيله ليه بعد التضحيه والتنازل ده يحصل كده ليه بجد ليه في ناس بيسيطر عليها داء النقص كده بجد ليه انتوا بتخلوا الواحد يفكر الف مره قبل م ياخد اي خطوه حتي لو صغيره نقوا ناس متربيه ياجماعه والأهم من انهم يكونوا متربيين اهلهم يبقوا ناس سويه نفسياً ومتربيه وحطوا خمسين خط تحت انهم يبقوا ناس سويه نفسياً دي🤝🤝

04/04/2023

انا بجد محتاجه افهم االلي بيحصل فينا ده هيحصل علي طول!!
خلاص اتعودنا اي بنت ترفض اي ولد يحصل فيها كده وابشع من كده كمان!!
لحد امتي هنفضل مش حاسين ب الأمان البلد مبقاش فيها امان حتي ولو 5%!!!
لحد امتي هنفضل خايفين نتجوز او نتخطب حتي بسبب اللي بيحصل ده؟؟
البني ادم ده هيفضل هربان لحد ما الموضوع يتحل بالواسطه والموضوع يتنسي زي ما موضوع نيره وايمان وغيرهم كتير اتنسي!
ومجرد ما يتنسي هيظهر واحد جديد يقتل بنت جديده او يع*ورها زي البنت دي لمجرد بس انها شايفاه مش مناسب ليها!
يا جماعه حرام عليكوا بجد وحسبي الله ونعم الوكيل فيك
#نُصين
#دُنيتنا_مقسومه_علي_اتنين

25/12/2022

الجواز للي متربي يعني ايه بناء بيت فيه أسره سويه صالحه للتعامل مع المجتمع…
الجواز للي متربي يصون بنات الناس وماهينهمش مهما يحصل من خلافات….
الجواز للي عارف يعني ايه مشاركه الحياه بين الراجل والست….
الجواز للي بتعرف تفرق بين معني مشاركه الحياه بين الراجل والست
وجُمله اصل لازم يبقي في مساواه بين الرجُل والمرأه!!!
الجواز للي عايز يعيش في هدوء وسكينه وراحه بال….
الجواز للي عايز ينجح مع شريك حياته في كل تفاصيل الحياه حتي في خلافته معاه….
الجواز للي يعرف ولاده يعني ايه موده ورحمه ويعرفهم يعني ايه مبادئ وأخلاق….
الجواز للي عارف ان اللي يحب عُمره ما يأذي حد ابدا♥️🤷🏼‍♀️
#نُصين
#دُنيتنا_مقسومه_علي_اتنين

17/11/2022

والعكس صحيح♥️
#نُصين
#دُنيتنا_مقسومه_علي_اتنين

03/09/2022

في الحلقه اتكلمنا عن جزء من مشروع نُصين، قولنا بعض النصايح واتكلمنا عن جزء بسيط من الحالات، ولكن لسه كلامنا معاكوا مخلصش هنفضل مكملين ومش هنوقف كلام عن حالات نُصين ولا نصايح♥️
♥️

مشروغ الانفصال _ سوزان تامر _ منة احمد _ طالبة بكلية الاعلام _ اعداد الاعلامية / بريهان المطيعى _ على العائلة _ 31 اغسطس 2022

31/08/2022

من اول ما بدأنا واحنا بنتكلم سوشيال ميديا، النهارده لاول مره هنتكلم عن نُصين في التليفزيون علي قناه نايل فاملي في برنامج هي الساعه ١٢ الظهر♥️

18/08/2022

طول عمر أهالينا بتحكيلنا حواديت جميله عشان نفهم ان قد ايه الدنيا دي جميله وحياتنا جميله ومن ضمن الحواديت دي حدوته سيندرلا
كلنا بلا استثناء عارفين قصه سيندرلا ولما فقدت فرده حذائها الامير فضل يدور عليها واتجوزوا في نهاية الحدوته

البنوته اللي في الصوره دي فقدت حذائها برضو وهي بتجري من الكلاب بس الفرق ان اللي المفروض بتقولوا عليه راجل يساعدها ويديها فرده حذائها، بس لا ازاي يساعدها اعت**دي عليها بدل ما يساعدها!!
مش عارفه اقول لأهلك ايه والله ألومهم انهم معروفش يربوك نص ساعه حتي ولا اشفق عليهم انك شوهت سمعتهم وهما ممكن يبقي مالهمش ذنب!!
حسبي الله ونعم الوكيل فيك وربنا يحاسبك علي الأذي النفسي وغيره اللي سببته للبنت وأهلها!
طول ما في ناس زيك طول ما نسبه الطلاق هتزيد!
طول ما في ناس زيك بتخدع بنات الناس ويجيبوا أطفال شبهك للمجتمع كل ما العالم هيتدمر اكتر!
#نُصين
#دُنيتنا_مقسومه_علي_اثنين

10/08/2022

البنات نسيت معني كلمه"امان" مش هقول احساس الكلمه بجد لا احنا نسينا معنها حتي كان ايه!!
ازاي طول الوقت بتقولوا للسياح واللاجئين وغيرهم"ادخلوا مصر ان شاء الله امنين"
ضيعتوا معني الأيه الجميل ضيعتوا معني كلمه امان ضيعتوا احساسنا بيه واحنا في اشد الحاجه ليه!
ضيعتوا كل حاجه حلوه المفروض اي بنت تحس بيها!
يعني ايه لمجرد اننا نرفض الناس الغير مناسبه ان دي تبقي نهايتنا!
ياعالم الدور بكره علي مين!
مصر مبقتش بلد امان محدش يقول البلد دي احسن من غيرها لا في احسن مننا ١٠٠ مره
اها بيحصل فيهم جرايم وكل حاجه ولكن بيعرفوا يأدبوا شعبهم بيعرفوا ياخدوا حقوق البنات اللي ضاعت لو حد فيهم اتعرض لموقف زي ده!
لحد امتي هنفضل خايفين!
لحد امتي هنفضل نروح واحده ورا التانيه!!
لحد امتي هنفضل عايشين في خوف!
خلاص فرضتوه علينا امر واقع!!!
حسبي الله ونعم الوكيل والله في كل واحد فكر حتي انه يأذي بني ادم
حسبي الله ونعم الوكيل في كل أهل مكنتش مؤهله انها تجيب اطفال ويتحملوا مسؤليتهم!!
انا نفسي افهم بتتجوزوا ليه طالما انتوا ناس مش قد المسؤولية ولا تعرفوا معناها حتي!
حرام عليكوا اللي بتعملوه في بنات الناس وأهاليهم
ربنا يحاسبك يابني علي كل دمعه نزلت من أهلها وصحابها حزن عليها
ربنا يحاسبك علي كل القهر اللي حسستو لأهلها في وقت هما فاخورين بيها فيه!
حسبي الله ونعم الوكيل في أهلك اللي معرفوش يشيلوا مسؤولية تربيه بني ادم عشان يطلعوه للمجتمع!
#نُصين
#دُنيتنا_مقسومه_علي_اثنين

16/07/2022

" اللي مصاحبه مطلقات دخلوا محكمه الأسره ماتنفعش"
ماتقنعنيش ان لو صاحبك طلق وقالك سبب الطلاق انت مش هتاخد حذرك من البنت او الست اللي معاك!!
تبقي إنسان مابتفكرش ولا بتاخد عظه من اخطاء الغير…
احنا موجودين في الدنيا عشان بنتعلم من تجارب بعض وناخد حذرنا من أخطاء الناس اللي معرفتش تاخد حذرها قبل ما تقع في غلط منهم🤷🏼‍♀️
لاقيت الموضوع مدايقك او زياده عن تحملك امشي
بس خلي بالك انت شخص معندكش احساس بالمسؤولية لإنك المفروض تطمنها وتحسسها بالأمان وان انت عيوبك بسيطه مش اللي هتوصلكوا لطلاق!!
معرفتش تطمنها يبقي العيب فيك مش فيها🤷🏼‍♀️

"الانانيه اللي عايشه لنفسها ماتنفعش"
والله الواحده مش عارفه تعمل إيه، تهتم بنفسها تقول عليها انانيه ومبتفكرش غير في نفسها، تهتم بيك وبالبيت وبالاطفال تشتكي وتقول مبتهتمش بنفسها!!
والله لاقيت الموضوع زايد عن تحمُلك امشي لكن مش من حقك تقول عليها أنانية…. افرض دي بالنسبه لشخص تاني واحده بتهتم بنفسها بس زياده شويه تبقي انت ف الأخر اهنتها🤷🏼‍♀️

"اللي بتتقمص علي حاجات صغيره ماتنفعش"
والله برضو مش عارفه اقولك ايه يعني انت عايز تغلط ومش عايزها تدايق ده اللي هو ازاي طيب؟؟
تيجي واحده تانيه تكبر دماغها وتتعامل معاك بعقل اكتر شويه تقول دي بارده….
والله بطريقه تفكير حد زيك احب اقولك انك مش هينفع معاك اللي تعاتبك علي غلطاتك ولا اللي تكبر دماغها، انت ربنا معاك والله🤝🤷🏼‍♀️

"المغروره ماتنفعش"
والله انا كبنت تعبت، تقولوا لازم البنت تبقي واثقه من نفسها وتيجي تاخد واحده واثقه من نفسها وتكتشف انك انت اللي معندكش ثقه في نفسك ف تقول عليها مغروره!!!
تيجي واحده تبقي محتاجه انك تدعمها شويه وتزود ثقتها في نفسها تقول دي معندهاش ثقه في نفسها…

"الهشه نفسيا اللي سهل يتضحك عليها بكلمتين ماتنفعش"
كل إنسان مننا ليه تجربه بتأثر فيه نفسيا مش معني انها محطمه نفسيا من حاجه معينه تبقي سهل يتضحك عليها بكلمتين!!
هي محتاجه اللي يحتويها ويحتوي طريقه تفكيرها ويشجعها ويستحمل ضعفها من نحيه التجربه دي🤷🏼‍♀️

"اللي شغلها ممكن يقويها عليك ماتنفعش"
معلش سؤال بسيط، انت عايز واحده ضعيفه تفضل حاسس انها محتجالك وانها ماتعرفش تعيش من غيرك!!
يؤسفني اقولك انك مريض ومحتاج دكتور نفسي عشان يشوف هيعرف يعالج ايه ولا ايه فيك🤝🤷🏼‍♀️

"واللي حاسه بنفسها وحلاوتها ماتنفعش" معلش هي مش ذنبها انها واخده عقليه زي عقليتك
معندكش ثقه في نفسك حتي ولو ٢٠٪؜
معلش انت مش واخد بالك ان اللي قولته ده يُصنف تنمر يا محترم!!🤷🏼‍♀️
هي مأذنبتش لما تعترف ان ملامحها حلوه او تعترف بإن ربنا مديها جمال….
احب اقول للدكتور النفسي اللي هيقابل عقليه زي عقليتك ربنا يكون في عونك يادكتور😂🤷🏼‍♀️

"وبتاعه المظاهر ماتنفعش"
ماتبقاش البنت مننا بتهتم بنفسها وبمظهرها ويجي واحد زيك يقول دي ماتنفعش!!
انت عايزها عامله ازاي طيب فهمني!!
معلش، انت اتعاملت معاها في مشكله ما وهي مطلعتش قد المسؤولية!!
جيت في مره قولتلها اقفي جنبي سابتك ومشيت؟؟
البنات والستات طبعها حنين، ف ٩٥٪؜ مننا اجدع واحن من رجاله كتير في حياتك!!🤷🏼‍♀️

"اللي مش بتحترم ابوها وأبوها مالوش كلمه عليها ولا علي البيت ماتنفعش"
محدش مننا بيختار اهله ف هي مش ذنبها ان والدتها أختارت غلط!!
المفروض الواحد مننا بيوصل عند سن ٢١ سنه اللي هو المفروض السن القانوني عشان بيبقي نضج كفايه انه يبقي عارف الصح من الغلط ف لو هي وصلت مرحله زي دي وانت شايف انها مش بتحترم اهلها امشي دي لاتصلح زوجه ولا أم🤷🏼‍♀️

"البيت اللي الست بتمشيه ماتنفعش"
مش عارفه مين حط في دماغ بعض الذكور ان الست لازم تبقي ضعيفه عشان هو يأمر ويقول تعمل ايه وماتعملش ايه!!
وانا استخدمت كلمه "ذكور" عشان مش كل ذكر يُقال عنه "رجُل"

مش هتكلم عن النصيحه اللي انت كاتبها في الآخر عشان انت محتاج كتاب نصايح…!

احب اقول لكل بنت وكل ست ان لازم يبقي في فتره خطوبه وتعارف طويله عشان ماتقعيش مع شخصيه بالعقليه دي!!
عشان كده دايما بنقول الأختيار بيفرق يا جماعه
"الف خطوبه تبوظ ولا جوازه واحده تفشل"
#نُصين
#دُنيتنا_مقسومه_علي_اثنين
💔

16/07/2022

معلش نركز في البوست ده والبوست اللي بعده عشان مهمين جدا ♥️

لاقيت البوست ده والحقيقه ان الشخص اللي منزل البوست يؤسفني اني اقولك انك مريض ومحتاج تتعالج
احنا ك بني ادمين كلنا فينا عيوب ومحدش فينا كامل احنا مش ملايكه حضرتك!!🤷🏼‍♀️
كل شخص فينا فيه عيوب وربنا حاطت لكل واحد مننا نصيب علي هيئه إنسان يتقبله بعيوبه ف فكره انك مش متحمل بنت عنيده شويه يبقي هي اختارت غلط وانت كمان اختارت غلط
هي اختارت غلط لانك شخص معندكش صبر وانت اختارت غلط لانك شخص مش هتتحمل عيب العند
انا مش بقول ان العند ده صفه عاديه لا طبعا ده غلط ولكنه عيب من عيوب الانسان….ممكن نقابل رجل عنيد زي ما في ست عنيده، ولكن كل واحد فينا ربنا شايله نصيبه اللي هيتقبله بعيوبه🤷🏼‍♀️
ومعلش انا محتاجه افهم يعني ايه ربايه الجوع!!

ومعلش محتاجين نعرف مواصافات الشخصيه اللي حضرتك هاتشوفها شخصيه ناجحه في حياتها الزوجيه والعمليه… صافتها عامله ازاي!!

حضرتك كده مش بتهينها هي بس ده انت بتهينها هي وأهلها كمان، لاقيتها مُستغله امشي انما متفضلش تقول دي ربايه جوع!! وفين تربيه حضرتك بقي؟؟

وبتقول كمان الماديه ماتنفعش، في بنات وستات كتير بيحبوا يحسبوا كل حاجه بالورقه والقلم عشان كل حاجه تطلع مظبوطه وف الجهه التانيه ممكن انت تبقي بخيل ف شايفها ماديه
او هي شخصيه ماديه فعلا، هنا حضرتك تاخد بعضك وتمشي لان اختيارك غلط مش مناسب مع حياتك🤷🏼‍♀️
ولكن تروح وتتكلم وتقول دي ماديه لا ده مش من حقك لان برضو اكيد انت فيك عيب هي مش هتستحمله، ف مش من حق حد فينا يتكلم عن عيوب التاني يا ساده!!

"بنت امها ماتنفعش" مسمهاش بنت امها اسمها والدتها حبت تحافظ علي بنتها من المجتمع اللي باقينا فيه وتحميها منه ف صاحبه بنتها وبتنصحها🤷🏼‍♀️
لاقيت الموضوع زاد عن الطبيعي امشي ولكن ماتصنفش علاقتها بوالدتها علي مزاجك!!

"اللي بتحب تصاحب رجاله" اولا دي اهانه لفظيه واضحه وصريحه لانها مسمهاش بتحب تصاحب ولاد يامحترم
اسمها ليها زمايل في الشغل، علاقتها كويسه مع قرايبها
لاقيت الموضوع زايد عن الحدود الطبيعيه أمشي لكن مش من حقك تتكلم عن سمعه بنت🤷🏼‍♀️

"اللي تفاصيل حياتها علي فيس بوك"
كلنا بنشارك بعض بحاجات كتير وفي مننا اللي بيحب يسجل كل ذكري ليه بطريقته اللي شبه شخصيته…
لاقيت الموضوع مدايقك أمشي🤷🏼‍♀️

"السترونج اندبندت وومن ماتنفعش وتهرب"
انا مش قادره احدد عقليه شخص زيك غير انه شخص رجعي ومش مُتحضر عشان ميحبش الست او البنت اللي معاه تبقي عاقله وناضجه وعارفه اهدافها في الحياه كويس!!!

"اللي تلاقيها مقتنعه بكلام مفيده شيحه و وليد خيري ورضوي الشيربيني ماتتفعش"
انا مش عارفه ليه تفكير حضرتك واقف عند ٢٠٠٥ حضرتك احنا ك بني ادمين بنتطور كل يوم وتفكيرنا بيتطور معانا
ف مش معني ان في ناس كتر الف خيرها بدأت تظهر وتنصح البنات والستات يبقي اللي بتسمع النصيحه ماتنفعش
مهو من ضمن النصايح دي ان البنت ماتقعش ف تفكير شخص رجعي زي حضرتك🤷🏼‍♀️

"التافهه ماتنفعش"
حضرتك هي لو تافهه او عقلها منضجش بالنسبه الكافيه انها تشيل مسؤولية اهلها هيقبلوا انك تتقدم ليه من الأول؟؟
مينفعش الإنسان مننا يبقي جد طول الوقت ولا بيهزر طول الوقت… خير الامور الوسط حضرتك🤷🏼‍♀️
ف مش ذنبها اللي قولت عليها تافهه انك شخص جد وقفل طول الوقت🤷🏼‍♀️
لاقيت الموضوع زاد عن تحملك امشي لكن ماتقولش دي تافهه

"الجريئه المتبجحه ماتنفعش"
مش معني انها صريحه انها تبقي بجحه حضرتك🤷🏼‍♀️
لاقيت الموضوع زايد عن حدود الانسان الطبيعيه امشي لكن ماتقولش دي بجحه… وانك تقول علي بنت انها بجحه ده تسميه ايه يامحترم!!
💔

13/07/2022

مش عارفه لحد امتي هتفضل الإهانة عاديه لبعض الذكور!!
طب انت ضميرك فين مبيأنبكش طيب؟؟
انت بتهين الست او البنت اللي معاك سواء خطيبتك او مراتك ازاي ده شيء عادي بالنسبالك او مجرد تفريغ عصبيه!!
تخيل كده نعكس الايه؟
"هي اللي تهينك"
هتقبل علي نفسك حاجه زي دي
طب بلاش نعكس الايه خلينا نتخيل كده مكانها بنتك او أختك مثلا مش هتدايق!!
مش هتبقي عايز تجيب الشخص اللي معاها وتاخد حقها منه
مش عارفه اقول ايه غير حسبي الله ونعم الوكيل في اي حد بيهين اي ست او بنت لو حتي بكلمه انتوا مش بني ادمين فعلا💔
#نُصين
#دُنيتنا_مقسومه_علي_اثنين

06/07/2022

بعد حوادث الخطف والقتل اللي بتحصل حوالينا #نُصين قررت تنزل أسك وتسأل فيه البنات بيحسوا ب إيه وهما نازلين الشارع
والحقيقة ان الردود كانت مرعبه!!
حقيقي الواحد مش متخيل الإحساس اللي بيحسوا بيه طول اليوم و طول م هما في الشارع !!
احاسيس مرعبة حقيقي!!!
لو كل واحد عنده نيه مش حلوه تجاه اي بنت ياريت يشوف احنا بنحس ب ايه واحنا نازلين الشارع!!
كل واحده فينا بتحس إحساس مختلف كلهم مرتبطين بإن مافيش امان💔🥺
اكتر من ٧٠٪؜ من البنات معندهاش إحساس بالأمان بسبب العقول المريضه اللي محاوطانا….
كل إحساس من دول بيتكتب بكلمه حروفها قليله انما وجعها اكبر بكتير من اي حد يحس بيه زي ما هي حاسه بيه…
حرام عليكوا خليتونا نفكر ألفين مره قبل م ننزل حتي نشتري ضاروريات مش نتفسح كمان!!!
شويه أمان ارجوكوا عشان نعرف نعيش…
#نُصين
#دُنيتنا_مقسومه_علي_اثنين