اتحاد طلاب كلية الطب البشري - جامعة بنها

30/03/2026

✨ يلا بيـــنا ع الأقصر وأســــــــوان ❤️
المرادي بقى مش أي تغيير جو…
المرادي رايحين رحلة فيها عظمة التاريخ + خروجات + مود مختلف خالص 😍🔥
قررنا ناخدكو في جولة من أجمل الأماكن في مصر…
الأقصر وأسوان ♥️♥️
وطبعًا مهما اتكلمنا عنهم مش هنوفيهم حقهم…
فـ خلينا نسيب برنامج الرحلة هو اللي يتكلم 😂❤️
عشان مطولش عليكم نبدأ بالتفاصيل:
رحلتنا هتكون ٤ أيام نقضي فيهم أحلى وقت ما بين المعابد، النيل، والخروجات الحلوة ❤️

⭕️ اليوم الأول :-
▪️ نوصل الأقصر ونستلم الأوض في الفندق
▪️ نتحرك لزيارة معبد الأقصر
▪️ بعدها زيارة معبد الكرنك
▪️ وفي آخر اليوم جولة حرة نلف فيها ونغير جو 😎
⭕️ اليوم التاني :-
▪️ نصحى ونبدأ يومنا
▪️ زيارة معبد حتشبسوت
▪️ زيارة وادي الملوك
▪️ نعدي على تمثالي ممنون
▪️ وبالليل جولة حرة في البلد نعيش أجواء الأقصر 🔥
⭕️ اليوم التالت :-
▪️ نصحى نسلم الاوض ونتحرك الصبح لأسوان
▪️ زيارة السد العالي
▪️ زيارة معبد فيلة
▪️ بعدها نروح الفندق ونسكن
▪️ وبالليل خروجة لطيفة نلف فيها في أسوان ❤️
⭕️ اليوم الرابع :-
▪️ نصحى نسلم الاوض ونجهز ليومنا الأخير
▪️ نروح جزيرة النباتات 🌴
▪️ نزور القرية النوبية ونعيش أجوائها الجميلة 🎨
▪️ نطلع جبل أبو الهوا ونشوف منظر أسوان من فوق 😍
▪️ وبعدها نتحرك راجعين… ونوصل بإذن الله آخر يوم الصبح
💛 وهيكون معانا Guide طول الرحلة عشان نعيش كل تفصيلة ونفهم حكاية كل مكان ❤️❤️

📸 رحلة مليانة صور، ضحك، وذكريات مش هتتنسي



✨️

19/03/2026

الله أكبر.. الله أكبر.. لا إله إلا الله.. الله أكبر.. ولله الحمد 🌙✨️

{ ذَٰلِكَ وَمَن يُعَظِّمْ شَعَائِرَ اللَّهِ فَإِنَّهَا مِن تَقْوَى الْقُلُوبِ } [الحج: 32]

لأننا مسلمون، وتعظيم شعائر الله فريضة، يتقدم اتحاد طلاب كلية الطب بأطيب التهاني وأصدق الأمنيات بمناسبة عيد الفطر المبارك، سائلين الله أن يتقبل منا ومنكم الصيام والقيام، وأن يرزقنا وإياكم القبول والرضوان.

أعاد الله علينا وعليكم هذا العيد بالخير واليمن والبركات، وألبسكم ثياب العافية والسعادة، ورزقكم فرحةً لا تنقطع ونعيمًا لا يزول.

تقبل الله منا ومنكم صالح الأعمال.. وكل عام وأنتم بخير وعافية 🤲🌿✨

15/03/2026

قطايف رمضانية 2 : القطعة الأخيرة 🥟

هل رمضان بيعمل "Restart" لمخك؟ 🧠

يا جماعة، إحنا غالباً بنظلم الصيام لما بنقول إنه بيخلينا "متعصبين"، والحقيقة العلمية بتقول عكس كدة تماماً. الصيام هو "دورة تدريبية" مكثفة لمخك عشان يرجع أحسن من الأول. خلونا نشوف إيه اللي بيحصل في الخلايا جوة:

1. حقيقة العصبية الرمضانية 😤

الصيام بيولوجياً هو "إعادة تشغيل" للجهاز العصبي مش مجرد جوع.

لو حسيت بعصبية، فده غالباً مش بسبب الجوع، ده "انسحاب كافيين" أو "لخبطة نوم".

الصيام في الحقيقة بيقلل "محرك الخوف والقلق" في اللوزة الدماغية (Amygdala) عن طريق تقليل الـ Glutamate.

2. الكيتونات: الوقود الـ Turbo للمخ 🚀

لما الجسم بيخلص مخزون السكر، بيبدأ ينتج "كيتونات".

الكيتونات دي بتعتبر "وقود فائق الجودة" للمخ بتديك صفاء ذهني وتركيز حاد.

3. هرمون السعادة والـ BDNF 📈

الصيام بيرفع مستويات الـ BDNF، وده بروتين مسؤول عن تكوين خلايا عصبية جديدة وتحسين المزاج.

الذروة النفسية الحقيقية بتبدأ في "أواخر رمضان" لما الدماغ يتكيف تماماً ويبدأ يحصد الفوائد.

4. صمام الأمان والقلق (GABA) 🧘‍♂️

الصيام بيرفع مستويات الـ GABA، وده بمثابة "فرامل" الدماغ الطبيعية اللي بتديك إحساس بالسكينة والهدوء.

5. الخلاصة عشان ننجح في "تحدي الرمضان" ✅

الصيام مش عصا سحرية لوحده، لازم معاه "إدارة نوم وغذاء" بذكاء.

السهر المفرط بيسرق منك كل الفوائد العصبية دي، فحاول توازن.

رمضان مش شهر حرمان، ده شهر "تعديل كيمياء" عشان نطلع منه بنسخة أنضج وأهدى.

سلااام 👋 ... استنونا رمضان الجاي إن شاء الله 🤍✨



✨️

08/03/2026

قطايف علمية 2 - القطعة التالتة 🌙✨

يا ترى هو التمر فعلا طعام مثالي ولا في كلام تاني؟؟🤔
ده اللي هنعرفه انهاردة في القطعة التالتة من قطايف رمضانية 🥟

بس خلينا في الأول نعرف أكتر عن تاريخ التمر وأنواعه المختلفة.
🗓 الانسان عرف التمر من أكتر من 6000 سنة، كان في الأصل بيتزرع في جميع أنحاء مصر على مدار 4000 سنة قبل الميلاد
💰التمر كان ولا زال عنصر مهم في التجارة الدولية و دلوقتي بيتزرع في كاليفورنيا و فلوريدا و أريزونا وبلدان كتير بس تفضل الغالبية في زراعته عندنا هنا في الشرق الأوسط.
🌴عملية زراعة التمر عملية طويلة و شاقة بتبدأ بالتلقيح اليدوي بإيد العمال و أول حصاد لثمار التمر بتكون بعد 7 لـ 10 سنوات. وفيه منه أنواع كتير تختلف في الطعم واللون والحجم والقوام ومستوى السكر ولكل نوع محبين واستخدام مثالي ف مثلا فيه:
- التمر السكري: من أشهر الأنواع هنا بيكون دهبي وطري ومسكر جدا.
- تمر العجوة/ المدينة: صغير و لونه داكن اقل في السكر شوية وزراعته مشهورة جدا في المدينة المنورة.
- المجدُول: حجمه كبير، بيسموه ساعات ب “ملك التمور” مشهور اكتر في المغرب والاردن.

التمور ممكن تختلف في حاجات كتير لكنهم بيتفقوا في الفايدة...
التمر ليه فوايد كتير بتخليه اختيار مميز :
⚡️هو مصدر سريع للطاقة وده لأنه غني بالسكريات زي الجلوكوز والفركتوز ولكن مؤشره الجلايسيمي متوسط يعني بيرفع السكر بشكل أبطأ من السكريات مثلا.
🩸التمر مش بس غني بالطاقة هو كمان غني بالمعادن المختلفة، زي البوتاسيوم اللي بيدعم صحة القلب ويساعد في تنظيم ضغط الدم لأنه بيساعد في تنظيم تأثير الصوديوم عالجسم و الفسفور اللي يعتبر عنصر مهم جدا لانتاج الطاقة في الجسم.
🍃كمان هو غني بمضادات الأكسدة اللي بتساعد الجسم يتغلب على الالتهابات وبتحمي الخلايا.
😶 فوق كل ده هو كمان غني بالألياف وده بيعزز الاحساس بالشبع ويقلل شعور الجوع بين الوجبات.

الفوايد دي نقدر نستفيد منها طول ما بناكله بكميات بسيطة ومعتدلة بسسس ...
⤴️ أكل كميات كبيرة منه مش فكرة كويسة لأن سعراته الحرارية عالية : التمرة الواحدة ممكن تكون من 20 ل 25 سعرة حرارية.
كمان الألياف الكتير اللي فيه ممكن تعمل مشاكل في الهضم والمعدة مع الكميات الكبيرة.😕

ده غير انه اه التمر بالفعل غني بكل اللي قلنا عليه لكن يفتقر حاجات مهمة تانية زي إنه:
يحتوي على بروتين قليل جدًا يعني مش هيغني عن اللحمة أو البقوليات لو عايز جسمك ياخد بروتين كفاية.💪🏻
🧈 الدهون فيه تقريبا معدومة: مفيد للناس اللي عايزين وجبة خفيفة، بس مش هيعوض عن زيت الزيتون أو المكسرات للدهون الصحية.
🧩الفيتامينات اللي فيه محدودة: فيه شوية فيتامينات زي B وK، لكن مفيش A أو C بكميات كافية.
🧂أملاح ومعادن محدودة: التمر غني جدا بالبوتاسيوم ولكن باقي المعادن ممكن متكونش كفاية زي الكالسيوم مثلا.

في الاخر نقدر نقول التمر ممكن فعلا يكون اختيار مثالي خاصة لكسر الصيام.... ولكنه مش طعام كامل.🤓

نتمنى تكونوا استفدتوا واستنونا الاسبوع الجاي
سلااام👋🏻



✨️

01/03/2026

قطايف علمية 2- القطعة التانية 🌙

في مصر رمضان مش زي أي شهر … رمضان حالة شعورية كاملة ليها سحر خاص ✨️
مع أول ليلة كل حاجة بتتغير .... الفوانيس والزينة في كل مكان, صوت المسحراتي, وريحة الكنافة والقطايف, زحمة الشوارع قبل الاذان, الموائد و صوت التراويح في المساجد …. رمضان في مصر ليه سحر مختلف بس النهاردة احنا جايين نشوف يا ترى سحر رمضان عامل ازاي في أماكن تانية؟🤔

🇸🇩 من مصر هنروح للسودان … لو لقيت رجالة بيقطعوا عليك الطريق قبل الاذان متخافش لا دي مش خناقة ده كمين مسلح بس مسلح بالكرم… دي عادة اسمها “قطع الطريق” مفيش حد هيعدي لوحده وقت الفطار لازم هتفطر معاهم.

🇰🇲 ومن السودان لجزر القمر هنشوفهم في أول ليلة بيستقبلوا رمضان بالمشاعل ودق الطبول على السواحل كأنه ضيف عزيز ولازم نستقبله استقبال رسمي.

🇲🇷 في موريتانيا بقى قبل الشهر بأيام هنشوف الرجالة بتحلق شعرها بشكل كامل “زُغبة رمضان” علشان يستقبلوا الشهر بمظهر جديد كأنها رسالة صامتة ل “بداية جديدة”.

🇵🇰 في باكسان و تحديدا في مدينة بيشاور، بليل مش بس هتسمع اذان المغرب… هتسمع صوت التنافس والضحك وده علشان في ساحة المدينة بيحصل “حرب البيض المسلوق” والفايز هي بيضة مسلوقة واحدة في النهاية.

🇹🇭 حرب البيض المسلوق مش بس بتحصل في باكستان هنشوفها كمان في تايلاند في مسابقة ليلية بين الأطفال والشباب.

أما في الشيشان هنلاقي إن حبهم لرمضان مش باين بس في الطقوس لكن في الأسماء كمان.. لما طفل يتولد في شهر رمضان الولد يتسمى “رمضان” والبنت تبقى “مرحة”.

في النهاية تختلف الشعوب وتتعدد العادات بس يفضل رمضان ليه سحره الخاص في كل مكان.🌙💜

يا ترى انتم ايه أكتر عادة استغربتوها في الدول التانية؟ وايه أكتر عادة بتحبوها في مصر؟ 🤔

استنونا في القطعة الجاية
سلااام👋🏻



✨️

27/02/2026

الإفطار الرمضاني المُجمَّع | رمضان باللمة أحلى! 🌙✨

رمضان مش بس صيام وعبادة، لكنه كمان لمة حلوة ولحظات ما تتعوضش مع صحابك! 🤍✨
وعشان كده السنادي بنقدملكم الإفطار الرمضاني المُجمَّع لكل الدفعات، يوم ٢٢ رمضان في ساحة الكلية! 🍽️🌿

🍽️ الإفطار يشمل:

١- (٤/١ فرخة + ٨/١ كفتة + بطاطس + ارز + سلطات + سمبوسة )

٢- مياه + MC + عصير فريش (جوافه - مانجا - فراوله - عناب - تمر - سوبيا - برتقال - ليمون نعناع )

٣- حلويات شرقية

متفوتش الفرصة، ومستنيينكم تفطروا معانا! 🤍✨

ُجمَّع
✨️

22/02/2026

قطايف علمية 2 - القطعة الأولى🌙

عمرك فكرت ان المعلومات اللي كتير مننا واخدها كمسلّمات عن صحتنا في رمضان ممكن تكون علميا مش دقيقة؟🤔
سواء جاوبت ب اه او لا في قطعة قطايف انهاردة هنعرف الحقايق العلمية ورا المعلومات والمفاهيم المغلوطة المنتشرة عن جسمنا وصحتنا في رمضان.🌙

1⃣ المفهوم الأول: الصيام بيسبب ضعف عام ونقص في الطاقة
✅ الحقيقة: واحنا صايمين جسمنا بيبدأ بالتدريج ينقل اعتماده من الجلوكوز كمصدر طاقة سريع للجليكوجين (Glycogen) المخزن ثم للدهون ودي عملية معروفة بال Metabolic Switching (التحول الأيضي). التحول ده حالة فسيولوجية طبيعية هدفها التكيف للمحافظة على استقرار مستويات الطاقة في الجسم في الناس الأصحاء. يعني بكلمات تانية جسمنا عنده القدرة يتكيف على ظروف الصيام ويغير اعتماده من مصدر طاقة للتاني علشان نحافظ على نشاطنا.

2⃣ المفهوم التاني: الصيام بيسبب جفاف.
✅ الحقيقة: الجفاف مش ناتج عن الصيام ذاته لأن جسمنا قادر يتكيف لو حافظنا على شرب معدل سوايل مناسب خلال فترة الافطار. علشان كدة سبب الجفاف هو عدم شرب سوايل بشكل كافي بين الفطار والسحور او استهلاك أملاح وكفايين بشكل كبير خلال فترة الافطار مش الصيام نفسه.
✍️حاجات تعملها:
1. وزع شرب السوايل على فترات بدل من شرب كميات كبيرة مرة واحدة.
2. اتجنب شرب القهوة والمشروبات التانية المدرة للبول

3⃣ المفهوم التالت: الصيام بيقلل التركيز والقدرة العقلية
✅ الحقيقة: فيه ناس فعلا ممكن تلاحظ انخفاض قدرتها على التركيز بشكل مؤقت أول كام يوم في الصيام وده بيبقى عادة نتيجة اضطراب نمط النوم و تغيير نمط الأكل المفاجئ او انسحاب الكفايين, ولكن بعد فترة التكيف بيحصل استقرار في مستويات الادراك والوضع بيرجع زي ما كان. كمان فيه دراسات بتربط بين الصيام وزيادة إفراز بروتين BDNF (Brain-Derived Neurotrophic Factor) اللي بيدعم بقاء ونمو الخلايا العصبية وبيلعب دور مهم في التعلم والذاكرة والوظائف الادراكية بشكل عام.
✍️ حاجات تعملها:
1. نام عدد ساعات كفاية حتى لو بشكل متقطع.
2. متبدأش حاجات معقدة ذهنيا اول ايام رمضان.
3. قسم جلسات المذاكرة للتسهيل واستغل اوقات التركيز والهدوء.

ودلوقتي جه دوركم تقولولنا في الكومنتات ايه المعلومة اللي كنتوا فاكرينها صح عن رمضان واكتشفتوا انها مش دقيقة بشكل كامل؟🤔
واستنونا في قطعة قطايف جديدة الاسبوع الجاي.
سلااام👋🏻



✨️

19/02/2026

رمضان مبارك وكل سنة وانتو طيبين🌙💜

كالعادة علشان رمضان شهر كلنا بنسعى نعرف فيه اكتر و بعد ما السنة اللي فاتت عرفنا قد ايه كلنا بنحب القطايف جدا قررت "اللجنة العلمية" ترجعلكو بموسم جديد من حلوياتنا المفضلة "قطايف علمية" استنونا يوم الحد من كل اسبوع بعد الفطار هنتكلم في مواضيع مختلفة نشرحها باسلوب سهل وبسيط وممتع🤩💜
تفتكروا مواضيع السنادي هتكون ايه؟ 🤔

مساعدة: عمركو فكرتوا ان المسلمات اللي كلنا مقتنعين بيها وبنتعامل على أساسها ممكن تكون مش صح أوي؟
استنونا يوم الحد علشان تعرفوا الاجابة

سلااام👋🏻



✨️

18/02/2026

بِسْمِ اللَّهِ الرَّحْمَٰنِ الرَّحِيمِ
"شَهْرُ رَمَضَانَ الَّذِي أُنزِلَ فِيهِ الْقُرْآنُ هُدًى لِّلنَّاسِ وَبَيِّنَاتٍ مِّنَ الْهُدَىٰ وَالْفُرْقَانِ ۚ فَمَن شَهِدَ مِنكُمُ الشَّهْرَ فَلْيَصُمْهُ" {البقرة: 185}

يتقدم اتحاد طلاب كلية الطب البشري - جامعة بنها بخالص التهنئة لجميع الطلاب وللأمة الإسلامية جمعاء بمناسبة حلول شهر رمضان المبارك، أعاده الله علينا وعليكم بالخير واليمن والبركات.

ولا نجد تهنئة أعظم وأغلى من تهنئة رسول الله ﷺ، فنهنئكم بها ونهديكم إياها:

قال رسول الله ﷺ:
"أَتَاكُمْ رَمَضَانُ شَهْرٌ مُبَارَكٌ، فَرَضَ اللَّهُ عَزَّ وَجَلَّ عَلَيْكُمْ صِيَامَهُ، تُفْتَحُ فِيهِ أَبْوَابُ السَّمَاءِ، وَتُغْلَقُ فِيهِ أَبْوَابُ الْجَحِيمِ، وَتُغَلُّ فِيهِ مَرَدَةُ الشَّيَاطِينِ، لِلَّهِ فِيهِ لَيْلَةٌ خَيْرٌ مِنْ أَلْفِ شَهْرٍ، مَنْ حُرِمَ خَيْرَهَا فَقَدْ حُرِمَ."

اللَّهُمَّ أَهِلَّهُ عَلَيْنَا بِالأَمْنِ وَالإِيمَانِ، وَالسَّلَامَةِ وَالإِسْلَامِ، وَالعَوْنِ عَلَى الصَّلَاةِ وَالصِّيَامِ، وَتِلَاوَةِ القُرْآنِ.

✨ رمضان كريم، وكل عام وأنتم بخير! ✨❤️

10/02/2026

يعلن اتحاد طلاب كلية الطب البشري - جامعة بنها

عن رحلة لمدينة الالعاب 🤩 دريم بارك هنقضي يوم لذيذ مع بعض ان شاء الله وتدخل اي لعبة نفسك فيها هناك 🥰

بعد ما هنخلص دريم بارك ان شاء الله هنروح بعدها علي مول مصر نقعد هناك بقيت اليوم اللي حابب يشتري حاجه او يخرج مع صحابه 🥰

بعدها ان شاء الله هنتحرك نرجع علي بنها

الرحلة هتكون يوم السبت ١٤/٢ 🤩

في انتظاركم ♥️



✨️

18/01/2026