28/05/2023
إحنا ليه بقينا سلبيين كدة ..؟؟
مبقاش حد فينا عنده إستعداد إنه يسمع لغيره ويشوفه محتاج إيه..الاول بدأنا نبطل نساعد بعض ماديا بحجة إن كلنا محتاجين وبعد كدة بقينا بنخبى وندارى النعمة اللى احنا فيها وأحيانا ندعى الفقر والحاجة خايفين حد يطمع فينا أو يحسدنا ليه قلوبنا بقت جاحدة أوى كدة ..
ووصلت اننا بقينا نخاف نقول لبعض مش عايزين حاجة من باب الواجب.. أو الذوق حتى.. رغم اننا زى ما إحنا متغيرناش نفس الظروف ..نفس الأشخاص .. مش شايفة حاجة اتغيرت يمكن النفوس هى اللى اتغيرت وغيرت معاها أخلاقنا وتربيتنا ومشاعرنا واحساسنا بالمسؤولية تجاه بعض ..إحنا وصلنا إننا حتى مش عايزين نساعد بعض معنويا ونسمع لبعض وندعم بعض نفسيا بحجة إن كل واحد فينا فيه اللى مكفيه ..
احنا بقينا قاسيين أوى ..
يا جماعة فين الإنسانية ..الكلمة دى بقت غريبة ومش موجودة فى قاموسنا
فين الاخوات ..؟؟
فين سؤال الاخوات على بعض وتواصلهم ومعرفتهم أخبار بعض بلاش يا جماعة ننطوى على نفسنا وناخد جنب من بعض مهما كانت الأسباب و بلاش نظلم اللى بيسأل علينا وحريص يطمن علينا و نقول يا ترى عايز ايه مش شرط على فكرة عشان هو اجتماعى وبيسأل يكون عايز حاجة لأ هو مختلف بس عننا هو بيلاقى سعادته فى التواصل هو مش فضولى ولا متطفل ابدا ..
فين معنى الأهل فى حياتنا .. ؟؟
فين التواصل.. فين صلة الرحم..فين الود والمودة ..فين الدعم المادى والمعنوي..ما إحنا اهل بقى مش أغراب مينفعش ننكسف من بعض ولا نكسف بعض ..
فين الصداقة والأصدقاء
ليه اتغيرنا..ليه بقينا بنقعد بالسنين منسألش على بعض ومنشوفش بعض بلاش نقول الدنيا وخدانا..بلاش نقول مشاغل ..بلاش شماعة الظروف والوقت ..عشان احنا عندنا وقت نعمل فيه كل حاجة فى حياتنا مجاتش على مكالمة لصديق أو وقت هقابله فيه ..نتواصل شوية..نسعد بعض ..نخفف عن بعض ..نعيش ..بلاش نستخسر اللايك والكومنت على بوستات بعض اجبروا خاطر بعض .. مش هنخسر حاجة بس هنسعد بعض ..نصفى قلوبنا ونوايانا شوية..الدنيا مش مستاهلة وكلنا ماشيين وسايبينها ..نسيب ذكرى حلوة بقى..
الاحتياج مش كله فلوس ..الاحتياج مشاعر ..سؤال عن الحال ..نفس مطمئنة .. بوجود نفوس حواليها تطمنها انها مش لوحدها فى الدنيا
ن.ه.ى
