28/02/2015
عزيزي السائح الخليجي..
بعد التحية والسلام وال هلا والله هلا والله..
لما تيجي مصر مش هتشوف ناس بتضحك وبتاخد بعض بالأحضان زي ما مدام أنغام فهمتك،هتلاقي وشوش مليانة قلق،خوف،كآبة..كائنات عصبية مش طايقة بعض،واقفين لبعض علي الكلمة،سواقين بتكسر عليك،وناس فاتحة ازاز عربياتها وبيردحوا لبعض،وعيال بتعاكس،وبنات ماشية خايفة..الحاضر صعب،والمستقبل مفيهوش اشارة واحدة للطمأنينة فأكيد مش هيتجاهلوا كل ده ويضحكوا في وشك،كانوا عملوها مع بعض..
الشرطة عندنا مش آسر ياسين،شاب كيوت وبيضحك في وش البشر،عندنا وجه تاني للشرطة،هيئة تنشيط السياحة مش عايزة توريهولك لأنك بتدخل عملة صعبة..في المقدم أحمد مصطفي اللي قتل شيماء الصباغ،والمقدم عمر حماد والرائد محمد الأحمدي اللي عذبوا المحامي الشاب كريم حمدي حتي الموت،وفيها ظابط وقف سواق تاكسي وربطه في العربية عشان بيحتج علي سير الرتبة عكس الاتجاه..آسر ياسين لايمثلنا..
روح الفيشاوي بس مش هتلاقي ناس شبه منير وهنيدي،لو رحت الصبح هتلاقي عيلة أبوها مسرحها في الشارع عشان تصرف علي البيت،هتيجي علي طرابيزتك وترمي فول أخضر وتلح عليك تشتري منها،هترفض،وهتتضايق،فهيجي حد من القهوة يضربها شلوت بسن جزمته يكسر سلسلة ضهرها...دول حصيلة 40% فقر،الحكومة مش عايزة توريهم لك،أو تعترف بهم حتي عشان ميوسخوش صورة البلد في عينك،بس دي بلدنا..
اوعي تفكر انك هتشوف ناس شبه انغام بفستانها القصير،وغادة عادل بطرحتها الخفيفة وابتسامتها الواثقة زيادة عن اللزوم دي،وبلقيس بشعرها الأصفر،وفستانها الذهبي..دي مش مصر خالص..مصر يعني بنات ماشيين في عز الحر متكلفتيين بمليون طرحة وهدوم ملونة،وفي كل خطوة بيمشوها ان شاء الله يكونوا لابسين لبس افغاني بياخدوا كم لاتحتمله امرأة من تحرش لفظي وجسدي..الحكومة برضه شالت دول من الصورة،الفساتين والشعر المكشوف هما كود الحكومة المناسب لزي المرأة،الكود اللي متستعرش منه وهي بتقدم نفسها للعالم..لكن ده برضه مش احنا خالص..
مصر مش الكورنيش وحنطور بيستقبلك فيه سمير غانم ودلال عبد العزيز..مصر الاف القري مش لاقية صرف صحي،مصر ملايين المعدمين وساكني القبور،مصر ملايين عايشين علي الكفاف ومرتبهم بيكفي لآخر الشهر بالعافية وبيموتوا ويورثوا لأولادهم الفقر،عيال بتموت في المدارس،وأكبر نسبة وفاة علي الطرق في كوكبنا الأغر،ومرضي بيترموا علي أرصفة المستشفيات عشان مش معاهم تمن الفيزيتا..
مصر مش قريبة لاولادها أصلًا..مصر خذلتهم بشكل مهول..اتفرج علي طوابير الحالمين بتذكرة ذهاب بلاعودة علي سفارات أوروبا،علي الاف قضوا في مراكب الهجرة غير الشرعية،علي أضعافهم اللي شافوا اخواتهم بيتدبحوا في ليبيا ومش راضيين يرجعوا مصر..مصر بعيدة عن ناسها..بس هتكون قريبة منك،انت معاك فلوس تدفع،وهي يتحب الفلوس،وبتقرب أصحابها،وبتكره الفقر والفقراء وبتطردهم..حظك في دي حلو..
مصر بتاعة الحكومة غير بتاعتنا..بتاعتهم صورة مزيفة،تفننوا في رسمها من غرفهم في كومبوندات معزولة بأسوار حديدية عشان ميشوفوش الفقر،ويسرقوا من غير إحساس بتأنيب الضمير..مصر بتاعتنا هي اللي فوق دي بالظبط،مش بنخبيها ولا بنتكسف منها..مش ذنبنا لو شفتها من طرف ازاز عربيتك اللي فتحته عشان تدي لطفل جنيه..حاولنا نعدلها مرات ومرات لكن إرادتهم لبقاءها فقيرة،متخلفة،مريضة،متسولة من أمثال حضرتك في المواسم،كانت أقوي مليون مرة..
يا 100 ألف ويلكم..نورتنا..شرفتنا
مصر قريبة
