10/03/2017
فاضل 90 يوم وتدخل امتحان الثانوى العام
منشن وشير لأى حد عندك فى ثانوى حتى لو مش هتقرأ بس هينفعه , مش هيكلف 3 دقايق قراية بس هيفيدك ال 3 شهور اللى جايه ..
اعمل فولو عشان لو فى جديد اعرفك ولو عوزت اى حاجه ابعتلى انبوكس ..
سواء مخلص منهج او لا او لسا مابدأتش صدقنى ال 90 يوم دول تقدر تلم فيهم المنهج كله زى مابيسموهم شهور الدرجات والمجموع , المذاكره الصح والجد بتبدأ من دلوقتى ركز بس على ال 3 نقط اللى جايين ..
النقطه الاولى
النوم : من النهارده تبدأ تظبط نومـك تنام من الساعه 9 بليل لحد 5 الفجـر , العقل ساعت الفجر بيبقا قادر يستوعب كميه معلومات كتير وبتركيز , تصحى 5 تذاكر لحد الضهر تنزل دروسك وترجع تنام وتكرر الكلام ده لحد ليلة الامتحان , ماتقوليش انا هطبق ليلة الامتحان عشان اراجع لا انا عندى انك تنام ومخك يرتاح احسن من انك تراجع لانك لو طبقت هتدخل الامتحان هتركز اول ربع ساعه بس بعد كدا مخك هيقفل وهتبتدى تكتب قوانين وتعريفات غلط وتتوه وتفتكر نفسك حالل صح , وده اسلوب الامتحانات بتاعت الثانوى العام " السهل الممتنع " اللى هو تقدر تحله بس فى نقطه هتلخبطك محتاجه عقلك كله يكون شغال فيها .. امال بيفرقو طالب طب عن صيدله عن تجاره ازاى ؟! بالتركيز
النقطه التانيه :
صالح امك وابوك وقوى علاقتك بربنا >> قلل الخروجات من دلوقتى >> ابعد عن الفيس بوك شويه >> سد ودنك لأى حد لانك الايام دى بالذات هتسمع كميه اشاعات رهيبه زى الامتحانات هتيجى صعبه هتسمع كميه اشاعات بالهبل من ناس صحابك محبطين بس عايزين يحبطوك معاهم >> ابعد نهائى نهائى عن الكافيـن والنسكافيه والشاى لانها بتضرب الاعصاب واكتفى بكوب قهوة الصبح بس >> اعمل Stop لأى علاقه عاطفيـه دلوقتى لحد ما ال 3 شهور يعدو علي خير عشان كل تركيزك يبقا فى الامتحان ماتقوليش حبيبتى بتقوينى ولا حبيبى بيشجعنى هيهي مانضحكش ع بعض ماحدش بيقويك غير ربك >> ماتقعدش مع صحابك كتير اوائل الجمهوريه كلهم بيقفلو على نفسهم الباب من دلوقتى وبينعزلو لو قعدت مع صحابك مش هتذاكروا ولو حد فيهم جاب مجموع مش هيفيدك فى حاجة
النقطه الثالثه : المواد
ماتفتحش نهائى كتاب دليل التقويم ده عباره عن مضيعه للوقت واسئله فوق الذكاء مش بتيجى اصلا فى الامتحان لانه اللى حاطين الكتاب ده ناس معقده نفسيه والله مابيجى منه حاجة فى الامتحان >> اهم كتاب هو كتاب الوزارة فى امتحانات كتير زى الهندسه الفراغيه والانجلش بياخدو copy و paste من اسئله الكتاب >> اهتم جدا الفتره دى ب " العربى والانجليزى واللغه التانيه " لانه بالنسبه لواحد مذاكر دول عباره عن 170 درجه هديه ليك ماتضيعهمش من ايدك واه على فكره السنه اللى فاتت اكتر من 5000 طالب قفلو العـربى >> الفيزياء مش صعبه انت اللى المدرس بتاعك بيحب يعمل نفسه شبح عليك فبيجبلكم مسائل هو مخترعها عشان يوريكم انه الذكى الجامد اللى مافيش زيه لو اداكم مسأله صعبه جدا ارميها فى باسكيت الزباله الفيزياء ياحبيبى 80% نظرى يعنى حفظ وقوانين واثباتات هتضيع وقتك عشان خاطر 20% مع انه ال 20% دى عباره عن مسائل افكارها زى ماقولتلك " سهل ممتنع " يعنى لو ركزت شويه هتحلها مش زى مسائل المدرسين خالص >> والكيمياء اصعبهم الكيمياء العضويه ماتهملهاش ذاكرها فى الاسبوع 3 مرات عشان بتسيح من المخ >> 85% من اى امتحان لو انت مذاكر هتبقا عارفه وال 15% اسئله ذكاء وتركيز عشان خاطر يعرفو مين يستحق هندسه ومين يستحق طب ومين يستحق تجاره ومين يستحق حقوق .
نهايه الكلام :
زى ماقولتلك 90 يوم تقدر تعمل فيهم كل حاجة وتراجع اهم شيئ تتوكل على الله وتذاكر وتسد ودنك للناس وكلام الناس واشاعات الناس , انا عارف انك متوتر صدقنى الاول على الجمهوريه السنه دى قاعد متوتر برده زيك وخايف بس الفرق بينه وبينك انه بيذاكر وبيقدر يقعد على المكتب اكتر من 8 ساعات ماتخاليش الخوف يحبطك , وافتكر يابنى انه الثانوى العام مش المستقبل بس هى اشهر طريق للمستقبل ركز فيه , ذاكر وقوى علاقتك بربنا وصالح اهلك وظبط نومك واكلك وركز ع الحجات المهمه بس وتوكل على الله وخش امتحن وحط فى دماغك دايما حاجة واحده بس : الاف العباقره ع مدار السنين اللى جابو اكتر من 98% فى الثانوى العام مش احسن منك فى حاجة .
" لا يكلف الله نفسا الا وسعها , يعنى من الاخر انت قدها "
