ربيهم صح

30/12/2021

شربت شاي بالملح قبل كدة؟

قاعد في البيت لقيت سلمى بنتي بتقولي: بابي تحب اعملك شاي؟
أنا: ايه دة؟ بقيتي بتعرفي تعملي شاي؟
هي: آه اتعلمت.
أنا: خلاص شربيني شاي من إيدك وهسجل تاريخ النهاردة عشان دي اول كوباية شاي من ايدك.

البنت فرحت أوي وجريت على المطبخ، ورجعت بعد شوية ومعاها كوباية شاي فعلاً.

مسكت الكوباية وهي واقفة مترقبة مستنية رأيي، تذوقت… إيه دة؟ شاي بالملح؟ 😱😱😱😱

حسيت بطعم غريب نفاذ جداً، وفي لحظة حسيت إن غضب السماء نزل عليا، والرعد بيرعد، والبرق بيبرق😂.

بس بصيت للبنت ولهفتها، لقيت وشي تلقائي اتحول ليعبر عن التلذذ، وقلتلها اد ايه الشاي حلو وجميل.

البنت فرحت واتنططت ومشيت بعد ما اطمنت انى خلصت اغلب الكوباية 😂.

بعد تلات ساعات جبتها وسألتها: تعرفي الفرق بين السكر والملح؟
وقعدت اعرفها الفرق وفي النهاية قلتلها انتى اتلخبطتي وحطيتي ملح في الشاي، بس أنا استمتعت بكوباية الشاي فعلاً لانى فرحان ان انتى بقيتي بتعرفي تعمليه.

وقلبنا الموضوع هزار.

افتكرت للحظة جلسات كتير اصحابها بيجولي من تحت بند (الإحراج وحبس الدم).

بلاقي واحد بيحبس دم مراته ويديها كلمتين قاسيين عشان بوظت طبخة.
وواحدة تحبس دم جوزها عشان اشترى حاجة مش على زوقها.
وواحد يحبس دم ابنه عشان موقف غلط الابن عمله.
وواحدة تحبس دم بنتها عشان درجات ناقصة في الامتحان.

س: يعني انت عاوزنا نسيب عيالنا يغلطوا ومنعلمهمش الصح من الغلط؟؟

مين قال كدة؟ أنت حقك تعلمه وتقوم سلوكه وتعرفه غلطاته وتشرف كمان (أحياناً) على تنفيذه للمطلوب.
بس إيه علاقة التقويم بإنك تحبس دمه؟ وتهز صورته قدام نفسه؟ وتخليه يشك في نفسه هل هو فعلاً إنسان وحش أو فاشل؟

فك الرابط بين (تعليم الآخرين) وبين (إحراج الآخرين)

أصل كسرة النفس بتوجع وبتضايق 😔.

علم عيالك الصح من الغلط… بس متكسرش نفسهم.

ومتنساش

انت مش مجبر تخلف، بس لو خلفت… انت مجبر تربي.



أحمد سمير
باحث في علم النفس الإيجابي

للدورات والاستشارات- واتساب: 01129873525

30/12/2021

من مدة فيه ناس زاروني وقعدوا مع عيالي، ولما جم مروحين واحد منهم قالي: "على فكرة عيالكم متربيين أوي، ياريتني عرفت اربي عيالي زيكم".
طبعاً ابتسمت في وشه ونافقته بجملتين تلاتة من نوعية لا انت بتعرف تربي وبتاع.
بس الحقيقة هو آه فعلاً عنده قصور في تربية ولاده، فخليني أقولك كام نقطة ركز فيهم:

* انتوا كآباء حقكم تتخانقوا، الخناقات الزوجية حق كفله الدستور والمجتمع، من حق كل زوج وزوجة إن هرموناتهم تطفح على بعض… على بعض ها… مش على العيال😉
عندكم باب أوضة، يتفضل يتقفل عليكم واتخانقوا وتقمصوا دور جون سينا وهو بيضرب تريبل اتش وعيشوا حياتكم.
وطبعاً مفيش أي داعي لمسابقات الأوبرا في الخناق… انتوا مش قبيلة الطرش يعني، ولو عاوزين تزعقوا وماله، ودوا عيالكم بشياكك عند بيت قرايبكم، وروحوا بشياكة، واشربوا ينسون وابتدوا وصلة الغنا، قصدي الزعيق.

* لما حد فيكم تتفقع مرارته من التاني، متطلعش غلبك في العيال، دي حيلة نفسية اسمها #الازاحة، وهي ببساطة معناها اللي مقدرش على البتاع يتشطر على البردعة 🙈… عيالك ملهمش ذنب على فكرة.

* متضربش عيالك، كل الحجج اللي هتقولها ولا تسوى الأضرار اللي هتسببها لابنك لما تضربه، وفيه بدل البديل ألف.

* بلاش تقعد تشتكي عمال على بطال من عيالك، المجتمع فهمك إن دي الطريقة المثالية عشان تخزي العين (أخزاهم الله)
طب بذمتك ودينك، انا يا سيدي همشي على كلامك ان الحسد موجود لأنه مذكور في القرآن (بس راجع ربنا قال عليه ايه) وموافق كمان ان الحسد وقع الطير من على الشجر ودمر الكواكب واحرق النجوم، طب كنت حسدنا ولاد العم اللى حاربناهم في اكتوبر واستعدنا القدس وخلصنا، بس ماشي انت صح.
ايه بقى الآية أو الحديث اللي قالتلك اشتكي من عيالك عشان محدش يحسدهم؟؟
أنت بالطريقة دي يا بروفسيور الحسد بتزرع في عقلك كراهية ولادك، وطاقة تحملك ليهم هتقل جداً، وتركيزك معاهم هيقل تماماً.

ركز مع ولادك لسبب بسيط:
أنت مش مجبر تخلف، بس لو خلفت… أنت مجبر تربي
‎
‎

‎الصفحة الرسمية: www.facebook.com/psyahmedsamir
‎الحساب الشخصي: www.facebook.com/samireshd
‎الانستجرام: ahmedsamir3110
‎اليوتيوب: https://youtube.com/c/eshdonline
‎التيك توك:
تويتر:
قناة التليجرام: https://t.me/joinchat/AIXwI6I4nHQxYWE8

30/12/2021

موقف أثر فيا جداً ومش قادر محكيهوش:

النهاردة بنتى كان عندها امتحان، وصلتها لحد باب المدرسة وكان صاحباتها واقفين، سلموا عليا وبعدها كلمت سلمى، حطيت ايدي على شعرها وقلتلها اللي بقوله كل مرة:

"اوعي تغشي يا سلمى، اسقطي وقوليلي أنا سقطت أرحم من إنك تقوليلي غشيت، مادام عملتي اللي عليكي وذاكرتي يبقى خلاص، ركزي بهدوء وبس، أنا بحبك"

وسلمت عليها ورحت قعدت فالعربية لحد ما تخلص امتحانها.

بعد اللجنة رجعت وقالتلي حاجة أثرت فيا جداً:

"بابا صاحبتي بتقولي هو مينفعش باباكي يتبناني؟
سلمى: عاوزاه يتبناكي ليه؟
صاحبتها: عشان بيطبطب على راسك، أنا بابايا عمره ما طبطب عليا"

والبنت كانت بتضحك وبتهزر بس مخي سرح في ألف حاجة

أعزائي الآباء والأمهات:

لازم تعرف إن ابنك احتياجاته مش مادية بس، له احتياجات نفسية كتير.
عارف إنكم مفحوتين طول اليوم بين إنكم تجيبوا فلوس وتودوهم مدارس ودروس وتمارين وشراء هدوم وكسوة وأكل وشرب ونت وموبيلات وليلة جامدة أوي سعادتك، أنا أب من ١٤ سنة وعارف كل دة كويس جداً.

بس عيالك ملهمش ذنب

أنت اللي حاربت عشان تخلفهم، يبقى لازم تقوم بدورك على أكمل وجه.

* البنت لو ملقتش حضنك، لما تكبر هتدور عليه عند الغريب
* البنت لو ملقتش كلمتك الحلوة، هتسعى إنها تسمعها من حد مستغل، وهتقدمله إيه في المقابل الله أعلم... وأنت فاهمني كويس.
* البنت لو دمها اتحبس من أبويها، هتتصاحب على أشكال ضالة عشان تحس بقيمتها.
* البنت لو أيقنت إن دورك فلوس وبس، متزعلش لما تعتبرك مجرد مكنة ATM وبس.

ونفس الكلام على أبناءك الولاد

أنا عارف وواثق إنك بتحب عيالك بجنون، ومستعد تضحي بروحك ببساطة عشان تحميهم من مجرد شكة دبوس، بس ليه كوكب الأرض كله يعرف إنك بتحب عيالك إلا عيالك نفسهم؟؟

إيه الحكمة العظيمة الخزعبلية اللي ورا إخفاءك لمشاعرك؟؟

وتعالالي هنا بقى:

إيه حكاية إنك تقلب على طفلك بالأيام والأسابيع عشان غلطة عملها؟

ابنك غلط؟ يتعاقب، ولفترة محددة جداً، وبعدها ترجع تصب له الحب صب جوة قلبه، لكن قلبتك الدائمة عليه بتوصل له رسالة إنك مش بتحبه😪.

كل حرف
كل لمحة وجه
كل نبرة صوت
بتوصل رسالة لعيالك

وصلهم رسالة إنك بتحبهم
بتدعمهم
بتخاف عليهم

علمهم يخافوا عليك بدل ما يخافوا منك

ومتنساش

أنت مش مجبر تخلف، بس لو خلفت ... فأنت مجبر تربي

أحمد سمير
باحث في علم النفس الإيجابي

07/05/2019