29/05/2026
Ambasada e Republikës së Shqipërisë ishte pjesë e ceremonisë së ndarjes së çmimeve të Edicionit të 54-t të Ekspozitës Ndërkombëtare të Artit për Fëmijë Lidice 2026, organizuar në kujtim të fëmijëve viktima të luftës dhe si një mesazh universal në mbrojtje të paqes, dinjitetit njerëzor dhe të drejtave të fëmijëve.
Këtë vit, ekspozita me temën “LIBRI” mblodhi 12,392 punime nga 70 vende të botës. Nga Shqipëria u paraqitën 17 punime artistike, duke dëshmuar talentin, kreativitetin dhe ndjeshmërinë artistike të fëmijëve shqiptarë.
Jemi veçanërisht krenarë që piktura e vogëlush*t 8-vjeçar Arsald Ponari u vlerësua me Çmim Nderi, një sukses që na gëzon dhe na frymëzon të mbështesim më tej talentet e reja shqiptare.
Ekspozita Ndërkombëtare Lidice u themelua në vitin 1967 në kujtim të fëmijëve viktima të fshatit Lidice në Çeki, i cili u shkatërrua nga regjimi nazist në vitin 1942. Pas atentatit ndaj një zyrtari nazist, fshati u rrafshua pothuajse plotësisht, qindra banorë u ekzekutuan ose deportuan dhe shumë fëmijë humbën jetën. Lidice mbetet sot një simbol ndërkombëtar i kujtesës historike, i rezistencës ndaj urrejtjes dhe i mbrojtjes së vlerave njerëzore.
Përmes artit dhe krijimtarisë së fëmijëve, kjo ekspozitë vazhdon të përcjellë mesazhe të fuqishme për paqen, tolerancën, dialogun dhe rëndësinë e ruajtjes së kujtesës historike për brezat e ardhshëm.
Urime të gjithë pjesëmarrësve dhe veçanërisht Arsald Ponarit për këtë arritje të bukur!
Ministria për Evropën dhe Punët e Jashtme - Republika e Shqipërisë
Eduard Stehlík Památník Lidice
