Ambasada e Republikës së Shqipërisë në Zvicër

13/09/2026

10/09/2026

Fluturime direkte mes Luksemburgut dhe Tiranës, Ministri Hoxha: Një tjetër kompani ajrore evropiane vjen në Shqipëri.

Ministri për Evropën dhe Punët e Jashtme Ferit Hoxha njoftoi në rrjetin social X, vendosjen e fluturimeve direkte midis Luksemburgut dhe Tiranës përmes kompanisë Luxair.

Ministri e konsideroi një lajm të shkëlqyer ardhjen e një tjetër kompanie ajrore evropiane në Shqipëri.

"Duke filluar nga 29 marsi 2027, kjo linjë e re që do të funksionojë gjatë gjithë vitit do të kryejë fluturime dy herë në javë, të hënave dhe të premteve, duke krijuar lidhjen e parë të rregullt ajrore direkte midis Luksemburgut dhe Shqipërisë", shkruan Ministri Hoxha.

Sipas tij, një lidhje e re dhe e mirëpritur mes dy vendeve tona do t'i afrojë edhe më shumë njerëzit, bizneset dhe komunitetet tona.

Më herët, në 21 Prill të këtij viti, Ministri Hoxha pati zhvilluar një vizitë në selinë e Luxair ku në një takim me CEO-n e kompanisë, Gilles Feith, u diskutua pikërisht mundësia e lidhjes Luksemburg - Tiranë përmes fluturimeve direkte.

10/09/2026

Shërbimin konsullor e vlerësojnë më mirë qytetarët që e marrin atë.

Ministri për Evropën dhe Punët e Jashtme, Ferit Hoxha, njoftoi sot vendosjen e një kodi QR në çdo pikë shërbimi konsullor: në Ministri, në përfaqësitë diplomatike dhe në konsullatat tona.

Pas marrjes së shërbimit, qytetarët mund të skanojnë kodin, të vlerësojnë përvojën e tyre dhe të ndajnë vërejtjet apo sugjerimet përmes një formulari të shkurtër online.

Na tregoni çfarë funksionon, çfarë jo dhe si mund t’i përmirësojmë më tej shërbimet konsullore.

10/09/2026

08/09/2026

Ambasadori Dredha priti Kryesinë e “AlbaHealth”

Ambasadori i RSH-së në Bernë, z. Ermal Dredha priti sot në Ambasadë Kryesinë e shoqatës “Alba Health”, të drejtuar nga z. Ekrem Hasani, sipërmarrës i suksesshëm dhe kontribues i çmuar i komunitetit shqiptar në Zvicër, së bashku me anëtarët znj.Shqipe Halili, z.Ali Murtaj dhe z.Nezir Tishuki.

Në një atmosferë miqësore u diskutua mbi mundësitë e forcimit të bashkëpunimit, rrjetëzimin e profesionistëve shqiptarë të shëndetësisë, krijimin e urave me institucionet në Shqipëri, organizimin e aktiviteteve të përbashkëta, si dhe përfshirjen e studentëve shqiptarë të mjekësisë dhe infermierisë.

Ambasadori Dredha vlerësoi lart angazhimin dhe kontributin e “Alba Health” në Zvicër dhe siguroi Kryesinë për mbështetjen maksimale të Ambasadës ndaj nismave që fuqizojnë profesionistët shqiptarë, krijojnë ura bashkëpunimi me Shqipërinë dhe i shërbejnë komunitetit tonë në Zvicër.

07/09/2026

Dje në Aargau, me ftesë të Misionit Katolik Shqiptar dhe të Don Pal Tunaj, Ambasadori i RSH-së në Bernë, z. Ermal Dredha , mori pjesë në veprimtarinë kushtuar përkujtimit të Shenjtërimit të Shën Nënë Terezës, në prani edhe të Don David Gjugjajt, drejtues i Radio Vatikanit në gjuhën shqipe, përfaqësuesve të Misionit Katolik, institucioneve, shoqatave dhe komunitetit shqiptar në Zvicër.

Në kremtimin e 10 vjetorit të shenjtërimit të Saj, Nënë Tereza mbetet një krenari për shqiptarët dhe një figurë universale e humanizmit. Në një kohë të shënuar nga luftëra, ndarje dhe kriza humanitare, mesazhi i saj është më aktual se kurrë “të mos jemi indiferentë ndaj vuajtjes së tjetrit dhe të shohim tek çdo njeri dinjitetin që meriton”!

Paqja fillon kur shohim tek tjetri, para së gjithash, njeriun. 🇦🇱🇨🇭

05/09/2026

🇦🇱🇨🇭 Nga Puka në Zvicër – 10 vite “Fol Shqip Show”

Ambasadori i RSH-së në Bernë, z. Ermal Dredha , mori pjesë në mbrëmjen në shënimin e 10-vjetorit dhe çeljes së sezonit të ri të emisionit “Fol Shqip Show”, drejtuar nga Altin Marku , me origjinë nga Puka, si dhe Marash Pulaj.

Në fjalën e tij përshëndetëse, Ambasadori vlerësoi kontributin e emisionit gjatë një dekade në promovimin e gjuhës, kulturës dhe arritjeve të shqiptarëve në Zvicër, si dhe në forcimin e lidhjeve me shoqërinë zvicerane.

Mbrëmja, ku morën pjesë përfaqësues të institucioneve të Zyrih-ut, diplomatë, personalitete të arsimit, sipërmarrës dhe miq të komunitetit shqiptar, shënoi gjithashtu hapjen e “Melodia Zürich”, një hapësirë e re multikulturore në Volketswil.

🇦🇱🇨🇭 10 vite fjalë, kulturë dhe ura mes shqiptarëve dhe Zvicrës.