16/07/2022
سنڌ ايڪشن ڪاميٽي جي پڌرائي
(16 جولائي 2022ع)
ڄامشورو : سنڌ ايڪشن ڪاميٽي جو سربراھي اجلاس جي ايم سيد ايڊيفس ڄامشورو تي ڪنوينر سيد جلال محمود شاھہ جي صدارت ھيٺ ٿي گذريو. ان ۾ سنڌ جي موجودہ صورتحال تي تفصيلي غور ويچار ڪيو ويو ۽ انھي ڳالھہ تي اتفاق ڪيو ويو تہ سنڌ اسان جو ھزارين سالن کان تاريخي وطن آھي، جنھن جا اسان سنڌي وارث آھيون. تازو حيدرآباد ۾ نوجوان بلال ڪاڪا جي بي رحمانہ قتل جي شديد لفظن ۾ مذمت ڪيون ٿا. افغان پناھگير لکن جي تعداد ۾ ڪراچي سميت سنڌ جي ننڍن وڏن شھرن ۾ آباد ٿيل آھن. جنھن سبب سنڌ جي معيشيت ۽ امن امان تباھہ ٿي چڪو آھي ۽ سنڌين کي اقليت ۾ تبديل ڪرڻ جي ڪوشش ڪئي پئي وڃي ، جنھن ۾ سنڌ سرڪار مڪمل طور سھولتڪار بنيل آھي. گذريل 15 سالن کان پيپلزپارٽي سرڪار ، افغانين ۽ ٻين غير ملڪين کي شناختي ڪارڊ ، ڊوميسائل ، ووٽ ، ملڪيت ۽ ڪاروبار جو حق ڏيئي ، خاص طور تي ڪراچي ۾ افغان پناھگيرن جون ڪالونيون ۽ ڳوٺ ريگيولرائيز ڪري سنڌ جي عوام سان ناانصافي ۽ ظلم ڪندي رھي آھي. گذريل ڪجھہ ڏينھن کان افغان پناھگير ڪراچي جي سھراب ڳوٺ، ال آصف اسڪوائر، ماڊل ٽائون ۽ خاص طور ٻين سنڌي آبادين، مک شاھراھن ۽ ڪاروباري مرڪزن مٿان مصلح جٿن جي صورت ۾ حملا ڪري رھيا آھن، جيڪا ڳالھہ قابلِ مذمت آھي. سنڌ پوليس ۽ رينجرز مڪمل طور تي ناڪام ٿي چڪي آھي. افعاني پناھگير سرعام ھٿيار ۽ افغانستان جا جھنڊا کڻي پوليس ۽ قانون نافذ ڪندڙ ادارن کي للڪاري رھيا آھن . ھن صورتحال ۾ وفاقي ۽ سنڌ حڪومت کي نوٽيس وٺي کين گرفتار ڪري افغانستان واپس موڪليو وڃي ۽ سنڌ ۾ سمورن ڪاروباري مرڪزن ۾ مصلح جٿن ۽ منشيات جي ڪاروبار کي ختم ڪيو وڃي.
خيبرپختون خواھہ ۽ ٻين صوبن مان سنڌ ۾ روزگار ڪندڙ ۽ رھندڙ پختونن ۽ ٻين قومن جي ماڻھن سان اسان جو ڪو تعصب ڪونھي پر ھن صورتحال ۾ پاڪستان جي ٻين صوبن جي شھرين کي سنڌ ۾ روزگار ۽ مزدوري ڪرڻ جو تہ حق ھئڻ گھرجي پر اسان سمجھون ٿا تہ پاڪستان ۾ شھريت ڏيڻ جو اختيار صوبائي حڪومتن کي ھئڻ گھرجي، ان ڪري ٻين صوبن مان آيل ماڻھن کي ووٽ ، ملڪيت، خريد ڪرڻ ۽ ڊوميسائل پي آر سي جو اختيار نہ ھجڻ گھرجي. اسان ٻين قومن بشعمول پختونن جي قومي قيادتن کي واضع ڪرڻ چاھيون ٿا تہ اھي سنڌ جي ان جائز مطالبن ۾ سنڌ سان گڏ بيھن.اسان سمورن سنڌ دوست پرامن سياسي ۽ قومي ڪارڪنن کي جس ڏيون ٿا جن ھنن ڏکين گھڙين ۾ پرامن احتجاجن ذريعي سنڌ جي حقن لاءِ جدوجھد ڪئي ۽ پنھنجي قوم کي پرامن ڪرڻ ۾ مثبت ڪردار ادا ڪيو.
اڄوڪو اجلاس متفقہ راءِ سان گُھر ڪري ٿو :
1. بلال ڪاڪا جي قاتلن کي گرفتار ڪري سندس خون سان انصاف ڪيو وڃي.
2. افغان پناھگيرن سميت ٻين سمورن غيرقانوني پرڏيھي پناھگيرن کي پنھنجن ملڪن ڏانھن واپس موڪليو وڃي.
3. موثر قانون سازي وسيلي پاڪستان جي ٻين صوبن مان سنڌ ۾ روزگار لاءِ آيل ماڻھن کي ڊوميسائل، پي آر سي شناختي ڪارڊ، ملڪيت خريد ڪرڻ ۽ ووٽ جي حق کان محروم ڪيو وڃي.
4. ڪراچي ۾ افغان پنھگيرن ۽ ٻين غير قانوني پرڏيھين جي ڪچين آبادين کي ريگيولرائيز ڪرڻ واري سنڌ اسيمبلي مان پاس ڪيل بل کي واپس ورتو وڃي.
5. آبادين ۽ مين شاھراھن تي پرتشدد ڪندڙ ڪارواين ۽ حملن ۾ ملوث افغانين کي فوري طور گرفتار ڪيو وڃي.
6. سڄي سنڌ مان گرفتار ڪيل پرامن قومي ڪارڪنن کي فوري طور آزاد ڪيو وڃي.
اجلاس ۾ فيصلو ڪيو ويو تہ مٿين مطالبن جي مڃتا لاءِ 21 آگسٽ 2022ع تي حيدرآباد ۾ سنڌ ايڪشن ڪاميٽي طرفان جلسہ عام ڪيو ويندو.
اڄوڪي اجلاس ۾ سنڌ ترقي پسند پارٽي جي چيئرمين ڊاڪٽر قادر مگسي، جيئي سنڌ محاذ جي چيئرمين رياض علي چانڊيو، قومي عوامي تحريڪ جي صدر اياز لطيف پليجو، عوامي جمھوري پارٽي جي صدرلعل شاھہ، پورھيت مزاحمت جي صدر مسرور شاھہ،جسقم اڳواڻ ارباب ڀيل، جيئي سنڌ محاذ سربراھہ عبدالخالق جوڻيجو، جيئي سنڌ قومي پارٽي جي سيڪريٽري ھالار رتڙ، انڊيجينيئس الائنس جي اڳواڻ سيد خدا ڏنو شاھہ، جسقم اڳواڻ ديدار شام ، انڊس لائيرس فورم جي اڳواڻ ايڊووڪيٽ عاقب راڄپر، جيئي سنڌ محاذ (س) جي اڳواڻ آدم ٻٽ، سنڌي ادبي سنگت جي اڳواڻ نعيم ملڪ، سيد زين شاھہ، تاج جويو، روشن علي ٻرڙو ، حيدر شاھاڻي، نواز شاھہ ڀاڏائي، مير احمد منڱريو ۽ ٻين شرڪت ڪئي.
