02/03/2022
ಬರವು ಬೊಕ್ಕ ಪಟ: #ಮಹೇಶ್_ಬೋಳೂರು
ಕೋಟಿ ಚೆನ್ನಯೆರ್ನ ಪಾಡ್ದನೊದ ಕಥೆಟ್ಟ್ ಬರಂದಿನ, ಆಂಡ ಗರೋಡಿಲೆಡ್ ನಿಲೆ ಉಂತುದು ಪೂಜೆ ಪಡೆಪುನ ಮಾಯದ ಮಾನಿ ಬಾಲೆ ಮಾಯಾಂದಾಲ್ ಅಸಹಾಯಕ ಪೊಣ್ಣುಲೆಗ್ ಕಾಪುನ ದೈವೀಸ್ವರೂಪದ ಪೆದ್ಮೆದಿ ದೈವ. ಮುತ್ತೇಸಿ, ಸಂತಾನ ಭಾಗ್ಯ, ಸುಖೊತ ಪ್ರಸವ, ಬಾಲೆ ಬೊಕ್ಕ ಪೆದ್ಮೆದಿನ ಕಾಪುಗ್ ಆನಿಡ್ದು ಇನಿಮುಟ್ಟಲಾ ವಾ ಜಾತಿದ ಕಟ್ಟಲೆದಾಂತೆ ತುಲುವೆರ್ ನಂಬೊಂದು ಬತ್ತಿನ ಶಕ್ತಿ.
ಆಳ್ ಅರಸನ ದೌರ್ಜನ್ಯೊಗ್ ಮಾಯ ಸಂದಿನ ಮಾಯಾಂದಾಲ್ನ ಕಾಲ ಕೋಟಿ ಚೆನ್ನಯೆರ್ನ ಕಾಲೊಡ್ಲಾ ದುಂಬು ಪನ್ಪೆರ್. ಗರೋಡಿ ಆಪಿನ ಪೊರ್ತುಗು ಉಪದೈವ ಆದ್ ಆಳಿಯಕಟ್ಟ್ ಪ್ರಕಾರ ಭಾತ್ರತ್ವ ನೆಲೆಟ್ ಭಾವನಾತ್ಮಕ ಮೆಗ್ದಿಯಾದ್ ಮಾಯಂದಾಲ್ ಕೋಟಿ ಚೆನ್ನಯೆರ್ನೊಟ್ಟು ಆಶ್ರಯ ಪಡೆಯುವೊಳ್. ಪಾಂಗಳದ ಬನ್ನಾಯೆ ಊರ್ದಕ್ಲು ಮಾತಾ ಕೊಲತ ಜುಮಾದಿ ಕೋಲಗ್ ತಿರಿ, ಬೊಂಡ ಕಡಡ್ಪುಡೊಡು ಪಂಡುದು ಆದೇಶ ಮಲ್ಪನಗ ಗುಡ್ಡೆದ ಆಲಿಬಾಲಿ ನಾಯ್ಗೆ ಮಾತ್ರ ತಿರಿ ಪಂಡ ಮುಂಡೆದ ಒಲಿ ಅತ್ತ್, ಬೊಂಡ ಪಂಡ ಕಾಯೇರ ಕಾಯ್ ಆತ್ತ್, ಕಾಡುದ ಕಾಟ್ ಬೂತಗು ಯಾನ್ ಕೊರಯೆ ಪಂಡುದು ಆ ಆದೇಸೊಗು ಸಡ್ಡ್ ಉಂತುವೆ. ಜಮೀನ್ದಾರನ ದರ್ಪ ಬೊಕ್ಕ ಬೆನ್ನಿದಕುಲೆನ ಸಂಘರ್ಷ ತಿಕ್ಕಾಟೊಡು ಅಸಹಾಯಕ ಪೊಣ್ಣು ಬೊಕ್ಕ ಬಾಲೆ ಮಾತ್ರ ಜಮೀನ್ದಾರನ ಪ್ರತೀಕಾರೊಗು ಬಲಿಯಾಪಲ್.
ತುಲುನಾಡುದ ಅಪ್ಪೆಕಟ್ಟುಡ್ ದ ಸಂಸಾರೊಡ್ ಬುಲೆಯಿನ ಈ ಮಾನಿಬಾಲೆ ಮೂಜಿ ದಿನೊತ ಪೆದ್ಮೆದಿ ತನೊ ತಮ್ಮಲೆನ ತಪ್ಪುಡ್ದಾವುರ ದಯಿವೊದ ಉರಿಮೆನ್ನ್ ಗ್ ಬೂರ್ದು ಅಲೆನ್ ದಯಿವ ಮಾಯ ಮಲ್ಪುಂಡು. ಈ ಪೊರ್ತು ತನ್ನ ಬಾಲೆನ್ ತನ್ನೊಟ್ಟು ಮಾಯ ಮಲ್ಪೊಡುಂದು ದಯಿವೊಡ ಕೇನುವೊಲು. ಮಾಯೊಡ್ ತನ್ನ ಕಾರ್ನಿಕೊಡ್ ಪಾಂಗಳದ ಬನ್ನಾಯೆರ್ನ ಮರ್ಮಲೆನು ಮಾಯ ಮಲ್ತುದು ದೈವತ್ವಗ್ ಏರ್ದು ಬಾಲೆದೊಟ್ಟು ಆರಾಧನೆ ಪಡೆಪೊಲು.
ಗರಡಿ ಸರ್ವ ದಯಿವ ನಿಲೆತ ಸಾಮಾಜಿಕ ಸಾಮರಸ್ಯೊದ ಜಾಗೆ. ತುಲುನಾಡುದ ಎಚ್ಚಿನ ಪೂರಾ ಗರಡಿಡ್ಲಾ ಮಾಯಂದಾಲುಗ್ ಮರತ ಪಾಪೆಡ್, ಕಂಚಿದ ಮೂರ್ತಿಡ್ ಕೆಲವು ಕಡೆಟ್ಟ್ ಕಲಸ ದೀದ್ ಆರಾಧನೆ ಮಲ್ಪುನ ತೂಪ. ಬೈದೆರ್ಲೆಗ್ ಆರಾಧನೆ ಆಯಿ ಬೊಕ್ಕ ಮಾಯಂದಾಲೆನ ಸೇವೆ ನಡಪುಂಡ್. ಪೊಂಜೋವುನಕುಲು ಪೆದ್ದುನ ಪೊರ್ತುಡ್ ಮಾಯಂದಾಲುಗು ಪಂತಿನ ಪರಕೆನ್ ಮಾಯಂದಲ್ನ ನೇಮ-ಕೋಲದಾನಿ ತಿರ್ಸಾವೆರ್.
ಮಾಯಂದಾಲೆನ ಕತೆ ನಡೆದಿನಿ ಒಡಿಪುದ ಕಟಪಾಡಿ, ಪಡುಏಣಗುಡ್ದೆದ ಊರುಡುಂದು ಪನ್ಪೆರ್. ಕಟ್ಪಾಡಿ ಪೇಂಟೆಡ್ದು ರಡ್ದ್ ಕಿ.ಮೀ ದೂರೊದ ಕೋಟೆ ಪನ್ಪಿನವುಲು ಮಾಯಂದಾಲ್ ತೋಟ ಉಂಡು. ಮಾಯಂದಾಲೆನ ಜೀವನಕತೆ ನಡತಿನ ಜಾಗೆ ಉಂದುವೇನ್ಪೆರ್. ಮುಲ್ಪ ತೋಟೊದ ನಡ್ಯೆಡ್ ಮಾಯಂದಾಲ್ ಗುಡಿ, ಗುಡಿತುಲಾಯಿ ಆರಾಧನೆ ಪಡೆಪುನ ಮಾನಿ ಬೊಕ್ಕ ಬಾಲೆದ ಎಲ್ಯ ಮರತೊ ಮೂರ್ತಿ, ಅಂಚೆನೆ ಗುಡಿತ ಪಿರ ಮೆಯಿಟ್ಟ್ ಒಂಜಿ ಇಸೇಸವಾಯಿನ ಮರತ ಕಂಡಿ ಉಂಡು. ಆನಿ ಮಾನಿಬಾಲೆನ್ ಗಿರಾಮೊ ದಯಿವ ಮಾಯ ಮಲ್ಪನೊಗ ಮಾಯಂದಾಲೆನ ಆಸೆದಂಚ ಅಲೆನ ಬಾಲೆನ್ಲಾ ಮಾಯ ಮಲ್ಪುನ ಪೊರ್ತು ದಯಿವ ಉಂದುವೇ ಕಂಡಿಡ್ ಬಾಲೆನ್ ಒಯಿದ್ಂಡು ಪನ್ಪಿನ ಪಾತೆರ ಉಂಡು. ದುಂಬು “ L” ಆಕಾರೊಡ್ ಬಯಿತ ಮಾಡುದ ಇಲ್ಲು ಇತ್ತ್ಂಡುಗೆ. ಅಯಿಕ್ಲಾ ಇಲ್ಲಾ ಪಿರಾವುದ ಗೋಡೆಡ್ ಉರುಂಟುದ ಕಂಡಿ ಇತ್ತ್ಂಡ್ಂದು, ಬಯಿತ ಮಾಡು ಪೋದು ಒಡಿಲ್ದ ಮಾಡು ಬತ್ತುದು ಬೊಕ್ಕ ಇತ್ತೆದ ಸಿಮೆಂಟುದ ಗುಡಿಕ್ಕ್ ಬದಲಾಯಿನೆಕ್ಕ್ ಸಾಕ್ಷಿಯಾದ್ ಮಾಯಂದಾಲೆಗ್ ನಿತ್ಯ ಪೂಜೆ ಪೂಜೆ ಕರಿಪುನ 94 ವರ್ಸೊದ ಶೀನ ಪೂಜಾರ್ಲು ಪನ್ಪೆರ್. ಇಲ್ಲಾಲ್ ನಡತಿನ ಆಜಾಗ್ರತೆಡ್ ತೂ ಬೂರ್ದು ಬಯಿತ ಇಲ್ಲ್ ಪೊಸುದು ಪೊದಿತ್ತ್ಂಡುಗೆ. ಅಯಿಟುಡ್ದು ಬೊಕ್ಕ ಗುಂಡ ಕಟ್ಟಾಯೆರ್. ಮಾಯಿಂದಾಲ್ ತೋಟೊಡ್ ಇತ್ತೆ ವಾಸ ಇಪ್ಪುನ ಇಲ್ಲ್ ಬೊಕ್ಕ ಆನಿ ಮಾಯಾಂದಾಲ್ ಸಂಸಾರೊಡ್ ಪೂಜೆ ಮಲ್ತೊಂದಿತ್ತಿನ ದಯಿವೊಲು ಉಂಡು. ಪ್ರತಿ ವರುಸಲಾ ಮೂಲು ಮಾಯಂದಾಲೆಗ್ ಅಗೆಲ್ ಬಲಸುನ ಕ್ರಮ ಉಂಡು. ಮಾಯಂದಾಲೆಗ್ ಕೆಲವು ವರ್ಸ ಪಿರ ಕೋಲಲಾ ನಡದ್ಂಡುಗೆ. (ಬರವು ಬೊಕ್ಕ ಪಟ: ಮಹೇಶ್ ಬೋಳೂರು)
ಈ ಪಿರವು ಆಯಿನ ಜೀರ್ಣೊದ್ಧಾರೊದ ಪೊರ್ತು ಬಲ್ಯಾಯೆರ್ನ ಪಾತೆರೆ ಕೇಂಡುದು ಕೆಲವು ದಯಿವೊದ ಕಟ್ಟು ತತ್ತ್ ಪೊತಿನ ಬಗ್ಗೆ ಮುಲ್ಪೊದ ಹಿರಿಯೆರ್ ಪನ್ಪೆರ್. “ಎಣೆದಾಂತಿ ಕಡ್ಲು ತೂವೊಂದು, ಬೆಚ್ಚೊದ ಕಾಂಕ್ರೀಟ್ ಗುಡಿಟ್ ಇಪ್ಪುನವು ಎಂಕ್ ಇಷ್ಠ ಇಜ್ಜಿ, ಎಂಕು ತುಲುನಾಡುದ ಪರತಿರಿತ ಇಲ್ಲ್ ಬೋಡು, ಅವ್ವು ಮುಲಿತ್ತ ಇಲ್ಲಾಂಡ ಆವು..... ಸಂಪುದ ಜಾಗೆಡ್ ಭಕ್ತೆರ್ನಂಚಿ ತಿರ್ಗುದು ಅಕುಲೆನ್ ಕಾಪು ದೀದ್ ರಕ್ಷಣೆ ಮಲ್ತೊಂದು ಬರೊಡು” ಪಂಡುದು ಮಾನೆಚ್ಚಿಡ್ ಮಾಯಂದಾಲೆನ ನುಡಿಯಾತ್ಂಡ್ಂದು ಶೀನ ಪೂಜಾರ್ಲು ಪನ್ಪೆರ್. ನನ ದುಂಬುಗು ಪೊಸತ್ತಾದ್ ತುಲುನಾಡುದ ಆಯದಕ್ಕ ಮಾಯಂದಾಲೆನ ಪುಟ್ಟು ಇಲ್ಲ್ ಅಲ್ಪ ಆಯೆರೆಯಾವು. ಇನಿಕ್ಲಾ ಕಟ್ಪಾಡಿ ಏನಗುಡ್ದೆದ ಮಾಯಂದಾಲೆನ ಮೂಲ ಪುಟ್ಟುಬಲೆಕೆದ ಆದಿ ಜಾಗೆ “ಮಾಯಂದಾಲ್ ತೋಟ” ಮಂದೆಲೆಗ್ ಮದೆಟೇ ಉಂಡು. ಅಲ್ಪನೆ ಕಯಿತಲ್ಡು ಒಂಜಿ ಕಾಲೊಡ್ ಸಾದಗದ ಗರಡಿ ಇತ್ತುದು ಇತ್ತೆ ಅವುಲು ದುರ್ಗಾಪರಮೇಶ್ವರಿ ದೇವಸ್ಥಾನೊ ಉಂಡು.
ಮಾಯಂದಾಲ್ ಏನಗುಡ್ಡೆ ಬೈದ್ಯೆರ್ಲೆನ ಗರಡಿಡ್ ಸುರುಕ್ಕಾದ್ ನಿಲೆ ಉಂತುದು ಬೊಕ್ಕದ ದಿನೊಟು ಬೇತೆ ಗರಡಿಲೆಡ್ಲಾ ಸ್ಥಾನ ಪಡೆವೊಲು. ಒಡಿಪುದ ಉದ್ಯಾರದ ಪಡ್ಡಾಯಿಲ್ಲ್ ಪನ್ಪಿನವುಲು ಮಾಯಂದಾಲ್ ಸುರುವಾದ್ ನಿಲೆಯಾಯಿನ ಸ್ಥಾನ ಉಂಡು. ಬೊಲ್ಲೆದ ಕೊಂಬಾಡಿ, ಕಾರ್ಲ ನಕ್ರೆದ ಪೆತ್ತಾಜೆಡ್ಲಾ ಆರಾಧನೆ ನಡಪುಂಡು. ಮೂಳೂರು ರಾಜ ಇಲ್ಲೆಚ್ಚಿಲ್ ಡ್, ಕೆಮ್ಮಣ್ಣ್ ಕುಜ್ಜರ್ಬೊಟ್ಟ್ ದ ಇಲ್ಲಾಲ್ ಮಾಯಂದಾಲೆಗ್ ಆರಾಧನೆ ನಡಪ್ಂಡು. ಕಾರ್ಲದ ಹಿರ್ಗಾನೊದ ಪಾಡಿ ಗರಡಿಡ್ ಕಾರ್ನಿಕೊಡ್ ಮೆರೆಯೊಂದುಪ್ಪುನ ಮಾಯಾಂದಾಲ್ ದೇವಿ ಸ್ವರೂಪೊಡ್ ಆರಾಧನೆ ಪಡೆಪೊಲು.
ಮಾಯಾಂದಾಲ್ ಪಾಡ್ದನೊಡು ಮಾಯಾಂದಾಲ್ನ ಕೊಜಪಾಡಿ ಮೂಲ, ಕೊಂಬಾಡಿ ಸಾನ ಪನ್ಪಿನ ಇಸಯ ಬರ್ಪುಂಡು. ನೆಟ್ಟ್ ಕೊಜಪಾಡಿ ಉಪ್ಪುನು ಬೋಳೂರು ಗರೋಡಿಗ್ ತಾಗುದುಪ್ಪುನ ಕೈತಲ್ದ ಊರು. ಮುಲ್ಪ ಆ ಬಗ್ಗೆ ಇತ್ತೆ ವಾ ಕುರುಹುಲಾ ಒರಿದಿಜಿ. ದುಂಬು ಅಲ್ಪ ದಯಿವೊಲೆನ ಕಲ್ಲ್ ಲ್ ಇತ್ತುಂಡ್ಂದು ಪೆರಿಯಾಕ್ಲು ಪನೊಂದಿತ್ತೆರ್. ಕೊಂಬಾಡಿ ಉಪ್ಪುನು ಮೂಡುಬೊಳ್ಳೆ ಕೈತಲ್ದ ನೆಲ್ಲಿಕಟ್ಟೆಡ್. ಮೂಲು ಇತ್ತೆಲಾ ಮಾಯಾಂದಾಲೆಗ್ ಆರಾಧನೆ ನಡಪುಂಡ್. ತುಳುನಾಡಿನ ಬಂಟ್ವಾಳ ಪುತ್ತೂರು ಭಾಗೊದ ಗರಡಿಲೆಡ್ ಬೈದ್ಯೆರ್ಲೆನೊಟ್ಟು ಮಾಯಂದಾಲ್ ತನ್ನೊಟ್ಟುಗ್ ಬಾಲೆದಾಂತೆ ಪೂಜೆ ಪಡೆಪೊಳ್. ನೆಟ್ರಾಸಾದ್ ಕೆಲವೆರ್ ಮಾಯಂದಾಲೆನ್ ಕಿನ್ನಿದಾರು ಪಂಡುದು ತಪ್ಪಾದ್ ಅರ್ಥ ಮಲ್ತೊಂದಿನಲಾ ಉಂಡು.
ಗರಡಿದ ಅಗೆಲ್ ಸೇವೆಡ್ ಮಾಯಂದಾಲೆಗ್ ಕಾಯ್ ಕಜಿಪುದ ಅಗೆಲ್ ಬಲಸ್ಂಡಾ, ಇಲ್ಲಪಂದಾ ಮಾಯಾಂದಲೆಗ್ ಕಾಯ್ ಕಜಿಪುದೊಟ್ಟ್ ಕೋರಿಮೀನುದ ಅಗೆಲ್ ಸಂದ್ಂಡು. ಎಚ್ಚಿನ ಗರಡಿಲೆಡ್ ಸಂದುಡ್ ಮಾಯಂದಲೆಗ್ ಬೇತೆನೆ ಗುಂಡ ನಿರ್ಮುದೆರ್. ಮಾಯಂದಾಲ್ ಕೋಲ/ನೇಮೊಡ್ ಪೆದ್ಮೆದಿ ದಯಿವಾದ್ ಮಾಯಂದಾಲ್ ಸಾಂಕೆತಿಕವಾದ್ ಮೋನೆಗ್ ಅರ್ದಲೊದ ಬೊಟ್ಟ ಪಾಡೊಂದು, ತರೆಕ್ಕ್ ಪೂ ಮುಡ್ತೊಂದು, ಮುತ್ತೇಸಿತನೊದ ಪ್ರತೀಕವಾದ್ ಪಟ್ಟೆ ಸೀರೆ, ಮುಂಡೊಗ್ ಕುಂಕುಮ ಬೊಟ್ಟ, ಕೆಂಟೆಲುಗ್ ಕರಿಯಣಿ, ಕಯಿಕ್ಕ್ ಕಾಜಿ, ಒಂಜಿ ಕಯಿಟ್ಟ್ ಗೆಜ್ಜೆತ್ತಿ, ಪನೊಲಿದ ತತ್ರ, ಕುಡೊಂಜೆಟ್ಟ್ ಆರತಿ ಪಸೊಂದು ತರೆಕಂತಪಾಡೊಂದು ತಂಬಡದ ಸವುದೊಗು ದಿನ್ನೊದ ಪಜ್ಜೆ ದೀವೊಂದು ಸೆರಂಗೊಡ್ಡುದ್ ಉಂತುದಿನ ಬಕುತೆರ್ನ ಅಭಿಷ್ಟೆಲೆನ್ ನೆರವೆರಿಸವೊಲು ಮಾಯಂದಾಲ್. ಇತ್ತೆ ಮಾಯಂದಾಲ್ ನೇಮೊಡ್ ಮಸ್ತು ಬದಲಾವಣೆ ಬರೊಂದ್ಂಡು. ಮೋನೆ ಇಡೀ ರಂಗ್ ಪೂಜೊಂದು, ಮಲ್ಲಿಗೆದ ಪೂತ ಜಲ್ಲಿ ಜಪುಡಾವೊಂದು, ಬನ್ನೊದ ಸೀರೆ, ತರೆಕ್ಕ್ ಬೊಳ್ಳಿದ ಕಿರೀಟ ದೀವೊಂದು, ಬೊಳ್ಳಿದ ಗೆಜ್ಜೆತ್ತಿ. ತತ್ರ , ಪದ್ದೇಯಿ ಬಂಗಾರುಡ್ ಬ್ಯಾಂಡ್ ವಾದ್ಯದ ಸೊರೊಕ್ಕ್ ಅಬ್ಬರೊಡ್ ಕಲ ಜತ್ತುದು ಗೌಜಿಡ್ ಮಾಯಂದಾಲೆಗ್ ಕೋಲ/ನೇಮ ನಡಪ್ಂಡು.
ಮಾಯಂದಾಲ್ ಪುಟ್ಟು ಪೊಲಬುದ ಬಗೆಟ್ ನನಲಾ ಎಚ್ಚಿಗೆದ ಇಸಯೊಲು ಅಡೆಂಗುದ್ ಇತ್ತುದು ಅಯಿತ ಬಗ್ಗೆ ಎಚ್ಚಿನ ಸಂಶೋಧನೆದ ಅಗತ್ಯ ಉಂಡು.
ಬರವು ಬೊಕ್ಕ ಪಟ: *ಮಹೇಶ್ ಬೋಳೂರು*
