Бразилд суугаа Монгол Улсын Элчин сайдын яам, Embassy of Mongolia to Brazil

10/06/2017

Монгол Улсын Ерөнхийлөгчийн 2017 оны сонгуулийн санал авах ажиллагаа Монгол Улсаас Бразил Улсад суугаа Элчин сайдын яаман дээр 2017 оны 6 дугаар сарын 10-ны өглөө 7:00 цагт эхэлж, эхний сонгогч Oyunsuren Alexandra Ulziisaikhan маань Сан Пауло мужийн Кампинас хотоос хүрэлцэн ирж, саналаа өглөө.

02/06/2017

Ерөнхийлөгчийн 2017 оны сонгуульд Бразилд суугаа ЭСЯ дээр саналаа өгөхөөр бүртгүүлсэн иргэдийн баталгаажсан жагсаалтыг Сонгуулийн Ерөнхий хорооноос ирүүлснийг үзнэ үү. Санал авах ажиллагааг 2017 оны 6 дугаар сарын 10, 11-ний өдрүүдэд тус ЭСЯ дээр зохион байгуулах болно.

15/05/2017

ЕРӨНХИЙЛӨГЧИЙН СОНГУУЛЬД ИДЭВХТЭЙ ОРОЛЦОНО УУ.

Ерөнхийлөгчийн 2017 оны сонгуульд санал өгөхийн тулд доорх холбоосоор орж, маягтыг татан авч бөглөн паспортын хуулгын хамт 5 дугаар сарын 20-ны дотор Элчин сайдын яаманд шуудангаар болон цахим шуудангаар илгээх, биеэрээ авч ирэн бүртгүүлэх боломжтой. Илүү дэлгэрэнгүй мэдээллийг Элчин сайдын яамны цахим хуудас http://brazil.embassy.mn/index.php?moduls=101&id=41 руу орж авна уу.

https://drive.google.com/file/d/0B86Ah1e_S2iBUWQxRlAxU2lvems/view

01/05/2017

МОНГОЛ УЛСЫН ЕРӨНХИЙЛӨГЧИЙН 2017 ОНЫ СОНГУУЛЬД САНАЛАА ӨГӨХӨӨР БҮРТГҮҮЛНЭ ҮҮ

Монгол Улсын Ерөнхийлөгчийн 2017 оны сонгуульд Дипломат төлөөлөгчийн газар байрладаг гадаад улсад байгаа сонгуулийн эрх бүхий иргэдийн саналыг 2017 оны 6 дугаар сарын 10-ны өдрийн Бямба, 11-ний өдрийн Ням гарагуудад 07:00 - 22:00 цагийн хооронд Дипломат төлөөлөгчийн газрын байранд авна. Иргэд сонгуульд оролцож, саналаа өгөхийн тулд заавал урьдчилан бүртгүүлсэн байх шаардлагатай.
• Сонгогчдын бүртгэлийг 2017 оны 5 дугаар сарын 1-нээс 20-ны өдрийг дуустал Бямба, Ням гаригуудыг оролцуулан 08:30-17:30 цагийн хооронд хийнэ, • Саналаа өгөхөөр бүртгүүлэх иргэн та иргэний шинэчилсэн бүртгэлд хамрагдсан, санал авах өдөр буюу 2017 оны 6 сарын 10-ний өдрөөс өмнө 18 нас хүрсэн байх шаардлагатай
• Бразилиа дахь Элчин сайдын яам дээр ирж саналаа өгөх иргэд саналаа өгөхөөр бүртгүүлэхдээ https://drive.google.com/open?id=0B86Ah1e_S2iBUWQxRlAxU2lvems холбоосоор орж, СЕХ-оос баталсан “Монгол Улсын Ерөнхийлөгчийн ээлжит сонгуульд оролцох гадаад улсад байгаа иргэний бүртгүүлэх маягт”-ыг татаж авч бөглөн гарын үсгээ зурж баталгаажуулан, гадаад паспортын хуулбарын хамт Бразилиа дахь ЭСЯ дээр өөрийн биеэр ирж бүртгүүлэх, эсхүл бөглөсөн бүртгэлийн маягт, паспортын хуулбараа:
Embaixada da Mongólia
SHIS QI 5, Conjunto 19, Casa 13, Lago Sul,
Brasilia-DF, CEP 71615-190 гэсэн хаягаар шуудангаар, эсхүл [email protected] болон [email protected] цахим хаягаар тус тус ирүүлж, бүртгүүлэх боломжтой.
Биечлэн ирж бүртгүүлэх тохиолдолд бүртгэлийн маягтыг Дипломат төлөөлөгчийн газраас авах боломжтой бөгөөд харин гадаад паспортоо авч ирэх хэрэгтэй. Саналаа өгөхөөр бүртгүүлж, бүртгэл нь баталгаажсан иргэд санал авах өдрүүдэд ирэхдээ гадаад паспорт, иргэний үнэмлэхийн аль нэгийг заавал авч ирэх шаардлагатай болохыг анхаарна уу. Иргэн та сонгох эрхээ эдэлж, Монгол Улсынхаа Төрийн тэргүүнийг сонгох сонгуульд идэвхитэй оролцоно уу. Монгол Улсын Ерөнхийлөгчийн сонгуулийн талаарх дэлгэрэнгүй мэдээллийг СЕХ-ны www.gec.gov.mn цахим хуудаснаас үзнэ үү. Бразилиа дахь Элчин сайдын яам, Салбар комисс № 45 Лавлах утас: 61-32635215, 61-999113386

25/04/2017

БРАЗИЛИЙН ХОРШООЛЛЫН ТУРШЛАГЫГ НЭВТРҮҮЛНЭ

Элчин сайд Ч.Сосормаа 4-р сарын 25-ны өдөр Бразилийн Хоршооллын нэгдсэн холбооны тэргүүн ноён Марсиу Лопест Монголын Хоршооллын үндэсний нэгдсэн холбооны тэргүүн ноён Н.Энхболдын урилгыг гардуулан өгч, Монгол Улсад зочлон туршлага солилцох хүсэлтийг уламжлав. Ноён Марсиу Лопес урилгыг баяртай хүлээн авч, энэ ондоо багтаан төлөөлөгчдийн хамт Монголд айлчилж, туршлага солилцох уулзалт зохион байгуулах боломжтойг илэрхийлэв.

Бразилийн 50 гаруй сая иргэдийг эгнээндээ нэгтгэсэн хоршооллын хөдөлгөөн хөдөө аж ахуй, эрүүл мэнд, боловсрол, дэд бүтэц, зам тээвэр, аялал жуулчлал, барилга, уул уурхай зэрэг олон салбарт жигд хөгжиж чадсан төдийгүй хоршооллын хоёр том банк болох “Bancoob”, “Sicredi” нь тус улсын хөдөө аж ахуйн салбарт олгодог нийт зээлийн 40%-ийг дангаар хангадаг байна. Түүнчлэн Сенатын танхимын гишүүдийн 44%, Төлөөлөгчдийн танхимын гишүүдийн 47% Конгрессын “Хоршооллыг дэмжих” бүлэгт ажилладаг нь хоршооллын хөдөлгөөн төрийн бодлоготой нягт уялдан хөгждөгийн жишээ юм.

12/04/2017

Элчин сайд Ч.Сосормаа Холбооны Бүгд Найрамдах Бразил Улсын Гадаад харилцааны яамны шинээр томилогдсон Ази, Номхон далайн орнууд хариуцсан Төрийн нарийн бичгийн дарга Элчин сайд Жеоржес Ламазье (Georges Lamaziere) -тэй уулзаж, хоёр талын харилцааны асуудлаар санал солилцлоо. Уулзалтын төгсгөлд Элчин сайд Ч.Сосормаа ноён Жеоржес Ламазьед Алтан гэрэгэ дурсгал болгон бэлэглэв.

11/04/2017

АВЛИГЫН ТУХАЙ “LAVA JATO” НОМЫН ЗОХИОЛЧТОЙ УУЛЗАВ

Элчин сайд Ч.Сосормаагийн урилгаар Бразилийн улс төр, бизнесийн салбарыг хамраад буй авлигын эсрэг мөрдөн шалгах ажиллагааны тухай өгүүлсэн “Lava Jato” номын зохиолч, Бразилийн “Эрэн сурвалжлах сэтгүүл зүйн холбоо”-ны дэд тэргүүн Владимир Нетто өнөөдөр ЭСЯ-нд зочлов. Тэрбээр эрэн сурвалжлах сэтгүүл зүйн чиглэлээр хамтран ажиллах, энэ чиглэлээр Монголын сэтгүүлчдэд онлайн сургалт явуулах, өөрийн “Lava Jato” номыг монгол хэлнээ орчуулах боломж буйг уулзалтын үеэр онцлов. Түүний номыг орчуулан хэвлүүлэх хүсэлт Япон, Их Британи, Герман зэрэг олон орнуудаас ирээд буй аж.

09/03/2017

Бразилд суугаа манай ЭСЯ-наас хавсран суугаа Аргентин Улстай Гадаад харилцааны яамд хоорондын анхдугаар зөвлөлдөх уулзалтыг Улаанбаатар хотноо амжилттай зохион байгууллаа. Энэ үеэр хоёр талын харилцааны олон асуудлыг хөндөсний дотор иргэдийг харилцан визгүй зорчуулах хэлэлцээрийг үзэглэж, цаашид албажуулахаар тохирлоо.

24/02/2017

02/02/2017

Монгол, Чилийн Төрийн албаны зөвлөлд хооронд хамтран ажиллах санамж бичиг байгууллаа. Суугаа болон хавсран суугаа орнуудын сайн туршлагаас судлах, нэвтрүүлэх, өөрийн орны туршлагаасаа хуваалцах нь ЭСЯ-ны ажлын чухал хэсгийн нэг байдаг. Чили Улс нь хүний хөгжлийн индекс, бизнес, гадаадын хөрөнгө оруулалтын орчин, төрийн албаны ил тод байдал зэргээрээ бүс нутаг төдийгүй дэлхийд тэргүүлэх орны нэг юм. Ялангуяа төрийн албаны шалгалтын систем, ил тод байдал, томилогооны зөв механизм сайтай улс. Ийм ч учраас Эдийн засгийн хамтын ажиллагаа, хөгжлийн байгууллага OECD Өмнөд Америкаас ганц орныг гишүүнээр элсүүлээд байгаа нь Чили юм. Цаашид хоёр орны Төрийн албаны зөвлөлд хамтран ажиллаж, харилцан туршлага судлах зорилгоор уг санамж бичгийг байгуулж байна.

24/01/2017

Энэ жил тохиож буй Монгол Улс, Холбооны Бүгд Найрамдах Бразил Улс хооронд дипломат харилцаа тогтоосны 30 жилийн ойн хүрээнд язгуур урлагийн Хөсөгтөн хамтлаг Бразилийн нийслэл Бразилиа хотноо бүрэн хэмжээний концерт тоглолоо. Бразилд суугаа Дипломат төлөөлөгчийн газруудын тэргүүнүүд, бразилийн улс төр, бизнесийн төлөөлөл голдуу нийт 500 гаруй үзэгч тоглолтын танхимыг дүүргэлээ.

10/01/2017

Язгуур урлагийн Хөсөгтөн хамтлаг Бразилд тоглоно.

"Авьяаслаг азичууд 2015" тэмцээний дэд байрын шагналт, язгуур урлагийн Хөсөгтөн хамтлаг 2017 оны нэгдүгээр сарын 17-20-ны хооронд Бразилийн Сальвадор хотноо зохион байгуулагдах олон улсын хөгжмийн Percpan наадамд урилгаар оролцож, 19-ний үдэш уран бүтээлээсээ толилуулна. Улмаар мөн сарын 20-ны Баасан гарагийн үдшийн 19:00 цагаас Бразилиа хотноо энэ жил тохиож буй Монгол Улс, Холбооны Бүгд Найрамдах Бразил Улс хооронд дипломат харилцаа тогтоосны 30 жилийн ойн хүрээнд бүрэн хэмжээний тоглолтоо хийхээр болсон тул Та бүхнийг хүрэлцэн ирэхийг урьж байна. Дэлгэрэнгүй мэдээллийг Элчин сайдын яамны 61-32635215 дугаар утаснаас лавлана уу