Kosovo in Brussels

14/06/2026

Këtë javë, në Ambasadën e Republikës së Kosovës në Bruksel, ambasadori Agron Bajrami priti për një takim joformal dy miq të vjetër të Kosovës: ish-zyrtarin e lartë të NATO-s, z. Jamie Shea, dhe diplomatin britanik të pensionuar, z. David Slinn.
Takimi u zhvillua pikërisht në javën kur Kosova kujton 27-vjetorin e çlirimit, fundit të luftës dhe intervenimit historik të NATO-s.
Gjatë bisedës u rikujtuan ditët e fundit të fushatës ajrore të NATO-s, bashkëpunimi me rezistencën e Ushtrisë Çlirimtare të Kosovës dhe të popullit tonë, si dhe roli vendimtar që luajtën në çlirimin e Kosovës - ngjarje që i hapi rrugën edhe pavarësisë së vendit tonë.
Z. Jamie Shea, ish-zëdhënës i NATO-s, mbahet mend si një nga zërat më të fuqishëm kundër propagandës serbe në atë kohë, ndërsa z. David Slinn shërbeu si diplomat aktiv në çështjet e Kosovës dhe rajonit.
Falenderim i sinqertë për të dy miqtë tanë të dashur për vizitën dhe për mbështetjen e tyre të vazhdueshme!

14/06/2026

12/06/2026

Me organizimin e të Ngarkuarit me Punë në Misionin e Maqedonisë së Veriut në NATO, z. Ismail Ebipi, në ambientet e Misionit të Maqedonisë së Veriut në NATO u zhvillua një takim ndërmjet Shefit të Misionit në Ambasadën e Republikës së Kosovës në Bruksel, Ambasadorit Agron Bajrami, dhe Përfaqësuesve të Përhershëm të gjashtë vendeve anëtare të NATO-s nga rajoni i Ballkanit.
Në takim morën pjesë Përfaqësuesit e Përhershëm në NATO të Shqipërisë, Ambasadori Bardhyl Kollçaku; Bullgarisë, Ambasadori Nikolay Milkov; Malit të Zi, Ambasadorja Milena Kalezić; Sllovenisë, Ambasadori Andrej Benedejčič; si dhe i Ngarkuari me Punë i Kroacisë, z. Mirko Ujdenica, së bashku me nikoqirin e takimit, z. Ismail Ebipi, i Ngarkuar me Punë i Misionit të Maqedonisë së Veriut në NATO.
Takimi u karakterizua nga një shkëmbim i hapur dhe konstruktiv mbi çështjet e sigurisë rajonale, integrimin euroatlantik dhe sfidat me të cilat përballet Ballkani Perëndimor.
Në këtë kuadër, Ambasadori Bajrami paraqiti perspektivën e Republikës së Kosovës në cilësinë e përfaqësuesit në BE dhe NATO, si dhe si Kryenegociator në dialogun Kosovë–Serbi, duke vlerësuar njëkohësisht angazhimin dhe kontributin e partnerëve të pranishëm në mbështetje të stabilitetit dhe bashkëpunimit rajonal.

06/06/2026

Ministria e Punëve të Jashtme dhe Diasporës njofton të gjithë bashkatdhetarët tanë se sot, nga ora 07:00 janë hapur të gjitha pikat e votimit në misionet diplomatike dhe konsullore të Republikës së Kosovës.

Ftojmë të gjithë qytetarët e Republikës së Kosovës që janë regjistruar për të votuar jashtë vendit, të marrin pjesë në procesin zgjedhor dhe të ushtrojnë të drejtën e tyre demokratike për të votuar.

Pjesëmarrja juaj në zgjedhje është një kontribut i rëndësishëm për demokracinë dhe të ardhmen e vendit tonë. Ministria e Punëve të Jashtme dhe Diasporës në koordinim me Komosionin Qendror të Zgjedhjeve, mbetet e përkushtuar për të siguruar mbarëvajtjen e procesit të votimit në të gjitha përfaqësitë diplomatike dhe konsullore të Republikës së Kosovës.

Ju falënderojmë për angazhimin dhe kontributin tuaj të vazhdueshëm për Republikën e Kosovës.

05/06/2026

Me mbështetjen e Ambasadës së Republikës së Kosovës në Bruksel, të enjten u mbajt promovimi i librit “Diku në Mes” të autores shqiptaro-belge Deniza Miftari. Libri ishte botuar fillimisht në gjuhën holandeze me titullin “Tussenin”, ndërsa së fundmi është botuar edhe në gjuhën shqipe.
“Diku në Mes” trajton përvojën personale të autores si një fëmijë e zhvendosur nga Kosova në Belgjikë, duke reflektuar mbi identitetin, migrimin dhe trashëgiminë e padukshme të luftës. Përmes një rrëfimi të ndjerë dhe autentik, autorja shtjellon ndjenjën e përkatësisë mes dy botëve, sfidat e integrimit, si dhe procesin e rikuperimit dhe rindërtimit të vetes.
Në hapje të aktivitetit, Ambasadori Agron Bajrami mbajti një fjalë përshëndetëse para të pranishmëve në “Press Club Brussels”, duke theksuar se libri ofron një rrëfim të veçantë të një shqiptareje nga Kosova, e cila, si fëmijë, u detyrua të shpërngulet me familjen e saj në Belgjikë dhe të ndërtojë një jetë mes dy vendeve.
- Përmes këtij libri, që në holandisht titullohet ‘Tussenin’ e në shqip ‘Diku në Mes’, autorja i jep zë diasporës kosovare -, tha ambasadori Bajrami, duke shtuar se ky është veçanërisht zëri i të rinjve shqiptarë nga Kosova, të cilët po ndërtojnë jetët e tyre mes dy kulturave, dy gjuhëve dhe një lidhjeje të pathyeshme me Kosovën.
Prezantimi i librit u zhvillua në formën e një paneli diskutimi, ku, përveç autores Deniza Miftari, mori pjesë edhe Dr. Vjosa Musliu, profesoreshë në Bruksel dhe autore e një libri me rrëfim personal për përjetimet e saj gjatë luftës në Kosovë.
Në panelin e moderuar nga znj. Ferdiana Hoti, znj. Miftari dhe znj. Musliu ndanë përvojat e tyre, sa të ndryshme aq edhe të ngjashme, duke shpjeguar arsyet që i shtynë t’i ndajnë këto rrëfime me lexuesin belg, por edhe me publikun shqiptar në Kosovë, Shqipëri dhe kudo ku jetojnë shqiptarët.

03/06/2026

03/06/2026

Raportet midis Kosovës dhe Bashkimit Evropian, si dhe ndikimi i procesit të integrimit në nivel lokal në Kosovë, ishin ndër temat kryesore që trajtoi Shefi i Misionit të Republikës së Kosovës në Bruksel, Ambasador Agron Bajrami, gjatë fjalës së tij në takimin e tretë të Grupit Punues për Kosovën pranë Komitetit të Rajoneve të Bashkimit Evropian.
Në fjalën e tij, ambasadori Bajrami shfrytëzoi rastin të falënderonte edhe një herë kryetaren e Grupit Punues për Kosovën, znj. Gillian Coughlan, anëtarët e grupit, si dhe të gjithë përfaqësuesit e Komitetit të Rajoneve për vendimin e marrë para tre muajsh për heqjen e fusnotës dhe asteriskut në emrin e Republikës së Kosovës në dokumentet dhe komunikimet zyrtare të këtij institucioni të BE-së. Ai po ashtu u shpreh thellësisht i prekur nga vendosja e flamurit të Republikës së Kosovës në sallën e takimit.
“Këta hapa parimorë e forcojnë partneritetin tonë dhe e sjellin Europën më afër vlerave të saj“, tha ambasadori Bajrami.
Ambasadori adresoi gjithashtu gjendjen e marrëdhënieve mes Kosovës dhe Bashkimit Evropian, duke theksuar zhvillimet pozitive të kohëve të fundit dhe vizionin e qartë të Kosovës për thellimin e mëtejshëm të raporteve, përfshirë avancimin drejt marrjes së statusit të vendit kandidat për anëtarësim në BE.
Në këtë kontekst, ai mirëpriti angazhimin aktiv të Komitetit të Rajoneve në mbështetjen e procesit të integrimit evropian të Kosovës, duke nënvizuar se autoritetet lokale janë në zemër të së ardhmes sonë evropiane.

03/06/2026

Shefi i Misionit në Ambasadën e Republikës së Kosovës në Bruksel, ambasadori Agron Bajrami, mori pjesë në një diskutim me Ministrin për Evropën dhe Punët e Jashtme të Republikës së Shqipërisë, z. Ferit Hoxha, të organizuar nga Instituti Mbretëror Belg për Marrëdhënie Ndërkombëtare Egmont, në bashkëpunim me Ambasadën e Republikës së Shqipërisë në Bruksel.

Gjatë kësaj tryeze, ministri Hoxha prezantoi ecurinë e Shqipërisë në rrugëtimin drejt anëtarësimit në Bashkimin Evropian, duke u ndalur te përparimet e fundit në procesin e negociatave, si dhe te sfidat dhe mundësitë që shoqërojnë këtë proces skajshmërisht transformues.

Në diskutim morën pjesë ambasadorë, diplomatë dhe ekspertë nga Belgjika, Maqedonia e Veriut, Mali i Zi dhe vende të tjera, si dhe përfaqësues të instituteve dhe qendrave studimore me seli në Bruksel. Debati u përqendrua në perspektivën e zgjerimit të Bashkimit Evropian në Ballkanin Perëndimor dhe sfidat aktuale me të cilat përballen vendet e rajonit në rrugën e tyre evropiane.

Në këtë kontekst, ambasadori Bajrami theksoi se çdo hap përpara i Shqipërisë në procesin e integrimit evropian përbën një lajm të mirë edhe për Kosovën, rajonin dhe vetë Bashkimin Evropian. Ai nënvizoi se zgjerimi në Ballkanin Perëndimor tashmë ka marrë një dimension të qartë strategjik për sigurinë, stabilitetin dhe të ardhmen e gjithë Evropës.

Ambasadori Bajrami shtoi se ka ardhur koha që edhe Kosova të avancojë nga statusi i një vendi me perspektivë evropiane në statusin e vendit kandidat për anëtarësim në BE dhe të nisë gradualisht procesin e negociatave të anëtarësimit – një proces i gjatë, por thellësisht transformues për shtetin dhe shoqërinë.

01/06/2026

Të nderuar bashkëatdhetarë, votues të regjistruar për votim jashtë Kosovës me postë. Adresa në Belgjikë ku duhet t’i dërgoni votat tuaja është kjo:

Rue Saint Lambert 139, 1200 Woluwe-Saint-Lambert, Bruxelles, Belgique/Belgium

✉️
KQZ – Zgjedhje
Ambassade de la République du Kosovo
P.O. Box 104
Rue Saint Lambert 139, 1200 Woluwe-Saint-Lambert, Bruxelles, Belgique/Belgium

❗ E RËNDËSISHME: Zarfet me votë që dërgohen në adresën fizike të Ambasadës së Republikës së Kosovës në Bruksel NUK do të pranohen dhe DO TË KTHEHEN tek dërguesi.

Afati i votimit me postë: 21 maj – 6 qershor 2026

31/05/2026