31/07/2026
PAGPALIG-ON SA AGRIKULTURA PINAAGI SA PAGTINABANGAY SA MGA MAG-UUMA SA SAN JOSE
San Jose, Dinagat Islands, Hulyo 31, 2026 – Usa ka mapuslanon ug puno sa inspirasyon nga kalihukan ang gipahigayon karong adlawa, Hulyo 31, 2026, diha mismo sa Municipal Demonstration Area, nga nahimutang duol sa opisina sa Municipal Agriculture Office (MAO) sa San Jose. Ang maong aktibidad nagtutok sa pag-ugmad ug pag-andam sa yuta para sa pagpananom ug kalibre (Manihot esculentas), isip bahin sa nagpadayon nga mga programa aron sa pagpalambo sa lokal nga agrikultura ug kasigurohan sa pagkaon sa lungsod.
Kini nga inisyatibo gipasiugdahan sa Municipal Agriculture Office (MAO) nga gipangunahan sa atung Municipal Agriculturist na si Ma'am Jo-Ann M. Gonzales ug gisuportahan usab sa atung lokal nga kagamhanan sa San Jose, uban ang aktibong partisipasyon sa mga miyembro sa nagkalain-laing Farmers Association sa tibuok lungsod.
Sugod pa sa sayong kabuntagon, ang maong area napuno na sa mga madasigon nga mga mag-uuma nga madasigong nagtinabangay sa paghawan, pagdugmok sa yuta, ug pag-andam sa mga tudling para sa pagtanom ug kalibre. Makit-an ang hugot nga pagtinabangay ug panaghiusa sa mga partisipante samtang nagbuhat sa ilang tagsa-tagsa ka tahas. Ang kalibre, isip usa ka matang sa "root crop" o crops nga dali ra itanom ug mapahimuslan, giilang usa ka importanteng tinubdan sa pagkaon ug panginabuhian alang sa mga lumulupyo.
Kini nga aktibidad nagtumong sa pagpakita sa importansya sa tinuoray nga pakigtambayayong tali sa kagamhanan ug sa mga mag-uuma sa pagsulbad sa mga hagit sa sektor sa agrikultura. Ang paghatag ug access sa Municipal Demonstration Area alang sa mga kalihukan sama niini usa ka paagi aron mapadali ang pagpaila ug pagbansay sa mga mag-uuma sa bag-o ug maayong mga teknolohiya sa pagpanguma.
Gawas sa pag-ugmad sa yuta, ang aktibidad nagsilbi usab nga oportunidad alang sa mga mag-uuma nga magbayloay sa ilang mga kasinatian ug kinaadman sa pagpanguma, samtang nakig-alayon sa mga teknikal nga kawani sa MAO para sa dugang nga giya ug suporta. Pinaagi sa pagtinabangay ug pagpalapad sa kahibalo, gilauman nga mas modaghan pa ang ani ug abot, ug mapataas ang kalidad sa kinabuhi sa mga mag-uuma sa San Jose.
Kini nga inisyatibo usa ka konkretong lakang ngadto sa pagkab-ot sa mas lig-on ug mapalahutayung sistema sa agrikultura sa lungsod sa San Jose, diin ang matag mag-uuma gihatagan ug saktong suporta aron molambo ug makatampo sa lokal nga ekonomiya ug seguridad sa pagkaon.
Daghang salamat sa atong mga bayaning mag-uuma sa ilang walay puas na dedikasyon!
