Zaqatala MKS Uzuntala kənd kitabxanası

26/05/2026

Mayın 25-də Azərbaycan Respublikasının Prezidenti cənab İlham Əliyevin sədrliyi ilə kənd təsərrüfatı məsələlərinə həsr olunmuş müşavirə keçirilib. Prezident öz çıxışında 2004-cü ildən başlanan Regional İnkişaf proqramlarının tarixi bəhrələrini xatırladaraq kənd təsərrüfatının inkişafının dövlət siyasətinin prioritetlərindən olduğunu vurğulayıb. Son 20 ildə aqrar sahənin inkişafı üçün yaradılmış fundamental şəraiti diqqətə çatdıran prezident İlham Əliyev bu gün də dövlət xətti ilə həyata keçirilən bir çox layihələrin kənd təsərrüfatının inkişafına böyük təkan verdiyini, pambıqçılıq, baramaçılıq və bir çox istiqa¬mətlər üzrə kənd təsərrüfatı məhsullarının istehsalında böyük artım olduğunu diqqətə çatdırıb. Ancaq buna baxmayaraq, kənd təsərrüfatı istehsalındakı cari dinamikanın qənaətbəxş olmadığını vurğulayan dövlət başçısı bu sahənin köklü şəkildə yenidən qurulması üçün hökumət və fermerlər qarşısında mühüm vəzifələr qoyub.
Müşavirədə şəhərlərdən kəndlərə qayıdış prosesinin başlanmasının vacibliyini qeyd edən prezident İlham Əliyev bu amilin - Bakıda keçirilmiş Ümumdünya Şəhərsalma Forumunun müzakirələrində də öz əksini tapdığını və bunun təkcə ölkəmiz üçün deyil, bütün ölkələr üçün xas olan mənfi meyil olduğunu bildirib.
Azərbaycanın daxili bazarı yerli məhsullarla təmin etmək imkanlarının genişləndirilməsi müşavirənin ana xəttini təşkil edib. İstehsalımızla bağlı özümüzü təminetmə əmsalı və bəzi rəqəmləri açıqlayan Prezident İlham Əliyev bildirib ki, “Bu rəqəmləri mən qeyd etdiyim kimi, investorlar üçün səsləndirirəm və onları dəvət edirəm ki, bizdə bu gün idxal olunan məhsulların istehsalına onlar töhfə versinlər.”
Müşavirədə cənab prezident tor¬¬paq¬lardan səmərəli istifadə olunmasının, hər bir əkin üçün yararlı torpaq sa¬həsinin öz pasportu olmasını, kənd təsərrüfatı texnikası ilə təminatın yüksəldilməsinin, gübrə is¬teh¬salının artırılmasının zəruriliyini də diq¬qətə çat¬dırıb. Dövlətimizin başçısı iqlim dəyişikliyinin kənd təsərrüfatına təsirini qeyd edərək, su anbarlarında toplanan suyun bu il kənd təsərrüfatı üçün yaradacağı imkanları vurğulayıb.
Müasir suvarma sistemlərinin genişləndirilməsinin məhsuldarlığın artırılmasında həlledici olacağını qeyd edən prezident İlham Əliyev bildirib ki, “Müasir suvarma sistemləri hazırda, - bu da dövlətin dəstəyi ilə mümkün olub, -130 min hektarda tətbiq olunur. Məqsəd bunu 300 min hektara çatdırmaqdır. Əgər bizim 300 min hektarda müasir suvarma sistemləri qurularsa, baxın, nə qədər məhsuldarlıq arta bilər.”
Azərbaycan Respublukasının Prezidenti İlham Əliyev müşavirədə Kənd Təsərrüfatı Nazirliyinin, Hökumətin, Prezident Administrasiyasının, İqtisadiyyat Nazirliyinin və digər qurumla¬rın fəal işləməsinin zəruriliyini də qeyd edib.
Müşavirənin ən mühüm nəticələrindən biri “Azərbaycan Respublikasında kənd təsərrüfatı, balıqçılıq və akvakultura məhsullarının istehsalı və emalı sahələrinin inkişafına dair 2026–2030-cu illər üçün Dövlət Proqramı”nın təsdiqlənməsidir. Genişmiqyaslı dəyişiklikləri hədəfləyən bu proqram özəl sektorun aqrar sahəyə marağını daha da artıracaq. Bununla yanaşı sahə üzrə istehsalın ixtisaslaşmasını və rəqabətə davamlılığını təmin edəcək.
Dövlət başçısının nümayiş etdirdiyi qətiyyətli mövqe, tənqidi və real yanaşma, eləcə də qarşıya qoyulan aydın vəzifələr yaxın illərdə ölkəmizdə ərzaq təhlükəsizliyinin tam təmin olunmasına, modern və rəqəmsal kənd təsərrüfatının formalaşmasına rəvac verəcəkdir.

Vaqif Şabanov
Zaqatala DAİM direktoru

25/05/2026

28 may 1918-ci ildə Azərbaycan xalqı öz tarixi taleyinə sahib çıxaraq, Şərqdə və müsəlman dünyasında ilk demokratik, hüquqi və dünyəvi parlament respublikasını-Azərbaycan Xalq Cümhuriyyətini yaratdı. Azərbaycan Xalq Cümhuriyyətinin Milli Şurası İstiqlal Bəyannaməsini imzalamaqla xalqımızın müstəqillik əzmini, siyasi iradəsini, öz müqəddəratını təyin etməyə qadir olduğunu bütün dünyaya nümayiş etdirdi.
Cəmi 23 ay mövcud olmuş Azərbaycan Xalq Cümhuriyyəti müsəlman Şərqində demokratiya ənənələrinin formalaşmasına əhəmiyyətli təsir göstərdi, qısa dövr ərzində Azərbaycanın ilk parlamenti, hökuməti yaradıldı, dövlət atributları təsis olundu, dövlət quruculuğu sahəsində mühüm tədbirlər həyata keçirildi. Azərbaycan vətəndaşlığı institutu təsis olundu, Milli Ordu formalaşdırıldı, dövlətin hüquqi əsasları yaradıldı. Eyni zamanda irqi, dini və sosial mənsubiyyətindən asılı olmayaraq bütün vətəndaşlara bərabər hüquqlar tanındı. Qısa müddət ərzində olduqca mütərəqqi sayılan müddəaları özündə əks etdirən çoxsaylı qanunlar qəbul olundu.
Azərbaycan Xalq Cümhuriyyəti hökumətinin xarici siyasətinin başlıca məqsədi yeni yaradılmış dövləti dünyaya tanıtmaq idi. Milli hökumətin qarşısında dayanan əsas vəzifələrdən biri Paris Sülh Konfransında müttəfiq dövlətlər tərəfindən Azərbaycan Xalq Cümhuriyyətinin tanınmasını, habelə dünyanın aparıcı dövlətləri ilə diplomatik əlaqələrin yaradılmasını təmin etmək idi. Dünya birliyi tərəfindən tanınan Xalq Cümhuriyyətinin fəaliyyəti sayəsində ölkəmizin beynəlxalq hüququn subyekti olması 1920-ci ilin aprel ayında bolşevik işğalından sonra Azərbaycanın bir dövlət kimi dünyanın siyasi xəritəsindən silinməsinin qarşısını aldı.
“Azərbaycan Respublikasının dövlət müstəqilliyi haqqında” Konstitusiya Aktı 1991-ci il oktyabrın 18-də qəbul olunmuşdur. Konstitusiya Aktında 1918-ci il 28 may tarixli İstiqlal Bəyannaməsinə istinad olunmuş və Azərbaycan Respublikasının Azərbaycan Xalq Cümhuriyyətinin varisi olduğu təsbit edilmişdir.
Azərbaycan Xalq Cümhuriyyətinin üçrəngli Dövlət bayrağı 1990-cı il noyabrın 17-də Naxçıvan Muxtar Respublikası Ali Məclisinin sədri, xalqımızın Ümummilli Lideri Heydər Əliyevin təşəbbüsü və rəhbərliyi ilə keçirilən sessiyada Naxçıvan Muxtar Respublikasının dövlət bayrağı olaraq təsdiq edilmişdir. Bununla da müstəqilliyə gedən yolun əsası qoyuldu. Sovet İttifaqının mövcud olduğu bir vəziyyətdə belə cəsarətli addımın atılması Ulu Öndərin xalqına, dövlətinə nə qədər bağlı olduğunu, bu yolda nə qədər cəsarətli olduğunu bir daha göstərdi.
XX əsrin sonlarında müstəqilliyinə yenidən qovuşan Azərbaycan suverenliyini qoruyub saxlamağı bacardı. Daxili qarşıdurmaların, dərin siyasi böhranın və torpaqlarımızın işğal təhlükəsinin p*k həddə çatdığı bir vaxtda xalqın təkidli tələbi ilə hakimiyyətə qayıdan Ulu Öndər Heydər Əliyev Azərbaycan dövlətçiliyinin qorunması üçün qətiyyətli tədbirlər gördü, ölkədə davamlı ictimai-siyasi sabitliyi bərqərar etdi. Bu tarixi qayıdış dövlət müstəqilliyimizin əbədiliyini təmin etdi və müasir Azərbaycanın inkişafının, həmçinin torpaqlarımızın işğaldan azad olunmasının təməlini qoydu. Kiçik bir ölkə Ulu Öndər Heydər Əliyevin uğurlu siyasəti sayəsində dünyada tanınan nüfuzlu bir dövlətə çevrildi.
Milli müstəqillik yolu bu gün Prezident İlham Əliyevin rəhbərliyi ilə tamamilə yeni bir mərhələyə qədəm qoymuş, həyata keçirilən sistemli islahatlar Azərbaycanın demokratik, hüquqi və dünyəvi dövlət kimi mövqeyini möhkəmləndirmişdir.
Azərbaycan Xalq Cümhuriyyətinin yadigarı olan üçrəngli bayrağımız bu gün artıq işğaldan azad olunmuş torpaqlarda azadlıq və suverenliyin simvolu kimi dalğalanır. Bu, yalnız hərbi-siyasi qələbənin yox, həm də dövlətçilik əmanətinə sadiqliyin göstəricisidir.
Azərbaycan Xalq Cümhuriyyətinin dövlətçilik fəlsəfəsinə sadiqliyinin mühüm göstəricilərindən biri də 2007-ci ildə Bakının İstiqlaliyyət küçəsində ucaldılmış İstiqlal Bəyannaməsi abidəsidir. Bu tarixi sənədin rəmzi olaraq əbədiləşdirilməsi Prezident İlham Əliyevin milli yaddaşın formalaşdırılması istiqamətində həyata keçirdiyi ardıcıl siyasətin mühüm parçasıdır. Prezident İlham Əliyevin Azərbaycan Xalq Cümhuriyyətinin 90 illik və 100 illik yubileylərinin keçirilməsi haqqında sərəncamları, 2018-ci ilin ölkəmizdə “Azərbaycan Xalq Cümhuriyyəti İli” elan edilməsi, Azərbaycan Respublikasının 2018-ci il 1 may tarixli Qanunu ilə “Azərbaycan Xalq Cümhuriyyətinin 100 illiyi (1918-2018)” yubiley medalı”nın təsis olunması Azərbaycanın dövlətçilik tarixində çox mühüm və şərəfli bir mərhələ olan Şərqdə ilk parlamentli respublikanın əhəmiyyətinin hər zaman uca tutulduğunun sübutudur.
2021-ci il 15 oktyabr tarixində “Müstəqillik günü haqqında” Azərbaycan Respublikasının Qanunu ilə 28 may tarixinin Müstəqillik Günü, 18 oktyabr tarixinin isə Müstəqilliyin Bərpası Günü kimi təsbit olunması Azərbaycanın dövlət suverenliyinin məhz 1918-ci ildə bərqərar olunması faktına əsaslanır. Bu, ərazi bütövlüyünü bərpa etmiş müasir Azərbaycanın 1918-ci ildə qurulmuş Azərbaycan Xalq Cümhuriyyətinin tamhüquqlu varisi olduğunu göstərir.
Yaşasın güclü, müstəqil Azərbaycan!

Famil Rəhimov
Zaqatala Heydər Əliyev Mərkəzinin direktoru

22/05/2026

Son illərdə ölkəmiz qlobal əhəmiyyətli beynəlxalq tədbirlərin keçirildiyi mühüm mərkəzlərdən birinə çevrilmişdir. 2026-cı il mayın 18-də Bakıda keçirilən Ümumdünya Şəhərsalma Forumunun 13-cü Sessiyası–WUF13 bunun ən parlaq nümunələrindən biri oldu. Şəhərsalma, dayanıqlı inkişaf və müasir infrastruktur sahəsində fikir mübadiləsinin aparılması baxımından xüsusi əhəmiyyət daşıyan bu forumun Azərbaycanda keçirilməsi ölkəmizin uğurlu siyasətinin və beynəlxalq səviyyədə qazandığı hörmətin göstəricisidir.
Ümumdünya Şəhərsalma Forumunun 13-cü sessiyasının açılış mərasimində çıxış edən prezident İlham Əliyev ölkəmizin inkişaf strategiyası və şəhərsalma siyasəti haqqında ətraflı məlumat verdi. Dövlətimizin başçısı COP29-dan sonra Azərbaycanda keçirilmiş ikinci ən böyük beynəlxalq tədbir olan Ümumdünya Şəhərsalma Forumunun 13-cü Sessiyasının nəticəsinin COP29 qədər uğurlu olacağına ümid etdiyini bildirdi.
Prezident İlham Əliyev Azərbaycanın tarixən Şərqlə Qərbin qovuşduğu məkan olduğunu vurğulayaraq bu harmoniyanın ölkənin memarlığında, şəhərsalma ənənələrində də öz əksini tapdığını, Bakıda, qədimliklə yenilik, tarixi irsimizin qorunması ilə şəhərsalmanın planlaşdırılması və müasirləşdirilməsi zəruriliyi arasında vəhdətin mövcud olduğunu bildirdi. Ölkənin bir çox qədim şəhər və rayonlarının da zəngin memarlıq abidələri ilə qürur duya biləcəyini xüsusi vurğulayan dövlətimizin başçısı bildirdi ki, “Vaxtilə Şirvanşahlar dövlətinin paytaxtı olan və XIV əsrdə yazıb-yaratmış dahi Azərbaycan şairi Nəsiminin doğulduğu yerdə - Şamaxıda 743-cü ildə tikilmiş dünyanın ən qədim məscidlərindən biri var. Bir vaxtlar Atabəylər dövlətinin paytaxtı olan, dahi memar Əcəmi Naxçıvaninin vətəni Naxçıvanda onun tikdiyi XII əsrə aid Möminə xatun türbəsi var. Dünyanın ən qədim şəhərlərindən biri olan, XII əsrdə yaşayıb-yaratmış digər dahi Azərbaycan şairi Nizami Gəncəvinin vətəni Gəncə bu gün Bakı kimi inkişaf edir və tarixi simasını qoruyur. Qafqaz Albaniyası dövlətinin paytaxtı Qəbələdə və əsas şəhərlərdən biri olan Şəkidə çoxsaylı tarixi abidələr var. Şəki şəhərinin yaxınlığında yerləşən Kiş kəndindəki kilsə ola bilsin, dünyadakı ən qədim kilsələrdən biridir. Əcdadlarımızın istedadını nümayiş etdirən digər bir misal Lahıc kəndidir. On beş əsr bundan əvvəl kənd yaradılanda insanlar bu gün də işləyən kanalizasiya sistemini və su xəttini çəkmişlər. Demək olar ki, 30 il ərzində işğal altında qalan Qarabağın tacı Şuşa indi sıfırdan yenidən qurulur və onun zədələnmiş qalası bərpa edilib.”
Bəli, cənab prezidentin qeyd etdiyi kimi, biz təkcə musiqimizdə və şeirlərimizdə deyil, eyni zamanda, memarlıqda öz əksini tapan qədim tariximizlə qürur duyuruq. Bizim vəzifəmiz bunları növbəti nəsillər üçün qoruyub saxlamaqdır.
Prezidentin çıxışının ən vacib istiqamətlərindən biri də işğaldan azad edilmiş Qarabağ və Şərqi Zəngəzur bölgələrində aparılan analoqsuz yenidənqurma işlərinin dünyaya təqdim edilməsi oldu.
Açılış mərasimində dövlətimizin başçısı ətraf mühit sahəsində görülən işlərə diqqəti yönəldərək Bakıda həyata keçirilən Ağ Şəhər və “Sea Breeze” layihələrindən bəhs etdi.
Bəli, tarixi olaraq neft sənayesinin mərkəzi olmuş Bakı uzun illər ekoloji problemlərlə üz-üzə qalıb. Lakin son onilliklərdə həyata keçirilən siyasət nəticəsində çirklənmiş sənaye zonalarının müasir yaşayış və istirahət məkanlarına çevrilməsi, Qara şəhərin Ağ şəhərə transformasiyası Azərbaycanın ekoloji bərpa sahəsində əldə etdiyi uğurları nümayiş etdirir. Azərbaycanın bir çox bölgələrində sürətlə həyata keçirilən şəhərsalma layihələri, azad edilmiş ərazilərdə aparılan yenidənqurma işləri, yeni şəhər və kənd konsepsiyalarının tətbiqi göstərir ki, Azərbaycan bütün ölkə miqyasında vahid inkişaf modelini həyata keçirir. Azərbaycanın məqsədi müasir və təhlükəsiz şəhərlər yaratmaqdır. Prezident İlham Əliyevin forumdakı çıxışı bir daha nümayiş etdirdi ki, Azərbaycan yalnız öz şəhərlərini deyil, həm də qlobal urbanizasiya gündəliyini formalaşdıran ölkələr sırasında yer almaqdadır.

Zaqatala RİH Başçının müavini,
Sosial-iqtisadi və memarlıq-tikinti məsələləri
şöbəsinin müdiri

21/05/2026

18/05/2026

Zaqatalada Əfzələddin Xaqaninin 900 illik yubileyinə həsr olunmuş tədbir keçirilib

Zaqatala rayon MKS-nin 1 nömrəli Yuxarı Tala kənd kitabxanasında klassik Azərbaycan ədəbiyyatının görkəmli nümayəndəsi, şair, filosof və nasir Xəqani Şirvaninin 900 illiyinə həsr olunmuş tədbir keçirilib. Məktəblilərin iştirak etdiyi tədbirdə kitabxana əməkdaşı şairin həyat və yaradıcılığı haqqında geniş məlumat verib. Daha sonra söz məktəblilərə verilib. Onlar Xaqani Şirvaninin “Gənclərə nəsihət”, “Günəşə xitab”, “Savalan dağının tərifi” və “Həbsiyyə” əsərlərindən parçalar səsləndiriblər.

07/05/2026

Qarşılıqlı hörmət, etimad və ortaq maraqlar əsasında qurulan İtaliya-Azərbaycan münasibətləri Prezident İlham Əliyevin uzaqgörən siyasəti, praqmatik yanaşması və güclü liderliyi sayəsində daha da dərinləşərək çoxşaxəli strateji tərəfdaşlıq səviyyəsinə yüksəlib. Onun təşəbbüsü və məqsədyönlü fəaliyyəti nəticəsində iki ölkə arasında yalnız siyasi deyil, eyni zamanda iqtisadi, enerji, humanitar və mədəni sahələrdə də faydalı əməkdaşlıq mühiti yaradılıb.
İtaliya Respublikası Nazirlər Şurasının sədri Ciorcia Meloninin 2026-cı il mayın 4-də ölkəmizə səfəri, səfər çərçivəsində keçirilən görüşlər, aparılan müzakirələr və mətbuata verilən bəyanatlar göstərdi ki, Bakı ilə Roma arasında əməkdaşlıq artıq ənənəvi enerji tərəfdaşlığı çərçivəsindən çıxaraq daha geniş geosiyasi və iqtisadi məzmun kəsb edir.
Prezident İlham Əliyev səfərin yekunu ilə bağlı mətbuata bəyanatında Azərbaycan–İtaliya əlaqələrinin strateji tərəfdaşlıq səviyyəsinə yüksəldiyini vurğulayaraq, bu münasibətlərin uzunmüddətli sabitlik və qarşılıqlı etimad üzərində qurulduğunu qeyd edib. Ölkələr arasında ticarət əlaqələrinin inkişaf etdiyini və İtaliyanın Azərbaycanın bir nömrəli ticarət tərəfdaşı olduğunu bildirən Prezident İlham Əliyev keçən il bizim ticarət dövriyyəmizin təxminən 12 milyard dollar təşkil etdiyini diqqətə çatdırıb.
İki ölkə arasında əlaqələrin əsas istiqamətlərindən birinin energetika sahəsində tərəfdaşlıq olduğunu vurğulayan dövlətimizin başçısı bildirib ki, “Azərbaycan İtaliyanın neft təchizatında ikinci yerdədir, qaz təchizatında da ikinci yerdədir və bizim üçün İtaliya bazarı həm neft, həm qaz üçün birinci dərəcəli əhəmiyyət daşıyır. Keçən il Azərbaycan 25 milyard kubmetr təbii qaz ixrac edib, onun 9,5 milyardı İtaliya bazarına ixrac edilmişdir və bu gün söhbətlər və danışıqlar əsnasında biz bu həcmi artırmaq üçün müzakirələr aparmışıq.”
Prezident İlham Əliyevin bəyanatında diqqətçəkən məqamlardan biri də iqtisadi əlaqələrin şaxələndirilməsi istiqamətində atılan addımlardır. Azərbaycan Dövlət Neft Fondu son bir neçə il ərzində İtaliya iqtisadiyyatına təxminən 3 milyard dollar sərmayə qoyub. Hazırda İtaliyanın 130-a yaxın şirkəti Azərbaycanda, o cümlədən işğaldan azad edilmiş Qarabağda və Şərqi Zəngəzurda bir çox layihələr həyata keçirir.
Bəli, İtaliya-Azərbaycan münasibətləri yeni sahələri də əhatə edir. Hərbi-texniki əməkdaşlıq, birgə istehsal və texnologiya mübadiləsi istiqamətləri inkişaf etdirilir. Bununla yanaşı, tərəflər arasında mədəni-humanitar əlaqələrin inkişafı da diqqət mərkəzindədir. Təhsil sahəsində isə İtaliya Azərbaycan Universiteti iki ölkə arasında insan kapitalı və bilik əlaqələrini daha da gücləndirir. Prezident İlham Əliyevin qeyd etdiyi kimi, “Keçən il böyük təntənə ilə İtaliya-Azərbaycan Universiteti Bakıda açılmışdır. Azərbaycanda təhsilin inkişafına bu universitetin çox böyük təsiri olacaq, töhfəsi olacaq.”
Beləliklə, Azərbaycan-İtaliya münasibətlərinin gələcək inkişafına yeni təkan verəcək mühüm hadisə kimi tarixə düşən bu səfər iki ölkə arasında əlaqələrin daha da dərinləşməsinə xidmət edəcək.

Araz Əliyev
Şəki-Zaqarala Regional Gənclər və İdman İdarəsinin
Zaqatala rayonu üzrə Sektorunun müdiri

01/05/2026

Azərbaycanın xarici siyasətində Avropa ölkələri ilə əməkdaşlığın genişləndirilməsi önəmli yer tutur. 2026-cı ilin aprelin 26-da Çex Respublikasının Baş naziri Andrey Babişin ölkəmizə səfəri Azərbaycanın qlobal siyasətdəki yerinin möhkəmlənməsinin və nüfuzlu tərəfdaş kimi qəbul edilməsinin bariz göstəricisidir. Bu səfər Azərbaycanın yalnız Çexiya üçün deyil, bütövlükdə Avropa Birliyi üçün vacib ölkə olduğunun təsdiqidir.
Azərbaycan və Çexiya arasındakı münasibətlər tarixi köklərə və müasir strateji tərəfdaşlığa söykənir. Çex Respublikası Azərbaycanın müstəqilliyini 1992-ci ildə tanıyıb və iki ölkə arasında diplomatik münasibətlər 1993-cü ildə qurulub. Prezident İlham Əliyevin 2013-cü ildə imzaladığı Sərəncam ilə Azərbaycanın Çex Respublikasının Karlovı Varı şəhərində fəxri konsulu təyin edilib. 2015-ci ildə imzalanmış "Azərbaycan Respublikası və Çex Respublikası arasında Strateji Tərəfdaşlıq haqqında Birgə Bəyannamə" əlaqələrin keyfiyyətcə yeni mərhələyə keçməsini təmin edib.
Səfər çərçivəsində Azərbaycan Respublikasının Prezidenti İlham Əliyevlə Çex Respublikasının Baş naziri Andrey Babiş arasında təkbətək və geniş tərkibli görüşlər keçirilib. Görüşlərdən sonra tərəflər mətbuata bəyanatlarla çıxış ediblər.
Mətbuata bəyanat zamanı bu səfərin iki ölkə arasındakı əlaqələrin dinamik şəkildə inkişafının göstəricisi olduğunu qeyd edən prezident İlham Əliyev bu gün həm regional, həm ikitərəfli, həm də daha qlobal xarakter daşıyan məsələlər ətrafında fikir mübadiləsinin aparıldığını diqqətə çatdırıb. Azərbaycanın ticarət dövriyyəsinin daha yüksək səviyyəyə çatdırılacağına ümid etdiyini bildirən prezident İlham Əliyev qeyd edib ki, “Halbuki bu gün də ticarət dövriyyəmiz əhəmiyyətli dərəcədə artmışdır, 800 milyon dollardan çoxdur. Amma əgər biz ticarət dövriyyəsinin strukturuna baxsaq görərik ki, burada əsasən Azərbaycan neftinin ixracı gözə dəyir. Ona görə biz ticarət dövriyyəsinin daha tarazlı olmasını və strukturun təkmilləşdirilməsini arzulayırıq. Ümid edirəm ki, biz buna nail olacağıq. Çünki bu gün həm təkbətək görüşdə, həm heyətlərin iştirakı ilə apardığımız danışıqlarda bir çox konkret iqtisadi və sərmayə yönümlü layihələr müzakirə edilmişdir.”
Əməkdaşlığımızın böyük hissəsinin energetika sektoruna aid olduğunu vurğulayan prezident İlham Əliyev bəyan edib ki, “Burada da uzun illər ərzində Çexiya və Azərbaycan çox etibarlı tərəfdaşlardır. Azərbaycan nefti Çexiyaya ixrac edilir və Çexiyanın enerji balansında önəmli yer tutur. Azərbaycan dünya bazarlarına öz enerji resurslarını ixrac edən etibarlı ölkələr sırasındadır. Bunu, o cümlədən Avropa İttifaqı da qeyd edir və Azərbaycanı etibarlı tərəfdaş kimi qiymətləndirir.”
Bəli, bu gün Azərbaycan qazı 16 ölkəyə ixrac edilir və onlardan 10 ölkə Avropa İttifaqının üzvüdür. O cümlədən Azərbaycan Çexiyaya qonşu olan ölkələrə təbii qaz ixrac edir.
Azərbaycan Prezidenti əlavə edib ki, ölkələrimiz arasında digər önəmli əməkdaşlıq sahəsi müdafiə sənayesi ilə bağlıdır: "Burada da uzun müddət ərzində uğurlu əməkdaşlıq aparılır. Biz Çexiyadan bir çox hərbi təyinatlı məhsullar alırıq və indiki mərhələdə birgə istehsalla bağlı konkret layihələr üzərində danışıqlar gedir. Əminəm ki, bu sahə də çox genişmiqyaslı olacaq".
Bəli, cənab prezident İlham Əliyevin qeyd etdiyi kimi, bu gün bir daha Çexiya-Azərbaycan dostluğu, əməkdaşlığı öz təsdiqini tapır və bizim qarşımızda çox gözəl perspektivlər açılır. Bu səfər ölkəmizin beynəlxalq münasibətlər sistemində artan rolunu və Azərbaycanın Cənubi Qafqazda formalaşdırdığı sabitlik modelinin Avropa üçün strateji məna daşıdığını bir daha sübut etdi.

Fəxrəddin Qurbanov
Rayon Statistika idarəsinin rəisi

28/04/2026

Ukrayna və Azərbaycan əlaqələri güclü siyasi təməllər üzərində formalaşıb, hər iki xalq və dövlət arasında hər zaman yüksək əlaqələr mövcud olub. Ölkə rəhbərləri arasında keçirilən görüşlər, qarşılıqlı səfərlər və beynəlxalq tədbirlər çərçivəsində aparılan danışıqlar əlaqələrin yüksək səviyyədə olduğunu bir daha təsdiq edir. Hər iki dövlət beynəlxalq hüququn prinsiplərinə, ölkələrin suverenliyinə və ərazi bütövlüyünə dəstək verir. Humanitar missiyalar sahəsində prinsipial mövqeyini hər zaman nümayiş etdirən Azərbaycan Ukraynada müharibə başlayan ilk gündən Ukraynaya humanitar yardım göstərir.
2026-cı il aprelin 25-də Ukrayna Prezidenti Volodimir Zelenski Azərbaycana rəsmi səfər edib. Səfər çərçivəsində keçirilən yüksək səviyyəli görüşlər və mətbuata verilən bəyanatlar Azərbaycan–Ukrayna tərəfdaşlığının dinamik və ardıcıl inkişaf etdiyini bir daha nümayiş etdirib.
Mətbuata bəyanatında Azərbaycan və Ukrayna liderləri arasında görüşlərin müntəzəm xarakter daşıdığını vurğulayan Prezident İlham Əliyev bildirib ki, “son dörd il ərzində bu, bizim yeddinci görüşümüzdür. Son görüşlər beynəlxalq təşkilatların toplantıları çərçivəsində baş vermişdir. Ancaq mən xatırlayıram ki, Siz Prezident kimi Azərbaycana ilk dəfə 2019-cu ildə gəlmisiniz. Bizim şəxsi münasibətlərimiz də o vaxtdan başlayır və bu gün də uğurla davam edir.”
İki ölkə arasında əməkdaşlığın möhkəm siyasi təmələ söykəndiyini diqqətə çatdıran dövlət başçısı qeyd edib ki, 2008-ci ildə Kiyevdə və 2011-ci ildə Bakıda imzalanmış strateji tərəfdaşlıq sənədləri qarşılıqlı şəkildə ərazi bütövlüyü, suverenlik və sərhədlərin toxunulmazlığı prinsiplərini təsbit edir. Azərbaycan və Ukrayna beynəlxalq platformalarda bu prinsiplərə qarşılıqlı dəstəyini davam etdirir.
Bəyanatında iqtisadi sahədə də mühüm mesajlar verən və SOCAR-ın Ukraynada uzun illərdir ki, uğurla fəaliyyət göstərdiyini xatırladan prezident İlham Əliyev bildirib ki, “ticarət dövriyyəsinin bundan sonra da artırılması məsələləri də gündəliyin mərkəzindədir. Bizim ticarət dövriyyəmiz yarım milyard dolları ötüb. Amma ümid edirəm ki, növbəti illərdə bu rəqəm daha da böyüyəcək. Çünki buna da böyük imkanlar var.”
Bəyanatda hərbi-texniki əməkdaşlıq məsələlərinə də toxunan dövlət başçısı həm Azərbaycanda, həm də Ukraynada hərbi sənaye kompleksinin inkişaf etdiyini və bu sahədə birgə istehsal üçün geniş imkanların mövcud olduğunu qeyd edib.
Prezident İlham Əliyev bu səfərin Azərbaycan-Ukrayna dostluq əlaqələrinin inkişafına növbəti mühüm töhfə olacağından əminliyini ifadə edib.
Prezident İlham Əliyevin səsləndirdiyi fikirlər və əldə olunan razılaşmalar iki ölkə arasında əməkdaşlığın konkret və məqsədyönlü hədəflər üzərində qurulduğunu əks etdirir.

Tahir Məmmədov
YAP Zaqatala rayon təşkilatının
fəal üzvü, rayon ağsaqqalı

24/04/2026

Azərbaycan Respublikasının xarici siyasətində ikitərəfli əlaqələrin inkişafına xüsusi önəm verilir. Bu çərçivədə Baltikyanı respublikalarla, o cümlədən Latviya ilə qurulan münasibətlər mühüm yer tutur. Bu münasibətlər qarşılıqlı etimad mühitində davamlı inkişaf etdirilir və dövlət başçılarının qarşılıqlı səfərləri ilə möhkəmlənir.
Azərbaycanla Latviya keçmiş SSRİ-nin tərkibində müttəfiq respublikalar olublar. Elə həmin dövrdə də iki respublika arasında iqtisadi və mədəni əlaqələr formalaşıb. Müstəqillik əldə etdikdən sonra ölkələrimiz arasında əlaqələr daha da inkişaf etməyə başlayıb. Latviya Azərbaycanın müstəqilliyini 1992-ci ildə tanıyıb. İki ölkə arasında diplomatik münasibətlər 1994-cü ilin yanvarında qurulub. Azərbaycanın Latviyada Səfirliyi 2005-ci ildə, Latviyanın Azərbaycanda Səfirliyi isə 2006-cı ildə fəaliyyətə başlayıb. Hazırda iki ölkə arasında yüksək səviyyədə əlaqələr mövcuddur. 2026-cı ilin aprelin 22-də Latviya Respublikasının Prezidenti Edqars Rinkeviçsin Azərbaycana rəsmi səfəri və bu çərçivədə keçirilən görüşlər iki ölkə arasında münasibətlərin gələcək inkişafı üçün yeni imkanlar açır.
Səfər çərçivəsində mətbuata bəyanatla çıxış edən Prezident İlham Əliyev ikitərəfli gündəliyin müxtəlif istiqamətlərinə toxunaraq, beynəlxalq əhəmiyyətli məsələlərin həm təkbətək görüşdə, həm də nümayəndə heyətlərinin iştirakı ilə geniş müzakirə edildiyini vurğulayıb. Bildirib ki, əməkdaşlıq geniş potensiala malikdir və doqquz il əvvəl imzalanmış Strateji Tərəfdaşlıq haqqında Bəyannamə münasibətlərin hüquqi əsasını formalaşdırıb.
Cəmi bir həftə əvvəl Birgə Hökumətlərarası Komissiyanın Azərbaycanda - Qarabağda, Şuşada görüş keçirdiyini diqqətə çatdıran dövlətimizin başçısı bildirib ki, “Bu gün keçiriləcək biznes-forum işgüzar əlaqələrin qurulmasında, qarşılıqlı sərmayələr üçün imkanların tapılmasında, birgə istehsalın və bir sıra digər işlərin qurulmasında çox böyük potensialın növbəti təzahürüdür.”
Prezident İlham Əliyev mətbuta bəyanatında qeyd edib ki, “Nəzərdən keçirmək razılığına gəldiyimiz digər sahə birbaşa uçuşlardır”. Bəli, bu təşəbbüs ölkələr arasında qarşılıqlı səfərləri daha əlçatan və operativ edəcək, eyni zamanda iqtisadi və mədəni mübadilənin intensivləşməsinə şərait yaradacaqdır.
Dövlətimizin başçısı Latviyanın ali təhsil müəssisələrində 450-dən artıq azərbaycanlı tələbənin təhsil aldığını da xatırladaraq Latviya prezidentini ölkənin inkişafında əldə olunmuş bütün nailiyyətlər münasibətilə təbrik edib.
Prezident İlham Əliyev mətbuata bəyanatında Azərbaycanla Ermənistan arasında artıq de-fakto sülhün olduğunu, hər iki ölkənin liderinin ötən il Ağ Evə dəvət edildiyini, Birgə Bəyannamənin imzalandığını və həmin vaxtdan bəri bir çox irəliləyiş olduğunu diqqətə çatdırıb. Dövlət başçısı bildirib ki, “Bir sözlə, bu nümunə göstərir ki, məhz siyasi iradə və siyasi müdriklik, o cümlədən gələcəyə strateji baxışlar hadisələri təyin edir: Siz ya sonsuz müharibəni və ya müharibələri davam etdirirsiniz, yaxud beynəlxalq hüquq əsasında istədiyinizə nail olduqda birdəfəlik dayanırsınız və sülhə hazır olduğunuzu nümayiş etdirirsiniz. Düşünürəm ki, həmin nümunə hələ də müharibədə olan ölkələr üçün vacib ola bilər.”
Səfər çərçivəsində Azərbaycan və Latviya prezidentlərinin geniş tərkibdə və təkbətək görüşü baş tutub. Bakıda Azərbaycan-Latviya biznes-forumu keçirilib və Azərbaycan ilə Latviya arasında imzalanmış sənədlər mübadilə edilib.
Ümumilikdə Latviya Prezidenti Edqars Rinkeviçsin Bakı səfəri strateji tərəfdaşlığın yalnız formal deyil, real siyasi və iqtisadi müstəvidə inkişaf etdiyini nümayiş etdirir.

İbrahim İbrahimov
rayon ziyalısı, Müharibə, Əmək və Silahlı Qüvvələr Veteranları Təşkilatının Zaqatala Rayon Təşkilatının sədri, "Zaqatala" qəzetinin baş redaktoru