26/05/2026
“28 May – Müstəqillik Günü” ilə bağlı Saatlı rayon Statistika İdarəsində tədbir keçirilib.
26.05.2026-cı il tarixində Yeni Azərbaycan Partiyası Saatlı rayon təşkilatının, Saatlı rayon Statistika İdarəsinin və Saatlı rayon Ağsaqqallar Şurasının birgə təşkilatçılığı ilə Saatlı rayon Statistika İdarəsinin inzibati binasında “28 May – Müstəqillik Günü” ilə bağlı tədbir keçirilib.
Tədbirdə Ulu Öndər Heydər Əliyevin, ölkəmizin ərazi bütövlüyü, müstəqilliyi və suverenliyi uğrunda şəhid olmuş qəhrəmanlarımızın əziz xatirəsi bir dəqiqəlik sükutla yad edildi.
Tədbiri giriş sözü ilə açan Saatlı rayon Statistika İdarəsinin rəisi Rövşən İsayev 28 May – Müstəqillik Gününün dövlətçilik tariximizdəki əvəzsiz rolundan bəhs edərək, bu müqəddəs tarixin bizə qazandırdığı ən böyük dəyərin milli inkişaf olduğunu bildirib. R.İsayev həmçinin vurğuladı ki, respublikamızın bütün bölgələrində, o cümlədən Saatlı rayonunda həyata keçirilən genişmiqyaslı infrastruktur layihələrini, sənaye və kənd təsərrüfatı sahələrində qeydə alınan artım dinamikasını, eləcə də əhalinin rifah halının yüksəldilməsi istiqamətində görülən ardıcıl tədbirlərin əhəmiyyətini statistik təhlillər də aydın şəkildə sübut edir.
Tədbirdə çıxış edən YAP Saatlı rayon təşkilatının sədri Elşən Əzizov Azərbaycan xalqının dövlətçilik tarixinin şanlı səhifəsi olan Şərqdə ilk demokratik respublikanın – Azərbaycan Xalq Cümhuriyyətinin yaranmasının tarixi əhəmiyyətindən bəhs edib. O vurğuladı ki, 1918-ci ildə əsası qoyulmuş müstəqillik ənənələrinin qorunub saxlanılması, XX əsrin sonlarında onun yenidən bərpa edilməsi və əbədi, dönməz xarakter alması birbaşa Ulu Öndər Heydər Əliyevin uzaqgörən dövlətçilik strategiyasının, xilaskarlıq missiyasının nəticəsidir. E.Əzizov bildirdi ki, bu gün Ümummilli Liderin siyasi kursunu uğurla davam etdirən Cənab Prezident İlham Əliyevin rəhbərliyi ilə Azərbaycan Respublikası öz tarixinin ən qüdrətli dövrünü yaşayır. Hazırda Müzəffər Ali Baş Komandanın rəhbərliyi ilə işğaldan azad edilmiş və suverenliyi tam bərpa olunmuş ərazilərimizdə üçrəngli bayrağımızın əzəmətlə dalğalanması müstəqillik tariximizin ən bariz və qürurverici nümunəsidir.
Daha sonra çıxış edən Saatlı rayon Ağsaqqallar Şurasının sədri Sədafər Hüseynov müstəqil dövlətimizin daxili və xarici siyasətdə qazandığı uğurlar, cəmiyyətin inkişafı və ölkəmizdə həyata keçirilən sosial-iqtisadi islahatların əhəmiyyəti barədə ətraflı məlumat verib. Bildirdi ki, dövlət müstəqilliyinin bərpasından sonra Ümummilli Lider Heydər Əliyev tərəfindən əsası qoyulan və Prezident İlham Əliyev tərəfindən qətiyyətlə davam etdirilən iqtisadi strategiya ölkəmizi regionun lider dövlətinə çevirib.
Mövzu ətrafında çıxış edənlər – Lütvəli Şıxəliyev, Həmzə Əliyev və Nəsir Ağayev müstəqilliyimizin qorunmasında və gənc nəslə aşılanmasında tarixi yaddaşın əhəmiyyətindən bəhs etdilər. Çıxışçılar xüsusilə vurğuladılar ki, dövlət müstəqilliyinin möhkəmləndirilməsi prosesində iqtisadi və statistik göstəricilərin dayanıqlı artımı, həmçinin milli-mənəvi dəyərlərin qorunması prinsipləri əsas götürülməlidir. Müstəqillik idealına sadiq qalmaqla yanaşı, qlobal uğurların ölkəmizdə tətbiq edilməsi Azərbaycanın beynəlxalq arenadakı müsbət imicini və suveren statusunu daha da gücləndirir. Bildirildi ki, vətənimizin gələcək inkişafında və müstəqilliyimizin əbədi qorunmasında intellektual gənc kadrların hazırlanması, elm və vətənpərvərlik ruhu həlledici əhəmiyyət kəsb edir. Sonda çıxışçılar müstəqilliyimizin əbədi və dönməz saxlanılması naminə hər bir vətəndaşı, xüsusilə də gəncləri dövlətçilik idealları ətrafında daha sıx birləşməyə çağırıblar.
