Qax rayon Mərkəzləşdirilmiş Kitabxana Sistemi

03/06/2026

Qlobal Enerji Səhnəsinin Zirvəsində: Müasir Azərbaycanın Strateji İnkişaf Modeli

Müasir Azərbaycanın beynəlxalq enerji arenasında əldə etdiyi nailiyyətlərin və formalaşdırdığı strateji xəttin əsası 1994-cü ildə, uzaqgörən addımlarla qoyulmuşdur. Həmin dövrdə təşkil edilən tarixi Xəzər Neft və Qaz Sərgisi ölkəmizin enerji inkişafının möhkəm bünövrəsinə çevrilərək bugünkü uğurlara yol açdı. İllər keçdikcə bu platforma daha da böyüyərək qlobal enerji səhnəsində həqiqətən aparıcı və nüfuzlu tədbirlərdən birinə – Bakı Enerji Həftəsinə çevrilmişdir. Bu gün dünya miqyasında sürətli texnoloji yeniliklər və yaşıl enerjiyə keçid meyilləri baş versə də, real mənzərə onu göstərir ki, bəşəriyyət hələ də faydalı qazıntı olmadan yaşaya bilməz və ənənəvi resurslar qlobal iqtisadiyyatın ana sütunudur. Hazırda beynəlxalq enerji sistemində müşahidə olunan müsbət halların, tərəfdaşlıq və dialoq mühitinin ərsəyə gəlməsində isə ABŞ Prezidentinin çox müdrik və praqmatik siyasəti xüsusi əhəmiyyət kəsb edir.

Azərbaycanın xarici arenadakı bu nüfuzu, şübhəsiz ki, onun daxili iqtisadi və hərbi qüdrətindən qaynaqlanır. Hazırda ölkəmizin iqtisadi fəaliyyəti son dərəcə müsbətdir və milli iqtisadiyyatımız tam müstəqil xarakter daşıyır. Ölkənin mövcud valyuta ehtiyatlarının xarici borcumuzu 18 dəfədən çox üstələməsi bu maliyyə dayanıqlılığının ən bariz göstəricisidir. Bu güclü iqtisadi potensial həm də milli suverenliyimizin rəmzi olan ordu quruculuğuna yönəldilmiş və nəticədə 30 il ərzində işğal altında qalmış torpaqlarımızı azad etməyə qadir olan məğrur və rəşadətli bir ordu formalaşdırılmışdır.

Milli təhlükəsizliyin ayrılmaz tərkib hissəsi olan enerji təhlükəsizliyi sahəsində Azərbaycan artıq regional çərçivələri aşaraq qlobal miqyasda mühüm rol oynayır. Müasir infrastruktur layihələri, xüsusilə Cənub Qaz Dəhlizi və onun genişləndirilmiş marşrutları vasitəsilə Azərbaycan qazı bu gün dünyanın 16 ölkəsinə təhlükəsiz şəkildə çatdırılır. Fəxrlə qeyd etmək lazımdır ki, mavi yanacağımızı alan bu 16 ölkədən 10-u Avropa İttifaqına üzv olan dövlətlərdir və bu faktor Azərbaycanı Avropanın enerji xəritəsində əvəzedilməz tərəfdaşa çevirir. Üstəlik, mövcud zəngin qaz ehtiyatlarımız ən azı növbəti yüz il ərzində həm daxili tələbatımızı, həm də bütün tərəfdaşlarımızın ehtiyaclarını tam qarşılamağa kifayət edəcək gücdədir.

Azərbaycan təkcə resurs ixrac edən ölkə deyil, həm də regionun ən böyük logistik mərkəzi və tranzit qovşağıdır. Şərq-Qərb dəhlizinin uğurlu fəaliyyəti sayəsində ölkəmiz Xəzər dənizinin şərq sahillərində yerləşən dost və tərəfdaş dövlətlər üçün böyük və etibarlı tranzit imkanları təqdim edir. Eyni zamanda, daxili sənayeləşmə siyasətinə uyğun olaraq, emal sənayesində yüksək dərəcədə şaxələndirilmiş imkanlar yaradılmışdır ki, bu da xammaldan asılılığı minimuma endirir. Gələcəyə baxış strategiyamız isə artıq real bəhrələrini verməkdədir; belə ki, alternativ mənbələrə əsaslanan bir sıra yaşıl enerji layihələrimiz artıq istismar mərhələsindədir. Hazırda tərəfdaşlarımızla birlikdə reallaşdırılan irimiqyaslı enerji kabeli layihələri üzrə sıx əməkdaşlıq, Azərbaycanın gələcəkdə həm də ekoloji təmiz "yaşıl" enerjinin ixracatçısı kimi qlobal arenada yeni bir epoxanın lideri olacağından xəbər verir.

01/06/2026

"Qax rayon kitabxanalarında 1 iyun Coşqusu"

1 iyun 2026- cı il tarixində Qax rayon Mərkəzləşdirilmiş Kitabxana Sistemi tabeliyində fəaliyyət göstərən müəssisələrdə 1 İyun – Uşaqların Beynəlxalq Müdafiəsi Günü münasibətilə İlisu, Cəlayir, Qaxbaş, Qaxingiloy, Toppax, Ləkit, Zəyəm,Güllük və Əmbərçay kənd kitabxanalarında silsilə tədbirlər keçirilib.

Tədbirlərdə uşaqlar üçün maraqlı oyunlar, nağıl saatları, kitab sərgiləri, şeir və rəsm müsabiqələri təşkil olunub. Balacaların asudə vaxtının səmərəli təşkili, onların kitaba və mütaliəyə marağının artırılması məqsədilə keçirilən tədbirlər iştirakçılar tərəfindən böyük maraq və sevinc hissi ilə qarşılanıb.

27/05/2026

26/05/2026

Fəaliyyətin istiqamətlərini müəyyənləşdirən vacib bir tədbir

Ermənistanın Azərbaycana qarşı apardığı ədalətsiz müharibə, bu müharibənin nəticəsi olaraq ərazisinin 20 faizinin işğalı Azərbaycanda kənd təsərrüfatının inkişafını ləngitmişdi. İllər çəkən işğal müddətində min hektarlarla bağ sıradan çıxdı, neçə-neçə suvarma sistemi yararsız hala düşdü. Azərbaycan Ordusunun tarixi Zəfərindən sonra işğal olunmuş ərazilərdə quruculuq işləri başladı və böyük uğurlarla davam etməkdədir. Quruculuq işləri təkcə tikinti sahəsinə aid deyil, bu, həm də kənd təsərrüfatının bərpasına və inkişafına aiddir. Azərbaycan Respublikasının Prezidenti cənab İlham Əliyev kənd təsərrüfatı məsələlərinə həsr olunmuş müşavirədə çıxışında bildirdi ki, tarixi Zəfərdən sonra bütün regionlar canlandı, regionlarda məşğulluq artdı və böyük infrastruktur layihələri icra edildi. Bu, Azərbaycanın Zəfərdən sonra da Zəfər qazanacağının zəmanətidir. Dövlət başçımız bildirdi ki, “Bu gün bu layihələr olmadan Azərbaycanın ümumi inkişafını təsəvvür etmək mümkün deyil. O cümlədən kənd təsərrüfatının inkişafı üçün bu proqramda nəzərdə tutulmuş infrastruktur layi­hələri həlledici rol oynamışdı. Çünki o vaxt bölgələrdə demək olar ki, qaz təchizatı yox idi. Elektrik təchizatı ilə nəinki regionlarda, Bakıda böyük problemlər yaşanırdı, hətta böyük fasilələr olurdu. Avtomobil yolları yararsız vəziyyətdə idi. Su ilə təchizat demək olar ki, tamamilə tükənmişdi. Yəni kəndlərin dirçəldilməsi və kəndlərdə yaşayan insanların yaşayış səviy­yəsini yaxşılaş­dırmaq üçün bu proqramın həlledici rolu olmuşdu. O ildən bu yana bölgələrdə ge­nişmiqyaslı infrastruktur layihələri icra edildi”.
“Elektrik təchizatı ilə heç bir yerdə heç bir problem yoxdur, nəinki özümüzü təmin edirik, hətta bizim böyük ixrac potensialımız yaradılmışdır. Bir çox magistral, şəhərlərarası və kənd yol­ları inşa edilmişdir. Böyük su anbarları inşa edilmişdir, ilk növbədə, Taxtakörpü, Şəmkirçay, Göy­təpə və digərləri. Kanallar yenidən qurulmuşdur və bu proses davam etdirilir. Bir sözlə, bölgələrin və kənd təsərrüfatının inkişafı çox sürətlə getmişdir. Bunun nəticəsində bir çox istiqa­mətlər üzrə kənd təsərrüfatı məhsullarının istehsalında böyük artım olmuşdur. Onu da bildirmə­liyəm ki, bu il­lər ərzində bir neçə dövlət proqramı qəbul edilmişdir, üzümçülük, pambıqçılıq, fındıqçılıq, sitrus­çuluq, digər istiqamətlər üzrə və bu sahələrə böyük təkan verilmişdir”.
Dövlət başçımız müşavirədə Azərbaycan gerçəkliklərinin bəşərilik amilinə də toxunaraq qeyd etdi ki, bizim fəaliyyətimizlə kəndlərdən şəhərlərə yox, şəhərlərdən kəndlərə qayıdış prosesi başlasın: “bu yaxınlarda Bakıda keçirilmiş Ümumdünya Şəhərsalma Forumunun müzakirələrində də bu öz əksini tapmışdır, - genişmiqyaslı urbanizasiya, yəni kəndlərdən şəhərlərə olan axın. Bu, təkcə ölkəmiz üçün deyil, bütün ölkələr üçün xas olan mənfi meyildir. Ancaq bəzi ölkələr, sadəcə olaraq, bu məsələnin həlli üçün imkan tapa bilmir, yaxud da ki, düzgün strategiya işləyə bilmirlər. Biz isə elə etməliyik ki, kəndlərdən şəhərlərə yox, şəhərlərdən kəndlərə qayıdış prosesi başlasın. Bunun üçün də əlbəttə ki, kəndlə şəhər arasındakı istənilən istiqamətlər üzrə fərqlər azaldılmalıdır. Qeyd etdiyim Regional İnkişaf Proqramının və proqramlarının, dediyim kimi, bir neçə proqram qəbul edilmişdir, məqsədi də bu idi ki, bölgələrdə elə şərait yaradılmalıdır ki, insanlar orada yaşasınlar, qalsınlar, öz dədə-baba torpaqlarında çalışsınlar, ənənəvi fəaliyyətlə məş­ğul olsunlar, əkin, biçin, turizm imkanları. Yəni orada xidmət sektoru da yüksək səviyyədə olmalıdır”.
Regional İnkişaf proqramlarının icrasında sosial infrastruktur layihələrinin də uğurla icra olunduğunu, qəbul edilmiş proqramların və qərarların böyük dönüşə səbəb olduğunu, aqroparkların yaradılmasının kənd təsərrüfatının inkişafında çox böyük rol oynadığını, da nəzərə çatdıran cənab İlham Əliyev dedi: “Ancaq son bir neçə il ərzində kənd təsərrüfatının inkişafında müşahidə edilən durğunluq, əlbəttə ki, bizi düşündürür və bu məqsədlə Dövlət Proqramı hazırlanıb və qəbul ediləcək. Bununla əlaqədar bəzi rəqəmləri səsləndirmək istərdim. Bu, xüsusilə özəl sektora göndərilən siqnal və mesaj olacaq. Çünki dövlət qurumları bu rəqəmləri bilirlər. Özəl sektor nümayəndələrinin də Dövlət Proqramının icrasında xüsusi rolu olmalıdır. Burada biznes nümayəndələrinin, əlbəttə ki, məsuliyyəti ön planda olmalıdır. Öz ölkələrinə olan bağlılıq və sərmayə qoyuluşu üçün daha münbit şərait olmalıdır. Əlbəttə ki, biz müxtəlif mexanizmlərdən də istifadə edəcəyik. Həm güzəştli kreditlər, həm digər alətlərdən istifadə etməliyik ki, Azərbaycan sahibkarlarının kənd təsərrüfatının inkişafına sərmayə qoymasına daha böyük həcmdə nail olaq”.
Dövlət xətti ilə həyata keçirilən bir çox layihələrin kənd təsərrüfatının inkişafına böyük təkan verdiyini, dünyada gedən meyillərin kənd təsərrüfatının istehsalına da mənfi təsir göstərdiyini, torpaqlardan səmərəli istifadə olunmasının zəruriliyini, hər bir əkin üçün yararlı torpaq sahəsinin öz pasportu olmasıını, kənd təsərrüfatı texnikası ilə təminatın yüksəldilməsinin, gübrə istehsalının artırılmasının, kənd təsərrüfatı texnikası ilə təminatın yüksəldilməsinin zəruriliyini də diqqətə çatdıran dövlət başçımız Qarabağ kanalının bərpasına, yenidən qurulmasına başlanıldığını, Aşağı Şirvan, Aşağı Qarabağ kanalları olmadığı üçün vaxtilə Yuxarı Şirvan, Yuxarı Qarabağ kanalları adlandırılan kanallaın Şirvan və Qarabağ kanalları adlandırıldığını da bildirərək dedi ki, “bu kanallar işə düşəndən sonra bəlkə də 200-300 min hektar torpağa su veriləcək. Ancaq bu torpaqlarda müasir şəbəkə qurulmalıdır və bu da Dövlət Proqramında nəzərdə tutulur. Müasir suvarma sistemləri hazırda, bu da dövlətin dəstəyi ilə mümkün olub, 130 min hektarda tətbiq olunur. Məqsəd bunu 300 min hektara çatdırmaqdır. Əgər bizim 300 min hektarda müasir suvarma sistemləri qurularsa, baxın, nə qədər məhsuldarlıq arta bilər”.
Azərbaycan Respublukasının Prezidenti cənab İlham Əliyev müşavirədə Kənd Təsərrüfatı Nazirliyinin, Hökumətin, Prezident Administrasiyasının, İqtisadiyyat Nazirliyinin, digər qurumların fəal işləməsinin zəruriliyini də diqqətə çatdırdı.
Bu müşavirə Azərbaycanda kənd təsərrüfatının daha dinamik inkişafının təmin edilməsi isti­qamətində fəaliyyətin istiqamətlərini müəyyənləşdirən vacib bir tədbir oldu.

25/05/2026

Şanlı tarixin 28 May səhifəsi

1918-ci il mayın 28-də Azərbaycan Xalq Cümhuriyyətinin Milli Şurası İstiqlal Bəyannaməsini imzalamaqla Azərbaycanın müstəqilliyini dünyaya bəyan etdi. Azərbaycan istiqlal müjdəsi ilə bütün Qafqaza isıq saçdı. Cəmi 23 ay fəaliyyət göstərən Azərbaycan Xalq Cümhuriyyəti o dövrün məhdud imkanları ilə miqyasına görə o qədər böyük işlər gördü ki, qısa müddət ərzində mövcud olmuş Azərbaycan Xalq Cümhuriyyəti müsəlman Şərqində demokratiya ənənələrinin formalaşmasına əhəmiyyətli təsir göstərdi. Sovet rejimi nə qədər çalışsa da, müstəqil dövlətimizin izlərini tarixdən silə bilmədi. Həmin gerçəkliyin nəticəsi idi ki, sovet dövləti laxlayan kimi müstəqil dövlətimizin bayrağı da, gerbi də, himni də ortaya çıxdı. Lakin müstəqilliyin bərpası ərəfəsində Azərbaycana rəhbərlik edənlər “bolşeviklərin varisləri” kimi, üçrəngli bayrağımızdan da, gerbimizdən də, dahi Üzeyir Hacıbəylinin istiqlal şairi Əhməd Cavadın sözlərinə bəstələdiyi himnimizdən də qorxurdular.
Xalqımızın dahi oğlu, Ulu Öndər Heydər Əliyev həmin, sovet reyiminin laxladığı dövrdə heç nədən qorxmadı. 20 Yanvar qətliamından sonra Moskvadan Bakıya qayıdan, lakin burada ona qarşı törədilən ciddi maneələrdən sonra Naxçıvana üz tutan Ümummilli Lideri doğma yurdu bağrına basdı. Belə ki, Ulu Öndər 1991-ci il sentyabrın 3-dən Naxçıvan Muxtar Respublikası Ali Sovetinin sədri seçildi və 1993-cü ilədək bu vəzifədə çalışdı. Bundan əvvəl Naxçıvan Muxtar Respublikası Ali Sovetində təmsil olunan xalqın ağsaqqalı və dahi şəxsiyyəti Heydər Əliyevin bilavasitə təşəbbüsü ilə üçrəngli bayrağımız Naxçıvan Muxtar Respublikasının dövlət bayrağı kimi qəbul edilmiş, mərkəzi qanunvericilik hakimiyyəti qarşısında milli rəmzlərimizin qəbul edilməsi üçün vəsatət qaldırılmışdı. 1991-ci ildə SSRİ-də yaranan vəziyyəti düzgün qiymətləndirməyən respublika rəhbərliyi bu məsələlərdə ciddi müqavimət göstərsə də, sonradan reallığı qəbul etməyə məcbur qaldı. Son nəticədə 1991-ci ilin oktyabrın 18-də dövlət müstəqilliyimizin bərpası baş tutdu.
Müstəqilliyin bərpasından sonra hakimiyyətdə olan və daha sonra iqtidara yiyələnənlər müstəqil Azərabycan Respublikasının 28 may 1918-ci ildə elan edilən, iki ilə yaxın mövcud olan, bolşevik işğalı və basqısı ilə süquta uğrayan Azərbaycan Xalq Cümhuriyyətinin varisi olduğunu qəbul etsələrdə də, bir çox hallarda tarixi varisçilik prinsipinə əməl etmirdilər. Bu durum müstəqilliyin bərpasından tutmuş silahlı qüvvələr gününün qeyd edilməsinə qədər bir çox ciddi tarixi hadisələrdə özünü göstərirdi. Həmin ziddiyyətli məsələlər yalnız Ümummilli Lider müstəqil Azərbaycana başçılıq etdiyi dövrdə həllini tapdı.
Azərbaycan xalqının dahi oğlu, Ulu Öndər yenidən hakimiyyətin yüksək pilləsinə qalxanda müstəqilliyimizin 75-ci illiyi tamam olmuşdu. 1993-cü ilin yazında Azərbaycan ya məhv olmalı, ya da mövcudluğunu qorumalı idi. Xalqın təkidli tələbi həmin çətin dövrdə Ulu Öndəri Naxçıvandan Bakıya gəlməyə və vətəndaş müharibəsinin qarşısını almağa səfərbər etdi. Bu minvalla ölkəmizdə müqəddəs qurtuluş dastanı yazılmağı başladı. Müəllifi Ulu Öndər olan bu əfsanə Azərbaycanı uğurdan-uğura aparır.
Müstəqilliyimizin bərpasından sonra bir çox tarixi hadisələrə qiymət verilməsində ciddi yanlışlıqlar olmuşdu. Buna görə də 2021-ci ildə müstəqillik və müstəqilliyin bərpası ilə bağlı qanunu müzakirə edən Milli Məclis “Müstəqillik Günü haqqında Azərbaycan Respublikasının Qanunu”nu qəbul etdi. Prezidentimiz cənab İlham Əliyev tərəfindən 15 oktyabr 2021-ci il tarixində təsdiq edilən qanuna əsasən, mayın 28-i Müstəqillik Günü, oktyabrın 18-i isə Müstəqilliyin Bərpası Günü elan edildi. Artıq xalqımız mayın 28-ni Müstəqillik Günü kimi qeyd edir.
Müstəqil Azərbaycanın Qalib Lideri İlham Əliyevin vurğuladığı kimi: “Azərbaycan Xalq Cümhuriyyətinin yaradılması tarixi hadisə idi. Çünki ilk dəfə olaraq müsəlman aləmində demokratik respublika yaradılmışdı. Biz haqlı olaraq fəxr edirik ki, məhzc Azərbaycan xalqı müsəlman aləmində ilk demokratik respublikanın yaradılmasının müəllifi olmuşdur.”
Bu gün xalqımız fəxr edir ki, Ali Baş Komandanın rəhbərliyi ilə tarixi ədaləti bərpa edən Azərbaycanın dövlət müstəqilliyi əbədidir, sarsılmazdır, dönməzdir.

19/05/2026

Mayın 19-da Qax rayon Mədəniyyət Mərkəzində Ümummilli Lider Heydər Əliyevin anadan olmasının 103-cü ildönümünə həsr olunmuş “Kitabın sehrinə qovuşaq!” adlı Kitab bayramı keçirilib. “Şəhərsalma və Memarlıq İli” çərçivəsində Qax rayon C.Cabbarlı adına Mər...

12/05/2026

“Kitab güclüdür” — Qaxda Heydər Əliyevin 103 illiyinə həsr olunan rəsm müsabiqəsi keçirilib

12 may 2026-cı il tarixində Qax şəhər C.Cabbarlı adına Mərkəzi Kitabxananın təşkilatçılığı ilə Ümummilli Lider Heydər Əliyevin 103-cü ildönümünə həsr olunan “Kitab güclüdür” adlı rəsm müsabiqəsi keçirilib.

Müsabiqənin keçirilməsində məqsəd gənclərdə kitaba marağın artırılması, onların yaradıcılıq qabiliyyətinin üzə çıxarılması, Ümummilli Lider Heydər Əliyevin əziz xatirəsini yad etmək, onun zəngin irsinin təbliği, uşaq və yeniyetmələr arasında bədii yaradıcılıq potensialının üzə çıxarılması, onların kitab haqqında düşüncələrinin, kitabın cəmiyyətdəki rolunun rəsm əsərlərində canlandırılması olub.
Tədbirdə məktəblilər və gənc rəssamlar müxtəlif mövzularda bir-birindən maraqlı rəsm əsərləri ilə iştirak ediblər. Münsiflər heyəti tərəfindən qaliblər müəyyən olunaraq mükafatlandırılıb. Belə ki, müsabiqədə iştirak edən bütün iştirakçılar fəxri fərman, diplom və sertifikatlarla təltif ediliblər.

I yerin sahibi — Yağmur Məmmədli
II yerin sahibi — Əminə Quliyeva
III yerin sahibi — Pəri Şirinzadə olub.
Tədbirin sonunda iştirakçılara uğurlar arzulanıb, kitabın insan həyatındakı əhəmiyyəti və maarifləndirici rolu barədə fikirlər səsləndirilib.

08/05/2026

Qax rayon MKS-nin tabeliyində fəaliyyət göstərən kitabxana filiallarında 9 May – Faşizm üzərində Qələbə Gününə həsr olunan silsilə tədbirlər keçirilib.

Qaxbaş, Toppax, Qaxingiloy və Qaşqaçay kənd kitabxanalarında baş tutan tədbirlərdə Böyük Vətən müharibəsi iştirakçılarının şücaətindən bəhs olunub, şəhid və veteranların əziz xatirəsi bir dəqiqəlik sükutla yad edilib.
Çıxışlarda qəhrəmanlıq, vətənpərvərlik və tarixi yaddaşın qorunmasının vacibliyi vurğulanıb, iştirakçılarla mövzu ətrafında söhbətlər aparılıb. Tədbirlər çərçivəsində abidələr və Şəhidlər xiyabanı ziyarət olunub.

08/05/2026

Qax rayon MKS-nin tabeliyində fəaliyyət göstərən kitabxana filiallarında Ümummilli Lider Heydər Əliyevin anadan olmasının 103 illiyinə həsr olunmuş silsilə tədbirlər keçirilib.

Şəhər 1,2 və 4 saylı kitabxana filialı, Qaxbaş,Toppax, Qaxingiloy, Əmbərçay,Əlibəyli, Şıxlar, Almalı, Zəyəm və Qum kənd kitabxanalarında təşkil olunan tədbirlərdə Ulu Öndərin zəngin həyat yolu, dövlətçilik fəaliyyəti, Azərbaycan xalqı qarşısındakı misilsiz xidmətləri haqqında geniş məlumat verilib, iştirakçılar tərəfindən dahi şəxsiyyətə həsr olunan şeirlər səsləndirilib və kitab sərgilərinə baxış keçirilib.