05/11/2025
Noyabrın 5-də A. Babayev adına Naxçıvan Muxtar Respublika Uşaq Kitabxanası və Mədəniyyət üzrə Elmi-Metodik Mərkəzinin birgə təşkilatçılığı ilə Zəfər Gününə həsr olunmuş “44 günlük zəfər tariximiz” adlı tədbir keçirilib.
Bir neçə şəhid ailəsinin də iştirak etdiyi tədbiri Kitabxananın direktoru Ruzi Süleymanov açaraq qeyd edib ki, 44 gün ərzində hər gün Azərbaycan Ordusu irəli gedirdi, hər gün yeni şəhərlər, kəndlər, qəsəbələr, yüksəkliklər azad edilirdi. Azərbaycan əsgəri, Azərbaycan zabiti bir amalla vuruşurdu ki, işğala son qoyulsun və tarixi ədalət zəfər çalsın. Azərbaycan Silahlı Qüvvələri 44 gün ərzində düşmən ordusunu məhv edərək öz ərazi bütövlüyünü bərpa etdi. Bu qüruru bizə yaşadan Müzəffər Ali Baş Komandan İlham Əliyevə və rəşadətli Azərbaycan Ordusuna minnətdarıq.
Mədəniyyət üzrə Elmi-Metodik Mərkəzin direktoru Səyyar Məmmədov “Zəfər günümüz: şəhid əmanəti ” mövzusunda çıxış edərək bildirib ki, bu gün biz böyük qürur hissi ilə Zəfər Günümüzü qeyd edirik. Bu gün xalqımızın birliyinin, igidliyinin, inamının və Vətən sevgisinin təntənəsidir. Biz bu gün azad nəfəs alırıqsa, bu qəhrəman şəhidlərimizin, qazilərimizin sayəsindədir. Bu səbəbdən Zəfər Günümüz şəhidlərin bizə əmanətidir. Biz bu əmanətə sahib çıxmalı, milli dəyərlərimizi qorumalı, Vətənimizin tərəqqisi naminə əlimizdən gələni əsirgəməməliyik. Şəhidlərimizin ruhuna ən böyük hədiyyə gələcək nəslə bütün sahələrdə inkişaf etmiş güclü Azərbaycan əmanət etməkdir!
Şəhid ailələri çıxış edərək bildiriblər ki, bu böyük zəfər qətiyyətli siyasi iradə və əzmin nəticəsində qəhrəman igidlərimizin canı-qanı bahasına əldə edilib. Bu qələbədə mənfur düşmənə qarşı inanılmaz şücaətlə vuruşan, öz həyatını qurban edən şəhidlərimizin qəhrəmanlığı əvəzsizdir. 44 günlük Vətən savaşın ölkəmizin ərazi bütövlüyü uğrunda həlak olan bütün şəhidlərimizin qanı yerdə qalmadı.
Sonra Kitabxananın oxucuları Vətənimizə və şəhidlərimizə həsr olunmuş şeirlər qiraət ediblər. Sonda videoslayta və sərgiyə baxış olub.
