Lənkəran - Astara Regional Təhsil İdarəsi

20/09/2026

Lənkəran-Astara Regional Təhsil İdarəsində 20 Sentyabr – Dövlət Suverenliyi Gününə həsr olunmuş tədbir keçirilib.

Tədbirdə çıxış edən Lənkəran-Astara Regional Təhsil İdarəsinin müdiri Bəhruz Mehdiyev 20 Sentyabr – Dövlət Suverenliyi Gününün Azərbaycan xalqının dövlətçilik tarixində mühüm əhəmiyyət daşıdığını qeyd edib.

Bildirilib ki, dövlət suverenliyi hər bir ölkənin müstəqil inkişafının, milli maraqlarını və ərazi bütövlüyünü qorumasının əsas şərtlərindən biridir. Azərbaycanın müstəqilliyi və dövlətçilik ənənələri uzun və mürəkkəb tarixi proseslərdən keçərək formalaşıb. Xalqımız müxtəlif dövrlərdə üzləşdiyi çətinliklərə baxmayaraq, müstəqil dövlətçilik ideyasını qoruyub saxlayıb və bu istiqamətdə ardıcıl mübarizə aparıb.

Çıxış zamanı Azərbaycanın müasir tarixində mühüm dönüş nöqtəsi olan 2020-ci il Vətən müharibəsindən bəhs olunub. Qeyd edilib ki, 44 gün davam edən Vətən müharibəsi nəticəsində ölkəmizin ərazi bütövlüyünün təmin olunması istiqamətində mühüm tarixi nəticə əldə edilib. 2023-cü ilin sentyabrında keçirilmiş lokal xarakterli antiterror tədbirləri isə Azərbaycanın suverenliyinin bütün ərazilərində tam bərpası ilə nəticələnib.

Dövlət Suverenliyi Gününün təsis edilməsi Azərbaycan dövlətinin ərazi bütövlüyünün və suverenliyinin tam bərpasının tarixi əhəmiyyətini özündə əks etdirir. Bu əlamətdar gün, eyni zamanda, gələcək nəsillərə dövlətçilik dəyərlərinin, milli birlik və həmrəyliyin aşılanması baxımından mühüm məna daşıyır.

Tədbirdə Azərbaycanın suverenliyinin və ərazi bütövlüyünün təmin olunmasında göstərilən qəhrəmanlıq və fədakarlığın gənc nəslin vətənpərvərlik ruhunda tərbiyəsində mühüm örnək olduğu diqqətə çatdırılıb. Təhsil müəssisələrinin bu dəyərlərin gələcək nəsillərə ötürülməsində xüsusi rola malik olduğu qeyd olunub.

Tədbirin sonunda 20 Sentyabr – Dövlət Suverenliyi Gününə həsr olunmuş videoçarx izlənilib.

19/09/2026

Məktəbəqədər və Ümumi Təhsil üzrə Dövlət Agentliyinin direktoru Eşqi Bağırov İctimai Televiziyada yayımlanan “Pressinq” verilişində təhsilin keyfiyyəti, müəllim peşəkarlığı və şagirdlərin keyfiyyətli təhsilə bərabər çıxış imkanları ilə bağlı vacib məqamlara toxunub.

“Hər bir şagirdin yüksək peşəkarlığa malik müəllimdən təhsil almaq imkanı bərabər olmalıdır.”

Bu fikirləri Məktəbəqədər və Ümumi Təhsil üzrə Dövlət Agentliyinin direktoru Eşqi Bağırov İctimai Televiziyada yayımlanan “Pressinq” verilişində jurnalistlərin suallarını cavablandırarkən səsləndirib.

Verilişdə təhsilin keyfiyyəti, müəllim peşəkarlığı və şagirdlərin keyfiyyətli təhsilə bərabər çıxış imkanları ilə bağlı məsələlər müzakirə olunub.

🔗 Link: https://youtu.be/lHQOdq3zpXU?si=LpxMPvtD1MAXNJy2

18/09/2026

📺 Bu axşam saat 22:50-də!

17/09/2026

Uşaqların məktəbəqədər təhsilə çıxış imkanlarının genişləndirilməsi məqsədilə Ailə tipli icma əsaslı məktəbəqədər təlim qruplarının təşkilinə başlanılır.

Uşaqların məktəbəqədər təhsilə çıxış imkanlarının genişləndirilməsi məqsədilə Ailə tipli icma əsaslı məktəbəqədər təlim qruplarının təşkilinə başlanılır.

Əgər yaşadığınız ərazidə dövlət və ya özəl bağça, yaxud icma əsaslı məktəbəqədər təlim qrupu fəaliyyət göstərmirsə, uşaqların məktəbəqədər təhsilə çıxışı məhduddursa və öz evinizdə və ya digər uyğun məkanda təhlükəsiz təlim mühiti yaratmaq imkanınız varsa, bu təşəbbüsə qoşula bilərsiniz.

Kimlər müraciət edə bilər?

* Tərbiyəçi-müəllim kimi fəaliyyət göstərmək istəyən valideynlər, xüsusilə xanımlar;
* Məktəbəqədər təhsil, məktəbəhazırlıq və ya tədris təcrübəsi olan şəxslər;
* Erkən yaşlı uşaqların inkişafına dəstək vermək istəyən təşəbbüskar şəxslər;
* Öz evində və ya digər uyğun məkanda təlim qrupu təşkil etmək imkanı olan şəxslər.

İlkin tələblər:

* Minimum tam orta təhsil;
* Uşaqlarla işləməyə maraq və məsuliyyətli yanaşma;
* Təlim proqramında iştirak etməyə hazırlıq;
* Təhlükəsizlik və gigiyena tələblərinə cavab verən məkan.

Təlim qrupları necə fəaliyyət göstərəcək?

* Hər qrupda 4-8 uşaq iştirak edəcək;
* Fəaliyyət həftədə 4 gün, gündə 2 - 2,5 saat təşkil olunacaq;
* Təlimlər oyun əsaslı və məktəbə hazırlıq istiqamətində keçiriləcək;
* Fəaliyyət mentor və metodistlər tərəfindən dəstəklənəcək və monitorinq ediləcək.

Müraciət zamanı təqdim olunan məlumatlar qiymətləndirildikdən sonra növbəti mərhələyə uyğun namizədlərlə əlaqə saxlanılacaq.

📌 Müraciət üçün: https://forms.cloud.microsoft/r/r39WsgUFVa
📅 Son müraciət tarixi: 23.09.2026

17/09/2026

Mövcud məkanınız və imkanlarınız varsa, İcma Layihəsinə tərəfdaş ola və məktəbəqədər təhsilin daha çox uşaq üçün əlçatan olmasına töhfə verə bilərsiniz.

İcma Tərəfdaşlıq Modeli ilə məktəbəqədər təhsilə dəstək olun! 🏫

Məktəbəqədər təhsil imkanlarının genişləndirilməsi məqsədilə İcma Layihəsi uşaq inkişaf mərkəzlərini, məktəbəqədər və məktəbə hazırlıq təhsil xidmətləri təklif edən və uyğun məkanı olan şəxsləri əməkdaşlığa dəvət edir.

Tərəfdaş nə təqdim edir?
🏠 Təlim otağı
🪑 Mebel, inventar və zəruri ləvazimatlar
👩‍🏫 Müəllim namizədi

İcma Layihəsi nə təmin edir?
📚 Müəllimə metodiki dəstək və maliyyələşməsi
👩‍🏫 Tədris proqramı
💻 Elektron portal üzərindən qeydiyyat və fəaliyyətin idarə olunması
🔎 Monitorinq və keyfiyyətə nəzarət

Model necə fəaliyyət göstərir?
Bir təlim otağında gün ərzində 3 qrupa qədər fəaliyyət təşkil oluna bilər. Hər qrupda 10-15 uşaq iştirak edir və qruplar təsdiq edilmiş qrafik üzrə fəaliyyət göstərir. Təlim 8 ay (oktyabr-may) ərzində həyata keçirilir.

Mövcud məkanınız və imkanlarınız varsa, İcma Layihəsinə tərəfdaş olun və məktəbəqədər təhsilin daha çox uşaq üçün əlçatan olmasına töhfə verin. 🤝

Müraciət linki: https://forms.cloud.microsoft/r/NRDFeY3BaS

Son tarix: 21.09.2026 saat: 23:59

17/09/2026

📢 Elm və təhsil naziri Emin Əmrullayevin 18 sentyabr tarixində Yardımlı şəhərində keçirilməsi nəzərdə tutulan vətəndaş qəbulunun vaxtı dəyişdirilib.

📌 Qəbulun tarixi barədə əlavə məlumat veriləcək.

ℹ️ Qeyd edək ki, qəbulda yalnız müvafiq qaydada müraciət etmiş şəxslər iştirak edəcəklər.

15/09/2026

✨ Bilik Günündə Lənkəran və Cəlilabad rayonlarında əsaslı təmir və yeni inşa edilmiş məktəb binalarının açılış mərasimləri baş tutub, Astarada isə liseydə ilk dərs günü qeyd olunub.

Lənkəran rayonunun Viyən kənd, Cəlilabad rayonunun Musalı və Kövüzbulaq kəndlərində yeni inşa edilmiş məktəb binalarının, əsaslı təmirdən sonra Lənkəran şəhəri Rövşən Bədəlov adına 9 nömrəli tam orta ümumtəhsil məktəbinin açılış mərasimləri keçirilib, Astara şəhəri Ceyhun Babayev adına 3 nömrəli liseydə isə ilk dərs günü təntənə ilə qeyd edilib.

Tədbirlərdə Lənkəran Şəhər İcra Hakimiyyətinin başçısı Taleh Qaraşov, Cəlilabad Rayon İcra Hakimiyyətinin başçısı Rafiq Cəlilov, Astara Rayon İcra Hakimiyyəti başçısının müavini Firəngiz Sadıxova, Elm və təhsil nazirinin müşaviri Rüstəm Ağayev, Elm və Təhsil Nazirliyinin Daxili nəzarət şöbəsinin müdir müavini Xəqani Qurbanov, Azərbaycan Respublikasının Təhsil İnstitutunun direktor müavini İlham Cavadov və Lənkəran-Astara Regional Təhsil İdarəsinin müdiri Bəhruz Mehdiyev və müdir müavini Rəhim Rəhimov, şəhid ailələrinin üzvləri, müvafiq rayonların (şəhərlərin) təhsil sektorlarının müdirləri, məktəblərin pedaqoji kollektivi, şagirdlər və valideynlər iştirak ediblər.

Açılış mərasimləri Dövlət Himninin səsləndirilməsi ilə başlayıb, ölkəmizin ərazi bütövlüyü və suverenliyi uğrunda canını fəda etmiş qəhrəman şəhidlərimizin və ulu öndər Heydər Əliyevin əziz xatirəsi bir dəqiqəlik sükutla yad edilib.

Tədbirlərdə çıxış edənlər məktəblərin pedaqoji kollektivini və şagirdləri yeni dərs ilinin başlanması münasibətilə təbrik edib, onlara müvəffəqiyyətlər arzulayıblar. Bildirilib ki, müasir tələblərə uyğun inşa edilən bu məktəb binalarında tədrisin yüksək səviyyədə təşkili üçün zəruri şərait yaradılıb.

Sonra RİH başçıları, ETN-nin rəsmi şəxsləri və qonaqlar məktəbdə yaradılan şəraitlə tanış olub, sinif otaqlarına, fənn kabinetlərinə, idman və akt zallarına baxış keçiriblər.

Tədbirin sonunda müəllimlər və valideynlər təhsilin inkişafına göstərilən diqqət və qayğıya görə ölkə başçısı cənab İlham Əliyevə və Birinci vitse-prezident Mehriban Əliyevaya dərin minnətdarlıqlarını ifadə ediblər.

Qeyd edək ki, yeni tədris ilinin ilk dərsi “Şəhərsalma və Memarlıq İli” mövzusuna həsr olunub.

15/09/2026

15 sentyabr təhsilimizdə yeni başlanğıcların günüdür.

Bu gün:
📌 İlk dərsimiz “Şəhərsalma və Memarlıq İli”nə həsr olunur.
📌 124 min şagird I sinifdə təhsilə başlayır.
📌 1,6 milyon şagird ümumi təhsilini davam etdirir.
📌 121 642 müəllim şagirdlərin təlim-tərbiyəsi ilə məşğul olur.
📌 “Azərbaycan Respublikasının işğaldan azad edilmiş ərazilərində Böyük Qayıdışa dair I Dövlət Proqramı” çərçivəsində 4 ümumi təhsil müəssisəsi fəaliyyətə başlayır.
📌 550-dən çox təhsil müəssisəsində “Rəqəmsal məktəb” platforması tətbiq olunur.
📌 850-dən çox təhsil müəssisəsi yenilənib, 15 təhsil müəssisəsi isə yeni istifadəyə verilib.

Bütün şagird və müəllimlərimizi 15 sentyabr – Bilik Günü münasibətilə təbrik edir, yeni tədris ilində hər birinə uğurlar arzulayırıq!

14/09/2026

Yeni tədris ili üzrə dərs prosesinə start verilir.

ℹ️ ~2,2 milyon təhsilalan yeni tədris ilinə başlayır.

📊 Təhsilalanların pillələr üzrə proqnoz sayı:

🔹 Ümumi təhsil – 1,6 milyon
🔹 Ali təhsil – 260 min
🔹 Məktəbəqədər təhsil – 226 min
🔹 Orta ixtisas təhsili – 64 min
🔹 Peşə təhsili – 44 min

✅ ~124 mindən çox uşaq 2026/2027-cı tədris ilində məktəb həyatına ilk addımını atacaq.

Yeni tədris ilinin bütün təhsilalanlar, müəllim və valideynlər üçün uğurlu olmasını arzulayırıq!

14/09/2026