https://www.facebook.com/101896062717152/

Ucar RİHB-nın Qazıqumlaq kənd inzibati ərazi dairəsi üzrə nümayəndəliyi, Ucar rayon Qazıqumlaq kəndi, Kazykumlak (2026)

26/05/2026

Bu gün dünyada gedən meyillər kənd təsərrüfatının istehsalına da mənfi təsir göstərir.

Azərbaycanın iqtisadi inkişaf strategiyasında qeyri-neft sektorunun aparıcı istiqamətlərindən biri olan kənd təsərrüfatı son illərdə keyfiyyətcə yeni inkişaf mərhələsinə qədəm qoyub. Dövlət dəstəyi, müasir infrastruktur layihələri və aqrar sahədə həyata keçirilən islahatlar nəticəsində bu sektor həm daxili bazarın təminatında, həm də ixrac imkanlarının genişlənməsində mühüm rol oynamağa başlayıb. Bu baxımdan Möhtərəm Prezidentimiz cənab İlham Əliyevin kənd təsərrüfatı məsələlərinə həsr olunmuş müşavirədə səsləndirdiyi fikirlər aqrar sahənin gələcək inkişaf prioritetlərini və qarşıda duran vəzifələri aydın şəkildə müəyyənləşdirir.
Kənd təsərrüfatının inkişafı Azərbaycanda uzun illərdir həyata keçirilən dövlət siyasətinin mühüm istiqamətlərindən biridir. Dövlət Başçısı öz çıxışında bu məsələyə toxunaraq hələ 2004-cü ildə ilk dəfə prezident vəzifəsinə seçildikdən sonra irəli sürdüyü əsas təşəbbüslərdən birinin regional inkişaf proqramı və onun da tərkib hissəsi kimi kənd təsərrüfatının inkişafı, kənd yerlərində məşğulluğun artırılması və regionların iqtisadi potensialının gücləndirilməsi olduğunu qeyd etdi.
Cənab Prezident həmçinin bildirdi ki, 2004-cü ilin əvvəlində qəbul edilmiş birinci beşillik proqram bir çox məsələlərin həll edilməsinə kömək göstərdi. Məhz buna görə də sonrakı illərdə ardıcıl olaraq yeni regional inkişaf proqramları qəbul edildi və həyata keçirildi. Bu proqramlar çərçivəsində elektrik, qaz və su təchizatının yaxşılaşdırılması, meliorasiya sistemlərinin yenilənməsi, fermerlərə dövlət dəstəyinin artırılması və kənd təsərrüfatı infrastrukturunun müasirləşdirilməsi istiqamətində genişmiqyaslı işlər görüldü. Nəticədə regionlarda iqtisadi fəallıq artdı, minlərlə yeni iş yeri yaradıldı, kənd təsərrüfatı məhsullarının istehsalı və ixrac potensialı əhəmiyyətli dərəcədə genişləndi.
Möhtərəm Prezidentin bu fikirləri bir daha göstərir ki, Azərbaycanın aqrar sahədə əldə etdiyi nailiyyətlər təsadüfi deyil, uzunmüddətli və ardıcıl dövlət siyasətinin nəticəsidir. Regional inkişaf proqramları vasitəsilə yaradılmış infrastruktur və iqtisadi baza bu gün kənd təsərrüfatının dayanıqlı inkişafına, ərzaq təhlükəsizliyinin möhkəmləndirilməsinə və regionların sosial rifahının yüksəldilməsinə xidmət edir. Bu siyasət gələcək illərdə də kənd təsərrüfatının modernləşdirilməsi və rəqabət qabiliyyətinin artırılması üçün möhkəm zəmin yaradır.
Ölkə Başçısı müşavirədə kənd təsərrüfatının inkişafında dövlət dəstəyi mexanizmlərinin, xüsusilə subsidiyaların mühüm rol oynadığını xüsusi vurğulayaraq Azərbaycan fermerlərə göstərilən dəstəyin həcmi və müxtəlifliyi baxımından dünyada seçilən ölkələrdən biri olduğunu,bu gün aqrar sektorda tətbiq olunan subsidiya siyasəti kənd təsərrüfatı istehsalçılarının fəaliyyətinin stimullaşdırılmasına, onların xərclərinin azaldılmasına və məhsuldarlığın artırılmasına xidmət etdiyini qeyt etdi.Cənab Prezident tərəfindən o da vurğulandı ki,hazırda fermerlərə yanacaq və motor yağlarına görə güzəştlər verilir, mineral gübrələrin alınması dövlət tərəfindən subsidiyalaşdırılır, kənd təsərrüfatı texnikasının əldə olunmasına dəstək göstərilir. Bu güzəştlər fermerlərin istehsal xərclərini azaltmaqla yanaşı, onların daha çox məhsul istehsal etməsinə və fəaliyyətlərini genişləndirməsinə imkan yaradır.
Bu cür geniş dəstək mexanizmləri bir çox ölkələrdə mövcud deyil və Azərbaycan bu baxımdan qabaqcıl təcrübəyə malik dövlətlər sırasındadır. Bununla yanaşı, fermerlər yalnız maliyyə dəstəyi ilə deyil, həm də metodiki və texniki tövsiyələrlə təmin olunurlar. Müasir aqrotexniki qaydaların tətbiqi, məhsuldar toxum və tinglərdən istifadə, suvarma texnologiyalarının düzgün qurulması kimi məsələlər üzrə verilən məsləhətlər kənd təsərrüfatında səmərəliliyin artırılmasına mühüm töhfə verir. Aqrar xidmətlərin genişləndirilməsi fermerlərin yeni bilik və bacarıqlara yiyələnməsinə şərait yaradır.
Kənd təsərrüfatının inkişafının əsas şərtlərindən biri etibarlı su təminatıdır. Möhtərəm Prezidentimizin rəhbərliyi ilə son illərdə həyata keçirilən iri su təsərrüfatı layihələri bu sahədə yeni imkanlar yaradıb. Taxtakörpü, Şəmkirçay və digər su anbarlarının tikintisi, suvarma infrastrukturunun genişləndirilməsi nəticəsində minlərlə hektar torpaq əkin dövriyyəsinə cəlb olunub və fermerlərin imkanları əhəmiyyətli dərəcədə artıb. Xüsusilə işğaldan azad edilmiş Qarabağ və Şərqi Zəngəzurda su anbarlarının və kanalların bərpası gələcəyə hesablanmış dövlət siyasətinin mühüm tərkib hissəsidir. Bu layihələr yalnız həmin bölgələrin deyil, ətraf rayonların da su təminatını yaxşılaşdıracaq, kənd təsərrüfatının inkişafına yeni imkanlar yaradacaq. Dövlətimizin başçısının su təhlükəsizliyini milli təhlükəsizliyin mühüm elementi kimi qiymətləndirməsi və bu istiqamətdə ardıcıl addımlar atması Azərbaycanın ərzaq təhlükəsizliyinin möhkəmləndirilməsinə, aqrar sektorun dayanıqlı inkişafına və regionların sosial-iqtisadi yüksəlişinə xidmət edir. Cənab Prezidentin müşavirədə verdiyi tapşırıqlar və müəyyənləşdirdiyi prioritetlər kənd təsərrüfatının inkişafına göstərilən diqqət və qayğının növbəti təzahürüdür.
Mayın 25-də Azərbaycan Respublikasının Prezidenti İlham Əliyevin sədrliyi ilə kənd təsərrüfatı məsələlərinə həsr olunmuş müşavirə keçirilib. Bu müşavirə ölkənin ərzaq təhlükəsizliyinin təmin olunması, aqrar sahənin intensiv inkişafı və yeni dövlət proqramlarının icrası baxımından strateji əhəmiyyət kəsb edir.
Müşavirə çərçivəsində dövlət başçısı tərəfindən verilən mesajlar və qəbul edilən qərarlar, kənd təsərrüfatını iqtisadiyyatın aparıcı və müasir qüvvəsinə çevirmək əzmini nümayiş etdirir.
Müşavirənin Əsas Mesajları və Hədəflər
Prezident İlham Əliyev çıxışında kənd təsərrüfatının inkişafının dövlət siyasətinin prioritetlərindən olduğunu vurğulayaraq, bir sıra vacib məqamlara toxunub.
Dövlət başçısı aqrar sahədə məhsuldarlığın artırılmasının əsas hədəf olduğunu bildirib. Məsələn, taxılçılıqda hər hektardan götürülən məhsuldarlığın 5 tona çatdırılması qarşıya konkret hədəf kimi qoyulub.
Ölkə başçısı hər bir əkin üçün yararlı torpaq sahəsinin öz pasportunun olmasının vacibliyini qeyd edib. Bu, torpaqların daha səmərəli istifadəsinə və fermerlərin daha çox gəlir əldə etməsinə xidmət edən strateji bir addım kimi dəyərləndirib.
Müşavirədə eyni zamanfa ət,süd və quş əti ilə bağlı 100 faizlik özünü təminetmə səviyyəsinə nail olmaq, ölkənin ərzaq müstəqilliyini möhkəmləndirəcək əsas vəzifələrdən biri kimi müəyyən edilib.
Prezident iqlim dəyişikliyinin kənd təsərrüfatına təsirini qeyd edərək, su anbarlarında toplanan suyun bu il kənd təsərrüfatı üçün yaradacağı imkanları vurğulayıb. Müasir suvarma sistemlərinin genişləndirilməsi (300 min hektara çatdırılması) məhsuldarlığın artırılmasında həlledici olacağını da deyən İlham Əliyev əlavə respublikada qazlaşdırma prosesinə də toxunub.Dövlət başçısı ötən illər ərzində bölgələrdə qazlaşdırmanın 96%-ə çatdırılması, elektrik enerjisi, yol-nəqliyyat və su təchizatı infrastrukturunun qurulması aqrar sahənin inkişafına birbaşa zəmin yaratdığını da qeyd edib. Qeyd edək ki,
“2026–2030-cu illər üçün Dövlət Proqramı”nın əhəmiyyəti müşavirənin ən mühüm nəticələrindən biri “Azərbaycan Respublikasında kənd təsərrüfatı, balıqçılıq və akvakultura məhsullarının istehsalı və emalı sahələrinin inkişafına dair 2026–2030-cu illər üçün Dövlət Proqramı”nın təsdiqlənməsidir. Bu proqram aşağıdakı istiqamətlərdə genişmiqyaslı dəyişiklikləri hədəfləyir ki, kreditlər üzrə faiz subsidiyalarının verilməsi və investisiya layihələrinin subsidiyalaşdırılması özəl sektorun aqrar sahəyə marağını daha da artıracaq.Bununla yanaşı sahə üzrə hüquqi bazanın təkmilləşdirilməsi istehsal və emal proseslərini daha şəffaf və səmərəli etməklə yanaşı müəyyən ərazilərin buğda, pambıq və heyvandarlıq üçün xüsusi təsərrüfat zonaları kimi müəyyənləşdirilməsi istehsalın ixtisaslaşmasını və rəqabətədavamlılığını təmin edəcək.Son olaraq qeyd etməliyəm ki, Prezident İlham Əliyevin sədrliyi ilə keçirilən bu müşavirə, Azərbaycanın aqrar siyasətində yeni bir keyfiyyət mərhələsinin başlanğıcıdır. İnfrastrukturun tam formalaşmasından sonra artıq diqqətin yüksək məhsuldarlıq, emal sənayesi və ixrac potensialının reallaşdırılmasına yönəldilməsi, ölkənin həm ərzaq təhlükəsizliyini təmin edəcək, həm də qeyri-neft sektorunun inkişafına ciddi töhfə verəcəkdir.
Bu qərarlar, həm fermerlər, həm də aqrar sahibkarlıqla məşğul olan şirkətlər üçün növbəti beş ildə fəaliyyətlərini daha müasir, texnoloji və gəlirli istiqamətdə qurmaq üçün geniş imkanlar açır.

22/05/2026

Şərqdə və müsəlman dünyasında ilk demokratik dövlət

Qısa dövr ərzində Azərbaycanın ilk parlamenti, hökuməti yaradılmış, dövlət atributları təsis olunmuş, sərhədləri müəyyən edilmiş, dövlət quruculuğu sahəsində mühüm tədbirlər həyata keçirilmişdir. Müstəqil, azad, demokratik respublika qurmaq məqsədini qarşıya qoyan Azərbaycan Xalq Cümhuriyyəti xalqın milli mənlik şüurunu özünə qaytardı, onun öz müqəddəratını təyin etməyə qadir olduğunu nümayiş etdirmişdir. Bu baxımdan 28 may – Müstəqillik Günü müstəqillik tariximizdə müstəsna rola malikdir. 1991-ci il oktyabrın 18-də “Azərbaycan Respublikasının dövlət müstəqilliyi haqqında” Konstitusiya Aktı qəbul olunmuşdur. Konstitusiya Aktında 1918-ci il 28 may tarixli İstiqlal Bəyannaməsinə və “Azərbaycan Respublikasının dövlət müstəqilliyini bərpa etmək haqqında” Azərbaycan Respublikası Ali Sovetinin 1991-ci il 30 avqust tarixli Bəyannaməsinə istinad olunmuş, Azərbaycan Respublikasının Azərbaycan Xalq Cümhuriyyətinin varisi olduğu təsbit edilmişdir. Beləliklə, “Azərbaycan Respublikasının dövlət müstəqilliyi haqqında” Konstitusiya Aktına əsasən Azərbaycan xalqı 1991-ci il oktyabrın 18-də öz müstəqilliyini bərpa etmişdir.Müstəqilliyi bərpa etdikdən qısa müddət sonra xalqımız yenidən onu itirmək təhlükəsi ilə üzləşdi. Bir tərəfdən Ermənistan silahlı qüvvələrinin artan təcavüzü nəticəsində geniş miqyas almış Birinci Qarabağ müharibəsi, digər tərəfdən dövlət rəhbərliyindəki səriştəsiz adamların yeritdikləri səhv siyasət və daxildə gedən siyasi çəkişmələr, vətəndaş qarşıdurması müstəqilliyin beşiyindəcə boğulması təhlükəsini yaradırdı. Əslində müstəqilliyin elan olunmasından daha vacib olan müstəqilliyin qorunması idi. Məhz müdrik Azərbaycan xalqının tələbi ilə Azərbaycan xalqının böyük oğlu, Ümummilli Lider Heydər Əliyevin hakimiyyətə qayıdışından sonra müstəqilliyi qorumaq və inkişaf etdirmək mümkün oldu. Azərbaycan ardıcıl islahatlar həyata keçirməyə başladı, qısa zaman ərzində Ermənistan-Azərbaycan münaqişəsində atəşkəs əldə edildi və bunun ardınca iqtisadiyyatda sərbəst ticarət prinsipləri əsas götürülməyə başlandı.Ötən illər ərzində atılmış hər bir addım və qəbul olunmuş hər bir qərar doğma Azərbaycan torpaqlarının işğaldan azad olunmasına xidmət edirdi.
Azərbaycan Respublikasının Prezidenti cənab İlham Əliyevin Müzəffər Ali Baş Komandan kimi gərgin əməyinin nəticəsində Azərbaycanda güclü ordu yaradıldı. Ordu quruculuğu hər zaman Prezident İlham Əliyevin dövlət siyasətinin prioritet istiqaməti olub. Bütün illər ərzində dövlətin büdcə xərclərinin əsasını məhz hərbi xərclər təşkil edib. Ordunun döyüş qabiliyyəti möhkəmləndi, yüksəldi, ordumuz müasir silah-sursat, texnika ilə təchiz edildi.44 günlük Vətən müharibəsi göstərdi ki, Azərbaycanda silahlanma siyasəti düzgün aparılmışdır. 2020-ci il sentyabrın 27-də Azərbaycan Ordusunun işğalçı Ermənistan silahlı qüvvələrinə qarşı başladığı əks-hücum əməliyyatında əldə etdiyi möhtəşəm qələbələrin ən başlıca səbəbi Prezident, Ali Baş Komandan İlham Əliyevin son illər həyata keçirdiyi güclü dövlət, güclü ordu strategiyası, milli birlik, döyüşçülərimizin qəhrəmanlığı, vətənpərvərliyi, ruh yüksəkliyi idi.44 günlük müharibədə məğlub olan Ermənistanın Azərbaycanın şərtlərini qeyd-şərtsiz qəbul etməsi, Azərbaycan, Rusiya prezidentlərinin və Ermənistanın baş nazirinin birgə imzaladıqları bəyanat da məhz düşmən ölkənin kapitulyasiyasının ifadəsi və Azərbaycan dövlətinin birmənalı qələbəsinin göstəricisi oldu.

21/05/2026

Böyük Qayıdış Proqramı həyata keçirilir, şəhər və kəndlərin Baş planları hazırlanır

Azərbaycanın gələcək inkişaf strategiyasının mühüm göstəricisi kimi 2026-cı il mayın 18-də Bakıda keçirilən Ümumdünya Şəhərsalma Forumunun 13-cü Sessiyası Azərbaycanın beynəlxalq nüfuzunu, şəhərsalma sahəsində qazandığı uğurları və dövlətimizin gələcəyə hesablanmış inkişaf modelini bir daha dünya ictimaiyyətinə nümayiş etdirdi. Azərbaycan Respublikasının Prezidenti İlham Əliyev forumun açılış mərasimində çıxış edərək həm ölkəmizin keçdiyi inkişaf yolundan, həm də müasir şəhərsalma siyasətinin əsas istiqamətlərindən geniş bəhs etdi. Dövlət başçısının çıxışı təkcə şəhərsalma ilə bağlı deyil, ümumilikdə Azərbaycanın siyasi, iqtisadi, sosial və humanitar inkişaf konsepsiyasının təqdimatı kimi yadda qaldı.
Prezident İlham Əliyev çıxışında vurğuladı ki, Bakıda keçirilən bu forum dünya miqyasında ən mühüm beynəlxalq tədbirlərdən biridir və forumda 182 ölkədən 45 mindən çox iştirakçının qeydiyyatdan keçməsi Azərbaycanın beynəlxalq aləmdə artan rolunun bariz nümunəsidir. Dövlət başçısı qeyd etdi ki, bu tədbir iştirakçıları üçün Azərbaycanı daha yaxından tanımaq, ölkəmizdə həyata keçirilən şəhərsalma layihələrini öz gözləri ilə görmək baxımından mühüm imkan yaradacaq. Prezidentin bu fikirləri Azərbaycanın artıq regionun deyil, dünyanın diqqət mərkəzində olan mühüm platformaya çevrildiyini göstərdi.
Prezident İlham Əliyevin çıxışında əsas diqqət çəkən məqamlardan biri Azərbaycanın müasir şəhərsalma siyasətinin insan amilinə əsaslanması oldu. Dövlət başçısı vurğuladı ki, şəhərlər yalnız binalardan ibarət olmamalıdır. Şəhərlər insanların rahat yaşadığı, təhlükəsizliyi, rifahı və sosial təminatı yüksək səviyyədə qorunan məkanlar olmalıdır. Bu fikir Azərbaycanın həyata keçirdiyi “ağıllı şəhər” və “ağıllı kənd” layihələrinin fəlsəfəsini də əks etdirirdi. Qarabağ və Şərqi Zəngəzurda aparılan genişmiqyaslı yenidənqurma işləri bu siyasətin ən böyük nümunəsi kimi təqdim olundu.
Prezident İlham Əliyev çıxışında işğaldan azad edilmiş ərazilərdə aparılan quruculuq prosesindən də ətraflı bəhs etdi. Dövlət başçısı bildirdi ki, Azərbaycan Ermənistanın dağıtdığı şəhərləri və kəndləri yenidən qurur, həmin ərazilərdə müasir urbanizasiya prinsipləri tətbiq olunur. Bu ərazilərdə ekoloji tarazlıq qorunur, yaşıl enerji layihələri həyata keçirilir, müasir yol infrastrukturu yaradılır, yaşayış məntəqələri yeni texnologiyalar əsasında inşa edilir. Prezidentin çıxışında bu məqam xüsusi vurğulandı ki, Azərbaycan yalnız dağıdılmış torpaqları bərpa etmir, eyni zamanda gələcəyin şəhərlərini qurur. Bu fikir ölkəmizin inkişaf strategiyasının nə qədər uzaqgörən olduğunu nümayiş etdirdi.
Dövlət başçısının çıxışında COP29 tədbirinə də toxunulması təsadüfi deyildi. Prezident İlham Əliyev bildirdi ki, Azərbaycan qlobal problemlərin həllində fəal iştirak edir və iqlim dəyişiklikləri ilə mübarizə sahəsində məsuliyyətli dövlət kimi çıxış edir. Şəhərsalma ilə ekologiyanın vəhdəti, yaşıl enerji, dayanıqlı inkişaf prinsipləri Prezidentin nitqində xüsusi yer aldı. Bu isə göstərdi ki, Azərbaycan müasir dünyada yalnız iqtisadi inkişafı deyil, həm də ekoloji təhlükəsizliyi prioritet hesab edir.
Prezident İlham Əliyevin forumdakı çıxışı həm də Azərbaycanın siyasi sabitliyinin və güclü dövlət idarəçiliyinin nəticəsi kimi qiymətləndirildi. Çünki qlobal əhəmiyyətli belə tədbirlərin Bakıda keçirilməsi dünya dövlətlərinin Azərbaycana olan etimadının göstəricisidir. Son illər ölkəmizdə keçirilən beynəlxalq tədbirlər, o cümlədən COP29, Qoşulmama Hərəkatı çərçivəsində təşkil olunan sammitlər və digər mühüm platformalar Azərbaycanın artıq beynəlxalq diplomatiyanın mühüm mərkəzlərindən birinə çevrildiyini sübut edir.
Forum zamanı Prezident İlham Əliyevin nitqində Azərbaycanın multikultural dəyərləri və tolerantlıq mühiti də dolayısı ilə öz əksini tapdı. Dünyanın müxtəlif ölkələrindən gələn minlərlə iştirakçının Bakıda bir araya gəlməsi Azərbaycanın təhlükəsiz, sabit və açıq cəmiyyətə malik ölkə olduğunu bir daha nümayiş etdirdi. Dövlət başçısının rəhbərliyi ilə həyata keçirilən siyasət nəticəsində Bakı artıq yalnız Qafqazın deyil, Avrasiyanın mühüm beynəlxalq tədbirlər mərkəzinə çevrilib.
Prezident İlham Əliyevin çıxışı həm də gələcəyə yönəlmiş strateji baxış idi. O, çıxışında şəhərlərin inkişafında innovasiyaların, rəqəmsal texnologiyaların və yeni idarəetmə modellərinin əhəmiyyətindən danışdı. Müasir şəhərsalmanın əsas prinsiplərindən biri olan insan rahatlığı, nəqliyyat sisteminin təkmilləşdirilməsi, yaşıl zonaların genişləndirilməsi, ekoloji təhlükəsizlik və sosial rifah məsələləri dövlət başçısının nitqində xüsusi yer tutdu. Bu isə Azərbaycanın gələcək inkişaf modelinin dünya standartlarına uyğun şəkildə formalaşdırıldığını göstərdi.
Mayın 18-də Bakıda keçirilən Ümumdünya Şəhərsalma Forumunun 13-cü Sessiyası və Prezident İlham Əliyevin həmin tədbirdəki çıxışı bir daha sübut etdi ki, Azərbaycan yalnız regionun lider dövləti deyil, həm də qlobal miqyasda mühüm təşəbbüslərlə çıxış edən güclü ölkədir. Dövlət başçısının forumdakı nitqi Azərbaycanın şəhərsalma sahəsində qazandığı nailiyyətlərin, işğaldan azad edilmiş torpaqlarda aparılan quruculuq işlərinin, dayanıqlı inkişaf strategiyasının və gələcəyə hesablanmış siyasətinin beynəlxalq auditoriyaya təqdimatı oldu. Bu çıxış eyni zamanda Azərbaycanın inkişafının yalnız bu günə deyil, gələcək nəsillərə hesablandığını nümayiş etdirdi.

10/05/2026

Ümummilli Lider Heydər Əliyev!

06/05/2026

Azərbaycan ilə İtaliya arasında əməkdaşlıq və strateji tərəfdaşlıq getdikcə möhkəmlənir

2026-cı il mayın 4-də İtaliya Respublikası Nazirlər Şurasının sədri Ciorcia Meloninin Azərbaycan Respublikasına həyata keçirdiyi rəsmi səfər iki ölkə arasında mövcud münasibətlərin dinamik inkişafının mühüm mərhələsi kimi qiymətləndirilə bilər. Səfər çərçivəsində keçirilmiş görüşlər, aparılmış müzakirələr və verilmiş rəsmi bəyanatlar göstərir ki, Bakı və Roma arasında əməkdaşlıq artıq ənənəvi enerji tərəfdaşlığı çərçivəsini aşaraq daha geniş geosiyasi və iqtisadi məzmun kəsb etmişdir. Azərbaycan Respublikasının Prezidenti İlham Əliyev səfərin yekunlarına dair mətbuata verdiyi bəyanatda Azərbaycan–İtaliya əlaqələrinin strateji tərəfdaşlıq səviyyəsinə yüksəldiyini vurğulamış, bu münasibətlərin uzunmüddətli sabitlik və qarşılıqlı etimad prinsiplərinə əsaslandığını qeyd etmişdir. Bu kontekstdə qeyd olunmalıdır ki, 2014-cü və 2020-ci illərdə iki ölkə arasında strateji tərəfdaşlığa dair müvafiq bəyannamələr imzalanmışdır. İtaliya Respublikasının Azərbaycanın əsas ticarət tərəfdaşlarından biri olduğu xüsusi vurğulanmışdır. İkitərəfli iqtisadi əməkdaşlıq, xüsusilə enerji sahəsində, yüksək dinamika ilə inkişaf edir. Belə ki, son statistik məlumatlara əsasən, iki ölkə arasında ticarət dövriyyəsi təxminən 12 milyard ABŞ dolları təşkil etmişdir. Həmin dövrdə Azərbaycanın ixrac etdiyi 25 milyard kubmetr təbii qazın 9,5 milyard kubmetri İtaliya bazarına yönəldilmişdir. Bu fakt, Azərbaycanın Avropanın enerji təhlükəsizliyinin təmin edilməsində artan rolunu bir daha təsdiqləyir. Azərbaycan qazının Avropa bazarına nəqlini təmin edən Cənub Qaz Dəhlizi layihəsi ikitərəfli strateji əməkdaşlığın əsas sütunlarından biri kimi çıxış edir. Layihənin tərkib hissəsi olan Trans-Adriatik Boru Kəməri vasitəsilə qazın İtaliyaya çatdırılması tərəflər arasında qarşılıqlı asılılıq və tərəfdaşlıq münasibətlərini daha da gücləndirir. Enerji sahəsində əməkdaşlıq yalnız iqtisadi deyil, eyni zamanda siyasi sabitlik və regional təhlükəsizlik baxımından da mühüm əhəmiyyətə malikdir. İtaliya Respublikasının Baş naziri Ciorcia Meloni səfər çərçivəsində Azərbaycanı etibarlı tərəfdaş kimi səciyyələndirmiş və ölkəsinin Cənubi Qafqaz regionunda sabitliyin və davamlı inkişafın tərəfdarı olduğunu bildirmişdir. O, həmçinin qeyd etmişdir ki, İtaliya Azərbaycan ilə əməkdaşlığın yalnız enerji sektoru ilə məhdudlaşmadığını, sənaye, nəqliyyat, yüksək texnologiyalar və humanitar sahələrdə də genişləndirilməsinin prioritet istiqamətlərdən biri olduğunu hesab edir. İqtisadi əlaqələrin şaxələndirilməsi istiqamətində görülən işlər də diqqətəlayiqdir. Azərbaycan Dövlət Neft Fondu tərəfindən son illər ərzində İtaliya iqtisadiyyatına təxminən 3 milyard ABŞ dolları həcmində sərmayə qoyulmuşdur. Bununla yanaşı, hazırda İtaliyanın 130-a yaxın şirkəti Azərbaycanda, o cümlədən Qarabağ və Şərqi Zəngəzur iqtisadi rayonlarında müxtəlif layihələrin icrasında iştirak edir. Eyni zamanda, Azərbaycanın İtaliya bazarına qeyri-neft məhsulları üzrə ixrac imkanlarının genişləndirilməsi iqtisadi əməkdaşlığın dayanıqlığını artıran mühüm amillərdən biri kimi çıxış edir. Mədəni-humanitar sahədə əməkdaşlıq da ikitərəfli münasibətlərin mühüm komponentini təşkil edir. Təhsil, mədəniyyət və turizm sahələrində həyata keçirilən birgə layihələr xalqlar arasında qarşılıqlı anlaşmanın və etimadın möhkəmlənməsinə xidmət edir. Bu baxımdan, Bakıda fəaliyyət göstərən İtaliya-Azərbaycan Universiteti xüsusi əhəmiyyətə malikdir və hazırda burada 500-dən artıq tələbə təhsil alır. Müasir geosiyasi reallıqlar kontekstində Azərbaycan–İtaliya münasibətləri daha geniş regional və beynəlxalq əhəmiyyət kəsb edir. Avropanın enerji təhlükəsizliyinin təmin edilməsi, beynəlxalq nəqliyyat dəhlizlərinin inkişafı və qlobal iqtisadi əməkdaşlığın genişləndirilməsi baxımından tərəflər arasında əməkdaşlıq strateji xarakter daşıyır. Xüsusilə Orta Dəhlizin inkişafı və Avropa ilə Asiya arasında iqtisadi əlaqələrin gücləndirilməsi istiqamətində Azərbaycanın oynadığı rol İtaliya üçün əlavə perspektivlər açır. Nəticə etibarilə, Ciorcia Meloninin Azərbaycana rəsmi səfəri Azərbaycan–İtaliya münasibətlərinin yüksələn xətt üzrə inkişaf etdiyini və yeni məzmunla zənginləşdiyini bir daha təsdiq edir. Bu münasibətlər yalnız ikitərəfli çərçivədə deyil, həm də daha geniş regional və qlobal miqyasda sabitlik, təhlükəsizlik və əməkdaşlığın möhkəmləndirilməsinə töhfə verir. Beləliklə, formalaşmaqda olan yeni mərhələ Azərbaycan–İtaliya tərəfdaşlığının çoxşaxəli və dayanıqlı əməkdaşlıq modelinə transformasiyasını şərtləndirir və yaxın perspektivdə daha əhəmiyyətli nəticələrin əldə olunacağını proqnozlaşdırmağa əsas verir.

05/05/2026

İrəvanda keçirilən “Avropa Siyasi Birliyi”nin 8-ci Zirvə toplantısında videobağlantı vasitəsilə çıxış edib

Prezident İlham Əliyev Bakıdan verdiyi mesajlarla Azərbaycanın regionda sabitlik, təhlükəsizlik və əməkdaşlığa sadiqliyini bir daha nümayiş etdirdi. Onun çıxışı həm də ölkənin sülh gündəliyinin ardıcıl şəkildə həyata keçirilməsi istiqamətində güclü siyasi iradənin göstəricisi kimi qiymətləndirilə bilər. Prezident çıxışında son doqquz ay ərzində bölgədə baş verən proseslərə aydınlıq gətirdi.
Qeyd olundu ki, ötən ilin avqustunda Vaşinqtonda imzalanmış Birgə Bəyannamədən sonra Azərbaycan Ermənistanla münasibətlərdə sülhə yönəlmiş addımlar atıb. Xüsusilə, 1990-cı illərin əvvəllərindən qüvvədə olan tranzit məhdudiyyətlərinin birtərəfli qaydada ləğvi və kommunikasiya xətlərinin yenidən işə salınması regionda etimad mühitinin formalaşmasına xidmət edib. Eyni zamanda, Azərbaycandan Ermənistana neft məhsullarının – benzin və dizelin ixracına başlanılması iqtisadi əlaqələrin inkişafına təkan verib.
Təxminən 12 min ton həcmində həyata keçirilən bu tədarük həm əlverişli qiymət siyasətini təmin edib, həm də qarşılıqlı ticarət münasibətlərinin genişlənməsinə zəmin yaradıb. Sülh prosesinin mühüm istiqamətlərindən biri də nəqliyyat və kommunikasiya əlaqələrinin inkişafıdır. Vaşinqton razılaşmalarına uyğun olaraq irəli sürülən təşəbbüslər regionda iqtisadi inteqrasiyanı gücləndirməyə yönəlib.
Bu çərçivədə nəzərdə tutulan yeni marşrutlar Azərbaycanın əsas ərazisini Naxçıvanla birləşdirməklə yanaşı, Orta Dəhlizin tərkib hissəsi kimi daha geniş beynəlxalq əməkdaşlığa şərait yarada bilər. Bununla yanaşı, Prezident çıxışında bəzi Avropa institutlarının Azərbaycana münasibətdə sərgilədiyi ikili standartları da tənqid etdi. Xüsusilə, Avropa Şurası Parlament Assambleyasının (AŞPA) və Avropa Parlamentinin yanaşmasının qərəzli olduğu vurğulandı. Dövlət başçısı Azərbaycanın ərazi bütövlüyünün digər ölkələrinki ilə eyni dəyərə malik olduğunu bildirərək bu məsələdə fərqli yanaşmaların qəbuledilməz olduğunu qeyd etdi.
Son illərdə Avropa Parlamenti tərəfindən Azərbaycanla bağlı qəbul olunan qətnamələr konstruktiv dialoqa töhfə vermək əvəzinə, əksinə, sülh prosesinə mənfi təsir göstərir. Bu səbəbdən Azərbaycan tərəfi belə yanaşmalar fonunda bəzi parlamentlərarası əməkdaşlıq mexanizmlərini dayandırmaq qərarına gəlib. Bütün bu məqamlara baxmayaraq, Azərbaycan sülh təşəbbüslərinə sadiq qalır və regionda uzunmüddətli sabitliyin təmin olunmasına çalışır. İrəvanda keçirilən sammitin özü də Azərbaycan və Ermənistan arasında münasibətlərin normallaşması istiqamətində əldə olunan irəliləyişlərin göstəricisi kimi qiymətləndirilə bilər. Ümumilikdə, sammit çərçivəsində səsləndirilən fikirlər və irəli sürülən təşəbbüslər Cənubi Qafqazda siyasi dialoqun möhkəmləndirilməsi, iqtisadi əməkdaşlığın genişləndirilməsi və davamlı sülhün təmin olunması baxımından mühüm əhəmiyyət daşıyır. Qlobal miqyasda artan geosiyasi risklər fonunda regionda sabitliyin qorunması bütün tərəflər üçün prioritet məsələ kimi önə çıxır.

01/05/2026

Bizim bayrağımız qaldırılanda bütün Azərbaycan xalqı qürur hissi keçirir, sevinir

Bu qələbə bizim hamımızı sevindirdi. Azərbaycan güləşçiləri bir daha göstərdilər ki, onlar Avropada birincidirlər. Avropa çempionatında komanda hesabında birinci olmaq, əlbəttə ki, böyük nailiyyətdir. Xüsusilə nəzərə alsaq ki, bu gün həm dünyada, həm Avropada güləş üzrə mübarizə daha gərgin keçir, bir çox ölkələrdən olan tanınmış güləşçilər böyük nəticələr göstərirlər və mübarizə də çox gərgin idi. Bəzi yarışları mən də izləmişəm və görmüşəm ki, bizim idmançılarımız öz peşəkarlığını göstərərək rəqibləri ədalətli mübarizədə məğlub etmişlər. Güləşimizin böyük ənənələri var və biz bu ənənələri yaşadırıq. Şadam ki, tanınmış güləşçilərlə bərabər gənc güləşçilərimiz də böyük nəticələr əldə edirlər. Bu onu göstərir ki, məşq prosesi, seleksiya prosesi düzgün qurulubdur. Bu münasibətlə federasiyanı təbrik edirəm, məşqçiləri təbrik edirəm və əlbəttə ki, ilk növbədə, idmançıları. Bu qələbə sevincini idmançılarımız xalqımıza bəxş edir və bu da öz növbəsində gənc nəsli vətənpərvərlik ruhunda tərbiyə etmək üçün çox önəmli amildir. İdman, ümumiyyətlə, cəmiyyətimizin ayrılmaz hissəsidir və xüsusilə son illər ərzində idmanda gedən müsbət proseslər, əlbəttə ki, hamımızı sevindirir.
Federasiyaya gəldikdə onu da qeyd etməliyəm ki, bizim tanınmış idmançılarımız, Olimpiya çempionları federasiya rəhbərliyində təmsil olunurlar. Məşqçilər arasında da tanınmış idmançılar təmsil olunur. Bu gün məşqçi kimi fəaliyyət göstərən idmançıların yarışlarını vaxtilə mən özüm izləmişəm, həm Bakıda, həm Olimpiya Oyunlarında onlara azarkeşlik etmişəm. İndi isə onların yetirmələri bizi sevindirir. Bax belə, nəsillər dəyişdikcə güləş və bütövlükdə idman Azərbaycanda nəinki yaşayır, hətta inkişaf edir və yeni zirvələrə çatır. Nəsillər dəyişir, amma bir şey dəyişmir, o da Azərbaycan idmanının uğurları. Əlbəttə, indi federasiya, xüsusilə bölgələrdə olan gənc idmançıları məşq, təlim toplanışlarına cəlb etmək üçün işini bundan sonra da təkmilləşdirəcək. Çünki bu gün hər bir bölgədə həm Olimpiya İdman kompleksləri var, eyni zamanda, güləş zalları. Ona görə bu seleksiya işi, əlbəttə ki, gələcək uğurlarımızın əsasını təşkil edəcək. Həm Olimpiya Oyunlarında, həm də dünya, Avropa çempionatlarında bizim idmançılarımız ölkəmizi ləyaqətlə təmsil edirlər. Əlbəttə ki, uğurlarla bərabər məğlubiyyətlər də olur. Amma idmanda hər şey mümkündür. Əsas odur ki, idmançılarımızda qələbə əzmi çox güclüdür və bir daha ölkəmizin ümumi inkişafını əks etdirir. Bu gün qalib dövlət və qalib xalq kimi yaşayan dövlətimiz, xalqımız, o cümlədən idman uğurları ilə fəxr edir.
Bizim təcrübəmiz də böyükdür, çox böyük beynəlxalq yarışlar keçirmişik, həm Avropa Oyunlarını, həm İslam Həmrəyliyi Oyunlarını. Bunlar demək olar ki, Yay Olimpiya Oyunlarının səviyyəsinə çox yaxındır. Keçən il MDB Oyunlarını özü də paytaxtda yox, bölgələrdə keçirmişik. Yəni bu onu göstərir ki, çox güclü potensial var və idmana, idmançılara qayğı dövlət siyasətidir. Əminəm ki, idmançılar da bunu görür və hiss edirlər. Avropa çempionatında belə bir mühüm, deyərdim ki, tarixi qələbədən danışarkən xüsusi qeyd etmək istərdim, həm yunan-Roma güləş növündə, həm də sərbəst növdə güləşçilər birinci yeri qazanıblar. Yəni bu, çox əhəmiyyətlidir. Qızlara gəldikdə onların da medalçılar arasında olmalarına çox şadam. Bu, qızlar arasında da gənc nəslin güləşə böyük maraq göstərdiyindən xəbər verir. Əminəm ki, gələcəkdə də qızlar qızıl medal qazanacaqlar, mən buna şübhə etmirəm. Qızlar arasında medalçılar daha çox ola bilərdi, amma kiminsə bəxti gətirmədi. Ola bilər ki, hər hansı səhvlər də oldu, lakin bu mühümdür, çünki həm sərbəst, həm yunan-Roma, həm də qadın güləşi üzrə bütün istiqamətlər Azərbaycanda inkişaf edir. İdmançılarımızın həm cəmiyyətdə, həm də məişətdə özlərini layiqincə aparmaları məni medallardan da çox sevindirir. Məşhur idmançıların, çempionların adi həyatda məhz bu səviyyəni saxlaya bilmədiklərinə dair tarixdə çoxlu nümunələr var və bir müddət sonra onlara idmançı kimi münasibət həmin səhvlər və ya yanlış hərəkətlər ucbatından p*s istiqamətdə dəyişir. Bizdə isə artıq dediyim kimi, ən azı mənim təqribən 30 ildir Milli Olimpiya Komitəsinə rəhbərlik etdiyim dövrdə xatırladığıma görə, belə hallar olmayıb. Bu, çox vacibdir. Medallardan heç də az əhəmiyyətli olmayan odur ki, çempionlar və mükafatçılar, həmçinin cəmiyyətdə və çalışdıqları kollektivlərdə yüksək mənəvi keyfiyyətlər nümayiş etdirsinlər. Bu belə də olmalıdır. Əlbəttə ki, burada çempionlarımızın — Olimpiya çempionlarının, Avropa çempionlarının və dünya çempionlarının nümunəsi var. Dediyim kimi, vaxtilə federasiyaya rəhbərlik edənlərə və məşqçilərə azarkeşlik etmişəm, bu gün isə onlar öz tələbələrinə azarkeşlik edirlər. Bu, bizim regionumuzda ənənələrin davamlılığıdır. Tarixdə ənənələr həmişə mühüm rol oynayıb və bu, Azərbaycan cəmiyyətində və bütövlükdə Qafqaz regionunda davam edir. Bu, bizi daha da yaxınlaşdırır. Məhz bu səbəbdən bir daha məmnunluqla qeyd etmək və arzulamaq istərdim ki, harada olmağınızdan asılı olmayaraq, - xalça üzərində və xalçadan kənarda, - layiqli davranış prinsiplərinə daim sadiq qalmağa davam edəcəksiniz. Bu, ölkəmizi təmsil edən bütün idmançılara aiddir.

Ucar RİHB-nın Qazıqumlaq kənd inzibati ərazi dairəsi üzrə nümayəndəliyi

26/05/2026

22/05/2026

21/05/2026

10/05/2026

06/05/2026

05/05/2026

01/05/2026

Address

Telephone

Website

Alerts

Contact The Organization

Shortcuts

Share

Category